الخميس، 26 فبراير، 2009

ايتها المرأه انتى فى حاجه الي

رجل ما

رجلا ما تتنفسين من رئتيه
تتأملين ملامح شخصيته
ترسمين بيدك حياوات وحياه على جسده
ترين فيه كل رجال الأرض تحت اصابع قدميه
وكل سعادة الدنيا مخذوله فى رضائه عليك
رجل ما
تعيشين فى كنف محبته
تتوارين فى حنانه
تستمدين قوتك من امانه
معه وبسببه تحمدى الله على كونك انثى
ولاا تتمنى معه ان تخلقى غير انثى
رجل ما
يعطيكى ما أخذ
يواريكى فى قلبه المحاط بقفصه الصدرى حيث منزلك الأبدى
تنجبى منه فلذاتك او لا تنجبى
فيكفيكى العيش فى محيطه
والنظر فى عينيه
حيث تستمدين الدفء الذى طالما حرمتى منه فى حياتك
دفء فى برودة شتاء ديسمبر القارس
وتشعرين بنظرة عينيه بنسمات الهواء الطلق فى غيابات اغسطس الحار
رجلا ما يحمل معانى الرجوله
فى شخصه كما يحملها فى ملامح جسده
رجل يحترمك كأمه
يعطف عليكى كأخته
يحبك كزوجته ومحبوبته الأولى والأخيره

..اذا وجد فى محيطك
فمن الجهل بنعمة الحياه ان تتركيه
...........................................
الكلام ده لا يعبر عن اى حاله بمر بيها غير انى حابه ااقول لكل ست مطلقه او ارمله او غير متزوجه ..الحياه تحت غطاء رجل تعنى الكثير..ومش كعلاقه حميميه واحتياج مادى دى رغبه بتزول بانتهائها انما الاهم والمقصد هو بعد زوال الرغبه تبقى الرغبه الاهم فى الشوق اليى مشاركة الحياه بما فيها وما لها وما عليها مع روح ما تتقاسموا سويا الهموم والافراح وتصبح الدنيا ليالا ملاح حتى لو مليانه مشاكل
وشكلى كده بخرف
يله كله بياخد ما كتب له بس لو...لو...لو.. عشان خاطرى اقتنصى المحاوله واغتنميها بكره تعجزى وتتمنى ايد جنبك تتعكزى عليها..حد ينيمك فى القبر بايده ويعيش بعدك يفتكرك ويترحم عليكى ويكون سبب فى دخولك الجنه ..
صدقينى الأمر يستحق المحاوله ..اه هيا مش حياوات جمع حياه برضه ولاا الجمع تكسير على دماغى..

.........
الغلطات الاملائيه عندى للركب وشهرزاد ربنا يكرمها ارشدتنى لكتابة رجل صح ..شكرا يا شهروزه ربنا يكرمك يا جميله على العلومه انا كنت عايزه اكتبها رجلا فاهمين قصدى بس مش عارفه اوصلها
المهم كده تمام

هناك 127 تعليقًا:

رئيس جمهوريه نفسى يقول...

يا ام بيرو يا جامدة حلوة قوي بجد الخاطرة دى وعجبتنى

ريمان يقول...

انا ممكن اتمنى من الدنيا دى طفل يبقى ليا كل حياتى


لكن


مش ممكن اتمنى راجل بإيده يدمر ما تبقى من حياتى

سمكه واحده يقول...

انا التعليق مظهرش ليه بقي حوصل ايه!

Nabil يقول...

السلام عليكم.....

اختى الغاليه الجميله الرقيقه اللى كل يوم بنشوف فيها حاجه جديده

بجد كلام عقلانى وموضوعى ومظبوط جدا جدا

الحمد لله بقيت من الاوائل

تحياتى ليكى وسلامى ليكى ولابن اختى

هانى زينهم يقول...

حقيقة بس ما حدش فى ايده نعمة بيحس بيها ومش معنى كلامى ان الرجالة نعمةr انا اقصد فى العموم دايما مش بنحس بقيمة الحاجة الا لما تروح وساعتها نقول كان فى حاجة هنا ومشيت . ما علينا اهم من ده كله اننا اطمنا عليكى وازى عبده ؟؟

سمكه واحده يقول...

تيب نرجع ونقول التعليق تاني
الله المستعان
كنت بقلك ياستي الكلمات حلوووووووه اوي
بس ياريت تفتكري ده ممكن يعني يحصل؟
ياسلام لو يحصل طب بس يعني مهو اص طب اقولك اممممم نتمني ذلك (هيه)و نتهيده كومان
ايوه وعيهم يا ام بيرو الستات دي ذي القطط تاكل وتنكر وتقولك معرفش ايه يا شيخه بلا كلام فارغ ناس تعصب وتنرفز اوعي اوعي بس سبيني

ربنا يسعد ايام يا ام بيرو يا سكره ويحققلك كل اللي تتمنيه
كلامك حلو اوي

ahmed_k يقول...

لو كان الكلام ده تخريف فياريت كل الستات تخرف كده
والله معاكي حق يا أم بيرو
أيوه كده قوليلهم ووعيهم
وعلى رأي أحمد ماهر
الراجل مش بس بكلمته
الراجل برعايته لبيته وأسرته

سلااااام يا أجدع محاسن

صبرني يارب يقول...

تماااااااام الكلام يا جميل

وبطلي تقولي لا يعبر عن حاله شخصيه

اولا لاها مش تهمه ثانيا مش معقول كل ما نكتب حاجه نبررها خلينا ما نخنقش بعض

المهم انتى مش بتخرفي ولا حاجه انتى بتقول كلام تمام التمام يا جميل

واه حياوات صح على اد علامي يعنى

بس بعد اذنك لفت نظري تعليق ريمان

ليه كده التشاؤم ده اتعشمي فى ربنا خير

الراجل مش هو بس الى ممكن يدمر حياتك

لا انتى لازم يكون ايدك بايده فى تدمير حياتك يا اختي الفاضله

العلاقه الثنائيه سبب فشلها دايما الاثنين

تحياتي لحضرتك

بوسه كبيره لكى يا محاااااااااااااااسن امووووه

الازهرى يقول...

اذا وجد فى محيطك
فمن الجهل بنعمة الحياه ان تتركيه


تحياتى على الكلمات الاكثر من رائعة والنصائح الغالية

ســـهــــر يقول...

حلوة اوى يا اختى الخاطرة
كلمات مستحيل تكون خارجة غير من قلب جميل

Khaled يقول...

لا يكتب مثل هذا إلا من يعرف معناة بحق ...... و يستشعرة أيضا

لكى منى وردة بيضاء

عاشقه الرومانسيه يقول...

رجلا ما تتنفسين من رئتيه
يعطيكى ما أخذ
يواريكى فى قلبه المحاط بقفصه الصدرى حيث منزلك الأبدى

اين ذلك الرجل ومتى يأتى؟؟؟؟؟؟؟؟؟

قوس قزح يقول...

عجبنى جدا كلامك
مش بس لانه حلو و معناه جميل
لكن لانك شخصية سوية و خرجت من تجربة اليمة بدون عقد و كره للحالة اللى مرت بها

ربنا يسعدك انتى كمان و تلاقى الشخص اللى يكون لكى الحضن و الامان

ABOALI يقول...

رجلا ما
عرف الدنيا وايقن
رجلا ما
اراد ان يحب ويحب
رجلا ما
اراد يستنشق العبير
ان يفرح فى يوم زمهرير
رجلا ما
عرف ما له وما عليه
رجلا ما
باع نفسه فى احضان شريكة الايام
شعر ان الانثى حياه وليس اوهام
رجلا ما
عرف ادم وحواء اكتمال لرب الكمال
رجلا ما


احيييكى على البوست ومعانيه الصادقه
وان لم نجد كل هذا الصفات فى رجلا ما
فيكفى
اننا ننظر كلانا حواء وادم
اننا انسان خلق مكرم
فهل نكرم بعض نحن



اشكرك بشدة وعنف

تامر علي يقول...

أيوه حياة تجمع على حيوات لأن أصلها مقصور حيي - حييات وعلشان تكرار الياءات المفتوحة قلبت اخرها واو :)

الإنسان له دور في الحياة وفيها جانب قدري كبير لكن لازال عندنا بعض الخيارات ...وكما قلت فعلاً يحب البحث عن الإختيارات وعدم تركها تضيع :)

تحياتي وتقديري

عمرو يقول...

الله ينور عليكى و الله يا أم عبد الرحمن بارك الله فيكى
كلمات معبره و جات فى وقتها و أكتر ما أعجبنى فيها أنها جات منك رغم أنك لسه خارجه من تجربه صعبه لكن بفضل الله قدرتى تخرجى منها سليمه نفسيا و روحيا
و على فكره كلماتك دى برضو أحب أوجهها لكل رجل فقد شريكة حياته لسبب ما اٍما بالطلاق أو الأنفصال أو بغياب الجسد
أحييكى من كل قلبى

(أم البنين) يقول...

حبيبتي في الله
نعم لابد أن تحتاج المرأة للسكن والمودة والرحمة..
وكذلك الرجل..
وأحيانا يبتلينا الله جميعا بإبتلاءات تختلف من شخص لآخر
ومنها أن تحرم المرأة من الزواج (يقولون عنها عانس)أو يموت زوجها(فتترمل أو تنفصل عن زوجها فتكون مطلقه
لا يعني هذا أنها أصبحت عرجاء
ولكنها لا زالت تقف على قدمين
وستقف بهما أمام الله عزّ وجل
لتحاسب...وأيضا تكافأ
فإن صبرت واحتسبت فلها ما تقر به عينها
وإن سخطت...فقد خسرت في الدنيا وفي الآخرة
نسأل الله أن يرضينا جميعا بما قسمه الله لنا من نعم...ومن إبتلاء

حرررررووووووف يقول...

حكمل قراية وارجع اعلق

غروب يقول...

كلامك جميل اووووووى كاعاده

ومش تخريف ولا حاجهةبالعكس

انتى دخلتى جوا نفس كل واحده حتى لو مش متجوزه

ربنا يصلح حالك يااااااارب ويسعدك
ويكرمك في ابنك

موااااه

انت تسال والكمبيوتر يجيب يقول...

طبعا الصحيح انت بحاجه الى رجل بكسرهتحت اللاموليس رجلا وبمناسبة زيارتنا نوجه لك ولزوارك هذه الدعوه
ونرجو قبولها
دعوه
الأخ العزيز/او الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

Habiba يقول...

ياسلاااااااام
ياسيدى ياسيدى عالرومانتيكيه

اه ياستى عندك حق وانا معاكى جدا فى الموضوع ده

بس اوقات بيبقى ضل راجل ولا ضل حيطه
واسألى مجرب يااختشى :)

ريمان يقول...

محاسن


لا والله حبيبتى ده بيرو ده سيد الرجاله كلها

بس انتى عارفه رايى من ناحيه الرجاله ومن ناحيه الجواز


اعمل ايه بقى

والله ماما غلبت معايا فى الموضوع ده

بس انا دماغى ناشفه اوى

معلش يا قمر

بحبك والله يا حماتى

شمس النهار يقول...
أزال المؤلف هذا التعليق.
NIDAAL .R يقول...

البوست ده حلو اوى .. بس على قد حلاوته على قد انه كئيب، مالك انتى وآآآبى مستلمنا بوستات كآآبة ليه اليومين دول ..
بس تصدقى فعلاً انتوا من غيرنا مش تعرفوا تعيشوا .. بأعترافك اهو .. وشهد شاهد من أهلها
هههههههههههههههههههه
والعكس صحيح على فكرة .

انا حره يقول...

سنسن ياسنسن

هوا فى رجاله كدا والنبى

طب دول نلاقى منهم فين

طب ممكن لو لقيتى تحجزيلى معاكى واحد بس تلفيه كويس والنبى

هههههههههه

واحشانى ياسكره ابقى خلينى اشوفك

elsha3er يقول...

يا سلام عليكى يا محاسن قوللهم والنبى
هههههههه

لا بجد جميلة جدا والله يا محاسن كل يوم كتابتك بتزيد فى نظرى عن اليوم اللى قبله وعشان كدة ان شاء الله يومين كدة وحعرض فكرة لذيذة لينا كلنا وبجد حتفيدينا لو بقيتى معانا

تحياتى


احمد الشاعر

mostafa rayan يقول...

محاسن لو كان تخريفك كدة لوسمحتي ماتعمليش حاجةفي حياتك غيرانك تخرفي
كلامك دةحلو قوي قوي قوي
وبجد هي دي حقيقة العلاقةاللي المفروض تكون بين الراجل والست
ربنا يكرمك يا محاسن وييسر لك كل الخير

fashkool يقول...

العزيزه محاسن صابر .. تحياتى
جميل ان اقرأ لك هذه الكلمات .. فمازلت لا تكرهين الرجل .. الحمد لله

بس نفسى تيجى تقولى لطنطك الحاجه ام اسامه الكلمتين الحلوين دول عشان هى كل يوم الصبح تكرشنى من البيت وتقول يا شيخ روح .. انت لازق فينا كدا على طول .. شوف لك حد غيرنا بقى .. وتقوم رازعه الباب فى وشى .. وانااطلع جرى قبل ما يتطور الموضوع لمكانس ومقشات وحاجات من هذا القبيل
تحياتى

blue-wave يقول...

ياااااااااااة
ياريتها كانت تقرا الكلام دا

شهرزاد يقول...

محاسن الرقيقة

الحياه تحت غطاء رجل تعنى الكثير
...
قال تعالى
"ومن آياته أن خلق لكم أزواجا لتسكنوا إليها وجعل بينكم مودة ورحمة..."
إنها آية من آيات الله عز وجل في هذا الكون ولن نختلف على أن المرأة بحاجة إلى الرجل وإلى السند والحماية لها في الحياة مثلها مثل الرجل الذي يحتاج إلى إمرأة ترعى بيته وتربي أولاده
الحاجة إلى السكن والدفء والحنان والاستقرار هي احتياجات خلقها الله للمرأة وللرجل على السواء
والمرأة بطبيعتها العاطفية محتاجة للعطف والحنان والإحساس بالحب
ولكن أحيانا ربنا بيحرمنا من بعض النعم لحكمة خفية هو يعلمها
ليرى إن كنا نصبر أم لا
أو بيأخرها علشان يختبرنا وبعد كده أكيد هيكرمنا فهو الكريم الرحيم بنا
المطلع على سرنا وعلانيتنا

ربنا يكرمك بابنك ويعوضك كل ما فات من أزمات ومصاعب بكل الخير والسعادة والفرج

وملاحظة صغيرة: هناك خطأ في عبارة "رجلا ما" والأصح " رجل ما"

وتقبلي مروري ومودتي

Sweet Violet يقول...

اذا وجد فى محيطك
فمن الجهل بنعمة الحياه ان تتركيه

انتى متأكده انه من الجهل ؟؟ مش ممكن يكون حاجه تانيه مثلا اللى تخليكى تتركيه

انتى مش عارفه موضوعك ده جاى فى وقت صعب جداااا و الكلمه دى بالذات لفت دماغى قووووى

قاعدت افكر فيها كتييير قبل ماارد عليك

قريت كلام شموسه عجبنى ردها قوووى

بس بردو حصلى حاله من اللغبطه و الحيرة بسبب الكلمه دى و رد شموسه

اعمل فيكى ايه بقى دلوقتى ؟؟ هه

طيب يعنى لو قبلتى حد كده فعلا رجل كده يعنى و انتى مابتحبهوش هيبقى بردو من الجهل تتركيه ؟؟؟

شكلى هبدأ اهيس هنا .. لما اكلمك بقى ابقى اتناقش معاك و اصدعك لايف

Sweet Violet يقول...

صحيح بخصوص ردك فى موضوع ازهرى

اى نعم الكلام كان عليا انا فى البوست

لكن البوست كله كان المغزى منه فى السؤال الاخير (:

Sweet Violet يقول...

اما بقى بخصوص الرقم ياقمر

افتكرت انك كنتى بعتيه فاخدته من الميل القديم اللى بعتيه

(:

موجة يقول...

سيدتى الفاضلة
احب اقولك ان الكلام فى غاية الجمال والروعة وبجد كل انثى محتاجة وجود رجل جمبها
لكن انا عندى اعتراض صغنن اوى اد كدة
عارفة ايه هو
ان الرجالة ماتو فى الحرب
وسمعنى بقى سلام خلى السلاح صاحى

حـــــ الــجــنــة ـــــور يقول...

أختي وحبيبة قلبي محاسن أولا وحشاااني

وتانيا وحشاني جدا
وتالتا ورابعا عقبال ماتيجي خامسا وحشاااني جدا وبزااااف دي بتاعتنا ماشي

بجد دايما مواضيعك جميلة زيك يا قمر .... بوست رائع وكل ست لازملها راجل زي منا كل راجل لازملو ست وكدا تهون الدنيا ويتعاون الكل على السراء والضرااء

اللهم إجعل لبنات المسلمين الزوج والذرية الصالحة أمين يااا رب العالمين

دمتي بخير وصحة يا غالية وربي يسعد ايامك
سلامي لعبد الرحمن وماما ...

princess يقول...

حلوة اوى بجد بجد حلوة:))

mohamed ghalia يقول...

اذا وجد فى محيطك
فمن الجهل بنعمة الحياه ان تتركيه
كلماتك رائعة يا محاسن
وواضح إنك اتعلمتى كتير من تجربتك
ربنا يسعد أيامك
دمتى بكل الود

طـــائر الليــــل الحـــــزين يقول...

اقولك ايه بس
كلامك لمس كل حته فيه واللهى العظيم
عارفة يارييت كل البنات والستات يقدروا يقروا كلامك ده وكمان يعملوا بيه . اكيد هيفرق معاهم كتييييير
انتى قدمتى مجموعة نصائح على طبق من دهب عشان يقدروا يعرفوا ان الحياة من غير رجل اكيد هيكون ناقصها كتير خصوصا لما يكون الراجل ده عارف يعنى ايه ربنا ويعنى ايه مسؤالية وحياة واسرة واطفال وزوجة
بصى مهما اتكلمت مش عارفة اعبر عن اللى حسيته فى البوست ده
تحياااااااااااتى وبشكرك بصوتى وبصوت كل ست ممكن تستفاد من البوست ده
تسلمى وتعيشى يا قمر

موناليزا يقول...

روح الموضوع جميلة احييكى عليها

romansy يقول...

الله عليكى يا استاذه
فيه على فكره رجاله كتير كده ولما بيحبوه والله بيحبوه بجد جدا
وبيكونوا قد المسئوليه بس دايما البنت هى اللى تقدر تنظم العلاقه دى وتجددها دايما علشان الحياه مش تبقى مله ابدا

شمس النهار يقول...

ماشاء الله عليكي يامحاسن
كلام جميل جدا
بس عايزه اقول لك ان المفروض الانسان سعادته تكون طالعه من جواه هو مش معتمده علي حد يسعده
وكمان التجربه التانيه دي عشان الانسان يخوضها تتطلب شجاعه كبيره جدا
الا اذا ربنا حط الاتنين في طريق بعض وحبوا بعض من غير اختيار في الحاله دي لازم الاتنين يتمهلوا شويه عشان هما وصلوا لبعض محمليين بمرارة الماضي مجروحين من تجارب سابقه فا لو مااخدوش بالهم كل واحد هيدفع التاني فواتير غيره
يعني لازم يكونوا من الوعي والحب والتفاهم انهم يتخطوا ويعلجوا بعض من جراح الماضي
تفتكري في حد عنده مراره يعمل ده في الزمن ده
الا لو شخص فاهم وواعي وبيحب بجد وبيحب حب حقيقي وفهم قيمة الانسانه اللي ربنا بعتها له
و الخوف هو عدو الحب
والست اللي بتنجرح قوي بتخاف من الجرح مره تانيه حتي لو حبت بتفضل خايفه من حبيبها لايجرحها ومابتعرفش تستمتع بالحب ده اللي كله خوف وترقب وانتظار يعني بتحط الحب الجديد ده تحت الميكرسكوب لحد ياالعمر يجري او الحب ده يداوي كل الجراح وينجح الاتنين في تخطي كل العقبات والجروح والشروخ ويحلي المراره اللي في النفس ويكونوا واعيين وفاهميين الموضوع صح
يعني يتعجزوا علي بعض
وساعتها يكملوا الاتنين مع بعض ماتبقي من العمر ويعوضوا العمر اللي راح وبتكون هي دي جائزة السماء اللي امي قالت لي عليها بتنزل للصابرين
البوست حلو
عارفه ان ردي الاول صدمك بس انا كنت بتكلم في العموم مش عن نفسي
لكن لو هتكلم عن نفسي مش هيقضيني البلوجر كله يامحاسن
نصيحتي الشخصيه ليكي
ماتخفيش لو جه لحد بابك اكيد لو بيحبك هيعبر بيكي وبحبكم لبر الامان ماتخافيش
الخايف مابيعرفش يفكر والا يعمل حاجه والا يستمتع بحاجه
وخوفه ده بيخسره حاجات كتير وبيزعل منه حبيبه نفسه
وبعد كده يزعل من نفسه

حاجات جوايا يقول...

ازيك يا سنسن يا جميلة
اخبارك ايه وحشااااااانى جداااااا

ايه الكلام الجامد ده
هو فيه كده فى الدنيا
ولا ده رجل من عالم تانى ولا ايه ؟؟
أكيد فى الجنة
صح ؟؟؟

سلامى لبيرو الجميل ولمامته الاجمل

أكون أو لا أكون يقول...

حسونتي... ازايك؟

البوست...

اممم

تفتكري فيــــــه رجل في المواصفات ده؟
لو فيه كنت اتجوزت من اليوم ههههههههههههه

للأسف... الرجال قليل...
ده واقع...
ده حقيقه...
ومش حدخل في نقاش قد يبدأ ولا ينتهي...
اعتقد انك فاهماني... ولا مش فاهماني؟؟؟
المهم...
لا للزواج بالنسبه لي ههههههه

tota يقول...

فيه بنات كتيير مستنين يلاقو راجل بمعنى الكلمه يحسو معاه الامان
يحسو ان الرجوله لسه مانقرضتش
وان واجبات الراجل ماقتصرتش على الفحوله
وان لسه فيه امل
وانا منهم
كلامك جميل جدا يابيرو تسلم ايدك

دعاء مواجهات يقول...

نعم هى فى حاجة لكل هذا ولكن هل هو موجود اصلا هذا هو السؤال

تحياتى ليكى عزيزتى

ادعوكى لزيارة

http://mhlpyaaa.blogspot.com/

حاسوباتيه يقول...

عارفه كلمات عبرتي بيها عن مطالب اي ست او بنت في الدنيا افتكر مش كتيره علينا ان يكون كل واحده تطلب راجل بمعنى الكلمه بس اظاهر انها بقت صفه صعبه عليهم هما انهم يوجدوها عندهم بحييكي جدا على كلماتك

سمكه واحده يقول...

المرأه:دفئا وحنانا وسكن
الرجل:امانا وقوه وعطف

المرأه: العطر الذكي والكلمه الشجيه
الرجل: الانف الذي يشم ذلك المسك والاذن التي تعي ما تسمع

المرأه:ابتسامه
الرجل:الفنان الذي يرسم تلك الابتسامه

المرأه:دمعه
الرجل:ارق من تلك الدمعه ولكن خلف اسوار وقلاع وحصون

جميل ان يؤدي كل منهم دوره بلغه التفاهم والصدق والحب والاحتواء
واخيرا جميله المرأه حينما تظل مرأه
ووسيم الرجل حينما يبدو رجل
بس خلاص ونقول بردو
نتمني ذلك

شخـا بيــط مـحـجـوب يقول...

لا تعليق سوى اسعدك ربى

ربنا يكرمك ويسعدك

تحياتى ليكى

شخابيط MAHGOUB

قطرات من شواطئ الحياة يقول...

مميزة كعادتك !
جميلة هي خاطرتك و الأجمل تعليقك بعدها
كلامك واقعي جدا و يصل إلى القلوب بعمق
دمتِ مبدعة دائما و أبدا

dodda يقول...

كلام جميل

والحلو اوى انه طالع من جواكى برغم ما تعرضتى له من رجل..

كمية مصداقيه غير عاديه
وعندك حق فيها 100%

كل منا يبحث عن من يستند عليه فى اخر العمر

ربنا يصلح حالك وحال المسلمين
ويبارك فى ابنك

مسدس صغير يقول...

كلمات تستحق الدراسة

بوست ولا اروع

اشكرك عليه

غير معرف يقول...

نورا

ياحبيبتي الي اتلسع من الشوربة ينفخ في
الزبادي وربنا يخلي لك ابنك مافيش راجل بينفع واحدة كلهم زي بعض مابيهمهمش غير نزواتهم وشهواتهم زي الحيوانات مافيش راجل يعرف يعني مشاعر رومانسية والي انتي بتوصفيه مش مشاعر هو اشتياق لعلاقة زوجية جسدية وهو طبعا من حقك ولكن انك تعبري عنه بإستحياءمش على الملأء وكل الي بيرد عليكي شباب مراهقين الحب اسمى وارقى من الي انت كتباه وصدقيني مافيش راجل يستاهل

هو انت اتطلقتي لية لما انت بتقدري قيمة الرجل قوي كدة

أحــوال الهـوي يقول...

انت في الطريق الصحيح
لم تخذلك التجربه و لم تاخذ منك الكثير لكي تبراي منها حتي لو كان ما كتبتيه لا يعبر عنك و لكنه يعبر عن مكنونات اي امراءة سويه و قويه

خيرك الله من يتفهمك و يثلج به صدرك
و كلمة للجميع العلاقة الحميميه بين الزوجين ضرورة و لكنها جزءنسبي من الحياة المشتركه قد يتفق الجميع اثناءها و لكن المجمل في العلاقة من مودة و رحمة تستهلك من يومنا الوقت الاكبر

تحياتي

محمد فارس يقول...

الاخت الغاليه والعزيزه
محاسن ام عبد الرحمن
كلماتك اكثر من رائعه
وانا مش هاقول ان الكلام ده مستحيل
لو فكرت النساء في الرجل كما في كلماتك
واشعرته باحتياجها اليه لذاته
من الممكن ان تجد المرأه رجلا يعاملها كأمه وكاخته وكازوجه وحبيبه
لو تعاملت هي معه بحنان الام
وعطف الاخت ومحبة الاحباب
امرأه لا تعشق النكد امراه لا تستمع
لنصائح الاخروات لان لكل رجل طباع ومواصفات تختلف من شخص لاخر***
لماذا تقولين ان هذا الكلام لا يعبر عن الحاله التي تمرين بها
فأنت امرأه تمتلكين من المشاعر والاحاسيس ما تمتلكه الاخروات وما لم تمتلكه ايضا وهذا ليس عيبا
عموما دعواتي بان تجدي من يعوضك
عما عانيتيه
مع خالص تقديري واحترامي لكي

صوت من مصر يقول...

حاله جميله جدا وتسلمى
شكرا لكلامك بس الدنيا هى الى مش موافقه

بالنسبه للبوست الى فات
انا بجد من غيرك مقرر عدم الجواز لانى معنديش
×( تشمل حاجات كتير )

mahasen saber يقول...

رئيس جمهورية نفسى.......

مش اجمد من خواطرك يا ريس يا فنان

منورنى يا محمود دايما

mahasen saber يقول...

ريمان..........

ريمو ريمو ريمو يعنى هو الطفل هيجى منيين ها مهو لازم يجى من اب حنين ومحترم ويعوضنا خير

يعنى الرجاله معانا معانا وورانا ورانا

حماتك بتقول حكم الايام دى

mahasen saber يقول...

سمكه وحده .........

كل واحد ونيته ههههههههههه

سمكمك كانه ظهر يا قمرى

mahasen saber يقول...

nabil........

اخويا النبيل الصغير الجميل الطيب

رايك بيهمنى جدا يا نبيل وبيسعدنى جدا جدا
وبفرح من وجهة نظرك قوى ونظرتك ليا
انتا اخ وغالى قوى قوى كمان

mahasen saber يقول...

هانى زينهم.........

ده لو نعمه يا هانى يعنى لو معاك نعمه اصلا ازاى وليه وعشان ايه تسيبها ه
اليى يعمل كده اكيد حاجه من اتنين لمجنون لاما مش عاجبه نعمة ربنا

انما اليى معاه نعمه يكلبش فيها ويبوس ايده ورجله كمان عليها

ولاا ايه يا ابو ملك

بس مالك حاساك حزين ومدايقك ومزاجك مش ولاا بد خالص

روق وجهز ملك بسرعه بيرو بيكبر بسرعة الضوء

كيــــــــــــارا يقول...

طبعا انا قلتلك رايي ياسنسنتي في الميل كلنا محتاجين الراجل دا ومحتاجينه اوي لكن للاسف مش بقي موجود :((

mahasen saber يقول...

سمكه وحده.........

سمكمكتى حبيبتى وروح قلبى اليى لو مش عقلت شكلها اخرها معايا طاسة القليه او الشوايه بالكتير قوى ههههههههههههه

طبعا كل شئ جايز فى الدنيا واكيد لسه الدنيا مليانه رجاله بجد وستات بجد وبعدين متجننيش يا ام امبارح انتى يا اليى يدوبك متجبيش تمنتاشر سنه لحقتى اتعقدتى امتى

سمكمك حلاوتك بالسلطه والرز الابيض هههههههههه
امممممممممممممممممموه بهزر يا قمرى

A.SAMIR يقول...

ياااااااااااه
تصدقي بالله
سرحت جامد معاكي وانا اقرأ البوست دة
قد ايه الواحد بيبقى جاحد واناني لما تبقى زوجته او حبيبته بتتمنى له الرضا علشان يرضى ومع ذللك ممكن جدا يقابل دة بمنتهى النكران والانانية
زي بالضبط الام اللي مستعده تضحي بنفسها علشان اولادها يعيشوا ومع ذلك لا تجد الا كل جحود ونكران للجميل
قد ايه في ناس كتير في العالم دة بيعانوا من ناس تانية

mahasen saber يقول...

ahmed k.........

غردقاوى انا بوعى الست انها لو لقيت الراجل ده وطبيعى اى ست هتلاقى راجل بالصفات دى مش هتسيبه دى هتحبسه فى قفص الزوجيه

بس منورنى يا غردقاوى وبلاش احمد ماهر عشان انا بحبه جدا ولو طلع يمثل فى اعلان كلور بحبه برضه
ممثل عبقرى

منورنى يا غردقاوى
الا اخبار الميل ايه
فوازيرك معقده ههههههههههه ولاا انا اليى مبفهمش

mahasen saber يقول...

صبرنى يا رب ..........

صبرنى الحبيبه متكسفنيش بئه يا صبرنى هههههههههه لا بجد انا كنت قاعده بسمع بيرو مش ابنى المطرب براين ادامز ومنها جه كوبليه للست على دماغى وقبلها الصبح كنت ايه انا ببرر ايه
على رايك يا جميله ممكن يكون انا وممكن لا ولو انا ليه لا

بس بقلك يا صبرنى لو طلع الراجل زى اشرف كده مع ايمان تحبى الست تكمل معاه لايه للمشرحه ولاا لايه بالضبط

نورتينى يا قمر يا مبدعه

وقولى كلمتين لريمو ام عشرين سنه دى عشان انا غلبت معاها وشويه شويه هشد فى شعرى منها


نورتينى يا حبيبتى
ربنا يباركلك فى زوجك وكل من تحبين

mahasen saber يقول...

الازهرى.........

ايوه يا ازهرى واذا وجدت فى محيطك فتاه بالمثل اوعى تسيبه لان برضه من الجهل انك تسيب واحده بالصفات دى

نورتنى يا ازهرى وطبعا منورنى دايما وعلطول
وخف على ضد شويه
قالتلك الشركه مجبتش الحبريبقى الشركه مجبتش الحبر
هو شكلى انا اليى خدته بس هو الكيبورد اليى بيمشى بالحبر ده عملوه فين

mahasen saber يقول...

سهر.........

انتى يا حبيبتى اليى كلماتك اكيد خارجه من قلب رقيق وروح ارق واجمل عشان تقلى كده

ربنا يكرمك يا حبيبتى
ونورتينى يا جميله
وشرفتينى يا سهر بالزياره الجميله دى

mahasen saber يقول...

khaled.........

اخيرا خالد ادانى ورده بيضا كنت قربت ايئس من البويه اليى كل شويه الاقيها فى وشى ولاا المسامير والمعجنه يا سيدى

تسلم يا فنان وتسلم رقتك

ودايما منورنى ومشرف المدونه
وليك منى قرطاس فسدق شفت الرقه ههههههههههه قرطاس
يا الفاظى

mahasen saber يقول...

عاشقة الرومانسيه.........

موجود يا حبيبتى والله يعنى هيا الدنيا هتخلا من الرجاله وهتبقى دنيا فليه

بس متى ياتى
دى ربنا اعلم بيها بس اكيد ان شاء الله هياتى فى محيطك الرومانسى مثلك يا جميله

بس قوليلى انتى اتعديتى من ريمان ولاا ايه

mahasen saber يقول...

قوس قزح.........

داليا الغاليه والرقيقه الله يكرمك يا حبيبتى ده من ذوقك ورقتك وكرم اخلاقك


وهيا الدنيا كده يا داليا فعلا لا تخلو من الحلو كما الوحش يعنى اكيد فيه رجاله كويسه زى الوحشه
وفيه ستات كويسه كما الستات الوحشه برضه

نورتينى يا داليا وشرفتينى يا حبيبتى

عارفه يوم عيد الحب كنت عايزه احضر بس رحت اجيب بيرو من عند باباه واسامه كلمنى وكنت هموت واروح انا وبيرو بس الوقت كان ضايع

تتعوض ان شاء الله

mahasen saber يقول...

aboali........

لا كلام بعد كلام واشعار ابو على
منورنى يا ابو على ودايمامنور البلوجر كله بكلماتك الجميله وتعبيراتك الرقيقه وروحك الساميه
وافكارك المبدعه

دايما مشرف المدونه بوجودك

Soul.o0o.Whisper يقول...

سنسنتىىىىىىىىىىىىى

عثولتىىىىىىىىىىى



بجد بوست روعة روعة روعة
و آسفة على التأخير معلش
سامحينى


يااااااااااااااه
يا سنسن
ياااااه بجد لو الرجل دا يبئا موجود
فعلا مايتسبش
بس للاسف أنقرض

إحنا بنحاول نلاقى اشلاؤه الضائعة
لعل و عسى أن يبعث الله فيها الروح


يا مسهل يااااااااارب
:)




لا تقلق
لا يأس مع الحياة و لا حياة مع اليأس
هههههههههههههههههه







سلام يا قمرتى انتى

mahasen saber يقول...

تامر على.......

شكرا شكرا جزيلا على تاكيد المعلومه اللغويه اصل الغلطات الاملائيهعندى الكيبورد بيهنج منها

والانسان دايما بيعيش يدور على نفسه وعلى حد يونس هذه النفس ويسمو بيها للافضل

منورنى يا تامر
ومشرفنى دايما

عارف كل ما ااقرا اسمك افتكر تامر على الملحن

بس فيكوا صفه مشتركه الابداع هو باللحن وانتا بالكلمه والمواضيع الشيقه
منورنى يا تامر دايما

mahasen saber يقول...

عمرو.........

طالما اللورد قال الله ينور عليه يبقى الموضوع عجبه وتمام
وده شهاده تشرفنى واعتز بيها جدا لانى اعرف قدر عقلية استاذنا عمرو جدا جدا وبقدرها فوق الوصف

يا رب دايما كلا منا روحه تهتدى لمن يحب ويلاقى العوض عن صبره فى الدنيا كما الاخره ان شاء الله

منورنى يا استاذنا يا مبدع يا راقى

mahasen saber يقول...

ام البنيين........

اولا اهلا اهلا اهلا وسهلا بام البنيين نورتينى وشرفتينى بالزياره الكريمه

وكلامك مضبوط طبعا ويا رب ربنا يرزقنا جميعا من البشر خيرهم
اللهم امين

حضرتك نورتيينى جدا جدا وشرفتينى جدا بالزياره الكريمه

ربنا يباركلك دايما فى كل من تحبين

mahasen saber يقول...

حرررررررررررروف.........

تنورى يا جميله وكملى براحتك يا غاليه

mahasen saber يقول...

غروب.........

غروبتى بتقول انى مش بخرف يا غروب يا كدابه ههههههههههههه

يا حبيبتى تسلمى وتعيشى يا جميله
وانا سعيده ان وجهة نظرك كده يعنى فيها تفال حلو وجميل

دايما فى اسعد حال يا غروب
بس اوعى اوعى اوعى تغيرى البلوج تانى
عشان مش هيبقى عندى تفاؤل انا فى الحته دى
مورتينى يا حبيبتى

وربنا يرزقك باليى يستاهل روحك الحلوه وقلبك الطيب ده

mahasen saber يقول...

انت تسال والكمبيوتر يجيب.....

الف الف مليون شكرا على التصحيح
كمبيوتر صحيح

ونورتونا جدا جدا وحاضر هنتابع ان شاء الله

Beram ElMasry يقول...

الاخت العزيزة . mahasen saber
السلام عليكم ورحمة الله وبركاته
(الغلطات الاملائيه عندى للركب وشهرزاد)
مش مهم الاخطاء الاملائية ، ولا النحوية ، ولا حتى صياغة الجملة ، ولكن المهم هو الصدق فى القول ، لان مايخرج من القلب بالصدق يصل الى القلب وقد وصل
لك تحياتى والسلام عليكم ، ولا سلام مع اليهود

mahasen saber يقول...

habiba.........

ما انا يا هندسه بقول كده بس لو الظل ده وقتى او مؤقت او مش هيدفينا يعنى ظل زى قلته يبقى ملوش لازمه انما لو ظل هيقينا حرارة الشمس يبقى يا اهلا وسهلا بيه
فهمتى حاجه

منورانى يا قمر ووحشانى يا مجرمه انا قررت انصبك مجرمة حرب

وطبعا طبعا اسقطى بيرو من حسابات الظل بتاعك
طبعا فاهمه

متزعليش كده بئه

من غير عنـــوان يقول...

بوست قنبلة

بوست على الفطرة...
فطرة الإنسان التي فطرها عليها خالقه جل شأنه...

بس موروثات هذا الشعب تحرم... ( هي لا تحرم) إنما تتشدد لحد التحريم في الآتي:

*زواج المطلقه والأرمله... دي عاشت حياتها لولادها..

*زواج الرجل بأكثر من واحده... ده عينه زايغه...

مع إن الخالق أباح ... بل وحثنا على ذلك.. وكان الصحابه رضوان الله عليهم يتسابقون في زواج الأرمله والمطلقه قبل البنت البكر.. حصنا وحفظا لنساء المسلمين...
أما الزواج الثاني فأنا أتحفظ في الكلام عليه.. حتى لا أفتح على نفسي وإياكم نار مدافع ستات مصر
(:

بنيتي...

لكل وليف أو وليفه.. كُتب في أم الكتاب منذ بدء الخلق بيد الرحمن..

وكُتب أيضا التجارب الثانية والثالثة....الخ

وحسن الإختيار.. والإستشارة والإستخارة... مهم..

وحاجة كل إمرأه لرجل مثل إحتياج كل رجل لوليفه...

فطره...


أحسنت

أمنياتي

mahasen saber يقول...

ريمان..........

ريمو ريمو يا قمر حرام واحده رقيقه وجميله وبريئه زىك كده تكون متشائمه كده
اه التجربه كانت مريره بس يا حبيبتى ايمانك فى الله لازم يبقى كبير ونحمد ربنا على اليى مرينا بيه اكيد كيد احنا احسن وافضل من غيرنا بكتير

ومامتك عايزه تطمن عليكى

ربنا يرزقك باليى يستاهلك
انتى مكسب لاى حد يعرفك بما فيهم ابنى

mahasen saber يقول...

niddal pal.........

نضال بيه سوليفان منور منور البلوج واصحابه

مبسوط قوى اننا من غيركوا منعرفش نعيش هو اصلا لو الستات تعرف تعيش من غير رجاله او العكس كنا احنا جينا من الاساس

مالها ابى قلقتنى يا ابو اخبار سقع

طول عمرك صاحب الطبعه الاولى

منورنى يا رئيس التحرير

mahasen saber يقول...

انا حره...........

ههههههههههههه حرتى حبيبتى واحد والفه وبالمره اصلحه ايه يا حره هو انا هقعلك على طقم صالون هههههههههه

الدنيا مليانه بشر محترمه يا حره وهتلاقى نصيبك من الزوج الصالح لا يقل احتراما وحب وطيبه وبكره تقولى محاسن قالت

بس انتى اليى وحششششششششششانى موت موت
يا ام اسم بيجننى

mahasen saber يقول...

alsha3er.........

فكره لذيذه تعالى هنا اموت انا فى الافكار دى

بقلك يا احمد لو الفكره ناقصه سكر انا منسحبه بهزر بهزر بلاش لوية بوز

بقلك اخبارك ايه ليك وحشه جامده يا شاعر المستقبل والجيل الجديد بحاله

منورنى يا عمنا الكبير

mahasen saber يقول...

mostafa rayan........

درش درش اليى انا زعلانه منه كده الاخوه الادباء مبيعبروش اخواتهم الصغيرين ليه
اه الصغيرين حاسه انه عندك مانع

يا ربى ازيك يا مصطفى اخبارك ايه
يا رب تكون بالف خير وسلام ومامتك واخواتك يا رب يكونوا تمام ومبسوطين من الكتاب بتاعك

وبعدين بئه انتا عايزنى اخرف علطول
كده يا مصطفى دى اخرتها عايز الواد يتشرد

mahasen saber يقول...

fashkool.........

استاذنا الغالى وعمى الكبير والغالى برضه قوى قوى وقوى كمان عشان خاطر طانط ام اسامه

ازاى اكره الرجاله وهما منهم ابويا الله يرحمه واخويا وابنى وولاد عمى وولاد خالى وحضرتك واخواتى المدونيين وزمايايلى فى الشغل والحياه

لا يعقل ده حتى عيب فى حق بيروان امه تكره جنسه

بعدين يا عمو فشكول طانت شكلها بس بتحب تهزر مع حضرتك فتقبل الهزار بصدر رحب
يفضل يعنى

سلامى ليها ولمحمود والهام وجميع الاحفاد

ربنا يخلي حضرتك ليهم ويخليهم ليك

mahasen saber يقول...

blue-wave........

عمرو عمرو اخويا الغالى حمدالله على السلامه يا دكتور

ولاا تزعل نفسك تقراه متقرهوش طالما انتا مش ظلمتها وطالما ده اختيار ربنا ليك يبقى مش فارقئه قرايتها من عدمه

ولاا تزعل نفسك ونور الدنيا بكلماتك الرقيقه والعذبه
ومتزعلش هجوزك الى متخطرش على بالك
كنت عاملالك خاطبه امبارح وبدورلك على عروسه مع واحده حبايبتنا
بس شكلى مشروع الخاطبه ده فاشل

بس ولاا تزعل نفسك ربنا يكتبلك كل الخير لانك تستاهله فعلا

Abu ShoSho يقول...

الأستاذة أم عبد الرحمن
قال رجل للحسن البصري رحمه الله تعالى : إن عندي بنتاً قد بلغت سن الزواج ، وقد خطبها مني ناس كثير !!! فممن أزوجها ؟؟؟
فقال الحسن البصري :
زوجها ممن يخاف الله ويتقيه ، فإنه إن أحبها أكرمها ، وإن أبغضها لم يظلمها ..

لكن دوما يثور السؤال كيف نتحقق ممن يخاف الله، ليس عندي إجابة فهل أجد عندك واحدة؟

تحياتي

mahasen saber يقول...

شهرزاد..........

شهروزتى الحبيبه الرقيقه الغاليه

شفتى كنت كاتباها رجلا وكانها رجل كنبه مثلا يله تعيشى وتصلحيلى غلطاتى يا جميله

وكلامك طبعا طبعامضبوط المراه دايما تواقه للالفه والامانوالانكماش فى حضن رجل يحتويها

تسلمى يا شهر وتسلم رقتك وتعبيراتك المبدعه والمعبره

ونورتينى يا حبيبتى يا غاليه على قلبى جدا جدا

mahasen saber يقول...

sweet violet..........

ضد يا ضد
مش دى اليى خلتك تغيرى اسم البلوج

تعالى هنا خير خير كل الحيره دى خير لان ان شاء الله هيجى بعديها اختيار صح ثم راحت بال

نقول امين يا قمر
وبكره امشى فى فرحك ياجميله
كان نفسى يبقى على الواد بيرو يله ملكيش نصيب

اما ازهرى فانا قاعده ااقول لروحى حبر ايه بتاع الكيبورد البت هبلت الواد وللا الواد هبل البت ولاا انا اليى هبله وسطيهم

يله منكوا لشركات البريد

mahasen saber يقول...

ضد تانى ..........

انا لو كنت اعرف كنت بعتلك فيروس على الميل هههههههههههههههه

قال يعنى بعرف ابعت فيروسات وانا اليى ببعت الميل بالعافيه

مش مشكله اغير الرقم يا ضد ههههههههههه
هاتى بوسه امممممممممممممممموه اعزمينى فى الفرح بئه

mahasen saber يقول...

موجه.........

ليه كده يا موجه ايه اليى موتهم العدو ههههههههههه

روقى كده ياما دقت على الراس طبول ومش تجربه ولاا تجارب اليى تعقد الانسان
خلى املك فى ربنا كبير وانه خلق الحلو والوحش وان كل انسان فيه الجانبين

وربنا يرزقك باليى يخليكى تغيرى وجهة نظرك للافضل وللابد

نورتينى يا قمره
يا جميله
ربنا يسعدك يا حبيبتى دنيا واخره
اللهم امين

mahasen saber يقول...

حور الجنه.........

يا حبيبتى يا حور فينك فينك فينك وحششششششششششششششششششششششششششانى قوى قوى قوى موت ودى بتاعتنا احنا هنا فى مصر

اخبارك ايه وحشانى قوى قوى يا غاليه

ونورتينى يا بنت بلادنا الشقيقه
يا رب تكونى بالف خير وسلام

وربنا يرزق الجميع بالازواج والزوجات الصالحين يا حور يا رب

نورتينى يا حبيبتى وشرفتينى وطمنتينى عليكى بالتعليق الجميل ده
ربنا يطمن قلبك يا رب

mahasen saber يقول...

princess..........

برنسيستى الجميله الرقيقه
انتى اجمل وارق
وعمرها ما تكون اجمل من بوستاتك الرائعه يا برنسيس

mahasen saber يقول...

mohamed ghalia.......

اخويا الغالى محمد محدش بيتعلم بالساهل ههههههههههههه ايه رايك متفق معايا

الحمد لله على كل حال يا غالى
كل شئ اكيد للانسان خير

منورنى يا محمد يعنى منور بيت اختك يا غالى

mahasen saber يقول...

طائر الليل الحزن........

اولا تشريفك شرف كبير ليا وكبير قوى

ثانيا الكلمات دى تشريف اخر ليا وربنا يكرمك
انا سعيده قوى ان البوست مسك بالشكل ده وده ان كان فده من رقة ورهفة مشاعرك ليس الا

جزاكى الله كل خير
وربنا ينور بصيرة كل ست ورجل
ويسعد الجميع
اللهم امين

نورتنى وشرفتنى يا ارق الطيور الليليه على الاطلاق

mahasen saber يقول...

موناليزا........

ام ابتسامه حلوه انتى اجمل وارق يا قمر

نورتينى يا حبيبتى
وشرفتى البلوج

mahasen saber يقول...

romancey.........

ده لما تبقى الرجاله رومانسى يعنى دسوقى منور دايما

بس مش البنت بس اليى عليها نجاح العلاقه يا احمد وانتا مدرك كده كويس بس بتكدب فى روحك
الراجل عليه عامل النص لان العلاقه بينهم مشاركه النص بالنص مش حد يشيل ويستحمل غلطات حد

ولاا ايه يا رومانسى

منورنى يا ساهر ومشرف البلوج

mahasen saber يقول...

شمس النهار...........

شموستنا الرقيقه الدافئه
اولا انا مقدرش اعلق على كلامك لان ل حكمه تقال بعد حكمك وكلامك

انما يا شموسه كل اليى واجعنى من الكلام انه صح وان دى اغلب المخاوف اليى بتواجه اى ست بتخوض تجربه تانيه او لسه هتمر بيها

مش هقدر ااقول كلام بعد كلامك يا شموستنا
لان مينفعش اصلا
هقول ايه يا جميله

غير دايما مشرفه ومنوره وبتسعدى البلوج بزيارتك يا اجمل شموس الارض قاطبتا

mahasen saber يقول...

حاجات جوايا.........

سالى اهه ههههههههههه قمر دمياط منور اهه

يا حبيبة قلبلى منورانى
ويا قمر فيه فى الدنيا بس عمله نادره فمحتاجين مننا تنقيب عنهم ههههههههههه

والله وحششششششششششششششانى موت موت وبستقبل الاوف لاين بتاعتك وبرد عليها بتوصلك الردود

منورانى يا جميله
واخبار بوده ايه ربنا ما يحرمك منه ولاا يحرمك من من تحبين يا حبيبتى

mahasen saber يقول...

اكون او لا اكون.........

كونتى حبيبتى حبيبتى حبيبتى
اختى الغاليه اليى وحششششششششششششششششششششششششششششانى موت موت موت وبزاف على راى حور الجنه

وفيه يا كونتى كتير كتير رجاله كده واحسن متنكريش ماشى

وبعدين هتتجوزى يعنى هتتجوزى
هربيلك بيرو ايه رايك ينفع هههههههههه

وحشانى قوى قوى يا جميله وسلمى لطانطت واختك وبوسيلى ابنها الصغير اتفقنا ولاا هنختلف

mahasen saber يقول...

tota.........

توته الجميله منورانى اولا باول زياره يا حبيبتى وشرفتينى جدا جدا

وكل نساء الارض يا توته ده مطلبها ومبحثها الاول والاخير

ربنا يرزقك باليى يتقى ربنا فيكى ويرزقك الجميع ستات ورجاله بكل الخير
اللهم امين

نورتى البلوج وشرفتينى يا قمر

mahasen saber يقول...

دعاء مواجهات.........

دوده موجود طبعا يا قمر وقلنا يا جميل دول عمله نادره فمحتاجه مننا التنقيب
ولاا انتى ايه رايك يا دودتى

وحشانى جدا جدا وازورك طبعا يا جميله من غير اى دعوات
ده شئ يشرفنى ويسعدنى جدا يا دوده

mahasen saber يقول...

حاسوباتيه.........

اه يا حاسوبه دى مطالب اى ست فى الدنيا والله صدقتى يا حبيبتى

بس بس ايه برضه صدقتى فى جزئية انها بقت صفات نادره قلما توافرت فى رجل
بس نقول لسه الخير فى البشر موجود

ربنا يرزقك بكل الخير يا حبيبتى

نورتينى ومنورانى دايما يا حاسوبتى يا جميله

mahasen saber يقول...

سمكه وحده...........

لالا لا سمكمك خافت من طاسة الئليه هههههههههههههه ايه الجمال ده

ده اليى انتى كاتباه عايز يتعمل بوست لوحده
ايه الروقان ده ما هو سبب مصدره اريد ان اعرف فى التو واللحظه

يا ربى على رقتك وجمالك
قمر قمر قمر انا عندى اخت قمر

الماسينجر عندى كان بيفصل بسبب النت السيئ والنت كان بيفصل بسبب الماسينجر الاسوأ
شفتى هحلى الفزوره دى لحد ما نتقابل

وحشتينى يا جميله وملحقناش نجيب فى سيرة حد ولاا اتنين ولاا تلات حتى
حظى وحش

mahasen saber يقول...

شخابيط محجوب.......

وده ابلغ تعليق واسعد تعليق كمان
دعوه بظهر الغيب

ربنا يكرم حضرتك
ويباركلك فى كل من تحب

حضرتك نورتنى وشرفتنى بالزياره الكريمه
جزاك الله كل خير

mahasen saber يقول...

قطرات من شواطئ الحياه.......

انتى اليى جميله ورقيقه دايما يا قطره وعشان كده شايفه الخاطره والكلمات كده

نورتينى يا حبيبتى ووحشتينى جدا جدا

اخبار دراسيتك ايه
اخبار مامتك ايه يا رب تكون بالف خير
ورجاء بلغيها سلامى مع انها متعرفنيش بس احب اسلم على ست ربت بنت بالذوق والاخلاق والرقه دى

نورتينى يا حبيبتى

mahasen saber يقول...

dodda.........

دودا اختى الغاليه يا حبيبة قلبى

اصل ده البحث والمطلب الحقيقى لكل ستات العالم فمن هنا جات المصداقيه
بس انا سعيده ان الخاطره عجبتك بجد سعيده قوى قوى

نورتينى يا حبيبتى وشرفتى بيت اختك بالزياره الجميله

اسعدك الله فى كل من تحبين يا دودا يا رقيقه

mahasen saber يقول...

مسدس صغير.........

يا اهلا اهلا اهلا وسهلا بالبارود بهزر طبعا بجد مبسوطه قوى يا مسدس ان الكلام عجبك

عشان انا عارفه دماغك عاليه ازاى وفكرك قد ايه راقى فعشان كده مبسوطه ان البوست عجبك
وممكن اكون بقول كده عشان خايفه منك ها بهزر تانى
دى اسمها روح الدعابه بجد نورتنى جدا جدا جدا
وشرفتنى بالزياره وبرايك الراقى

mahasen saber يقول...

غير معروف........

اهلا بيكى يا نورا مع انى مش عارفه ليه بتدخلى بغير معروف مفيش حاجه تستاهل ان الواحد يخفى نفسه عشانها

اما كلامك فانا بتكلم عن مشاعر انتى مش مقدراها او بتهمشيها وبتخذليها فى شئ معين ودى وجهة نظر خاصه بيكى انما انا يا نورا يوم ما احسانى فى حاجه ماديه لرجل وان الشهوه بلغت بيا الأفاق فصدقينى مش هستنى على نفسى وهتجوز واشبع رغباتى بكاملها الحسيهوالمعنويه والماديه مش هقعد فى مدونتى ابكى على اللبن المسكوب لانى ببساطه بقدر نفسى قوى وبحترم روحى جدا

اما اتطلقت ليه فاتطلقت عشان قيمة الراجل اليى كنت معاه اعلى من قيمتى فمش قدرت اسمو واعلى لمستواه

نورتينى واتمنى الزياره الجايه تكونى معروفه ..نورتينى يا غاليه

والخلاف فى وجهات النظر لا يفسد للانسانيه قضيه مع انى معرفكيش فعلا

بس نورتى والله بجد وشرفتينى جدا وممكن يكون اسعدنى تعليقك لانه خلانى اطلع من جوايا كلام كتير فعرفتى نورتينى واسعدتينى ليه

mahasen saber يقول...

احوال الهوى........

امممممممممممم دايما بجد بجد بستنى تعليق حضرتك
ممكن لانى بحترم راى حضرتك جدا جدا وبقدره لانه دايما راقى وموضوعى

وممكن لانى بحب كلمات حضرتك جدا جدا وبتسعدنى للابد

جزاك الله كل خير عن السرور اليى بتدخله لقلبى باراء حضرتك وتعليقاتك الرقيقه والموضوعيه والجميله

وحضرتك صدقت فعلا بتستهلك من وقتنا وحياتنا الكثير يعنى عمرين بيتضافوا على بعض
بس يا ترى مين يقدر ويعى

نورت المدونه حضرتك وشرفتنى جدا جدا ومش محتاجه انى ااقول طبعا

سمكه واحده يقول...

عارفه يا محاسن انتي راقيه جدا والدليل علي كده ردك علي غير المعروف بجد والله كنت منتظره ده منك لان الاخلاق والرقي متجيش غير من حد زي العسل ذيك
اصلي بصراحه كنت لبدالك في الذره ومستنيه ردك علي التعليقات منا فاضيه بقي ومش لاقيه حاجه اعملها وكل شويه اعملك رفرش لمدونتك ومتابعه ردك واحده واحده وطبعا اولهم ردك علي تعليقي
ربنا يكرمك ويذيدك رقي واحترام واخلاق مش موجوده في الزمن ده
انتي ملاك وتستهلي كل خير
متجيبي بوسه بقي الله
واوعي تقليني في الزيت وكمان مش بحب الرز الابيض انا بحبه احمر لحسن هزعل
متجيبي كمان حضن ياله بقي عن حد ما حوش
امووووووووه يا قمر
بحترمك وبتذيدي في نظري كل يوم عن يوم وبحبك اكتر

mahasen saber يقول...

محمد فارس..........

اخويا الغالى العزيز جدا جدا محمد ابو الملاك يا رب تكون بافضل حال

بس انا بقول مش بيعبر عنى لانى مكنتش عايشه الحاله فى وقتها يا محمد ليس الا بس اكيد بيعبر عنى فى حالات تانيه

انما كلامك ومطالبك من الست انها متسمعش للغير برضه ده مطلب الست بتترجاه وبتطلبه من الراجل
يعنى لازم من التفاهم والتوحد على نقطه واحده بينهم وهيا انهم ستر وغطا على بعض ومينفعش حد تالت يدخل يطلع على ما بينهم

نورتنى يا اخويا الغالى وشرفتنى جدا جدا جدا
وسلامى لملاكك الصغير ولزوجتك الكريمه

ربنا يباركلكم فى بعض
اللهم امين

mahasen saber يقول...

صوت من مصر.........

لا ل متزعلنيش عليك ان شاء الله يبقى عندك وكتير كمان وتقدر تتجوز وتكون اسره سعيده وربنا يرزقك بالذريه الصالحه

انا مش عارفه متشائم ليه بس
لو مش لاقى شغل هتلاقى ان شاء الله
لو مش لاقى شقه هتلاقى باذن الله لو على فلوسها ربنا هيرزقك من كرمه ان شاء الله

انتا واضح انك شاب زى السكر زى شباب البلدى

ربنا يرزقك ويكرمك بكل الخير ان شاء الله

ونورتنى يا صوت مصر

mahasen saber يقول...

كيارا.........

وانا قلت موجود ههههههههههه انتوا مالكوا يا بنات كده اتعقدتوا ليه

الدنيا لسه قدامكوا مفتوحه على مصراعيها
امال انا اعمل ايه

شكلك عايزه علقه او اخد مصاصاتك كلها
اختارى شفتى الديمقراطيه

mahasen saber يقول...

a.samir.........

يبدياتى بلدياتى ازيك يا احمد منور البلوج فينك ده كله بتحاول تصرف الجنيه الفضه ابشر يا ابو حميد مفيش امل انه يتصرف فى بر الزقازيق كله
يعنى الشراقوه اتفقوا على عدم الاعتراف بشرعيته

اما البوست فكلامك لعب فى دماغى بصموله انتا يا دكتره مش عريس جديد لحقت تقول الكلام ده
بس طالما بدات تقول يبقى فيه ضمير صاحى

ربنا يسعدك يا احمد ويهنيك باسرتك الجميله يا اجدع بلديات فى الدنيا

بس مقلتليش صيدليتك فين عشان انفعك وتعملى خصم طبعا هههههههههههههه شفت هنفعك ازاى

منورنى يا سمير ومشرف بيت اختك دايما

mahasen saber يقول...

soul.000..whisper..........

سول اوه اوه الجميله يا حبيبتى منورنى
ووحشانى قوى قوى قوى

وده بيت اختك تيجى وتروحى منه براحتك المفتاح مش معاكى فمفيش داعى للاعتذار يا قمر

واتطمنى بكره هتلاقى وهتدعيلى وتقولى يا سلام يا محاسن على تنبئاتك

والله يا بنات يا قمرات انتوا ربنا هيكرمكوا بمشيئته ان شاء الله تعالى
لانكوا تستاهلوا كل خير
نورتينى يا سول يا قمره
فى اى وقت انتى فى بيت اختك يا حبيبتى يا غاليه

mahasen saber يقول...

berm almesrey.........

استاذنا الغالى وعمنا لاغلى بيرم حضرتك نورتنى وشرفت المدونه

وشاكره لحضرتك بجد تغاضيك عن الغلطات الاملائيه وردك وكلامك الطيب ده

وده مش غريب على حضرتك

جزاك الله كل خير
وحضرتك نورتنى وشرفتنى جدا جدا كالعاده يعنى يا عمنا الكبير والغالى

mahasen saber يقول...

من غيرعنوان..........

يا اهلا وسهلا بحضرتك وعجبنى قوى كلمة بوست قنبله بجد عجبنى التعبير قوى

حضرتك صدقت جدا جدا واشرت ووضحت مورثات شعوبنا العربيه فى محله وبدقه
بس جزئية الزواج التانى بقول نسيبنا منها برضه ههههههههههههه منعا لبوظان الاعصاب

بس بجد سعيده ان البوست عجب حضرتك قوى قوى

حضرتك نورتنى وشرفت المدونه والبلوجر بحاله كمان

mahasen saber يقول...

abo sho sho........

اخويا العزيز والغالى ياسر ازى ملايكتك يا رب يكونوا بالف خير وسلام

بجد نفسى استمتع بالحوار معاك بس الماسينجر لا يمهلنى اعمل ايه فيه

بس السؤال فعلا يبان سهل بس عويص جدا لان ده شئ داخلى فربنا اعلم بمكنونات البشر بس اعتقد لو تماك نفسه عند الغضب ممكن قوى يبقى كده

صح ولاا ايه

نورتنى يا اخويا الغالى
بجد يا ياسر فرحت قوى قوى بوجودك

mahasen saber يقول...

سمكه وحده...........

ههههههههههه انا قلت سمكه خافت من طاسة القليه تطلعى مستخبيالى فى الدره ومرقبالى كل حرف
طب لما اشوفك ان ما مزمزتك هههههههههه

والله انا اليى بموت فيكى وبحمد ربنا على معرفتك

لانك من اطيب البشر اليى عرفتهم فى حياتى وبنت فعلا متربيه وعلى خلق وفعلا فعلا انسانه راقيه بمعنى الكلمه

ربنا يكرمك يا حبيبتى ويسعدك

ونفسى اشوفك على خير يا سمكمك ان شاء الله
وربنا يديم المحبه فيه يا حبيبتى يا رب

خلاص لغيت الطاسه وقفلت الشوايه ده عشان بحبك بس

اممممممممممممممممموه يا قمر

hosam4u2004 يقول...

اختى الغاليه
اتمنى ان ترزقى بذلك الشخص الذى ينير حياتك
بس الملاحظ انكم يا ستات كللكم تتمنعن وانتن الرغيبات
لماذا لان الرجل والمراة هملا اساس البشرية ولا يمكن ان يستغنى اى طرف عن الاخر ولكن كل يعامل بالمثل وربنا يقويكى وبلاش مواضيع الطلاق

http://hosam4u2004.blogspot.com

mahasen saber يقول...

hosam4u2004........

يا اهلا اهلا اهلا وسهلا بالزياره الكريمه وبتشريفك لينا يا استاذ حسام

نورتنا وشرفت البلوج

بس بذمتك بعد البوست ده فى تمنع ازاى طيب

الحياه للاتنيين متكملش طبيعتها ولاا اتزانها الا بالاتنيين مع بعض
نورتنى وشرفت البلوج يا اخونا العزيز

will يقول...

情趣用品,情趣,A片,AIO,AV,AV女優,A漫,免費A片,AIO交友愛情館,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,情色論壇,色情影片,微風成人,嘟嘟成人網,成人,18成人,成人影城,成人圖片區,成人圖片,成人貼圖,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,視訊聊天室,視訊聊天

麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online

情趣用品,情趣,情趣商品,A片,AIO交友愛情館,AIOAV女優,AV,A漫,免費A片,本土自拍,自拍,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,色情影片,情色網,色情網站,微風成人區,微風成人,嘟嘟成人網,成人,18成人,成人影城,成人圖片區,成人圖片,成人貼圖,成人文章,成人小說,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,080中部人聊天室,080聊天室,中部人聊天室,080苗栗人聊天室,苗栗人聊天室,免費視訊聊天,免費視訊,視訊聊天室,視訊聊天

情趣用品,情趣,情趣商品,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,AIO交友愛情館,一葉情貼圖片區,情色論壇,色情影片,色情網站,微風成人區,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人文章,成人小說,A片,AV女優,AV,A漫,免費A片,自拍,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,080中部人聊天室,080聊天室,080苗栗人聊天室

情趣用品,情趣,情趣商品,愛情公寓,情色,情色貼圖,色情小說,情色小說,情色文學,色情,做愛,寄情築園小遊戲,色情遊戲,AIO交友愛情館,AIO,色情影片,情色網,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人文章,成人小說,成人電影,麗的色遊戲,自拍,A片,AV女優,AV,A漫,視訊交友網,視訊,視訊交友,免費視訊聊天室,免費視訊,視訊聊天,視訊聊天室,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園

mahasen saber يقول...
أزال المؤلف هذا التعليق.
mahasen saber يقول...
أزال المؤلف هذا التعليق.