الأربعاء، 30 ديسمبر، 2009

مطلقات راديو والافتتاح المباشر

يا اعز الاحباب ويا عيلتنا الجميله المنوره والمتنوره بعقول راقيه وقلوب مزهره

اسمعونا يوم الجمعه الجايه 1 \1 2010 مباشرة فى اول افتتاح لمطلقات راديو على الهوا مباشرة
الساعه 6 من 6 مساء الى 8 مساء برضه

وهنستناكوا تكلمونا وتقولولنا رأيكوا على تليفون الاستديو 0235869769

وممكن تراسلونا على ايميل الراديو info@motalakatradio.com


وهيكون معانا اول حلقات برنامج ابنك على ما تربيه مع د\ وليد هندى مباشر

وهيكون معانا قنوات الجزيره والاخباريه السعوديه والام بى سى والبغداديه بيصورنوا وبيعملوا لقاءات معانا فى اليوم الجميل ده
يا رب نعجبكوا وهنستنا دعمكوا كالعاده لان انتوا خيركوا مغرقنا

ده بانر الراديو يا ريت تدعمونا وتزينوه بأنه يتحط فى مدوناتكوا الموقره
بشكر كيارا حبيبتى قوى قوى قوى على تعبها وذوقها لانها هيا الليى فى ثوانى ضبطتتلى الدنيا دى كلها.....


السبت، 21 نوفمبر، 2009

يا امه فرحت فينا الأمم

هقول رأيى ببساطه كده وعلى بلاطه ومن غير كلام مكلكع
ورأيى لا هيعجب اليى فى مصروصوتهم بالثأر وصل المدى ولاا هيعجب الجزائريين اليى برضه صوتهم بالثأر والغضب وصل لسابع سما .....
بصوا يا اخوانى االيى عمل الكارثه دى قله واليى اتخانقوا معاهم فى مصر قله فمينفعش نحاكم شعب بحاله بسبب قله
ده شق الشق التانى احنا متهببين على عنينا عرب كلنا زى بعض لا هما دمهم اخضر ولاا احنا دمنا بنفسجى كلنا من ارض وطين واحد يعنى نتنيل على عنينا ونفوق لنفسنا وللفتنه اليى اتجرينا فيها نقولها تتفضل تروح فى حته تانيه وافكركوا بحديث الرسول الكريم...الفتنه نائمه لعن الله من ايقظها..صدق رسولنا الكريم
اما غير كدا احنا امه مستهدفه وعندنا عدو متربع وسطنا وماسكنا من شعرنا وبدل ما نتحد ونتشطر عليه بنتشطر على نفسنا اسمحولى احنا شعوب هايفه قوى لما سيبين العراق والاقصى سايحيين فى دمهم وجايين احنا كمان نسيح دم بعض
وفوق ده كمان كرامة المصريين اليى اتضربوا فى ماتش كوره او بسبب ماتش كوره واجعاكم قوى وكرامة المصريين اليى اتجلدوا فى الكويت واليى بيتعذبوا وبيتهانوا فى السعوديه واليى بيغرقوا فى بحور ايطاليا واليى محدوفيين فى سجن ابو غريب واليى متبعزئيين فى دول اوربا بيموتوا من الغربه والبرد مش واجعاكم ولاا اثرت فيكوا
وحاجه كمان مسأرتوش ليه لكرامة المصريين اليى ماتوا فى العباره اليى اكلهم سمك القرش ولاا لكرامة المصريين اليى اتسمموا بأكياس الدم الفاسده ولاا لكرامة المصريين اليى بيوتهم بقت قبورهم فى الدويقه
والاهم والاهم والاهم واجيبلكوا من الاخر احنا ياما قطعنا فى بعض وفى الاخر لما بتحصل حاجه جامده هتلاقينا نجرى نضحى بروحنا عشان بعض وهذا ما اتمناه على الاقلل.. كفايه دول زى اوربا مفيش بينهم رابط الا اللون يتحدوا واحنا اليى بينا رابط الحضاره والاصل والدين والدم واللغه مش عارفين نتحد حتى على ماتش كوره
اتمنى اننا نفوق لنفسنا لان بسم الله ما شاء الله احنا مش ناقصيين تقطيع من اعدائنا عشان نقطع فى بعض وطبعا عارفيين مين اعدائنا ومش محتاجه ااقلكم
وبعدين بالحرب اليى انا شايفاها دى ما بينا تقدروا تقولولى لو اسرائيل ولاا امريكا مثلا راحت شنت حرب على الجزائر مثلا احنا كدا هنلم بعض هيله بيله ونروح نحارب مع اسرائيل ..وحياة ابنى ساعتها دم كل واحد فيكوا هيغلى وهيجرى يدافع عن الجزائر ويفتح بيته لاهله ولاا افكركم بايام حرب العراق والكويت استقبلنا اخواتنا العرب اليى برضه بيضربونا وبيهنونا ازاى فى بيوتنا
سيبكوا انتوا من كل ده والله المصرى ما فيه احن ولاا اطيب من قلبه ولاا اكرم منه ولاا يستحمل على اخوه العربى قرصة نموسه احنا بس بنقطع فى بعض غل كل واحد قرفان من عيشته ومن ضغوط حياته فلاقاها فرصه يفش غله
وطبعا طبعا الاخوه المصريين اليى بينادوا من زمان بأن مصر تنسلخ من كينونتها العربيه واننا فراعنه مش عرب طبعا فرحانيين ومزئططين باليى بيحصل وناسيين اننا برضه عرب متفرعنيين
وبعدين اليى بيقول قطع علاقات مع دوله عربيه والنبى مش مكسوف على دمه الاحمر اليى ما قطعنا العلاقات مع الدنمارك فى اهانة رسولنا الكريم وقلنا حرية رأيى ونددنا وشجبنا وهو مين رسولنا ولاا قطعناها مع اسرائيل فى البنت اليى رسمت رسومات مسيئه وقلنا بينا معاهده ولاا قطعناها مع امريكا وقلنا ست العالم والراس الكبيره
نيجى نحتد قوى ودمنا يغلى وعايزين نقطعها مع دوله عربيه ولاا دى اليى قدرنا عليها

عارفه ان برأيكم المحتد ده هتزعلوا منى فاليى عنده طوبه فيكوا اهلا وسهلا يحدفها فى وشى
والسلام عليكم يا امة محمد وعيسى وداؤد .. يا امة الاديان

الأربعاء، 30 سبتمبر، 2009

ما بين الليل وسواده خطوط بيضا

ما بين تنهيده وأخرى يزداد هجوم الليل عليها وبأزدياد اشتياقها لحضنا دافئ منه يزداداد الليل سوادا وتتسارع ساعاته لتقارب الفجر تنظر لنفسها بالمرآه فهى لا تتطلع اليها الا كل صباح حيث تنمق شعرها الاسود المائل للبياض من آثار المشيب العالقه على بعض من خصلاته وهى لم تتعدا عامها الخامس والعشرون بعد وتضع ما تيسر لها من حلى ثم تضع زفيرين من عطرها المفضل والمكون تركيبه من زيوت عطريه وورد واشجار فهى دائما تفضل هذه الروائح التى تؤكد لديها انها مازالت حيه ومازالت تدب بأوصالها الحياه..هذا عن نظرتها الاولى فى المرآه اما النظره الثانيه قتكون عند عودتها من عملها وهى تخلع ما عليها من حليها وزينتها وتنظر لنفسها نظرة الحسره اليوميه من خلال المرآه ففى هذا الوقت كانت ستعد له الغداء وتتزين بحب بأفضل ما لديها من ثياب وسيكون شغلها الشاغل كيف تزيح عنه عناء يوم العمل الشاق وترتب له جوا سعيدا ومنظما يقضيه مع صغيرهما لكى يشرب منه حنان الابوه هذا المشروب الذى سيعينه علىمواجهة الحياه ....تطول نظرتها لنفسها فى المرآه وتركز فى عينيها وما بدا عليهما من عناء ثم ما تلبث ان تفيق ماما ..ماما انه ميراثها الباقى لها من الحياه صغيرها فمقابل كل ما اخذ منها يبقى هو العوض الوحيد الذى اعطتها لها الحياه ينظر اليها تلك النظره المداعبه الباسمه فمن خلال هذه النظره هو يدعوها لتشاركه عالمه البرئ المكون من بيوت من المكعبات وعربات تسير بمحرك الزمبلك واسود ونمور و حيوانات مفترسه ولكنها لا تقوى على ابداء اى نوع من الخطوره وعالم فيه البشر صامتون لا يتحدثون ويكتفون بالصمت والاستماع على غير العاده .. تطيل النظر اليه وتمسك بيديه تقبلها بكل حب الدنيا الذى اختزل بداخلها ثم تقبل رأسه وتداعبه فى شعره ذو الخصلات الناعمه الصفراء متشائله كالعاده من اين لك بهذا اللون الغربى وتتعالا ضحكاتهم ومزاحهم المفعم بكل لحظات الحنان والالفه والود وكأن هموم الدنيا اصبحت تحت اقدامهم ..تفكر مليا يا قرة عينى اعطيك كل لحظات عمرى وافنى ساعاته تحت قدميك اهتمام ورعايه وحب فأنت صغيرى وحيد بلا أب.......

حالة المطلقه النفسيه زى حروف الهجاء مختلفه فساعات بتكون حالتها على ده الحال وساعات ساعات بتبقا على حال غير الحال
يعنى المطلقه او الارمله او الست اليى اختفى من حياتها الراجل بتحس ولسه حس الاحساس والاحتياج عندها فيه نبض ..يعنى مش كتلة بودرة تلج زى ما بعض الناس بتقيم وتحس....
وعند اغلبنا ده لو مش كلنا اولادنا فى مكانه خاصه اقدامهم فوق رؤسنا كلنا وعشانهم بنحس بقيمة سنيين عمرنا....

الجمعة، 21 أغسطس، 2009

شهر كريم يا ريت نكون كرماء زيه

دنيا بتلف بينا فى سلسلة ايام
ايام شايله سعاده
وايام تشيل اوهام
وفيها ايام مباركه بنستناها كل عام
نغسل فيها ذنوبنا ونتوب ونغير توبنا
ونقول حلو الكلام.........

كل رمضان وكل مدونى المعموره بالف خير وسلام وكل قراء ومتابعى مدونى المعموره بكل خير وسلام

ربنا يتقبل منا ومنكم فيه صالح الاعمال..
ان شاء الله بعد الشهر الفضيل ده هرجع تانى وهعلن توبتى عن كسلى التدوينى
وان شاء الله الراديو نازل بعد العيد مباشرتا ببث مباشر وعلى سايت كبير كبير قد الدنيا وببرامج تانيه وناس تالته حلوين قوى
انا بتمنالكوا كل خير وبتمنالكو شهر فضيل وكريم علينا جميعا
وببارك من قلبى كده لاخونا المدون الرائع ادم صاحب الاجنحه المتكسره على خطوبته ..الواد اخويا الصغير ده فضل ساكت ساكت لحد ما ربنا كرمه بملاك بجد..
ربنا يحميهم لبعض ويباركله فيما رزقه

رمضان كريم على كل الاحباب وشهر فضيل على احيائنا وامواتنا
اللهم انزل الرحمه على امواتنا وجازيهم عنا خير...
( بابا وحشتنى قوى وببوس التراب اليى انتا نايم عليه ربنا يتغمدك برحمته الواسعه ويجازيك عن تربيتنا كل خير)

الخميس، 6 أغسطس، 2009

مطلقات راديو..شوفوا الحياه بنظره مختلفه

عمر الحياه قصير ولاا حتى طويل
شكل الحياه وردى ولاا ازرق تقيل
هفضل انا عايشه عمرى الحلم الجميل
طول ما انا بفكر وعقلى بيقول اكتر
وفى قلبى خد الجميل
...
ده بيرو يعنى

الراديو نزل اخيرا يا رجاله ااقصد يا ستات طب يا جماعه
اللينك على اليمين اضغط الصوره وادخل بودنك اليمين.....اه والنهارده هكون فى القناه التانيه الارضيه على التلفزيون المصرى فى برنامج زينه
الساعه واحده ظهرا....
وهرجع بئه على بيوتاتكوا اليى وحشانى كل واحد وواحده يسيبلى المفتاح فى الباب ..ولاا ادخل من الشباك ااقصد صفحة التعليقات..
...ومبروك لدودو عاشقة الرومانسيه على الخطوبه السعيده وكنت هروح بس كان فيه ظروف انشغاليه ..مبروك يا دودو يا قمرومبروك لسالى ..حاجات جوايا..لجواز اختها الجميله وعبال دوده وكل حبايبها
ومبروك لريمان ..ملائكيه على تخرجها اخيرا الملاك البلوجرى ده اتخرجومبروك لدعاء افتتتاح مدونتها الجديده مش عايزه
ومبروك مبروك لكل حد حصلتله حاجه حلوه
ومعلش لاى حد حصلتله حاجه مش ظريفه وربنا يعوض الجميع خير ان شاء الله




الأربعاء، 15 يوليو، 2009

كلام حلو لناس احلى ..وتحديث بآخر الاحوال.تانى

تحديث اخر وليه لا.....
النهارده الساعه 9 ونص بالليل هكون فى برنامج على قناة المحور اسمه 48 دقيقه
يا رب رؤيتى لو شفتونى تسعدكوا ...

خبر مهم شويه بسيطه...انا النهارده الساعه 1 ونص ظهرا هبقا على قناة الساعه فى برنامج اسمه ساعه مع حوا
يا رب يكون كل شئ حلو وكويس
اسيبكوا على خير....
من بين الوف الورد
جرح النسيم ورده
مالت بخوف عل الارض
خافت من الوقعه
حضنها كف حنين
كانت ايديه ناعمه
باسها برقه خطفها من ارضها الناعمه
بكت بحسره الورده
قالت دى مش نعمه
ازرعنى تانى فى ارضى ده فى بعدها بعما
ازرعنى تانى وعمرى هستحمل الوقعه
......................
الكلام ده لكل حد بيحب الكلام الحلو احنا هنا مبيطلعش من بئنا الا ..كل كلمه طيبه حلوه
لقاء العربيه اليى كان هيبقى على الهوا امبارح ملحقنهوش العربيه جاتلى الشرقيه متأخر وطبعا صلاح سالم وزحمته الصبح فطبيعى ملحقناش الهوا بس التقرير اليى سجلوه معايا من يومين قبلها اتذاع

بشكر احمد بيجاتو اليى كان على اعصابه من وقت خروجى من الشرقيه لحد ما الفقره راحت بصراحه معد رائع وانسان قمه فى الخلق وخفة الدم ..وانا قلتله لازم لازم يعمل مدونه ويبقا مننا وعلينا كما يقال
.........
ويشكر مصطفى اليى فضل يعتذر عن التأخير وبرغم انه عارف انه ممكن بتأذى فى شغله من التاخير ده
الا انه اصر يعزمنى على الفطار وطبعا انا مبفطرش فأصر يجيبلى قهوه وطبعا انا مبقلش للقهوه لا

بصراحه انا عماله امر بتجارب جميله بتمتعنى وبتثرينى انسانيا بجد
.................
شموسه وحشتينى ووحشتينا كلنا ويا رب تكونى بأفضل حال ومستنينك تنورى مصر
وانتوا ومدوناتكوا وحشتونى جدا استعدو للهجوم الملئ بالحب والشوق لكتابتكم منى
......
اه يا جماعه الراديو راديو المطلقات نازل اول 8 اليى حابب ينورنا ويشاركنى بأى فكره ليها هدف يشرفنى ويقلى
ده راديو لينا كلنا مش للمطلقات بس
انا جايلكم بئه ممكن سكه
وممكن قهوه بلاش شاى...

.....................
بنائا على طلب ماما اموله ودودو عاشقة الرومانسيه وحبايبنا الكتير كتير المحترمين والاخوه الافاضل فهحذف الشات بوكس عشانهم ووالله ما هعمل كده الا عشان بس طلبهم وبالذات عشان الناس اليى اتشتمت فيه
هرجع من الشغل الدنيا ان شاء الله ..اسيبكوا فى رعاية الله وامنه..

الاثنين، 13 يوليو، 2009

انا وقناة العربيه صباحا

ان شاء الله...بكره الساعه 9 صباحا هيكون ليا لقاء فى قناة العربيه

يا رب يعجبكوا
واسفه جدا جدا على تغيبى بس مشغال وظروف شويه

................
بالنسبه للاخت اليى بتعلق فى الشات بوكس باسم كلمه
بتتكلمى عن سخافة وسطحية فكرى واسلوبى هايل جدا ممكن اعيد نظر كويس فى اسلوبى فى الكتابه اكيد هستفاد من نقدك
بس طالما بتتكلمى عن الاسلوب والسخافه ليه بتشتمينى وبتهمشى من شخصى
يعنى ممكن تنقدى فيا من غير ما تهينى نفسك ولاا تلوثى لسانك بأى لفظ مش ظريف
وبعدين بتتهمينى بأنى فاشله فى حياتى الاسريه ..هو مش الفشل ده مرض
طب هو فيه حد بيعاير حد بمرضه
يا ستى على العموم شكرا على نقدك وكلامك نورتينى بالزياره وخطوتك عندى على دماغى من فوق
بس يا ريت تعلقى باسم مدونتك وباسمك الحقيقى لانه عندى
كتير خيرك على توجيهك وشكرا على اهانتك وتجريحك
ربنا يباركلك ويكرمك ويكرمنا جميعا

..................
انا بعتذر لسالى حاجات جوايا.ودود عاشقة الرومانسيه.. وبعتذر لاستاذ عادل عن الوقاحه اليى اتقالت ليهم والاسلوب المتدنى اليى الاخت كلمه اتكلمت معاه بيهم
وارجوكوا يا جماعه اليى يشتم رجاء منى محدش يناقشه طالما الامور وصلت لكدا ارجو اننا نشوفها فى التعليقات ونتجاهلها تماما لان ده افضل رد
وربنا يهدى اللهم امين
بس كلمه بسيطه ليكى يا كلمه انتى مصره انى فاشله وده لمجرد انى مطلقه هفكرك ان اليى افضل منى ومنك طلقوا
بنات الرسول الكريم طلقوا والصحابيات طلقوا
ربنا يهديكى يا حبيبتى وينقيلك قلبك انا حزينه عليكى من الغل الغريب اليى بيشوبه ده
كمان مره ارجو محدش يرد عليها ...انتوا اكبر وارقى من ان انتوا تتشتموا بسببى ووالد عاشقه الرومانسيه الله يرحمه ميصحش انه يتسب ويتهان بسببى
بتأسف ليكوا مليون مره تانى
وانا قافله التعليقات على البوست ده زى بوست حوارى فى اسلام اون لاين لسبب بسيط انى عندى اكتر من تلات بوستات مردتش على تعليقاتهم ولسه مزرتكوش فبتالى قفلت التعليقات على البوست ده
اليى حابب يقولى اى حاجه اليوست اليى فات التعليقات متاحه عليه
دى تانى مره ااقفل التعليقات وبيكون بسبب البوستات اليى مردتش على تعليقاتها

ربنا يبارك فيكوا يا عيلتى الجميله انا فخوره بكل مدونيين مصر ومبسوطه انى بنتمى ليكوا ولو من بعيد يا ارقى البشر على الاطلاق
واسفه لليى اتهان بسببى كمان مره.....

الاثنين، 29 يونيو، 2009

الجوازه الندامه والانسان القمامه

لما بيخيب الانسان بيخيب فى عقله ولما بيبقى حظه وحش ومخاصمه بيبقى فى جوازته هيا دى الدنيا قاحلة الالوان الغامقه ...
جالها العريس مره رفضته الف مره جالها مره ومره وهيا على الرفض مستمره ومصره لكن امها خايفه على بنتها من لقب عانس برغم ان عمرها لسه بيفتح بس بمشورة امها شكله هيودع
وافقت مرغمه ومضطره اصله بيسمع الادان يجرى جرى جرى على الجامع ويأم الناس فى الصلاه ولاا كأنه مشارى راشد العفاسى
اصله عصامى ومحترم وشاب رياضى وكمان فى نفس المستوى ومش هيخليها تعانى
قالت يا ماما لا مش مرتحاله وحاسه انه ياما بيدارى
ماما قالت لا لا يبقى انتى ناويه على موتى ولو افتريتى عليه عمرك ما هتشوفى غيره
سألوا عليه اهل الخير ويا ريتهم ما سألوا ولاا يا ريتهم ليه مهو النصيب بيصيب حتى لو بين اهله
وعليه اتجوزته المضطره ومن تانى يوم جواز بان اليى كان فى الجره اتارى المؤمن ايمانه كان ناقص سوى شويه طلع لا بيركع فرض ولا حتى ايمانه فى النيه
والعصامى اليى جاب من كفاحه شقه فى مساكن معرفش ايه الشيراتون طلعت قال شقه ايجار يعنى معلم من معالم الخطه ومرسم على الضحيه القطه
وعليه من اول اسبوع جواز بان كل شئ من وشه اليى عايز جاز وجنبيه ولاعه او بوتجاز
لا صلاه ولاا شغل ولاا حتى شقه وهيا دى الجوازه المحترمه
ومن اول اسبوع عسل بان على الغلبانه كل البصل وعنيها اتعمت من دموعه وعدى يوم فى شهر فى سنه وهيا مستنيه على امل او حتى فى انتظار عمر وزاد الضغط عليها هاتى دهبك هاتى فلوسك
قالتله اتجوزتنى ليه ولما انتا بتنافق قولى ايه يستاهل كده تغضب ربنا عشانه دى الدنيا فانيه ومبيفضلش غير حسن معاملة المرء واحترامه
طلعت مبتصليش ربنا يهديك ويغفرلك طلعت مبتشتغلش ربنا يرزقك ويعزك نقلتنى من مكان كويس لمكان يعنى ويعنى عادى اعيش فى جهنم بس تتقى ربنا فيا
اديك كل اليى حيلتى لو انا حاسه منك خير وحاسه معاك سعادتى مش سبب جوازك منى انك طمعان فى حاجتى
والبنت قصدى الست مازالت فى حيره فكل يوم هيا فى معركه عسيره وبيسيبها من غير فلوس وزادت وحاشة النفوس والبنت بنت ناس يعنى اتربت على المكسرات والمكنتوش والمحشى ومنها لحتى العيش الحاف بئه عندها زى الفسدق المملح اليى كانت بتئزئزه بتأنى
وعليه الغلبانه فى حيره تعمل ايه وهيا عايشه فى حيره وحيره تديله اليى وراها وقدامها وتخلص من معاملته الوحشه ولاا تصبر وتحتسب هيا اليى على لسانها انا وافقت عشان ارضى ماما وقلت يكفى انه بيعرف ربنا فاكيد حاسه ان ربنا مش هيخذلنى لانى عشان ارضيه برضا امى وانه عريس متدين
هيا واثقه ان نيتها فى الجوازه هتصلحلها حالها
وانا فى حيره مش قادره اديها رد قاطع غير انى بقلها لو اخدت منك حاجه هيرميكى بكره ولاا كأنك حاجه
فعليه انا عايزه نصيحتكوا تعمل ايه الغلبانه مع هذا الانسان القمامه.....
..الانسانه دى عزيزه عليا قوى قوى فمش قادره اديها رأى قاطع قوى لانى خايفه اغرقها وابقى عامله زى الدبه اليى قتلت صاحبها..
..آه مش هقول انا اسفه على تقصيرى معاكو وفى زيارتكوا لانى ببساطه استاهل ضرب النار...

الخميس، 18 يونيو، 2009

اوفى بالوعد لاسلام اون لاين

ازيكم وازيكن لو الجمع للمؤنث يجوز طبعا وشى منكوا فى ارض البلوجر بس ربنا عالم انكوا فى بالى وعلى خاطرة قلبى دايما...

النهارده يا جماعه موقع اسلام اون لاين عمل معايا حوار مباشر وبجد الاسئله بهرتنى وامتعتنى لانها كمان جايه من اشخاص مختلفين وفكريا واجتماعيا ومن عدة بلاد مختلفه يعنى ثقافات مختلفه ومتضضاربه بس المؤكد ان نظرة مجتماعاتهم للمطلقه واحده....
ابطل رغى واسيبكوا مع حوار من اجمل وامتع واثرى الحوارات اليى اتعملت معايا وبشكر كل الناس اليى سألتنى ووجهت ليه اسئله فيه ويشكر آيات فاروق محررة الموقع وبقلها انا وفيت كده بوعدى ليكى اهه ودى ااقل شكر للوقت الممتع اليى قضيته فى الحوار النهارده
بس الحوار كان طويل بصراحه يعنى من 11 الصبح ل 2 بس والله عدوا على ودانى هوا ...
ده لينك الحوار يا جماعه يا رب يفيدكوا ويمتعكوا....

http://www.islamonline.net/livedialogue/arabic/Browse.asp?hGuestID=Oa8709

واكون برضه وفيت بالوعد لحبايبنا المدونيين الساكنيين فى الفيسبوك زى حالات ناس اعرفهم قوى كده

سالى حبيبتى التاج هيتجاوب هيتجاوب متفتكرنيش ناسيه ويعدين ده منك يعنى فتخيلى بئه حتما ولازما اجاوبه والبسه على راسى طبعا

اه يا جماعه اليى حابب يشوف اعادة حلقة انا والحياه هتتعاد بكره على الحياه اتنين اعتقد الساعه 5 العصر او اربعه مش فاكره بالضبط

واليى هيسجل الفقره هديله شوية فسدق مملح هديه....

بحبكوا جدا جدا وحاسه فعلا ان حياتى مليانه وان انا ليا عيله حتى لو معرفكوش كلكم معرفه شخصيه

الأحد، 31 مايو، 2009

عمرى راح ولاا بيشاور عقله

نعكشه جوه روحى ..عشان انفض جروحى
واشوف ينفعنى ايه
بناغش انا فى عمرى
واصاحب ساعات عمرى
عشان ااقدر اعيش انا بيه
.................................
انا دخلت فى التلاتينات من اوسع ابوابها الشهر ده وبعد ما كان عندى امل انى لسه بعافر فى العشرينات وممكن اعمل حاجه بقيت فى مفترق طرق الحياه انا يوم ميلادى من سن 18 سنه وهو بيبقى يوم نكد عندى لانى بشوف انا عملت ايه ولاا وصلت لايه بلاقى نفسى صفر اليدين ومن سن 25 قررت انى الغى موضوع العمر من حياتى يعنى ابقى ماشيه لاغيه من تفكيرى انا عندى كام سنه وااقيس عمرى باليى هقدر اعمله فى حياتى يفيد غيرى ويفيدنى وعليه انا معنديش 30 سنه ولاا عندى 25 سنه انا ماشيه فى الحياه كده بالبركه
.....بس يوم زى ده برضه قلب فيا المواجع انا عملت ايه فى حياتى عدل يمكن الحاجه الكويسه انى ربنا رزقنى بابنى يعنى خلفت بيرو وانا فى اول شهرين من ال 26 سنه واخدت اهم قرار فى حياتى بأن مينفعش اكمل حياتى او اضيع الباقى منها كزوجه لمجرد انى احافظ على اللقب الجميل ه وانا حاسه انى راضيه عن نفسى ولاا عن المعامله اليى بتعامل بيها فممكن ده من اهم قرارات حياتى وربنا ايدنى فيه لان ابو ابنى طلقنى بالفعل وقتها
.......عملت المدونه ولو ساهمت فى ان وجهة نظر اى شخص تغيرت بالنسبه للست اليى بتطلب الطلاق او المطلقه بصوره ايجابيه طبعا فاكيد اكيد ده حاجه هايله
.......اهم حاجه انا لما فضلت ادعبس واشقلب مخزن احداث حياتى لقيت ان اهم حاجه ممكن اكون عملتها لابنى انى قدرت انى اديله العيله اليى ربنا مكتبلوش انه يستمر فى حياته وسطها يعنى قدرت انى اخليه يعيش مع باباه وجده وجدته واعمامه حتى مع مرات باباه بدون اى حساسيه او احساس بأن فيه شئ ناقص او غلط يعنى كون ان ابنى بيتربى بينى وبين والده بالشكل ده فحاسه ان دى افضل حاجه عملتها فى حياتى
يعنى برضه كون بيرو يحب اخوه وكل ما نشترى حاجه يجيب زيها لاخوه من حبه فيه فاعتقد ان ده شئ هايل ربنا وفقنى ليه
...........يمكن واكيد ماانجزتش كل اليى نفسى فيه يعنى الراديو معملتوش فى العشرينات ولاا الوقفه ضد ثغرات القانون ولاا حاسه انى اثرت فى حياة كتير بشكل ايجابى بس اعتقد انى هحاول انجز بسرعه فى اليى باقى من عمرى لانى اعتقد ان مش باقى كتير ونفسى اطلع من الدنيا بشئ ايجابى حتى يترحم عليا من قلبه بجد
................
حاجه كده بئه على الهامش الاسبوع اليى فات كلمتنى معده فى برنامج انا والحياه بتاع حسين فهمى وانا اعتذرتلها عشان مش فاضيه بجد وكان من قبلها ب 4 شهور اعتقد مكلمنى حد من نفس القناه لبرنامج لرولا خرسا والمفروض ان اول حلقه كانت هتبقى معايا وحلقه كامله المهم قلت ماشى من 4 شهور مكلمنيش تانى نسيت نسيت بجد ..المعده بئه وسطت واحده صحفيه علاقتى بيها اخت ومقدرش ااقولها لا ناهيكم انها قالتلى سبب يخصها مهم جدا فبتالى من منطلق انى ممكن اعمل حاجه عدله لحد رحت الحلقه دى واخدت بيرو معايا عشان كنت براجعله فى الطريق وسجلت الفقره وكان معايا رئيس مأذونية مصر ومأذون مصر الجديده وسيحان الله قالى انه يعرف والدى وعمى شفته الدنيا وحسين فهمى ظريف جدا وراجل ارستقراط قوى والمعده اتبسطت واول مره اخد فلوس اه والله ادونى 400 جنيه راح نصهم لحد كنت حاسه انه محتاج فلوس ولان مفيش علاقه بينا اديتهمله على اساس ان حد سابهمله والباقى بئه جبت سويتس لكل حد اعرفه بنية ادخال السرور على قلب مسلم يعنى علبة شوكلاته مكنتوش وفت بالغرض ههههههههههه والعلبه اصلا بالباقى من الفلوس
معد رولا زعل منى شويه بس لما شرحتله ووضحتله مزعلش منى واعتقد اننا قفلنا مع بعض بشكل راضى لكل الطرفين
الشئ بئه اليى دايقنى بجد حاجتين اولا اختلفت فى الراى مع واحده كانت هناك فى ان موضوع الرؤيا لا من حقها ولاا من حق طليقها عشان نمنع ولادنا من رؤية ابهاتهم وان ده حق لاولادنا واحنا ما علينا غير اننا بنحققلهم الحق ده ..بس الكلام معجبهاش بصوره رفعتلى الضغط
حاجه تانيه انى قرفت من نفسى اه والله قرفت من نفسى يعنى مش كل ما حد يكلمنى على برنامج اروح طب انا بروح ليه ما خلاص وجهة النظر اليى كنت عايزه اوصلها اعتقد وصلت والصوره اليى بتمنى تتاخد صح اعتقد برضه اتعدلت شويه يبقى انا كل ما حد يكلمنى ويطلب انى اروح برنامج بروح ليه حب ظهور ولاا عايزه اثبت لنفسى ايه ..المهم فضلت قرفانه من نفسى مده طويله واخدت عهد انى افرمل الموضوع ده وعليه من يومين معده لبرنامج زينه على القناه التانيه كلمتنى وقلت لا مش هقدر
مدون زميلنا كان بيكلمنى يهنينى على عيد ميلادى وهو اخ اكتر من عزيز كمان رغيت معاه فى الموضوع ده قالى تفسير خلا حالة القرف النفسى اليى كانت عندى تروح هو قالى ليه بتاخدى الامور كده خديها ان معرفش ايه شافك يبقى القناه التانيه الفين يشوفوكى وهكذا انا مش متذكره الكلام بالضبط بس فاكره انه كلامه بسطنى واسعدنى وجبر بخاطرى قوى ربنا يحبر بخاطره هو كمان
.................................
انا فضفضت وقلت اليى جوايا اصل مخى كان ملغوش كده وروحى مش مستريحه قوى بس كده خلاص اعتقد انى استعدت ما فيا من توازن
بس وحشتنى المدونه قوىىىىىىىىىىىىىىىى ووحشتونى قووووووووووووووى اكتر من المدونه وانا كمان..........يا رب مكنش دوشتكم معايا
اه بيرو خلص ثانويه عامه على راى شموسه ههههههههههه الحمد لله ونجح حد يزغرط
وابراهيم العدوى اخويا الصغير بالنسبه لمشاركتى فى مجلة رؤيا انا بعتذرلك على الملأ اهه انتا شايف بكتب بوست جديد كل قد ايه
بس يا جماعه عالم التدوين فيه مجلتين من اجمل ما يكون وعايزين نقف على بابهم كل يوم رؤيا ..وميكانو
يعنى دول مجلات مدونيين مصر كلهم فعايزين مننا دعم جامد على الاقلل بزيارتنا واطلاعنا عليهم
ارجو يا ابراهيم انك متزعلش من اعتذارى انتا اكبر منى ومن اعتذارى بكتير

الثلاثاء، 28 أبريل، 2009

باركو لابنى اخيرا بئه اخ

الحمد لله اخيرا ابنى بئه ليه عيله ولمه وظهر وسند وبئه ليه اخ.. مرات باباه ولدت امبارح ولد زى القمر زى بيرو وامتعونى هيا وابو ابنى ان اخيرا ابنى بئه الاخ الاكبر وبئه ليه اخوات وهيحس بجو الالفه والعزوه بجد
الحمد لله ..نعم ربنا عليا كبيره قوى قوى قوى
......................
يجرى عليا يقول ماما يا ماما ..عوا..
ااقوله نعم حبيبى يا ماما خوفت قال..نوا..

يجرى عليا يقول يا ماما ماما
ابص عليه استنى يرد
يبص عليا كتير ما ينطق حرف
غير بسمه حلوه بترد فيا الروح
وتطول العمر
يآه على دى نظره
يا سلام على احلى بسمه
بتخلينى اتمنى افضل كده علطول ام
ويكبر حبيبى يكون افضل واعظم شاب
ويجرى عليا يقول ماما ..ماما
بحبك يا اجمل ام
واخده فى حضنى واضمه
واتمنى طول عمرى اضمه
واموت يكفنى بحبه
ويدفنى تحت رجله فى قبر
ويجرى عليا يقول ماما امى حبيبتى
بحبك لأخر العمر
...................................
دى كتبتها فى بيرو من زمان من اول يوم بدأ يجرى ويلعب معايا لعبة الاستغمايه

الجمعة، 10 أبريل، 2009

(تحديث بالمره).. نها وعمى والاستاذ خالد ولسعة برد الشتا وال art

تحديث وتحفيز ......

ومش فاهمه تحديث يعنى ايه بالضبط فنها بتسألنى قلتلها يعنى اخر الانباء فقالتلى اه يعنى فهمت وانا قلتلها اه انا فهمت كمان...
اولا انا غايبه عن الرد عن التعليقات وعن التمتع والاحساس العالى بالرقى والانبساط والنشوه بزيارت بلوجاتكم البديعه والمريحه واليى حس فيها انى فى عقر دارى وده لسبب قوى والله يعنى لا غتاته ولاا كسل انا بس ربنا اكرمنى واليومين اليى فاتوا اخدت دور مرض محترم بالاحضان جامد يعنى انا افتكرته احتقان الدكتور كدبنى وقاللى حما فيفر يعنى بالازنجليزى ويجى على بالى حاجتين متناقضتتين يعنى مرض الرسول الكريم بالحما ومش عارفه يصح اجمع ذكر الاتنيين سوابس جه على بالى فيلم ساتر داى نايت فيفر يمكن عشان الاسم او عشان بحب جون ترافولتا واليفيا نيوتن جون الظريفه ..الله اعلم بس اكيد كنت بخرف من العيا مش هعرف اعتذرلكم طبعا كفايه بس بجد وفعلا المرض من اوحش الحاجات اليى ممكن يتعرض ليها الانسان يكفى انى مش عارفه ابوس ابنى فى وشه خايفه ليتعدى منى ويكفى انى من تعبى مش عارفه ازوركم ولاا افتح الكمبيوتر من الاساس بس انا الحمد لله حاليا بتحسن بروح شغلى النهارده وبتعايش والحمد لله على الصحه لو بنسبه ا ونص فى الميه البيضا

وثانيا بئه..كان فيه صحفى عزيز عليا جدا ويعتبر اخ غالى وده من ايام ما كنت بتابع كتاباته وبعدين تمر السنون قصدى والله الشهور بس وهو عمل معايا حوار للمجله دى وبعديها بفتره طلب منى انى اظهر معاه فى برنامج هو بيعده اسمه الانسانييه اليوم على قناة الانسانيه والمفروض الحلقه بكره على الهوا من 8 ونص مساء فانا حبيت ااقول واعرفكم عشان اتونس بيكوا وتتفرجوا عليا ومش عايزه تحديف طوب انا فيا اليى مكفيكنى الحقن قامت بالواجب وزياده
انا كنت حابه اعتذر بس انا اعتذرتله كتير قبل كده وقلت ذوق لو اعتذرت تانى وهو خلاص كان ضبط الحلقه واموره
يا رب اكون عرفت اعتذرلكم عن تقصيرى فى زيارتكم ويا رب بكره تسعدوا برؤية وجهى اليى محتاج فورا عملية تجميل بس عاجبنى عشان خلقة وصنع ربنا
بحبكوا جدا وانتوا مصدر قوتى الوحيد فى هذا العالم المتوحش وعبدالرحمن بيسلم عليكم .....
شمس النهار قريت تعليقك يا جميله يا شموستنا بس التحديث اهه بيقلك انا رحت فين من السرير للدكتور ومن الدكتور للسرير واسألى ضد هيا عارفه وفاتيما وحشتينى يا اختى وحبيبتى وقريبة روحى الغاليه بتغيبى وبتغطسى فين يا قمر انتى بجد انا والله بلزق وبربط فى نفسى من التعب وهتعب واعيا اكتر واكيد هموت لو حد زعل منى فيارب محدش يزعل منى عشان ادعيلكوا حاكم دعوتى دلوقتى ايه منها لربنا دعوة مريض بئه
.................................................
انا ليا عشق خاص للسعة برد الشتا
انا ليا عشق خاص لروحى فى جو الشتا
انا بعشق الشتا
وبعشق كمان قفلة بيبان الشتا
والتلج على الاركان والمطر فى كل مكان
وبرغم ذللك
انا المهاجر من برد الشتا
ما انا ملقتش فى الشتا حد يورينى الدفا
كل اللى قابلته فى الشتا ادانى جفا
وخد قسوة الفصل الجميل
ومخدش منه لين شمسه الحنينه
امتى الشتا يبقى معاه
حضن دافئ يعوض ايام القسا
امتى الشتا يحضن دفا وبرد ايام الصبا
.........................................
الغنيه دى على لهجة اخوانا اللبنانيين كاتباها من سنة 2004 وطبعا فى شهر 12
من حوالى 3 اسابيع كده كلمتنى معده جميله قوى اسمها بسمه وقالتلى انها من قناة art وانها عايزانى فى حلقه عن النعدد من حلقات البيوت اسرار ولانها كانت مكلمانى متأخر وبصراحه صحيت على تليفونها فقلتلها لا لانك كلمتينى متأخر ومش هقدر وبعد اه ولا واه ونص وطيب ومينفعش وممكن وجايز واحتمال ووارد بكلم نها صاحبتى اليى هيا صاحبة المدونه الصاعده بلاش فضايح حيث ان كل خطواتى برغيها وبرفها وباخد راى فخامتها فيها حيث انها ودعاء اختها اخواتى وصحباتى الحميميين فى الشرقيه بحالها ..
المهم بعد ما بستفتنى وكلام من نوعية روحى يااختى ولاا بقيتى بتتشرطى وتقولى لا وانا طبعا هههههههههههه بضحك قلتلها اروح وتيجى معايا هيا قالت لا طنط قالت اه وطبعا كلام طنط مشى عليها ورحت انا ونونا واخدت بيرو ظلى الظليل وكلمة باباه وجدته عشان لو يحبو ان بيرو يقعد معاهم الكام ساعه مدة التصوير او اسيبه مع ماما واختى فطبعا رسى الموضوع ان بيرو ياخد جرعة اهتمام وحنان لمدة كام ساعه من باباه وجده وجدته واعمامه وعليه جاتلنا عربية القناه على بيت اختى او قريب منها لاننا معرفناش نديله العنوان صح وركبنا العربيه والرغى طبعا اشتغل مع استاذ خالد اليى طلع صاحب شركة العربيات المتعاقده مع القناه شوفوا بئه واجيبه يمين اجيبه شمال انه يشغلنى سواقةه معاه ابدا الراجل مش مأمنى على عربياته ..بعد كده رحت القناه الاقى مين هناك ضيوف الحلقه د/ عبد الحى عزب وده كان رئيسنا فى الشغل وراجل من اروع الشخصيات اليى قابلتها فى حياتى وهو حاليا عميد دراسات اسلاميه بنى سويف والاقى مين واليى جالى زهول ودموعى انجرفت من عينى لما شفته د/ عبد الحكم عبد اللطيف الصعيدى وده ليه بئه لانه عمى يعنى هو ابن خالت بابا الله يرحمه لزم كما يقال وبابا قبل ما يموت واول ما نزل من الامارات كان نفسه يشوفه جدا وكل شويه يقلى يا محاسن جربى رقم عبد الحكم ابن خالتى كده ااقله يا بابا الارقام اتغيرت وسبحان الله مع ان شغلى فى نفس مجال عمله ومع انه طول النهار بسم الله ما شاء الله فى برامج الفتوى يعنى كل ما افتح برنامج او قناه الاقيه قدامى وبابا طبعا بيبقى مبسوط ده بجانب اننا انا وبابا كنا بنتابع حلقاته فى برنامج مع الدعاء اليى بعد صلاة الفجر فى اذاعة القرآن الكريم وبرغم كل ده فشلت فى انى اجيب رقمه المهم سلمت عليه وقلتله انا محاسن صابرمحمود زهل طبعا وقالى ابوكى فين ده انا تهت على ارقام تليفوناتكوا واخدت ارقام باباكى فى الامارات وارقام الشرقيه من عمك وطلعت غلط طبعا ذهلت تانى وحكيتله ان بابا كان نفسه يشوفه وفضلت احكيله وهو يحكيلى على طفولتلهم وذكريات عن بابا الله يرحمه المهم اخدنا الارقام الصح بعد كده وفضل يسألنى عن اخواتى وعن كل شئ يخصنا وعناوينا والدنيا واخبارها معانا انا عيطة لسببين ان بابا كان بيحبه قوى قوى وكان نفسه يشوفوه وانه شبه بابا جدا جدا وحتى عمى عبدالحكم حسيت فيه بحبه لبابا فعلا وبصلة الرحم بتتوصل من جديد وبعد ما خصنا الحلقه الى طبعا انا ونها ضحكنا فيها كما لم نضحك من قبل روحنا تانى مع استاذ خالد ونها هانم راسها الناشفه والف خنجر انها تروح والساعه ايه 10 بالليل وبعد ما كلمنا طنط وباباها قالها باتى مع محاسن ودى ابدا اغريها اننا نتفسح فى اى مول وهوديها محلات تحف وانتيكات حيث انها مجنونة تحف وانتيكات وناويه تعمل مشروع محل تحف فقلتلها نتفرج وناخد خلفيه واشاركك بالنص ودى ابدا شكلها اصلها صعيدى وعليه قلتلها طب نروح المهندسين حيث اننى بقالى اربع سنيين مشربتش عصير من عند فرغلى ونفسى اعيش الجو ده تانى واهى حاجه ظريفه كده وعليه استاذ خالد فهم انا ااقصد ايه ولف بالعربيه واخدنا على فرغلى وهو اليى عزمنا كمان وانا وهيا نبص لبعض ومكسوفين فوشوشتنى وقالتلى لما نوصل عند اسماء نديله فلوس العزومه دى قلتلها وانا بوشوشها برضه ده راجل راجل وشكله ابن بلد يعنى لو عملنا كده ممكن يرصنا قدام العربيه ويدوس علينا وهيا ههههههههههه وانا هههههههههههههه ويعد ما شطبنا على فرغلى واليى فيه خدنا طريقنا للذهاب الى المنزل وطول الطريق شغاله رغى لما صدعت الراجل وكمل كرمه معايا ورحنا شارع مراد واخدت بيرو من عمه وكان نايم طبعا زى الملايكه ......
اليوم كان من اوله ظريف يعنى بدايته نها وان ده اول سفر لينا مع بعض وهيا صحبه رائعه بصراحه وبيرو قضا كام ساعه دافيين مع باباه واعمامه وجده وجدته وبعدين ااقابل عمى وحبيب بابا الله يرحمه ناهيكم انى حسيت ان بابا مبسوط انى شفتله ابن خالته واخيرا استاذ خالد الراجل ده من اروع واجدع واطيب ما يكون رغى معاه فكرنى برجالة مصر الطيبيبن قوى تحمل المسئوليه والجدعنه ناهيكم اننا من جمايلهانا ونها وبيرو ابنى حتى مش عارفنا نكأفه ازاى بس اعتقد ان ربنا بيحبنا على اننا بنقابل ناس نضيفه ونقيه وجدعه كده فى حياتنا ...ومش عشان عزمنا على العصير يا نها يا مجرمه ابدا والله ههههههههههههه
نها كل شويه نزلى البوست نزلى البوست البوست اهه نزلته استريحتى ...اه انا كنت ااقصد بئه والمغزى من الفسحه وفرغلى انى ااخر نها عشان تبقى مرغمه انها تبات عند اختى معايا يعنى حركة خبث ولئم فلاحين كده ويجعله عامر
..................

الجمعة، 27 مارس، 2009

بربش وفريحه ومش كل يوم طريحه

......تحديث وحاجه مهمه .....

الوالد الكريم بيرم المصرى والاخ العزيز الحسينى اليى معتقد ان حدودى اخرها الشرقيه للاسف الشديد رد حضرتك فى موضوع اليهود ازعجبنى جدا جدا انا لا بحب اليهود ولاا حتى عمرى وافقت على التطبيع كل الموضوع استاذ بيرم بيقول قتل اليهودى صدقه وده معناه انى لو ماشيه فى شوارع المحروسه مثلا ولقيت يهودى اهبده بطوبه فى نافوخه او ارميه فى بلاعه ...انا قلت نعاملهم زى ما الرسول الكريم عاملهم فى الحرب والسلم الاسلام ادا الامان لكل اهل الكتاب وفيه يهود ضد اسرائيل زى اينشتين مثلا عالم النسبيه واليى قال ان ربنا كتب عليهم الشتات ولازم يقبلوا عقاب الله يبقى واحد زى ده لو عايش ورايه كده لما اشوفه فى الشارع اعمل فيه ايه ااقتله ولاا اديله الامان اليى دينى فرضه عليا تجاهه طالما مبيتعداش عليا ولاا على اخوانى ....انا حزينه حزينه ان حضراتكوا تأواى فكرى ورايى على مزاجكوا وتحسسونى بكلامكوا انى لا قدر الله مؤيده لليهود والصهيونيه الدين السماوى شئ والصهيونيه شئ وانا ضد التطبيع وضد اسرائيل ولاا اعترف بيها اصلا انما ااقتل انسان لمجرد اختلافنا فى الدين معتقدش ان ربنا امرنا بكده
ارجو اكون عرفت اوصل وجهة نظرى واسفه قوى قوى قوى انى اتفهم كده ومن حضراتكوا بالذات لانى بكنلكوا كمية احترام وتقدير وحب لا توصف


بربش عبد الله عبد من عباد الله بس ابعد ما يكون عن طريق الله سلوكه محتاج اعادة تأهيله واخلاقه سقطت من كيانه كأنسان وضميره ضميره ضميره وقع فى بلاعه من اليى كانت مفتوحه فى ارجاء المحروسه زمان
وعليه هذا الكائن البشرى الشبه شبه انسان ..هو هيكله بشرى بس داخله يكاد يكون على سلوكيات ابن آوى

بربش عبد الله العبد من عباد الله اكرمه الله سبحانه وتعالى بزوجه تجيب من حلاوتها الثماله ومن فرط ذوقها تحس انها عامله فى سلوكها ولاا فوارس الخياله
اتجوزت بربش من اول نظره ووقعت فى غرامه القاتل كسم الزعاف من اول بربشه على الطريق واهداهم الله ذاك الشئ البرئ كائن صغنن انما من فرط برائته شئ عجيب عجيب ..
وبعد مفيش تلات سنيين من الاهانه والامتهان والضرب تحت الحزام وشد الشعر كمان شافت ان الحياه استحاله وان العيشه ممات برغم وجودها فوق الارض مع الاحياء حيث انها فى سنوات زواجها الثلاث عانت ما لم تعانيه نمله فى بير وكان كل يوم بيمر عليها ياخد فى طريقه شعره بيضاء تصيغ على خصلات شعرها السوداء ووشم من نفس هذا اللون على قلبها المفعم باليأس والحزن
وعليه لقيت فريحه ان الحياه بقت ايحه والدنيا قلبت قبيحه ومفيش لحظة امان ولاا بتشتاق لحضنه كمان وبعد ما كان الخوف من قطع الكهرباء دافع للاحتماء والاختباء فى حضنه المليئ بالاشواك وجدت لها بديل فى حضن تانى خطير ..تحتمى تحت ملة السرير..اى نعم تحت ملة السرير حيث الامان المحفوف بالمخاطر من مله على دماغها تخاطر وتكسرها نصين وتعيش ما بين البنيين انها تبقى بدماغ مكسوره كما العفريته ام رجل مسلوخه او تعيش مشكشكه من اشواك حضنه المتعبه وعليه هذه الفريحه قالت مش كل يوم طريحه نفسى احس بالامان واستخبى فى حضنه كمان وانام جنبه واغمض عينى ومحسش ان بكره هيطلع عينى..

وعليه خدت القرار وكان عليها صعب الاختيار وقالت حياتى مره هتتعاش لاما حلو لاما بلاش
فكان قرار الانفصال حيث انها تبغى العيشه الحلال ورجل يحتويها حتى لو على الحميد تعيش طالما المجيد رزقها بصاحب الخلق القويم
وعليه طلعت فى البلكونه واخدت نفس عميق ودخلت تانى من البلكون على زوجها المجنون واخبرته بانها ....
بربش اريد الطلاق حيث ان العيشه هباب وببكى على كرامتى فى اليوم الف بكاء وبكاء وحيث ان الرحمن امر بحسن العشره والعشيره ..فارجوك ارجوك اطلق سراحى بهدوء وكما فى هذه الحالات يقول الدين نفعل ما احقه لنا الرحمن بكل ود وحنان
وعليه ثارة ثائرته كأنه اختل به الميزان وطردها شر طرده من مسكن الزوجيه كمان وكأنه على تلفظها بهذه الكلمه كان يقول يا رب تقولها وانا ااقول كمان وكمان
صدمت لما رأت المسكينه فقد طردت توا من مسكن قلما احست فيه بالسكينه بل هو ااقرب لسكينه وعليه قالها طلاق تتنازلى عن كل شئ اديكى اغلى شئ ورقه وفيها الطلاق اما تقولى حقى ملكيش غير المحاكم وطريق من اتنيين يا حاكم يا سكه طويله ضلمه يا سكه اطول وبرضه ضلمه..

لملمت اشلاء روحها وقالت لا ومطلعتش روحها وفضلت تروح وتيجى فى جو المحاكم المنعش لدرجة خلت منها حد بجد منتج وجالها كتير اكتئاب وجالها كتير تفاؤل
وقالت محاربة الظلم فرض والجهاد على الحق واجب هجاهد واكافح واتور وهثبت انى جسوره ولاا يهمنى المعموره طالما مع الرحمن هقول طلقنى وادينى حقى
وعليه فى البوست القادم هنرغى فى حالة بربش بعد ما بربش ل فريحه اداها فى المحكمه الطريحه
..ااستنوا معانا وشوفوا بربش وفريحه واوشو...
اوشو دى زوجة بربش التانيه ذات الصفات القاتمه ..والروح الغريبه والعقل المغيب فى انها يا عنيه مش عارفه ان المساعده على الظلم ظلم وان اليى تعمله النهارده اكيد اكيد هيتعمل فيك بعد بكره
..............................................
البوست ده كتبته من زمان وكان مركون فى الرسايل المحفوظه قلت افرج عنه يفرج عنى ربنا
واهه اهداء منى لكل ست لسه فى اجواء المحكمه او تعانى من داء المرمطه من جانب جوزها ......
اه وعلى فكره فاكرين بوست تعديل ثغرات القانون انا كنت مخططه انى اعمل وقفه احتجاجيه كل شهر مره قدام المجلس القومى للمرأه بس طبعا بعد موافقة الامن الغذائى حيث انى بخطط برضه اربى الواد مش تربيه مرات اب وعليه هبعت جوابات للجهات المختصه بتعديل هذه الثغرات او على الاقلل النظر فيها وبعد كده تيجى الوقفه وطبعا مدعو ليها الستات والرجاله لانها فى الاخر بتصب فى مصلحة المجتمع بحاله مش الست برضه عماد المجتمع يبقى عماد المجتمع يعيش متبهدل كده فى المحكمه ..
وخبر كمان انا نويت اعمل اذاعه على النت وهسميها برضه عايزه اتطلق وهتكون برضه للستات قبل الرجاله والرجاله قبل الستات يعنى اذاعة الجنسيين بس لسان حال جنس واحد ..........

انا كنت عايزه انزل بوست تانى بس مش مركزه


الجمعة، 20 مارس، 2009

امهات المحاكم كل رول وانتوا بالف خير

البشر دى تستاهل يتقلها كل عيد ام وهما بكل خير ومتمتعيين بالصبر ......
...كوابيس احلام.....

احلام اسم على غير مسمى حياتها كلها كوابيس مش عارفه اذا كانت فى المحكمه بقالها 7 سنيين ولاا اكتر كويس انها عارفه ان بنتها عندها 12 سنه اليى فهمته من قصتها ..ان لو جوزك كابوس هيجى يوم وتفوقى وتصحى منه ..انما لو الكابوس ده اخوكى هتفوقى منه ازاى وهيا يا سلام عليها الحياه مبتسمالها بشكل ...فاقت شويه من كابوس جوزها (وشويه يعنى لانها اتطلقت من 11 سنه بس رافعه قضيه للنفقه وزيادتها من 11 سنه الدنيا ووضعها الاقتصادى اتغيرت طبعا )

المهم دخلت فى كابوس اخوها البيه البار باخته وامه بيتهمها فى شرفها ودايما يضربها ويزعقلها ويقولها يا ام مشى بطال ( مع رجاله يعنى ) لا والاهم انه بيتطردها هيا وبنتها من البيت اليى هو بيتهم كلهم ولازم وحتما عشان يومهم يعدى هيا وامها وبنتها يعنى امها تمضى على تنازل عن الميراث لجنابه والا يومهم ايامهم كلها مش هتعدى
طبعا جه على بالكم هوا متجوز ولاا لا ولو متجوز عامل ايه مع مراته..
اريح بالكم وبالى البيه مراته رفعت عليه قضية طلاق ولما لقيت الطريق هيطول جابتله بلطجيه وطلق بالذوق طبعا ده بخلاف انها راحت مكان شغله وحكت على بلاويه لمديره واليى بالتالى طرده شر طرده مكافأتا ليه طبعا على خلقه الكريم مع مراته.....يا سلام كما تدين تدان خلص من مراته مسك فى امه واخته
( طب ما تمسك فى راجل زيك فى الشارع ونشوف مين هيغلب )
...........................
.. الست الراجل......

الست الكائن الضعيف جسديا البريئة المشاعر والمرهفة الحس راجل (اذا كنا بنقيس كلمة راجل بمعنى قوة التحمل والصبر والشهامه )
آه الست راجل الست الانثى اليى بتدوب من كلمه ومابالك بلمسه اليى مليانه مشاعر واحاسيس بكل انواعها واليى جواها حاجات كتير حلوه ربنا خلقها جواها..راجل لانها لما بتتحط فى مشكله بتسد ولما بتبقى ام بتتحمل مسئولية الامومه بشجاعه وصبر
صبر على كل ظروف الحياه من معيشه واسعار وناس وكلام الناس وشغل وضغط شغل ومن صبر على مشاعرها وكبح جماح لرغباتها وتمسح باستيكه من دماغها الدنيا برغباتها وتبقى فكرتها عن العيشه والحياه ولادها (اعيش عشان ولادى ) هاتلى راجل فى يوم سمعناه يقول اعيش عشان ولادى ..اول ما يسيب مراته ..يعنى لسه مطلقهاش طبعا الا لما تتنازل يجرى يعيش عشان رغباته...الا من رحم ربى طبعا..

البوست ده هدفه ومغزاه ااقول لكل ست فى المحكمه او براها خطت عتبتها او مخطتطهاش كل عيد ام وانتى بالف خير وقوة تحمل وكفاح
...........................................
فيه ام ملاك وهيا بشر اه بس ااقرب ما تكون للملايكه اترددت قوى قبل ما اكتبلها الاهداء مش عارفه ليه اترددت بس يمكن لانى عارفه انى بتعامل مع ملاك فبخاف وبتعامل بحذر لاعمل حاجه تجرحها وانا ببشريتى معرفش

فاتيما ام الغالى يوسف ...

كل عيد ام وانتى بالف خير وصحه وراحة بال وقلب

وابنك مش بعيد ابدا عنك يا طمطم ابنك مستخبى جوه قلبك ودفيان ومستقوى فى حضنك هو بس بجسده بيتفرج وبيتعايش مع دنيا تانيه ليس الا

ربنا يطمنك عليه ويفرح قلبك الطيب ده واسفه لو هنيتك على الملأ بس بحبك مش قادره امنع نفسى او احجمها عن حبك وشعورى تجاههك انك شقيقة روحى واختى



الثلاثاء، 10 مارس، 2009

شبه خريف المطلقات

بقت مشاعرى ضعيفه

بقت مشاعرى ورق

من كتر ما دقت قسيه

خلاص قلبت غلط

بقيت بحب على روحى

عشان انسا كل جروحى

خلاص بحلم صاحيه

وانام وااقوم عايشه فى وحده

وااقول يا ريت ابقا مراهقه

عشان احب تانى كتير

اشوف فلان اعشق خلان

وادوب ادوب فيك انسان

يقيت مشاعرى ضعيفه

بقت حياتى ورق

يا ترى دى عيبه

ولاا احساس غلط

............................
ساعات اى ست قلبها وحياتها خاليه من العنصر الادمى بتحس كده ساعات ساعات بس ..ملوش اى داعى انى كل ما ااكتب حاجه او اعبر عن شئ انى اابرر انى مش بمر بيها ايه العيب لو مريت بيها مع انى مبمرش بيها دلوقت وللاسف ويا خساره..
وشاكره افضالكوا يا قطع قلبى النابضه بالحب


الأربعاء، 4 مارس، 2009

بحتاج صديق


تحديث واخر الاحوال...مين قال انى زعلانه ولاا مدايئه ولاا خايفه على مستقبل الواد ..انا مرعوبه بس..بهزر بهزر بهزر
بقلكم يا جماعه نهنى جميعا للاخت حبيبه صاحبة القصاقيص اليى كانت فى يوم ..فى يوم كانت خطيبة المحروس لامه بيرو ابنى وجابت العبقريه جيد جدا فى سنه معرفش كام هندسه
وفى خضم هذا الاحتفال التحديثى المهيب نهنى جميعا الباشمهندس اليى فاضله تكه ونص ويبقى امين شرطه قد الدنيا علاء عايش وبيشاور عقله حيث انه نجح بتقدير جيد مع مخدة شرف ومنها بقله شد حيلك بالذوق بدل ما يتشد بالعافيه ومتنشغلش بالشعر العامى قوى صدقنى يا عايش لا الشعر ولاا الهندسه هتنفعك مش هينفعك يا ابنى الا امناء الشرطه على الاقلل هتطلع تلاقى وظيفه
انا كده قلتلهم مبروك قللهم انتوا بئه مبروك
وعلى فكره غدا رايحه انا وكيارا وضد احتمال ضد تيجى معانا لقاء التبرع بالدم طبعا طبعا لا انا ولاا كيارا ولاا ضد هنتبرع احنا رايحيين نتفرج بس ونفوئق اليى هيغمى عليهم انا بجد مبسوطه قوى من دلوقت ان ده هيكون تانى لقاء مدونيين احضره ياللهول انا سعيده موت قوى من دلوقت ويمكن لانى لسه مكلمه بيرو كمان وطبعا طبعا طبعا مبسوط موت لا بلاش موت دى مبسوط قوى قوى قوى يا حبيبى

كتير بحتاج صديق
اترمى فى حضنه وابكى بحق وحقيق
وكتير بحتاج صديق
وياما بشتاق لأيد تمسح دمعة عينيه
وتطبطب بشويش عليا
فى عز البرد الشديد
دا انا اتكسرت ياما من قسوة الحياه
وبقيت عايشه فى ملامه ودوامه من الالام
نفسى تكونلى صديق
انا مش عايزاك حبيب
دا انا من الحب القديم لسه بداوى فى جروحى
لسه بلملم فى روحى
لسه بخاف من مشاعرى
لتجرح فى يوم شعورى
انا محتجاك صديق ليا بحق وحقيق
تمسح دمعة عنيه
وتطبطب بشواش عليا
فى عز البرد الشديد
....................................

نسيبنا من الكلام اليى فوق ونخلينا فى اليى هقوله ده انا ليه بموت بموت بموت من الألم كل لحظه ليه بتقطع كل ساعه ليه مجرد ما الامور والدنيا تيجى جنب ابنى حتى لو حتى لو حتى لو .....ومليون لو كمان انا ليه بتكهرب وبتاخد ليه كده ..شكلى هبقى اراشانه وحيزبونه واخطبوطه
يا رب عفوك....

انا الحيزبونه الشريره الكائنه المكنونه فى بوتقه من الشجن المرير..على شفا الارتياح النفسى
كلام ادم ..ابو اجنحه مكسوره..قوانى شويه وطمنى شويتين مع انه كلمنى قبل البوست بس مفعول الكلام محصلش الا دلوقت

السبت، 28 فبراير، 2009

انا انثى وانا زعلانه

تحديث تحديث خلاص انا بقيت عكس زعلانه......

اولا ربنا يبارك فى اعماركوا على ارائكم الجميله اليى قريتها فى التعليقات ايهاالاخوه والاخوات فعلا ربنا كرمه كبير وبيعوض الانسان بحب فى الله عنده اهم من حاجات كتير فى الدنيا فمش عارفه ااقولكم ايه ولاا اشكركم ازاى غير انى ادعيلكم بظهرالغيب دعوه دعوه لكل فرد فيكوا
ثانيا بئه ..وكمان مره ثانيا بئه... انا مبقتش زعلانه اصل احمد مهنى اتصل بيا يبررلى ما حصل وطبعا انا من مجرد ما قال الو انا احمد مهنى وانا خلاص ولاا كأنى كنت مئموصه ولاا زعلانه ولاا اى حاجه تزعل اصلا مهنى بررلى وبررلى وطبعا شعللنى وشعللنى من ناحية احمد سلامه وابسط حاجه وصانى بيها انى اخنئه يا عينى عليك يا غلبان يا سلامه انا طبعا قلتله مش هتفرق اهه دكتور وهيعرف يعالج نفسه ....بجد انا مجرد ما بس سمعت احمد بيقول انا احمد مهنى وانا ولاا كأنى كنت واخده على خاطرى ولاا غيره وكأن اخويا اتصل بيا يطمن عليا مثلا وبعدين هو بررلى وقالى انه داخ على رقم تليفونى وان احمد كان عيان فتره طويله وان وان وان وبخلاف اى ان يكفى انه اتصل وبررلى وجبسلى خاطرى يعنى جبر بخاطرى كده وطبعا بستفنى وقالى بئه انا اتكلم عليكى فى صباحك سكر زياده وانتى تزعلى قلته ده اولى انى ازعل بتجيب فى سيرتى ليه ..طبعا بغتت.. انا طبعا هتجنن واروح حفلة التوقيع عشان اشوف كل المدونات اليى بموت فيهم وبكنلهم كل احترام ومحبه بس طبعا حظى ااقل ما يوصف انه زى وشى وحدث ولاا حرج يعنى عندى مشاغل ومشاكل صغننه كده الاسبوع ده وكلها تدور فى فلك بيرو افندى سوليفان وحضانته وباص حضانته فمش هقدر ااجل حلها ولاا هعرف اروح الحفله بس هتابعها اكيد ان شاء الله..
ااحمد سلامه واحمد مهنى يعنى الاحمدين اليى اسمهم على اسم اخويا انتوا زى اخويا فعلا وانا مش زعلانه بتاتا انا زعلى كان من ايه زى ما قلت واخدت على خاطرى لانى بحترمكوا وبعزكوا جدا وكنت ومازلت بقول عليكوا ولاد طيبين ومحترمين وغلابه ..على فكره غلابه مش شتيمه دى يعنى طيبين قوى وعلى الفطره..
المهم انا فرحانه بتليفونك يا مهنى ونشمر بئه ونسلم على سلامه طبعا بالضرب..احمد عقابه انه يتحرم من القهوه ده العذاب المناسب ليه
شكرا يا جماعه على كل اليى تعاون فى البوست ده فى ترميم معنوياتى وفى رعاية الله ااقوم اصلى الفجر بئه واسفه على التاخير فى التحديث انشغلت مع بيرو كالعاده نمت وانا بنيمه

مش عايزه اكون زى اليى بيضرب كرسى فى كلوب فرح انما انا هتكلم مع اخواتى وعايزه رايهم هل انا مزوداها ولاا وجهة نظرى صح وزعلى فى محله
كتاب انا انثى..الموضوع متعلق بيه انا اتبعتلى ميل من احمد سلامه وكان بيقلى ان المسئولين عن الكتاب عاملين فكرة العدد الجاى من الكتاب عن الستات وقضاياهم وانهم عايزين بوست من مدونتى ينزل فيه وانه هيزعل لو قلت لا انا احمد بحترمه جدا جدا برغم انى مشفتوش غير مره واحده فى مدونى الشرقيه وعليها بعتله رد على ميله وقلتله موافقه هو كان قالى انه رشح بوست ثغرات قوانيين الاسره لحد كده تمام انما الغير تمام خالص معايا ان بعد ما قلت موافقه لا حس ولاا خبر فقلت يمكن فكره واتلغت وطنشت انما بئه مربط الفرس كما يقال واليى زعلنى ودايقنى وبالأحرى جرحنى انى اعرف بالصدفه البحته ان الكتاب نزل واتحددله معاد حفلة توقيع فى معرض الكتاب طب ازاى افهم انا قدرتكوا وبعت وقلت موافقه ااقل شئ انه يتبعت يتقالى بوست ايه اليى اخترتوه البوست نزل كامل ولاا متمنتج ومتشال منه يتبعت يتقالى معاد حفلة التوقيع ده ميل مبياخدش ساعات فى بعتانه ...انتوا طلبتوا بمنتهى الذوق وانا رديت عليكوا بنفس الذوق وقدرتكوا يبقى اولى ان سلسلة الذوق تكمل يا جماعه تبعتوا تعرفونى ايه من مدونتى اخترتوه تبعتوا تعرفونى نزل ازاى كامل ولاا غير تتعطفوا وتعرفونى بمعاد حفلة التوقيع مش خلاص اختوا الموافقه فخلاص التقدير لا يقابل الا بتقدير مش باهمال وتجاهل ومسح اى ذوقيات انا اعتبرونى عيله بس الحاجات الصغيره دى بتفرق معايا قوى قوى وهو ايه اصلا اليى بين البشر غير المعامله..

وحاجه تانيه لقيت فى اعلان الكتاب فى المدونات اسمى نازل محاسن بس لو سمحتوا شيلوا محاسن وحطوا صابر لان اسمى ملوش اى لازمه ولاا قيمه من غير اسم والدى الله يرحمه انا مبعترفش باسمى الا مزينه اسم ابويا الله يرحمه

انا اسفه لو كلامى ممكن يدايق حد بس دى النقط اليى انا اخدتها ونقطتنى وزعلتنى وبالأحرى جرحتنى
اعتبرونى عبيطه خفيفه مغلوشه انما اصغر الاشياء وارقها واذوقها بتفرق معايا كتير قوى قوى
ويا جماعه يا اخواتى البلوجر بما اننا اخوات ومن حقى عليكوا انكوا ترشدونى للصح لو انا محبكاها او واخده الامور بحساسيه او الامور مش لازملها حتة التقدير اليى بقول عليها دى ارجو ارجو منكم انكوا تنبهونى انا اختكم برضه
اوقات اخطئ وساعات اصيب واسفه اسفه اسفه لو كلامى ممكن يدايق حد بس انا بحب اعبر عن اى شئ جوايا اصل لو معملتش كده هتنقط وافطس و اموت يعنى فعلى ايه..واسفه كمان لو حد ممكن يدايق مع انى مش عارفه ايه بقوله ممكن يدايق ولاا مين يدايق اصلا بس اسفه وخلاص..
محاسن صابر بنت ابويا الله يرحمه

الخميس، 26 فبراير، 2009

ايتها المرأه انتى فى حاجه الي

رجل ما

رجلا ما تتنفسين من رئتيه
تتأملين ملامح شخصيته
ترسمين بيدك حياوات وحياه على جسده
ترين فيه كل رجال الأرض تحت اصابع قدميه
وكل سعادة الدنيا مخذوله فى رضائه عليك
رجل ما
تعيشين فى كنف محبته
تتوارين فى حنانه
تستمدين قوتك من امانه
معه وبسببه تحمدى الله على كونك انثى
ولاا تتمنى معه ان تخلقى غير انثى
رجل ما
يعطيكى ما أخذ
يواريكى فى قلبه المحاط بقفصه الصدرى حيث منزلك الأبدى
تنجبى منه فلذاتك او لا تنجبى
فيكفيكى العيش فى محيطه
والنظر فى عينيه
حيث تستمدين الدفء الذى طالما حرمتى منه فى حياتك
دفء فى برودة شتاء ديسمبر القارس
وتشعرين بنظرة عينيه بنسمات الهواء الطلق فى غيابات اغسطس الحار
رجلا ما يحمل معانى الرجوله
فى شخصه كما يحملها فى ملامح جسده
رجل يحترمك كأمه
يعطف عليكى كأخته
يحبك كزوجته ومحبوبته الأولى والأخيره

..اذا وجد فى محيطك
فمن الجهل بنعمة الحياه ان تتركيه
...........................................
الكلام ده لا يعبر عن اى حاله بمر بيها غير انى حابه ااقول لكل ست مطلقه او ارمله او غير متزوجه ..الحياه تحت غطاء رجل تعنى الكثير..ومش كعلاقه حميميه واحتياج مادى دى رغبه بتزول بانتهائها انما الاهم والمقصد هو بعد زوال الرغبه تبقى الرغبه الاهم فى الشوق اليى مشاركة الحياه بما فيها وما لها وما عليها مع روح ما تتقاسموا سويا الهموم والافراح وتصبح الدنيا ليالا ملاح حتى لو مليانه مشاكل
وشكلى كده بخرف
يله كله بياخد ما كتب له بس لو...لو...لو.. عشان خاطرى اقتنصى المحاوله واغتنميها بكره تعجزى وتتمنى ايد جنبك تتعكزى عليها..حد ينيمك فى القبر بايده ويعيش بعدك يفتكرك ويترحم عليكى ويكون سبب فى دخولك الجنه ..
صدقينى الأمر يستحق المحاوله ..اه هيا مش حياوات جمع حياه برضه ولاا الجمع تكسير على دماغى..

.........
الغلطات الاملائيه عندى للركب وشهرزاد ربنا يكرمها ارشدتنى لكتابة رجل صح ..شكرا يا شهروزه ربنا يكرمك يا جميله على العلومه انا كنت عايزه اكتبها رجلا فاهمين قصدى بس مش عارفه اوصلها
المهم كده تمام

الجمعة، 13 فبراير، 2009

اللحظه الأخيره وسرير من الأمومه


     الحمد لله انا حاليا لو هكتب حاجه مش هتكون ااقل من ..وحياة قلبى وافراحه..
اليومين اليى فاتوا كنت بموت قلبا وقالبا وكنت مدمره نفسيا ودى من الحالات القليله اليى بتحصلى لانى مش بالساهل بوصل لمرحلة التعب النفسى اليى بتقلب بعضوى وضغط واغماء والحاجات العبيطه دى انا اليى عجنى فى بعضى كده ان بيرو راح الخميس القاهره جده اخده وانا راجعه طول الطريق لبيتنا حسيت انى غريبه يعنى مفيش على لسانى الا شويه ادعى وشويه ااقول هو الخميس والجمعه ويجى السبت الصبح الخميس الجمعه ويجى السبت الصبح وبعدين حسيت انى جاتلى لوسه عقليه اسمها الخميس الجمعه ويجى السبت الصبح بس بعد كده كنا يوم الجمعه باليل وبكلمه وبكلم باباه فعرفت انه ممكن ممكن يجى الاحد الصبح وعليها من الاحد ومن ممكن دى ربنا ما يحرم حد من قرة عينه انا اصلا وانا عارفه هو هيجى امتى كنت ممنوعه من النوم والاكل والتركيز اه عايشه تمام بس مش زى الفل بس جه يوم الاحد ده واحساسى انه ممكن يغيب عنى اكتر من ما احتمل هو الولد عايش فى جو جميل وحب واهتمام يعنى ده بيرو مين يقدر ميحبش بيرو بس انا مقدرش على البعد ده وعليها قلت لياباه متتعبش نفسك انا هنزل القاهره اخده بكره يا بنتى خليه هجيبه انا ...لا لا مش قادره وعليه كنت فى المقطم 8 الصبح بالضبط طبعا مع احترامى لكمان نص ساعه كمان نص ساعه.. فاهمانى يا كيارا طبعا انتى وضد .. اكتشفت ان ممكن المواصلات تقهر وسرعة العربيه تتضاعف فى سبيل فلذة كبدى المهم شفته وقريت نظرى بيه وحسنت نظرى كمان برؤيته وقضينا نص اليوم انا وهو وباباه ومرات باباه مع بعض واتمشينا شويه فى المقطم وقابلت بالصدفه اعز أصحابى فى المقطم وبصراحه رؤيتها كملت اليوم الجميل برؤية بيرو واطمن عليها واخدت حبيبى فى حضنى واستخبينا من الدنيا وطرنا بعيد درجه اولى للشرقيه انا بصراحه خدت استراحه عند اختى ونمنا عندها انا وبيرو وصحينا على الشرقيه انا مش عارفه اغيب عن بيرو ازاى ولاا ده عشان اول مره ولاا الخوف من انه ممكن يقعد مده اطول من كده
انا فرحت قوى ان ربنا عدى ازمتى النفسيه على خير وان عينى اتكحلت برؤية ابنى تانى وانه قضى وقت حلو وممتع مع اهله وباباه وانهم فرحوا بيه وهو فرح بيهم كمان بس انا ساعات بخاف هو استجابة ربنا لدعائى رضا منه عليه ؟ ولاا والعياذ بالله كاره انه يسمع صوتى ؟ من لحظة ما لمحة ابنى من بعيد ولمسته وانا بقول يا رب يكون استجابتك لدعائى حب مش حاجه تانيه
اه انا وحشه وحشه وحشه واوحش ما اكون وابغض البشر فعلا وقولا بس بحاول اكون زى ما امرتنى على قد ما ااقدر
......................
انا هرد على تعليقاتكوا وحبكوا واهتمامكوا ربنا ما يحرمنى منكم ولاا يحرمكوا من فلذات ارواحكوا وهزوركوا وطبعا مش هقول حضروا القهوه وخلوها مضبوط وبلاش بن محوج

التفت يمينا وشمالا ..واماما ووراء
لأجد نفسى فى منتصف شئ ما
بدأ لى يتراءى تتضح رؤياه
انه يأتى مقتربا

وكلما اقترب كلما اصبح اكثر وضوحا
يا له من وسيم برغم ..كل ما سمعت عنه
يبدو وديعا
قد جاء وحانت اللحظه
وخاب كل الرجاء
فى ان يخلد بشرا فى دار فناء...

يا ترى امتى ؟
كل شويه عمرى بينقص ثانيه
.......................................
عندما يجعل ذراعى وسادته
وقلبى غطائه
عندها احس بأهميتى
وبأن منه عطائى
فهو مصدر قوتى ودفئ ان وجد وحياتى
وليدى الصغير الذى
سيظل عمرى فدائه
واظل احيا انا
رمال تحت اقدامه
....................
اهه الكلام اليى فوق عندى مرتبط ارتباط وثيق بالكلام اليى تحت انا بموت وبتقطع ..اكتر موت مؤلم مع انى مجربتش اموت قبل كده هو بعدك عن من تحب

الاثنين، 9 فبراير، 2009

الملايكه يسكنون الأرض احيانا

الملايكه.. مش دايما غير مرئيين ولاا دايما مش عايشين معانا ملاصقين لينا ولارواحنا ومصاحبين انفسنا كما الظل
البشر..مش كلهم وحشين فى المجمل ولاا كلهم حلويين روعتهم فى رقيهم بأنفسهم واختلافهم فى تهذيب ارواحهم والسمو بيها
وتبقى من المبختين والمرضى عنهم لو صادفت فى حياتك بشر على نفس الشاكله الملائكيه
انا هتكلم عن انسانه فى عذوبة نهر النيل وفى جمال السما الصافيه وفى رقى السيده سكينه وحكمتها وخبرتها ولاا اعتى حكماء الصين
انا بتكلم عن شمس النهار كلكوا تابعتوا المواضيع عن اللقاء فى مدونات اخواتى الصغيرين اليى عايزين الضرب ضد المفعوصه واختها ام مصاصه كيارتى وشموسه طبعا افردت للحديث عن اللقاء مساحه فى مدونتها
انا كنت ومازلت هتجنن عشان اشوف البنانيت الاختين الصغيرتين كيارتى وضدتى بس الظروف والوقت قطموا وسطى لانى كان المفروض اودى بيرو لباباه عشان يقضى اليوم معاه وانا كنت جايه من الشرقيه والمفروض اطلع الولد المقطم لباباه وذوقيا مبرداش اخلى ابو بيرو ينزل ياخده من ااقرب مكان بقول برضه لما اسيب الولد مع باباه فى البيت ووسط الفه عكس ما اسيبه فى الشارع ويستغرب الجو وانى هسيبه وامشى المهم الضريبه دفعتها كاش وملحقتش البنات عشان اشوفهم بس تتعوض وهما انتقموا لنفسهم شر انتقام شركونى شركونى بس منهم اى حاجه مقبوله انا الكبيره بئه وبعدين يتصلوا يقولولى فى التليفون على التشريكه وانا اضحك اضحك لحد ما شفت البوستات فمش بطلت اضحك لا كنت هفطس من كتر الضحك ..المهم التاخير ده قلت عليه لازم اروح لشموسه واختم اليوم الشاق ده بحاجه حلوه فخدت بيرو ورحت لشموسه وبعد وصف للبيت وخلافه يا دوب طلعت من الاسانسير ذهلت من اليى شفته انا شفت ليدى قدامى مديتهاش اكتر من 28 سنه وقلت يمكن بنتها اه والله واكدب فى روحى حتى بعد ما سلمت عليا وفضلنا نتكلم ااقول لا اكيد شموسه هتسطع كمان شويه ذهلت يا جماعه من جمالها ورشاقتها وشكلها ليدى فى العشرينات ليس الا بس بعد ما فقت تأكدت انى على اعتاب الستين جنبها ..بسم الله ما شاء الله طبعا عليها.. فعلا جمال الروح بينطبع اكيد على الشكل
وبعدين شفت ملايكتها من ارق ما يكون ومن شابه امه فعلا ما ظلم ادب.جمال.دماثة خلق..الفه وود فى مقابلتهم حسيت انى مع بنات اختى وشموسه الكلام معاها متعه ما بعدها متعه الحكمه والاحتواء والصدق والحب مش سهل انك تلاقيه فى شخص واحد دلوقت انا حسدت نفسى اليوم ده على معرفتى بيها فعلا وخرجت من عندها ادعيلها بظهر الغيب زى دعواتها ليا فى الحج
اليى يعرف انسانه بالشكل ده والرقى ده يمسك فيها بكل ما اوتى من قوه وده اليى انا وضد وكيارا هنعمله اكيد
...وبعد شويه واحنا بنتكلم ومن موضوع ممتع لموضوع اكثر امتاعا كلمنا عمرو بدر المفكر والمبدع والراقى والمثقف جدا جدا وصاحب الحبشتكنات انا اتشرفت بمعرفته كمدون بس ذهلت من عذوبة كلامه ودماثة خلقه وذوقه العالى جدا جدا ومكنتش عارفه اشكره ازاى على اهتمامه انه يكلمنا انا وكيارا وضد عنده رقى وسمو غريب حسيت انى بكلم لورد انجليزى او كونت من كتر ما حسيت برقى فى اسلوب كلامه..
انا استمعت واتبسطت قوى بمعرفة النماذج البشريه الراقيه دى وبعتذر لاخواتى الصغنطتين بس ده ميمنعش ان مفيش مصاصه المقابله الجايه وفيه ضرب بس ضد وكيارا حبايبى وهيضربوا برضه
شموسه مش هيوفيكى اى كلام حقك بيتك من اكثر البيوت الفه وود واليى ممكن ادخلها فى حياتى
عمرو بدر لو كل الرجاله برقيك ده كانت محكمة الاسره اتقفلت
ملايكة شموسه عندكوا اجمل وارق ام ربنا يباركلكوا فيها
انا استنيت يا شموسه لما تخلصوا بستاتكم واتكلم انا واعبر بئه عن احساسى بيكوا
................................

الأربعاء، 4 فبراير، 2009

بشر فى المحكمه( ريهام ومحاكم التفتيش)

اما ريهام.. فحكايتها من واقع سجلات الدنيا مش غريبه انما كبنت يحصلها كده حاجه صعبه قوى ..خطيبها اليى هو ابن عمها اليى هما الاتنين كاتبين كتابهم وهيتجوزوا (يعنى خلاص الرباط المقدس او الحزام حتى ) ..بيغير عليها ماشى يغير انما يشك زى الدبوس لا يحرقها اهه ده اليى مش ممكن ابدا يولع فيه وفى امثاله نار جهنم ...
ازاى احرق بنى ادم ازاى ائزى حد بالدرجه دى المهم الاستاذ ساديزم بعد ما ولع فيها وقبلها كان ضاربها فى الشارع رافض يطلقها ( صحيح ويطلقها ليه هو هيلاقى حد اغلب من كده يطلع فيه كل العقد والكلاكيع البشعه اليى فيه)
المهم واتعمله قاعده عربى وافرنجى كمان انما هو راجل راجل راجل ازاى يطلق بنت عمه لحمه ودمه هوا يحرقها بس


......ام وليد والطفس

ام وليد (وهيا اصلا معندهاش ولاد وعندها 3بنات جه منين وليد ده معرفش؟) هيا فى الخمسينات كده بالتقريب وطبعا انا مقدرش ااقول فى وشها كده وعندها 3 بنات وبعد عشرة عمر طويله بينها وبين جوزها فكر بدل ما يستر واحده من بناته يستر روحه راح اتجوز وساب العيال وامهم من حوالى 10 سنه وهيا لما خلاص يأست انه يطلقها او يصرف على بناته لجأت للمحكمه فشغاله الله ينور ويعينها من القضايا ما لذ وطاب المهم انها ست على باب الله كما يقال معندهاش دخل ثابت والحياه صعبه والحمل تقيل بالتلات بنات والاسعار تفطس (مش من الضحك) بس الغريبه بئه انها رافعه قضية الطلاق مش عشان تتجوز تانى ولاا عشان تخلص من اسمه المربوط فى رقبتها لا دى رفعاها عشان تاخد الورقهويتصرفلها بيها معاش تأمينى زى مساعده للمطلقات
..شفتوا الست بتعمل ايه والرجاله بيعملوا ايه ( مش كلهم برضه ولاا كلهن برضه )

الاثنين، 2 فبراير، 2009

بشر فى المحكمه (ميرفت والوغد )

انا كاتبه من زمان زمان سلسله اسمها بشر فى المحكمه ودى عرضتها فى مدونتى القديمه الجديده اليى هيا عايزه اتطلق برضه بس كانت على البلوج بس من غير سبوت وبعدين من زمان عايزه انزلها هنا لانى حابه انكوا تشوفوا وتحسوا ببشر قابلتها فى المحكمه وتشوفوا اشكال مختلفه من القضايا وصراعات البشر الانسانيه فهاخد الوقت الجاى فى المدونه لعرض كل بوست بشر من البشر الكتير اليى فى المحكمه وبعد كده ان ربنا امد ليا فى العمر عندى موضوعات كتير كتير مكتوبه باحاسيس مختلفه فى وقت ما من الحياه وما زالت حبيسة ورق كشاكيلى اليى اتكتبت بفعل جو المحكمه .....
..............................
ميرفت والوغد

رضينا بالهم والهم مش راضى بينا ده الوصف الازم لحكاية ميرفت شابه (وشايبه برضه)فى التلاتينات وعشان شكلها متوسطة الجمال (او معدومه متفرقش) من الاخر عشان النصيب اتجوزت واحد اكبر منها فى السن بكتير بكتير وكان معرفها انها هتكون الزوجه الثالثه ورضيت لكن بعد الجواز فوجئت انها الزوجه الخامسه وانه واخدها عشان يغيظ بيها طليقته الرابعه عشان ترجعله يعنى يلعب بواحده ومستقبلها عشان يغيظ عصفورته المهم الكناريا ده بيلعب فى الخمسين او الستين وطبعا وده الطبيعى ورا ميرفت الويل هو وولاده اليى هيا كانت فاكره انها هتصلحهم ده على اساس انها خريجة خدمه اجتماعيه آه والله خريجة خدمه اجتماعيه وهو مش متعلم من الاساس ( وعلى فكره هيا مش لاقيه شغل وده عشان الوكسه قصدى الوسطه وتقديرها جيد جدا واهه فى الاخر نهايتها رول زى اى رول فى المحكمه ليه بدايه مستنيه النهايه )...ميرفت على فكره كل اخواتها عباقره وشكلهم كده بختهم مايل يعنى واحده دكتوره وواحد مهندس وواحد متخرج من آداب انجليزى بتقدير جيد جدا ( بس مات الله يرحمه ..يا بخنته هوا محدش بيحسد حد على الموت بس ده مات شهيد فعشان كده يا بخته )......

السبت، 24 يناير، 2009

امتى نقول للمطلقه مبروك

ده مش تحديث ده اعتذار.......

بعتذر بشده عن تقصيرى فى زيارتكم او تكملة الرد على التعليقات ..امبارح هاجمتنى موجة برد غريبه اول مره تحصلى تكسير غريب فى العضم مع اعتلال ملحوظ فى الصحه انا قلت هدوس على نفسى وارد على التعليقات بس والله مش قادره والبوستات الجديده عينى اليى عماله تحرقنى دلوقت هتطلع عليها عشان ااقراها واتابع جديدكم
انا اسفه والله وخجلانه جدا جدا منكم ..حتى حاولت ازور مدونات مقدرتش هيا مدونة مرمر وكنت هأغمن على روحى

وحاجه كدهمهمه قوى استاذ ابو شو شو حضرتك نورت المدونه تانى وتالت ونفسى الاقى لحضرتك مدونه مفتوحه
اتمنى فعلا ...وبعدين انا مش عارفه لينك الفيديو اليى حضرتك بعته بتاع ايه هو عامتا مش بيفتح بس يا ريت تكون حاجه حلوه واكيد هو حاجه حلوه طالما من حضرتك....
اسفه والله وارجو محدش يزعل من تقصيرى ارجوكم ارجوكم
وادعولى بيرو مياخدش البرد ده منى اصل الحكايه مش ناقصه دى بالذات
...تحديثاتى زى وشى عايزه تجميل ....اسفه كمان مليون مره بس انا التعب مبهدلنى فعلا

تحديث وتحفيز وبينهما خبر.....
.................
السلام عليكم ازيكم يا جماعة الخير بجد انا لسه راجعه من القاهره حالا واول ما دخلت البيت على المدونه علطول بجد انا مبسوطه بتعليقاتكم وفرحتكم ارآكم قوى قوى

فقرة امبارح من برنامج كل ليله كانت من اروع ما يكون انا كالعاده اتبسطت قوى قوى استاذ شعبان يوسف اليى كان معايا فى الفقره من اروع ما يكون هو اديب وليه اهتمام خاص بالمدونات وكان شريك من افضل واروع ما يكون فى البرنامج ....والحوار وموضوعه كان حلو قوى
حتى المذيعين من اجمل واظرف ما يكون اسامه منير واضح جدا ان مش صوته بس اليى مميز لا وروحه كمان شخصيه متحدثه وودوده جدا جدا
وهبه الاباصيرى من ارق ما يكون ولا تقل ود والفه وروح حلوه عن اسامه يعنى بجد حلوه من بره وجوه

والاستاذتين الرائعتين الجميلتين الظريفتين المميزيتين.. هو الجمع ده تانيث اعتقد..
هما على العموم معدتتين فى البرنامج استاذه وفاء الرائعه واستاذه محاسن الجميله ام قصة شعر حلوه وام اسم على اسمى ..... الاتنين من اروع واجمل ما يكون
شكرا ليكم جدا على كرم اخلاقكم وذوقكم معايا
انا يا جماعه بجد اتبسطت قوى قوى من الفقره الذيذه دى ويا رب اليى شافنى تكون عجبته
.....................
انا هستريح شويه وهرجع علطول ازوركم واشوف جديدكم وارد على حبايبى وكلامهم الجميل فى التعليقات ..اذا حييتم بتحيه ...

اشوفكم ان شاء الله على خير كمان شويه ........
وشموسه شوفى عرفت اعمل التحديث اهه ...يموت المدون وايده على الكيبورد بتلعب..




آه انا ملخبطه ومتلخبطه ومش عارفه ابتدى الكلام ازاى ولا على اى شاكله ... بس اليى هعرف ااقوله

لما تبقى الست قضت جزء غير هين من عمرها فى جو حضرت المحكمه وتكون عاشت على اعصابها سنوات فى انتظار حكم يعوض ما فات وتستنى وتستنى عشان يتحقق المراد اليى بيعجزه بعد كده طريق تانى فرعى ورئيسى اسمه استئناف ولما يكون بان قدامها من وسط طريق الضباب شعاع بسيط بيقول ممكن نغير الاتجاه ونسلك طريق اخر فى سبيل اشياء اخرى ...تبقى غلطانه لو ما مشيتش وجريت ورا هذا الشعاع حتى ولو سراب

واتكلم بوضوح بدل المتاهه اللغويه اليى انا عملاها دى

يا جماعه انا بعد المشوار الطويل نفسى اتقطع ومش ضعف لا انا صحتى ولا صحة تايسون ابو عضلات انما لان انا مشيت فى الطريق لاثبات حق ما وعشان اضمن حق ابنى وما انقصش من حقه شئ ممكن اتحاسب عليه فيما بعد قدا ربنا ولانى كنت عايزه احقق شئ ربنا بغضه بس حلله الا وهو الطلاق للضرر

بس لقيت ان فيه بادرة خير ومعاهدة سلام ولاا كامب ديفيد ولقيت ان سكة المحكمه مش هتوصلنى لشئ الا لو نويت انى احتفل بعامى الثمانيين فيها ..وبرضه هيفضل الدافع لانى احقق شئ مش مستمتع بلا شئ الا وهو ابنى ..فلقيت ان ممكن بشوية تنازل كتير او بسيط منى اضمن لابنى انه يعيش حياه مستقره فيها حب من عاتلتين ورعايه من بشر كتير اعمام وجدود واب مكنش يعرف شكله ايه واخوات من ابوه يحبهم ويبقى قدوتهم واخوهم الكبير ولقيت انى ممكن اخد ورقة طلاقى وانعم برؤية ابنى فى جو ناعم وخالى من المشاحنات وعليه انا اتطلقت فعلا يوم الثلاثاء الماضى وده نصر ليا مش هزيمه وعرفت انه نصر بعد ما ابنى قضى يوم الجمعه مع والده واعمامه وجده وجدته شفت فرحه فى عين ابنى وحسيت بحب ليه

يبقى ليه اكابر واحارب على شئ فى النهايه ممكن اوصله بطريق تانى وليه احارب على حق ابنى وهو اكيد الحب والرعايه والحنان اليى هيشوفه اهم اهم بكتير

.............

انا حاليا وفى الظروف دى مقدرش اشجع واحده على انها تفضل مستمره فى طريق المحاكم ده اليى تقدر على انها تاخد حقها من غير الطريق ده تاخده

وثغرات القانون مش هسيبها انا وراها والطريق طويل فيه خطابات شجب ..حلوه شجب دى زى تصريحات القمم العربيه .. وادانه بالمره

وفيه وقفات ستتزامن مع وقفات عيدى الاضحى والفطر للمطالبه والتحفيز على سد الثغرات القانونيه دى ومسح المعاناه المريريه عن كاهل ستاتنا الغلابه والمساكين والدعاء صدقه لينا

وطبعا هعلنكمبكل جديد وسأخطركم باليى هيحصل اولا باولا



...............

حته على جنب

....

على فكره وانا فى الطريق ورايحه بابنى اول زياره لبيت جده كنت حاطه امل كبير فى ربنا وبدعى كتير وكانكل همى اننى امسح لى شؤائب متبقيه من سكة النزاع اليى فاتت دى فقولت ايه يمسح كده غير انى ارجع اعمل زى ما كنت بعمل زمان الحاجات البسيطه اليى كانت بتحسسنى انهم اهلى وعليه

اول ما شفت جدى ابنى ميلت على ايده عشان ابوسها زى زمان لنه برضه فى مقام والدى

وبوسة دماغ جدة ابنى وقلتلها ماما تانى بعد ما كنت بقول طانت

وبكده اكون كسرت حدة وعنفوان النفس الاماره بالسوء عندى

وزوجة ابو ابنى بوستها ورغيت معاها لما صدعتها لانها برضه هتبقى ان شاء الله ام اخو او اخت ابنى فمينفعش يكون فيه اى ضغائن تجاهها

وابو ابنى بقئه بمثابة اخ لانى الحمد لله دى تالت طلقه وفعلا يسعدنى جدا انه يكون اخ وبار كمان



انا كنت يوم الجمعه بسعادة عبد الرحمن فى قمة واوج سعاتى

وبان الامور ماشيه كما ارجو من الله سبحانه وتعالى فى قمة افرست بحالها من الرضا والسعاده

وحسيت ان اى شئ راح واتنازلت عنه سعادة ابنى باهله وبيوم زى ده لا يعوضه اى شئ وفداه كل شئ



الستات اليى فى المحاكم والله ما هتخلى عنكم ولا عنى لان فيكم مستقبلا وبعد الشر يعنى اى حد عزيز عليا واليى هقدر عمله وقفات ووقفات لما يجيلى دوالى ساقين كمان عشان نعدل شئ فى قانون الاسره

وربنا عالم ان نيتى خالصه لوجه انا كده مليش مصلحه زى ما عمرو حبشتكنات وشموستنا كانت قالت انك حتى محدش هيقول دى بتحارب عشان نفسها..شموسة النهار او ملاك النهار بالاحرى



........................

معلش الكلام ملخبط والبوست غير متزن بس انا مستعجله ومرتبكه النهارده فيه ليا لقاء فى برنامج اسمه كل ليله على النيل للمنوعات الساعه 9 انا قلت للمعده هما اكيد اتصلوا عليا غلط فيه مدونيين كتير افضل منى فهيا قالت عشان المدونه قلت ماشى يمكن نعرف نعمل حاجه

انا قلت مع انى مبحبش ااقول اصل بصراحه شكلى بيبقى وحش فى التليفزيون انا فى ارض الواقع ااقرب ما اكون لصوفيا لورن بس وهيا كبيره

كل اليى بيسألوا عليا ربنا يكرمكم من كرمه الواسع وانا اسفه انا غبت انا شكلى اتعملى عمل مع كل بوست جديد يحصلى حاجه ومشاغل واغيب عنها عن التدوين بس راجعه ان شاء الله للزيارتكم ودوشتكم تانى وهرد على تعليقات البوست اليى فات

بس بعد بكره ان شاء الله

دعواتكم واسفه لو صدعت حد او خيبت امل حد فيا

انا طول عمرى وحشه وتصرفاتى هوجاء وعمياء وغبيه انا اسفه جدا ليه ولمين وعشان ايه الله اعلم بس اسفه وخلاص

آ ه صحيح خلاص ايه وعليه لما تكون الامور انتهت بالصوره المريحه دى او على الاقلل لحد كده يبقى نقدر نقول للمطلقه مبروك ويا ريت متشوفيش غيرها

بس المدونه واهدافها مستمره لحد ما اروح المكان اليى متر فى متر ..لا لا مش السجن ..القبر قصدى القبر فاتطمنوا ستظل عايزه اتطلق و هيا عايزه اتطلق و

ويمكن فى يوم اكون سبب ما فى راحة بال واحده فى يوم كانت معاناتها زى معاناتى

شموسه انا حاولت انقل التحديث من تحت لفوق زى ما قلتيلى معرفتش خالص مبيتاخدش كوبى بتاتا فايدى اخدتنى لبوست جديد وخلاص ...اصل متعرفيش دماغى نصها حشو فاضى وساعات كتير مبفهمش فى التكونولوجيا ولاا ابجدياتها حتى فاسفه معرفتش اعمل اليى وعدت حضرتك بيه
اسفه جدا جدا كمان

الأحد، 18 يناير، 2009

كل واحده ونص وواحد يحطوا نفسهم مكانى لا مكانها

كان املى انى انزل بوست غير ده شاغلنى بقالى فتره
بس مفيش طبعا شئ يشغل ويبهدل الكيان ويعصف بالحاله النفسيه زى اليى انا فيه دلوقت
القضايا بقالها من 2005 وهيا بتتأجل وبتتأجل يعنى لحظة سعاده وانتصار ما من عمرى بتتأجل معاها
انا يا ساده عمرى راح فى المحاكم وشعرى ابيض من هول ثغرات قوانينها
واليى طلعت بيه من ال تلات سنيين ونص او اربعه مش فاكره هو قرار تمكين مناصفتا بشقة الزوجيه اليى سعرها وصل حوالى 700 الف جنيه زى ما جارتى العزيزه شقتها جابت فى اخر تتمين ليها ..
وبخلاف القرار المصيرى بنفقه شهريه للصغير ب100 جنيه ليه و100 لامه رضا رضا رضا قوى ده حتى المبلغ ده بيكفى اى صغير ويفيض ده على اساس ان الصغير كتكوت بكبيره قوى شوية دره يشبعوه
المهم انا هسبنى منى ومن حالى الممل ده وهدخل فى حال قريب ليا
دلوقتى واحده عزيزه عليا وعليكوا والله ودى مش فزوره خالص خالص دى لزوم ترويق الجو العاصف بقنابل الفوسفور والدردنيل
المهم عزيزتى دى بعد ما كان طليقها بيقلها اتنازلى عن كل شئ واديكى ورقة طلاقك دلوقتى الامر اتطور بعد قرار التمكين وبئه بيقلها طب خدى الحاجات اليى جبتيها ونص مؤخرك وكتى وقولى يا فكيك
طب نفقة الولد ؟
ابد ابدا ابدا
طب لا لا لا وانا والمحاكم والله المستعان

شويه بعد البلطجه والملطجه والعب بالقوانيين حوالين الشقه يعنى لقي ان قرار التمكين صعب العب بيه او مش بالساهل والشقه يا ناس كانت متاجره على عفش الغلبانه مفروش بخمس تلاف جنيه فى الشهر فالراجل الراسمالى العصامى بيتجنن كل ما يفتكر ان الشقه كل يوم بيمر من غير ايجارها بيخسره فلوس وهو يخسر عمره وفلذة كبده اليى اكبر من كبد الحوت ولاا يخسر مليم حتى ولو على شئ مش من حقه بالضبط ..
ده حتى اتجوز وقعد فى الشقه عشان يضيع عليها التمكين لقى الامر برضه صعب .. والله لسه فى قضائك خير يا محروسه... والمواسم عماله تيجى الموسم ورا الموسم والشقه سعرها بيزيد وكل ما التقييم المادى ليها يعلى يزداد جنونه وشغفه اكثر واكثر بالشقه يعنى مش برؤية الغلبان ضناه وعليه رجع للست اليى احلىسنيين عمرها اتفنت من اجل حقها وانها تنول شرف انها تاخده بالمحاكم طالما الذل للمرأه للركب يا عينى وااقل حاجه تتقال خلى المحاكم تنفعك المهم رجع بعد اخر تسعيره للشقه ولاا تسعيرة اللحمه وبعد ما غلب حماره الحكيم فى العب المتين فى قرار التمكين مش بفعل ضميره يعنى
انه يعرض على الست ام كعب داير فى المحاكم دى انها تاخد مؤخرها اليى هو 20 الف جنيه مش يورو و5 الاف جنيه نفقه متاخره عليه حيث انها بقالها حوالى 8 شهور بتصرف نفقه للكتكوت قصدى الصغير البرئ يعنى قبل كده 3 سنيين اهلها هما المتولينه ومتولينها بس عايشين ايه منتهى الدلع ربنا برضه مش بيخلى كل شئ غوامق غوامق لازم طاقة نور فى النص
المهم و5 كمان زيهم اسمعوا دى قيمة دهبها اليى الزوج المغوار سرقه واليى اصلا كان عباره عن محبس الماظ وواكمل ولاا كده كفايه كده كفايه يعنى الخمس تلاف دول ميصلحوش حاجه منه لو اتكسرت
وفوق كل الكرم ده كان مصر بصراحه على 100 جنيه نفقه و150 اجر مسكن ده على اساس انها هتسكن بابنها فى عشش فيلم حين ميسره .. وبعد طبعا ما قالته الشقه هتجيبلك ايجار 7 الاف جنيه زى ما انتا قلت بعضمة لسانك قالها خلاص هما 350 جنيه واذا كان عاجبك ودلوقتى ام عمر ضايع فى المحاكم دى محتاره قوى وواقفه على تراتيف صوابعها مش من رقص الباليه لا ابدا ده من التفكير
تعمل ايه ..تعمل ايه..؟
دلوقتى قدامها خيار ومش مغسول كويس انها تفضل فى طريق ضئ القناديل وفى سكة المجبرين المحكمه وتفضل فى التشتت ورحمة ان ممكن فى يوم تسمع بودانها انها اخدت حكم ويا سلام بئه لو بعده مفيش استئناف وده من المستحيلات الاربعه وانها كمان تفضل تحارب تحارب على تعديل الثغرات بس ما هيا عارفه انها ممكن تموت وتتحلل والثغرات تفضل ثغرات بخلاف انها مش حاسه انها بتعمل حاجه لغيرها قوى قد ما هو لنفسها الشريره الست الوحشه دى
او انها ترضى بالقهر الراهن قصدى يا جماعه الوضع الراهن وتقبل وتستعوض المولى عز وجل فيما اخذ وتنفد على راى طليقها بجلدها املا واملا وعمرا فى انها تربى ابنها فى ارجاء اهدئ من قاعات المحاكم وان ابنها مش يلاقيها لابسه الصبح ويقلها رايحه فين يا ماما ؟
تقله رايحه اشم هواء مرافعات فى المحكمه
وانها تتفرغ بكل حرقتها وكبتها ومرارة ما حصلها وتدافع بروقان بال عن كل اليى زيها يمكن فى يوم تقدر تعملهم حاجه ويكون ده سبب قوى فى دخولها الجنه اليى صاحيه قايمه بتحلم تشوفها من بعيد حتى
وانها كمان تنفذ امل ورغبة والدها الله يرحمه اليى مكنش راضى على الطريق ده من البدايه وكان مصر على تنازلها عن كل شئء وتنفد بجلدها هيا وابنها اليى كان بيزعقلها لو بس صوتها عليى عليه وقالتله ده غلط
بحجة ايه انه محدش يزعق لبيرو حفيدى وانا عايش ده ابن روحى وياخده فى حضنه حضن مش هيحس زيه تانى لا هو ولا امه
هيا مش كانت واخده طرق ا لمحاكم دلع هيا لجئت ليها مرغمه لانها اتزلت وهيا متجوزه وعانت وهيا مطلقه وشافت ان الست كوره شراب فى رجل الراجل وده اليى حصل معاها اتضربى اتبهدلى اتنازلى اتمرمطى اصلكوا ملكوش قيمه واخرتكوا بتترموا فى المحاكم .. هيا الغلبانه حبت تثبت لنفسها وللمجتمع وليه انها قويه وان المجتمع والشرع كفلها حقوق من الصعب والعار انه تتنازل عنها
لقيت الغلبانه الامر غير كده لقيت ثغرات قانون تذل وتطول العمر فى المحاكم بس مش فى الدنيا
ولقيت مجتمع فيه ناس بيبصوا للست اليى بتحارب على حقها على انها طماعه وجشعه مع ان ده اليى ربنا شرعهه لها او انها ست يا سلام على سلوكها المنحرف وبجاحتها منقطعت النظير
واه البيه الطليق معتمد على ان ابوها قضى عمره فى الغربه وانه راجل كان حيلته قرشين وانهم عايشين كويس فباصص ليها انها تصرف على الولد ما انتوا تصرفوا على قاره ..قارة ايه دى انا معرفش يمكن اطلنتس القاره المفقوده

يا جماعه الست الغلبانه ام الولد اليى بتحارب على اى مليم عشانه واليى خايفه عليه من الدنيا ومرعوبه لتسيبه فى ثانيه وترحل لعالم اخر ميبقيش حد يحن عليه ويتغمده بالعطف الا اهلها طبعا اليى مش محسسينه بحاجه ولا حارمينه من اى حاجه

تعمل ايه هيا تتنازل وتقبل
ولاا تكمل فى سكة الالف مطب وثغره

ارجوكم افيدوها عشان هيا محتاره ومقهوره ومخنوقه وتعبانه وخايفه كل لحظه انها تكون بتعمل شئ ضد ارادة باباها وانها تكون بتضيع استقرار وامان ابنها من ايديها يعنى ولد يكبر يلاقى امه فى المحاكم شئ يدعو للنشأه الغير سويه نفسيا على الاقل

بس هيا ايه مصره على تعديل القوانيين دى وهتعمل وقفات احتجاجيه ولاا وقفة عيد الاضحى وناوياها نيه انها تفنى ما تبقى من عمرها عشان تدافع عن كل حق وليه ..ست ..امرأه..حرمه يعنى ..مكسورة الجناح وبتصوصو ولاا مؤاخذه
معلش البوست طويل بس صبركم شويه
وبعدين يعنى معرفش اكرم صاحبتى يعنى عندى فى المدونه ولا ايه واعرض مشكلتها من طئطئ للسلام عليكم...
اه نسيت ااقولكم واوضح لكم برضه ان الزوج عامل تمكين للزوجه التانيه فى الشقه وان ابو الزوج جد الولد البرئ عامل لنفسه تمكين كمان بس لسه متحكملهمش يعنى الكل بيحارب صحبتى فى الشئ الوحيد اليى القانون ادهولها فا التوضيح ده لازم منه عشان تعرفوا تدوها راى سليم ..على اساس ان الشقه ام 700 الف حديده وحديده على مهب الريح معاها برضه وده لو لو التمكين طاله من الثغرات ما طال باقى القوانيين...
ومعلش طولت عليكم انا وصحبتى رغيين بئه من شابه صديقته فما ظلم...

............................
تحيث واخر الاخبار...
على فكره اليى خلا صاحبتى تفكر انها تخلص باى شكل هيا نصيحه مدونه معروفه ومحبوبهوحد من ارق كائنات البشر واكثرهم دماثة خلق وحلاوة روح ....
الا وهى شموستنا شمس النهار
بصراحه مكالمه تليفون منها فيها نصيحه صادقه من انسانه حبيبه وعزيزه ولا يهمها الا مصلحتى ومصلحة ابنى ..قصدى مصلحة صحبتى يعنى ومصلحة ابنها
وعليه عشان قلبها طيب ونصيحتها صادقه انا سمعت النصيحه
....انا رايحه انا وصاحبتى يعنى اخلص الموضوع الطويل والمجهد ده
ارجو منكم الدعاء والدعاء والامن من مكر اى ماكر
استودعكم الله وصباح الخير
ومحدش ينسانى من دعائه لحد ما ارجع
قصدى صاحبتى برضه