الجمعة، 28 ديسمبر، 2012

 

                                             لموت الحبيب غصه

ما ابشع ان تعيش مرارة اليتم وانت فى الثلاثين من العمر ..فراقك يا امى يميتنى كل يوم

وفراقك يا ابى يوجعنى كل دقيقه..

اللهم  اكتبهما من اهل الجنه بحق ايمانهم بك وبرسولك بدون رؤيه ولا لقاء سوى الايمان بك والتصديق بوجودك 

آه يا امى واصبحت اتمنى الموت بعد فراقك لا لشئ سوى للقائك 

 

الأحد، 10 أكتوبر، 2010

فاقد الزمن مبركزش فيه

ياااااااااه .. يااااااااااه ..معقول
ده بعض من انواع التساؤلات والاستغرابات الليى بتورد على بالى وبقولها لنفسى وانا مثلا بتفرج على صور اتاخدت فى وقت ما او وانا بدعبث فى ورق يخصنى وبالذات لو ورق متعلق بفترة الترحيل والنزهه فى طرقات المحكمه وزى بالضبط دلوقت عند دخولى المدونه
..معقول هيا الراحه بتاخد من الانسان حب التعبير عن ما يعتريه ؟
ده كان سؤال لنفسى بس راحت ايه هيا فين الراحه دى انتى مخبوله ولاا مخك اتلوث ولاا اتلحس
هيا الدنيا من امتى فيها راحه يا شيخه احمدى ربنا وتعايشى مع مشاكلك كدا ..بطلى هبل ونزلى رجلك دى تلمس الارض
طيب ..طيب ..متشديش خلاص خلاص نازله اهه ..ده برضه لنفسى بنكلم بعض
.....غيبت غيبت عن المدونه وافتكرت انى غايبه يدوب شهرين تلاته معرفش ان الغياب داخل على سنه
وغيبت وغيبت بالرغم ان الايام الليى فاتت حصل فيها مليون حاجه وحاجه وستين الف مليون حاجه عليهم كان نفسى افضفض بيهم هنا فى المدونه ..
بس لانى زهايمر وزهايمر زهايمر بتوهان كمان وبجد..يعنى غلبت منامينو وزهايمره وزى ما ضد بتفضل تقولى دايما حماتى زهايمر
انا فعلا تعبت تعبت ابدا ..ابدا يا ناس معنديش تركيز فى الوقت مبعرفش فعلا احنا فين من التاريخ والوقت الامور عندى بتمشى بالتوقيت البركاوى البحت
وتعبت فعلا من نفسى والتوهان ده كتير بيغيبنى عن الوعى الزمنى
...مقدرش انكر ان حالة التركيز وتفتيح العنيين فى الساعه والتاريخ والوقت بتكون فيما يخص ابنى بس غير كدا سبهلله يا دنيا وبالكيلو ومين يشتريك يا وقت
فنفسى بجد اتخلص من سوء التعامل مع حياتى والوقت واتعايش كدا بكامل العقل مع حالى وابطل عك...اه هيا العك دى الليى ااقصدها بجد
......................................
وحشنى كل كل الناس والمدونه والتدوين بالضبط جالى احساس السمكه الليى رجعت للميه بعد ما دخلت شبكة صياد بالغلط
يا ترى حبايبنا بئا اخبارهم ايه ودنيا التدوين مطلعه من جواهم ايه
اروح اشوف بئا

الأربعاء، 30 ديسمبر، 2009

مطلقات راديو والافتتاح المباشر

يا اعز الاحباب ويا عيلتنا الجميله المنوره والمتنوره بعقول راقيه وقلوب مزهره

اسمعونا يوم الجمعه الجايه 1 \1 2010 مباشرة فى اول افتتاح لمطلقات راديو على الهوا مباشرة
الساعه 6 من 6 مساء الى 8 مساء برضه

وهنستناكوا تكلمونا وتقولولنا رأيكوا على تليفون الاستديو 0235869769

وممكن تراسلونا على ايميل الراديو info@motalakatradio.com


وهيكون معانا اول حلقات برنامج ابنك على ما تربيه مع د\ وليد هندى مباشر

وهيكون معانا قنوات الجزيره والاخباريه السعوديه والام بى سى والبغداديه بيصورنوا وبيعملوا لقاءات معانا فى اليوم الجميل ده
يا رب نعجبكوا وهنستنا دعمكوا كالعاده لان انتوا خيركوا مغرقنا

ده بانر الراديو يا ريت تدعمونا وتزينوه بأنه يتحط فى مدوناتكوا الموقره
بشكر كيارا حبيبتى قوى قوى قوى على تعبها وذوقها لانها هيا الليى فى ثوانى ضبطتتلى الدنيا دى كلها.....


السبت، 21 نوفمبر، 2009

يا امه فرحت فينا الأمم

هقول رأيى ببساطه كده وعلى بلاطه ومن غير كلام مكلكع
ورأيى لا هيعجب اليى فى مصروصوتهم بالثأر وصل المدى ولاا هيعجب الجزائريين اليى برضه صوتهم بالثأر والغضب وصل لسابع سما .....
بصوا يا اخوانى االيى عمل الكارثه دى قله واليى اتخانقوا معاهم فى مصر قله فمينفعش نحاكم شعب بحاله بسبب قله
ده شق الشق التانى احنا متهببين على عنينا عرب كلنا زى بعض لا هما دمهم اخضر ولاا احنا دمنا بنفسجى كلنا من ارض وطين واحد يعنى نتنيل على عنينا ونفوق لنفسنا وللفتنه اليى اتجرينا فيها نقولها تتفضل تروح فى حته تانيه وافكركوا بحديث الرسول الكريم...الفتنه نائمه لعن الله من ايقظها..صدق رسولنا الكريم
اما غير كدا احنا امه مستهدفه وعندنا عدو متربع وسطنا وماسكنا من شعرنا وبدل ما نتحد ونتشطر عليه بنتشطر على نفسنا اسمحولى احنا شعوب هايفه قوى لما سيبين العراق والاقصى سايحيين فى دمهم وجايين احنا كمان نسيح دم بعض
وفوق ده كمان كرامة المصريين اليى اتضربوا فى ماتش كوره او بسبب ماتش كوره واجعاكم قوى وكرامة المصريين اليى اتجلدوا فى الكويت واليى بيتعذبوا وبيتهانوا فى السعوديه واليى بيغرقوا فى بحور ايطاليا واليى محدوفيين فى سجن ابو غريب واليى متبعزئيين فى دول اوربا بيموتوا من الغربه والبرد مش واجعاكم ولاا اثرت فيكوا
وحاجه كمان مسأرتوش ليه لكرامة المصريين اليى ماتوا فى العباره اليى اكلهم سمك القرش ولاا لكرامة المصريين اليى اتسمموا بأكياس الدم الفاسده ولاا لكرامة المصريين اليى بيوتهم بقت قبورهم فى الدويقه
والاهم والاهم والاهم واجيبلكوا من الاخر احنا ياما قطعنا فى بعض وفى الاخر لما بتحصل حاجه جامده هتلاقينا نجرى نضحى بروحنا عشان بعض وهذا ما اتمناه على الاقلل.. كفايه دول زى اوربا مفيش بينهم رابط الا اللون يتحدوا واحنا اليى بينا رابط الحضاره والاصل والدين والدم واللغه مش عارفين نتحد حتى على ماتش كوره
اتمنى اننا نفوق لنفسنا لان بسم الله ما شاء الله احنا مش ناقصيين تقطيع من اعدائنا عشان نقطع فى بعض وطبعا عارفيين مين اعدائنا ومش محتاجه ااقلكم
وبعدين بالحرب اليى انا شايفاها دى ما بينا تقدروا تقولولى لو اسرائيل ولاا امريكا مثلا راحت شنت حرب على الجزائر مثلا احنا كدا هنلم بعض هيله بيله ونروح نحارب مع اسرائيل ..وحياة ابنى ساعتها دم كل واحد فيكوا هيغلى وهيجرى يدافع عن الجزائر ويفتح بيته لاهله ولاا افكركم بايام حرب العراق والكويت استقبلنا اخواتنا العرب اليى برضه بيضربونا وبيهنونا ازاى فى بيوتنا
سيبكوا انتوا من كل ده والله المصرى ما فيه احن ولاا اطيب من قلبه ولاا اكرم منه ولاا يستحمل على اخوه العربى قرصة نموسه احنا بس بنقطع فى بعض غل كل واحد قرفان من عيشته ومن ضغوط حياته فلاقاها فرصه يفش غله
وطبعا طبعا الاخوه المصريين اليى بينادوا من زمان بأن مصر تنسلخ من كينونتها العربيه واننا فراعنه مش عرب طبعا فرحانيين ومزئططين باليى بيحصل وناسيين اننا برضه عرب متفرعنيين
وبعدين اليى بيقول قطع علاقات مع دوله عربيه والنبى مش مكسوف على دمه الاحمر اليى ما قطعنا العلاقات مع الدنمارك فى اهانة رسولنا الكريم وقلنا حرية رأيى ونددنا وشجبنا وهو مين رسولنا ولاا قطعناها مع اسرائيل فى البنت اليى رسمت رسومات مسيئه وقلنا بينا معاهده ولاا قطعناها مع امريكا وقلنا ست العالم والراس الكبيره
نيجى نحتد قوى ودمنا يغلى وعايزين نقطعها مع دوله عربيه ولاا دى اليى قدرنا عليها

عارفه ان برأيكم المحتد ده هتزعلوا منى فاليى عنده طوبه فيكوا اهلا وسهلا يحدفها فى وشى
والسلام عليكم يا امة محمد وعيسى وداؤد .. يا امة الاديان

الأربعاء، 30 سبتمبر، 2009

ما بين الليل وسواده خطوط بيضا

ما بين تنهيده وأخرى يزداد هجوم الليل عليها وبأزدياد اشتياقها لحضنا دافئ منه يزداداد الليل سوادا وتتسارع ساعاته لتقارب الفجر تنظر لنفسها بالمرآه فهى لا تتطلع اليها الا كل صباح حيث تنمق شعرها الاسود المائل للبياض من آثار المشيب العالقه على بعض من خصلاته وهى لم تتعدا عامها الخامس والعشرون بعد وتضع ما تيسر لها من حلى ثم تضع زفيرين من عطرها المفضل والمكون تركيبه من زيوت عطريه وورد واشجار فهى دائما تفضل هذه الروائح التى تؤكد لديها انها مازالت حيه ومازالت تدب بأوصالها الحياه..هذا عن نظرتها الاولى فى المرآه اما النظره الثانيه قتكون عند عودتها من عملها وهى تخلع ما عليها من حليها وزينتها وتنظر لنفسها نظرة الحسره اليوميه من خلال المرآه ففى هذا الوقت كانت ستعد له الغداء وتتزين بحب بأفضل ما لديها من ثياب وسيكون شغلها الشاغل كيف تزيح عنه عناء يوم العمل الشاق وترتب له جوا سعيدا ومنظما يقضيه مع صغيرهما لكى يشرب منه حنان الابوه هذا المشروب الذى سيعينه علىمواجهة الحياه ....تطول نظرتها لنفسها فى المرآه وتركز فى عينيها وما بدا عليهما من عناء ثم ما تلبث ان تفيق ماما ..ماما انه ميراثها الباقى لها من الحياه صغيرها فمقابل كل ما اخذ منها يبقى هو العوض الوحيد الذى اعطتها لها الحياه ينظر اليها تلك النظره المداعبه الباسمه فمن خلال هذه النظره هو يدعوها لتشاركه عالمه البرئ المكون من بيوت من المكعبات وعربات تسير بمحرك الزمبلك واسود ونمور و حيوانات مفترسه ولكنها لا تقوى على ابداء اى نوع من الخطوره وعالم فيه البشر صامتون لا يتحدثون ويكتفون بالصمت والاستماع على غير العاده .. تطيل النظر اليه وتمسك بيديه تقبلها بكل حب الدنيا الذى اختزل بداخلها ثم تقبل رأسه وتداعبه فى شعره ذو الخصلات الناعمه الصفراء متشائله كالعاده من اين لك بهذا اللون الغربى وتتعالا ضحكاتهم ومزاحهم المفعم بكل لحظات الحنان والالفه والود وكأن هموم الدنيا اصبحت تحت اقدامهم ..تفكر مليا يا قرة عينى اعطيك كل لحظات عمرى وافنى ساعاته تحت قدميك اهتمام ورعايه وحب فأنت صغيرى وحيد بلا أب.......

حالة المطلقه النفسيه زى حروف الهجاء مختلفه فساعات بتكون حالتها على ده الحال وساعات ساعات بتبقا على حال غير الحال
يعنى المطلقه او الارمله او الست اليى اختفى من حياتها الراجل بتحس ولسه حس الاحساس والاحتياج عندها فيه نبض ..يعنى مش كتلة بودرة تلج زى ما بعض الناس بتقيم وتحس....
وعند اغلبنا ده لو مش كلنا اولادنا فى مكانه خاصه اقدامهم فوق رؤسنا كلنا وعشانهم بنحس بقيمة سنيين عمرنا....

الجمعة، 21 أغسطس، 2009

شهر كريم يا ريت نكون كرماء زيه

دنيا بتلف بينا فى سلسلة ايام
ايام شايله سعاده
وايام تشيل اوهام
وفيها ايام مباركه بنستناها كل عام
نغسل فيها ذنوبنا ونتوب ونغير توبنا
ونقول حلو الكلام.........

كل رمضان وكل مدونى المعموره بالف خير وسلام وكل قراء ومتابعى مدونى المعموره بكل خير وسلام

ربنا يتقبل منا ومنكم فيه صالح الاعمال..
ان شاء الله بعد الشهر الفضيل ده هرجع تانى وهعلن توبتى عن كسلى التدوينى
وان شاء الله الراديو نازل بعد العيد مباشرتا ببث مباشر وعلى سايت كبير كبير قد الدنيا وببرامج تانيه وناس تالته حلوين قوى
انا بتمنالكوا كل خير وبتمنالكو شهر فضيل وكريم علينا جميعا
وببارك من قلبى كده لاخونا المدون الرائع ادم صاحب الاجنحه المتكسره على خطوبته ..الواد اخويا الصغير ده فضل ساكت ساكت لحد ما ربنا كرمه بملاك بجد..
ربنا يحميهم لبعض ويباركله فيما رزقه

رمضان كريم على كل الاحباب وشهر فضيل على احيائنا وامواتنا
اللهم انزل الرحمه على امواتنا وجازيهم عنا خير...
( بابا وحشتنى قوى وببوس التراب اليى انتا نايم عليه ربنا يتغمدك برحمته الواسعه ويجازيك عن تربيتنا كل خير)

الخميس، 6 أغسطس، 2009

مطلقات راديو..شوفوا الحياه بنظره مختلفه

عمر الحياه قصير ولاا حتى طويل
شكل الحياه وردى ولاا ازرق تقيل
هفضل انا عايشه عمرى الحلم الجميل
طول ما انا بفكر وعقلى بيقول اكتر
وفى قلبى خد الجميل
...
ده بيرو يعنى

الراديونزل اخيرا يا رجاله ااقصد يا ستات طب يا جماعه
اللينك على اليمين اضغط الصوره وادخل بودنك اليمين.....
اه والنهارده هكون فى القناه التانيه الارضيه على التلفزيون المصرى فى برنامج زينه
الساعه واحده ظهرا....
وهرجع بئه على بيوتاتكوا اليى وحشانى كل واحد وواحده يسيبلى المفتاح فى الباب ..ولاا ادخل من الشباك ااقصد صفحة التعليقات..
...ومبروك لدودو عاشقة الرومانسيه على الخطوبه السعيده وكنت هروح بس كان فيه ظروف انشغاليه ..مبروك يا دودو يا قمر
ومبروك لسالى ..حاجات جوايا..لجواز اختها الجميله وعبال دوده وكل حبايبها
ومبروك لريمان ..ملائكيه على تخرجها اخيرا الملاك البلوجرى ده اتخرج
ومبروك لدعاء افتتتاح مدونتها الجديده مش عايزه
ومبروك مبروك لكل حد حصلتله حاجه حلوه
ومعلش لاى حد حصلتله حاجه مش ظريفه وربنا يعوض الجميع خير ان شاء الله