السبت، 6 ديسمبر 2008

ابتسم للحياه بس مش فى العيد بس

ابتسم للحياه مهما اشتدت الظروف
وزد ثقتا بالله
انك مقربا اليه لانه ابتلاك بالهموم
لتخفيف الذنوب
فبلاء ربك رحمه ومغفره
ولا تشغل بالك بالأختيار
فهو اولا واخيرا نصيب وقدرا محتوم
ولن تأخذ غيره
لأنه رزق قد كتب لك
فى اللوح المحفوظ

كل سنه وانتوا بالف خير وسلام طبعا انا مينفعش يعدى عيد من غير ما اهنيكوا بيه
انا غايبه عن الرد عن التعليقات لانى مشغوله جدا والله ما بين الشغل وحضانة ابنى والبيت يعنى شوفوا احنا ملتزمين ازاى ...بس قلت لازم انزل بوست التهنئه يعنى لازم انزل بوست التهنئه
انا طبعا العيد ده زى اليى قبله بعيط زى العيله عشان فراق بابا الله يرحمه

دى انكد تهنئه بالعيد ممكن حد يقراها انا اسفه
كل سنه وانتوا بالف خير واهلكم وكل احبائكم بالف خير
ورجاء من فضلكم وثواب ربنا هيكتبه ليكم اليى يقرا البوست ده يترحم على روح والدى وروح اموات المسلمين ويستغفرلهم ويقرالهم ما تيسر من القرآن الكريم حتى ولو المعوذات
احنا بكره نبقى زيهم ويبقى كل املنا فى دعاء وآيه تنورلنا القبر
ومن قلبى ومن شرايينه كمان كل عيد وانتوا جميعا بالف خير وسلام
وربنا ما يحرمكم من احبائكم ابدا يا رب
..انا هلف عليكم اعيد عليكم فى بلوجاتكم بلوج بلوج ومحدش يتوقع انى بدى فلوس انا اليى بدى فلوس يعنى اليى ازوره يجهز ان شالله نص جنيه اهه بعدد البلوجر هعمل مبلغ حلو .. كده ولاا آخد قرض من البنك ومتشفوش وشى
اه والكلام اليى فوق ده ده التصبيره اليى بصبر بيها نفسى
بس بتسد فى وشى ابواب اليأس يعنى تقدروا تقولوا دى قفل الاحزان واليأس..

الخميس، 20 نوفمبر 2008

,وكمان الحاجه روز وبنتها علياء بيجيبوا فى سيرتى

كتبت..علياء ابو شهبه
يا جماعه يظهر ان اول بطوله سينمائيه فى انتظارى خلاص وانى هتعمى قريب من كاميرات التصوير .....طبعا بهزر بس المدونه شكلها بتعيش حالة اهتمام اعلامى وشهره فى الاجواء المحيطه وده شئ طبعا يسعد ويفرح ان الصوت اليى اتنبح ده اخيرا اتسمع .....موضوع البديل مفيش لسه اجوائه هديت الا وتانى يوم لقيت اتصال من صحفيه رائعه وانسانه خلوقه جدا استاذه علياء ابو شهبه وطلبت منى انها تعمل موضوع عن المدونه وطبعا انا سمعت اسم روزاليوسف علطول جالى حول ...يعنى دى روزاليوسف اليى كنت مضيعه عليها فلوسى فى ثانوى وجامعه هيكتبوا عن مدونتى لا لا لا
ده شئ يفرح طبعا
شفتوا الكلام بيفرح ازاى يعنى اهه كلام ممكن واحد يقراه وعشره لا وممكن واحد يحسه ومليون لا وممكن يتقال فيك او فى غيرك بس فى الاخر الكلام اكيد اكيد بيفرح وبيمثل دافع ما سواء ليك او لغيرك
وفعلا الكلمه الطيبه صدقه
وابطل رغى واسيبكوا مع الموضوع .....
وانا هكتب الموضوع لو مش باين للقرايه ......واستاذه علياء ذاكره ومنوهه عن تعديلات قوانيين الاسره اليى انا عملاها وانا هكتبها بوست او تحديث لانى احب تشاركونى رايكوا فيها ستات ورجاله واههى حاجه للمستقبل يمكن تنفعنى فى قبرى قدام

وربنا ييسر الخير
على فكره يا جماعه اليى عايز يقرا الموضوع يضغط على الصوره ويكبرها ويقراه والمعلومه دى من دكتور محمد اليى يا عينى هيعتزل الطب ويحول معهد صحى من عمايلى وهو صاحب مدونة رادار على الوردبريس وكل ما اسأله فى حاجه يقولى ماله الوردبريس ...فعلا السؤال لغير الله مذله...
//اه يا جماعه محمد بيقولى انه مش دكتور وبيعترض وبشده انى الصق اللقب ده بيه وبيقول ان زمايله لو دخلوا البلوج هيشرحوهزى الضفادع اليى مش عتقينها عشان يطلعوا منها مفتاح الجنه
طب بذمتكوا مش اليى فى صيدله بنقولوا يا دكتور ولا بنقولوا يا باشمهندس ولا يا اسطا على اساس انه بيصنع دوا تركيب يعنى ساعات
وبعدين دى جزاتى اديك لقب اكراما للتسعه وتسعين ولاا التمانيه وتسعين اليى جبتهم فى ثانويه عامه ...انا غلطانه وفكرنى المره الجايه احط لقب ..اليى مش دكتور...
دايما عاملى استبحس فى مزاجى اللغوى..


الخميس، 13 نوفمبر 2008

نضال والبديل والمدونه ثالثهما


جريدة البديل

الرئيسية الأخيرة « عايزة اتطّلق».. آخر صيحة في عالم المدونات النسائية




13/11/2008
كتب: محمد جمال الدينبعد ما أثارته مدونة " أنا عايزة اتجوز" الشهيرة من جدل واسع وما عرضته فيها صاحبتها غادة عبد العال من آراء جريئة حول المشاكل والمعوقات التي صادفتها خلال محاولاتها المتعددة للزواج، جاءت آخر صيحة في عالم المدونات النسائية علي النقيض تماما وذلك في صورة مدونة عنوانها: " عايزة اتطلق".المدونة الجديدة التي أنشأتها في الآونة الأخيرة "محاسن صابر" (29 سنة)، تعرض مشاكل وأحاسيس امرأة غير موفقة في الزواج، وتسعي بالتالي إلي الطلاق، وهو ما عبرت عنه صاحبة المدونة بقولها: "عندما ينعدم الأمان في الحياة الزوجية وتصبح الطمأنينة حلما بعيد المنال عندها فأهلا بأبغض الحلال..".وتشير محاسن إلي أنها لا تهدف بمدونتها تلك إلي عرض مشكلتها فقط وإنما مشكلات آلاف السيدات المصريات اللاتي يعشن ظروفا مشابهة؛ وهي المشكلات التي أشارت إلي أن من بينها "رحلة الحصول علي حكم من المحكمة بالطلاق والروتين الإداري الذي يجعل المطلقة عالقة بين ذل الزوج والروتين والحالة النفسية السيئة التي تترتب علي تأجيل البت في القضية المنظورة لمرات ومرات".وقد كانت معاناة محاسن داخل المحكمة أحد الأسباب الرئيسية التي دفعتها إلي إنشاء "عايزة اتطلق"، وهو ما كشفت عنه بقولها: "كنت أدخل المحكمة بنوتة وقلم وشوية صبر لكي أدون كل ما أتعرض له من مواقف وكان أكثر ما يزعجني هو أن تظل تلك المواقف حبيسة الكراس وذلك كان أحد أهم العوامل التي دفعتني للاتجاه إلي التدوين".اللافت للنظر في "عايزة اتطلق" أن صاحبتها كثيرا ما تحاول استخدام الشعر في التعبير عن مشاعرها، وهو الأمر الذي يبدو مثلا في قولها: "هفضل كده كتير/ برضه مفيش تغيير/ نفس المشوار الممل/ بادور فيه علي حل/ جلسة في إعلان مرافعة/ توهان في سرداب طويل/ يقول اتحجزت للحكم/ أفرح أنا شوية وييجي بعده الحكم/ أزعل بقي شوية/ ما بعده استئناف للحكم/ وطريق طويل تاني..

ده موضوع محمد نضال فلسطين كان قالى انه عايز يعمله فى البديل وانه عجبك رئيسه فى الشغل واستئذنى انه ينزله وده لانه محترم يعنى مش عمله جهجهونى واحترم فعلا ادآب المهنه وانسانيته وانسانيتى
وانا مكنتش بصراحه عايزه انزله فى المدونه ومش لانه حاجه وحشه ولاا قلت ادب لا سمح الله بس محبتش حد يقول دى غاويه شو اعلامى وكلام فارغ من العينه دى
بس لليى هيفكر كده وانا عارفه انه محدش هيفكر كده انا اشتغلت فتره فى الصحافه ونزلى موضوعات كتير يعنى اى جزئية شو دى مش عندى ولو عندى كان زمانى اشتغلت رقاصه اظن مفيش شو احسن من كده
.........
بس انا نزلت الموضوع كبوست لسببين
اولا : احتراما لمحمد وحبا بصراحه كده وعلى بلاطه فيه لانى فعلا بحس انه اخويا الصغير وبشوف فيه دايما جزء من صوره لابنى لما يكبر

وثانيا: احتراما لصحباتى اليى اصروا على كده وبعدين متأكده ان دى حاجه حلوه تجاه مدونتى واهى تخفف من طعم المرار اليى فيها شويه
مع انها عسل وسكر عسل مدونتى دى
...............
واسفه اتاخرت عليكم فى زيارتكم بس انا كنت مشغوله لشوشتى وربنا وحده عالم بس وسعولى انى قادمه ومعايا اتنين كيلو جوافه

السبت، 1 نوفمبر 2008

وايه يعنى ....بس عودا حميدا

وايه يعنى
ما ياما حاجات كتيره راحت مرجعتش
وحاجات جميله لسه محصلتش
ولو هيا دى نهاية المطاف
شئ يحزن بس ميقتلش
.........
الحمد لله ماما رجعت البيت بالسلامه وعبدالرحمن شرفنى واسعدنى وفضل معايا وكان مطيع جدا كل ما ماما تطلب منى طلب يجرى هو يعمله ويقولها انا يا تيته ماما لا....الحمد لله عملية ماما خلتنى اعرف انى ليه اخوات واصحاب كتار قوى وفعلا وقت الشده بيبانوا ....وخلتنى اشوف صحباتى وكان بقالى فتره مش شفنا بعض يعنى شهور بس برضه كانوا واحشنى مع اننا بنرغى بالتليفون مع بعض دايما....والعمليه شكلها اتعملت ليا انا فى قلبى فحاسه بحالة رضا وهدوء وتفاؤل والحمد لله
...............
من كل قلبى شكر لكل اليى سأل عليا فى غيبتى فعلا اخوات لو يولدوا من نفس الرحم
.......
ادم والاجنحه المكسوره ونيجار بنت القاضى واحمد الباحث عن الحقيقه وكيارا وحبيبه وقصاقيصها واحمد سكر ....مش عارفه اشكركم ازاى على سؤالكم عليا الدائم بالتليفون انا فعلا مش عارفه اشكركم ازاى على اهتمامكوا وانا بعد كده مكنتش برد لانكوا فعلا اتصلتوا بيا كتير وكنت مكسوفه منكم جدا ومن كرم اخلاقكوا ده يعنى سؤالكوا متقطعش ابدا ...الف الف شكر من قلبى ليكوا ولكل اليى سأل عليا سواء بتعليق فى المدونه لان التعليقات كلها حب الحمد لله وسواء بالتليفون او الايميل مليون شكر وتقدير واحترام واردهالكم فى الحاجات الحلوه
انا كتبت البوست عشان حقكم عليا اطمنكم زى ما قلقتكم ومن بكره هزوركم فياا ريت تجهزوا القهوه عشان ااقرا بوستاتكوا بمزاج مه انها بتعدلى دماغى من غير اى كافيين

.............
منى ومن عبدالرحمن مليون التشكرات والدعوات بظهر الغيب ربنا يكرمكم فى كل من تحبون
.........حبايبى والله بجد وفى الله فعلا

الثلاثاء، 28 أكتوبر 2008

هفضل كده ..وابقا ااقابلنى لو حاجه عدله حصلت

هفضل كده كتير

برضه مفيش تغيير نفس المشوار الممل

نفس الطريق الكئيب بدور فيه على حق

بحارب فيه على شئ

جلسه فى اعلان مرافعه توهان

فى سرداب طويل ضلمه

نفسى فى طاقة نور

اشوف بئه الشمسه

يقول اتحجزت للحكم

افرح انا شويه

ويجى بعده الحكم ازعل بئه شويه

ما بعده استئناف للحكم

وطريق طويل تانى

لاموت انا هناك

لأحيا حياه تانى
البوست ده قديم بس حبيت انزله لانه اكتر شئ معبر عنى دلوقتى ولان نفس الاحساس اليى كتبته بيه جالى تانى وانا لو كنت نزلته امبارح كنت هنزله بلون اسود لانى كنت فعلا حزينه بشكل وبرغم انى فضلت احمد ربنا بشكل هستيرى من جوه وابص فى وش ابنى الا ان برضه حالة الحزن كانت اقوى منى وبشكل بشع..بس دلوقتى ااقدر اتكلم وانا الحمدلله كويسه شويه لا باس بها
..اولا : انا كان عندى قضيه امبارح وكل المحامين اليى فى القاعه اقسمولى انها اكيد هتتحجز للحكم ماشى هايل ربنا يسهل وانا طبعا من جوايه بقول يا رب هو العمر مبقاش فيه كتير واخلص من اسمه المربوط فى رقبتى مش يبقا محسوب عليا عافيه بس ..وعليها خير هايل المحامى يا مدام خلاص انا خلاصين بس ربنا يسهل.......
تانى يوم ....المحامى بيتصل بيا فى الشغل يا مدام يله وراكى جلسة طاعه دلوقت ولو مرحتيش هيتحكم عليكى فيها انا مقولتليش من امبارح ليه ما انا كنت فى المحكمه طيب طيب زى كل شئ طيب....انا اتصلت باخويا وده لانى ممعيش عربيه ومش هيلحق بالمواصلات ومش هينفع اخلى حد يوصلنى اتصلت باخويا وخدنى وطبعا من السرعه كنا هنعمل حادثه وزى الافلام العربى وصلت المحكمه وسبته بيركن عربيته وجرى على جوه ولسه بدخل برجلى الاتنين لقيت صوت الحاجب الجهورى بينادى اسمى والمحامى بيشاورلى وبس ادخل الاقى عندى 7 قضايا طاعه والمحامى بيحاول يا عينى يلمهم على بعض
7 قضايا والمفروض ان اصلا قضيت طلاقى بقالها 3 سنيين وفيها مستندات تودى فى داهيه وتطلقنى من المحكمه بالتلاته مش من طليقى بس ...3 سنيين ونقول حوالى تسع قضايا اسره
اما ثانيا ....ماما داخله المستشفى النهارده هتعمل عمليه وانا هفضل معاها وان شاء الله ربنا يشفيها على خير انا امبارح كان المود كامل وفول اوبشن فكان موضوع العمليه مكمل البرواز النكدى الحزينى ده ولانى بعد وفاة بابا حسيت ان جزء كبير منى ومن ابنى اتيتم فخايفه افقد امى اه الموت حق بس الفراق صعب قوى وبيقطعلى قلبى وفعلا بيحسسنى انى هفقد عقلى من الحزن........
انا بس فيه مشكله بتواجهنى فى المستشفى رافضين وجود ابنى معايا مع انها مستشفى خاص يعنى يخف التحكمات شويه بس انا على عمرى مقدرش اسيب ابنى ليله واحده وبالذات فى الشتا يا حبيبى ده لازم اتطمن انه متدفى فى قلبى ااقوم ابعد عنه استحاله بس شكلها هتصفصف على حجز اوضه لينا انا وهو شكل ماما هتعمل عمليه فى فندق مش مستشفى
......انا عكيت ورغيت وثرثرة بس لو مش مدونتى استحملتنى اروح فين يعنى اروح العباسيه افضفض هناك.
بس الحمد لله على كل حال وربنا يشفى ماما ويباركلى فى ابنى واهه ماشيه الدنيا ويا عالم
.........بعتذر قوى انى مش قادره اتابع جديدكو ا بس بعد ما هرجع هتابع كل المواضيع والبوستات ان شاء الله وبعدين انا عارفه مدوناتكم بيوتى مفتوحه ليا فى اى وقت.
....واسفه كمان مره انى مش تابعت بوستاتكم بس لو مش استحملتونى مين يستحملنى طليقى مثلا...

.........

الخميس، 23 أكتوبر 2008

اوقات بحتاج ..كابوس ومصحتش منه..

أوقات بحتاج كتير ..لألف لمسة ايد
غيرك تمسنى
أوقات بحتاج كتير ..لألف حضن وغير
غيرك يضمنى
منك ياما قاسيت ..منك ومن عنيك
وازاى هتهمنى
بعد السنيين الطوال ..والايام الصعاب
خلاص بحاول انسى
كل ما عملتلى

......................
اولا : دى اغنيه انا كتبتها ووديتها لعمرو مصطفى ايام ما كنت بكتب اغانى وبعافر عشان اوديها لملحنين...
ثانيا : لو ست حاسة الاحساس ده او الشيطان بيفكر يضحك عليها كأنها مهرج او يلعب فى دماغها بقلم روج ..تفتكرربنا وتفتكره كويس قوى وتعرف انها ممكن تكون بين ايداه فى أاقل من الفانتو ثانيه
ثالثا : لو راجل اتقى ربنا فى الأمانه المربوطه فى رقبتك عشان عمرها ما توصل للأحساس ده ..املا عنيها قلبا وقالبا وكحل عنيها برؤيتك وأكسر شيطانها بمعاملتك الطيبه........

...................
( تحفيز او اليى اسمه تحديث )
نبيل وجهة نظرك احترمتها وعشان كده غيرت العنوان ولو مش متفقه مع وجهة نظرك قوى يكفينى يكفينى اهتمامك بيا وخوفك من ان حد يفهمنى غلط ...فعلا اخ مش من ابويا وامى..... وربنا عالم معزتك وغلاوتك كانت عندى ازاى وبقت عندى ايه دلوقت
.....
اما استاذ هانى ابو ملك وجهة نظرك يا هانى من البدايه فى محلها يعنى كل اليى قلته على الاغنيه لقيته فعلا فى التعليقات ....شكلك يا ابو ملك بتقرا الفنجان ولاا بتفتح المندل بعد الشغل.....
بس برضه اخويا وعزيز عينى كمان بس نقسم الارباح بالنص..

الاثنين، 20 أكتوبر 2008

هو وهي والفالنتين ثالثهما

دخل المفعوص فلذة كبدها عليها البيت وماسك فى ايده دبدوب فيه برائة زى طفولته وفى أيده التانيه حاجات حمراء وورود وقلوب وحاجه كده خلتها تحب على روحها هي : يحيى ايه اليى فى ايدك ده ولمين جايبلى قلوب يا يوحا
يحيى : ايه يا ماما ده لكنزى صاحبتى
هي : وامك يا يحيى
يحيى : لسه بدرى على عيد الام
هي : عيد الام يله يعنى هلاقى بختى فيكوا كنت لقيتوا مع اليى جابكوا
وبعدين مع نفسها كده والحاجات الحمرا لسه ضاربه فى شرايين قلبها وحاسه بنغششه فى مشاعرها
هي : واد يا يحيى
يحيى : ماما ما اسميش واد
هي : وانا امك أأقالك اليى احب اأقوله وبعدين انتا ابنى ولاا مش ابنى انا ااقولك اليى عايزه ااقوله
وله النهارده ايه
يحيى : الاتنين
هي : لا الهديه لايه (بتزغرله )
يحيى : عيد الحب الفالنتين
هي : اما اشوف ابوك هيجيبلى ايه وقعته سوده لو جاب اليى فى بالى (فى سرها )
بعديها وهيا على نار الشوق والأنتظار وقاعده فى نفسها تكلم يا ترى هيفتكر ولاا لا هيفتكر ويطنش
شويه ومش كتيره داخل عليها بكيس جوافه وكيلو موز
هو : نجوى امسكى منى الشنط دى
هيا : (امسكى منى) أيه جوافه موز انتا مجبتش بصل اخضر ليه (وهيا بتتريق من هول الصدمه)
هو : خلاص المره الجايه
هي بتكدب فى روحها لا هو مخبى الهديه او اضعف الاحتمالات هو هيجى يقلى كل عيد حب وانتى حبيبتى اكيد اكيد
شويه وهيا داخله عليه الاوضه محمد محمد محمد هو النهارده ليه الدنيا كلها احمر
هو: يمكن ماتش للاهلى
هي : هو انتا ليه بتيجى من الشغل تسلم على السرير قبل ما تسلم عليا
هو : تعبان يا حبيبتى وببقا زهقان من المواصلات والتعب
هي : اه طب نرجع للاحمر
هو : ماله الاحمر يا حبيبتى (وهو تعبان لا هلكان )
هي : طيب انتا مقولتليش ليه كل سنه وانا طيبه
هو : لسه بدرى على عيد ميلادك
هي : وفرحانه من جواها قوى ...ده فاكر عيد ميلادى يا حبيبى بس برضه الفالنتين اشمعنى البت كنزى صاحبة المقروض ابنى
هي : لا لا لا مش عيد ميلادى آهى آهى آهى يا ميلة بختى
هو : طب انام ساعه و اصحى اعدلك بختك المايل
هي : عمرك ما قولتلى كلمه حلوه ..عمرك ما دخلت عليا بهديه ولاا حاجه فى ايدك ولاا دلعتنى فى يوم وعشتنى بره هو انا ايه مش ست مش مراتك ..خدتنى لحم وبترمينى فى البيت عضم..
هو ينظر اليها فى دهشه وعنيه بتقول يا قطه (يالى بتاكلى وتنكرى )
هو : خلصتى الموشح الندبى الاندلسى ده
هى : آهى آهى آه يله (وبتلم فى روحها وماشيه من الاوضه )
هو : انا عمرى ما قولتلك كلمه حلوه
هي : اه (و تلتفتله بوشها )
هو : مين من شويه قايلك اعمليلى عصير جوافه يا حبيبتى
هي : انتا وقولت حبيبتى اه بس عشان الجوافه
هو : انا عمرى ما جبتلك هديه مش من سبع شهور فاتوا جايبلك قميص نوم هديه
هيا : آه بس عشان رغباتك
هو : وانا عمرى ما دخلت عليكى بحاجه انا مش داخل من شويه بكيس جوافه وكيس موز
هى : آه بس عشان بطنك وعيالك
هو : وطب مش دخولى انا عليكى من الشغل بالسلامه وانا كويس ومش فيا تعويره ولاا معايا مصيبه اكبر هديه
هي : ( صمت وسكون ووداعه ) آه يا اخويا ربنا يخليك لينا
هو : ومش ولادنا حوالينا ماليين علينا الدنيا بشقاوتهم وطلباتهم ومشاكلهم دى اكبر هديه ممكن اسيبهالك او اجيبهالك
هي : الكلمتين اليى عن دخوله بالسلامه وعن العيال لعبوا فى قلبها قوى وحركوا مشاعر الوداعه والحنيه جواها وبصتله كده وهي بتهرش فى دماغها وقالتله ..بس نفسى برضه تجيبلى حاجه حمرا ..
هو : حط ايده تحت المخده وطلع ورده بلدى وقالها زى كده مثلا
هي : الفالنتين
هو : انتى ناسيه ان فى اوان الورد البلدى بدخل عليكى كل يوم بورده
هي : لا مهو عشان قصارى الزرع بتاعتك
هو : بصلها بحب آه هيا مخها ضارب بس الله يكون فى عونها اكيد من حرارة المطبخ
هي : بصتله بحب وقالت ما كفايه صحيح هو والولاد عليا وجودهم فى دنيتى احلى فالنتين فى حياتى
وبسسسسسسسسسسسسسسسسسس.
( انا بقه على فكره مبطقش حاجه اسمها الفالنتين )
(انا بئه بتكلم بس مش فى سرى )
انا مكنتش عايزه انزل البوست ده بس محمود مصرى بالغربه هو اليى طلب منى انزله وانا محمود بالذات مقدرش اتنيله كلمه ولا اكسفله طلب وده لانه فعلا اخويا بالغربه وعزيز عليا جدا وكفايه حتى تعبه فى الريدر اليى تسببلى فى زعل حبايبى منى كلهم انتى مش حاطانى فى الريدر ليه ..مع انهم بمدوناتهم مكتوبين فى قلبى قبل ما يتكتبوا فى صفحات المدونه ...فشوفتوا محمود غالى ازاى ..امشى فى فرحك يا محمود يا رب
..بعدين انا النت فاصل عندى من امبارح واحتمال ياخدله اسبوع دلع ومياصه وميرجعش قبل يوم الاحد احتمال وعليه انا دخلت سيبر وبكتب البوست ده منه وعليه برضه حبايبى اعذرونى هتاخر عن زيارتكم شويه وهتاخر عن متابعة جديدكم ارجو المعذره ..ولا اراكم الله قطعا فى نتا لديكم...
.....

.. اليى بيقولوا عليه تحيث ..
يظهر ان حد دعالى بظهر الغيب النت لسه راجع حالا بسلامة الله فى الساعه الثامنه ونصف الحمد لله كده هبطل اضرب اخماس فى اسداس ....

السبت، 11 أكتوبر 2008

هو وهي وحاجات مستخبيه

نبدأ ب هى ..هي تعانى من داء الهسهس منذ سنوات ولا علاقة لهذا الداء بالصمت نظرا لان الهسهس تقال لمن نريد منه بعض الصمت وهو..يعانى من داء الأستبحس ولا علاقة لهذا الأستبحس بما يسمى الجنون فلكلا منهم هسهس واستبحس فى علاقتهما العاطفيه وهذه الأمراض ليست معديه وعليه فالتعامل بينهما لا يستوجب الحيطه والحذر ....
انما هسهسها هو مرض مشتق من ثورة الشك لام كلثوم فاذا تكلم هو فهى فى انتظار غلطه او ان يتلفظ بأسم غيرها حتى تصبح واقعته سوداء اللون معدومة الملامح كأيامها معه ..وتظل تسمع وتسمع وتنتظر وهو وبرغم دائه الاستبحسيى الا انه يظل يتكلم ويتكلم ولا يمل من الكلام....
هو : شوفتى جارتك فلانه عامله ايه لجوزها (ويقصد بهذا اذلالها )هو :شوفتى اختى مخليا بيتها جنه (ويقصد بهذا اذلالها برضه )هو : شوفتى مرات حاتم صاحبى محافظه على رشاقتها أزاى (اه اخدها لحم ورماها عضم وقصده طبعا هز صورتها قدام نفسها)
هو : وراء كل راجل عظيم امرأه اعظم منه (فاصل توبيخ ويقصد اغماسها فى الأحساس بالفشل ما هى  الشماعه اليى بيعلق عليها هدومه وفشله )
وبعد شايفه وشايفه وشايفه وهو ناسى ان نظرها ضعيف وانها بحاجه ماسه لعملية تصحيح نظر وهذا واضح من اختيارها له كشريك حياه النص بالنص والارباح هو المستفيد بيها..وناسى بأن له دور بارز فى مرضها الهسهس الفعال ....

وتتعالا نبضات قلبها لتصل عنان السماء وترتجف يديها لتسقط كوب الماء الذى كانت ستتناول به المهدئ اليومى من حباية لمون مقشره ببذرها تاخدها بعد كل موجة هياج لمرضه الأستبحسيى واذا بها تغلى دماء الأنوثه فى عروقها وتتذكر ما كانت عليه فى ماضيها السعيد وكيف انها كانت تقول لملكة جمال الكون هاتى يا بت اللقب والتاج ده ده ميستاهلش دماغ حد غيرى ..ووسط كل هذه الصور والفلاشات من الذكريات التى كانت مغلفه بالسعاده وعليه زاد عندها حس الحسره والندامه واصبحت على شفا ارتكاب مصيبه فى وجهه الوسيم سابقا ...واذا بهوجة موجة الهسهس واذا بها بصوت جهورى ولاا ماريا كالاس فى اعظم اداء لها بالاوبرا...


هي : جارتى فلانه عامله ايه لجوزها شوف جوزها الأول وبعدين اتكلم نسمه داخله البيت ونسمه خارجه منه صوته بيساعدها على الأسترخاء انفاسه موسيقى كلاسيك (قصدها تقوله صوتك انكر الأصوات وزعيقك خرملى طبلة ودانى )
هي : اختك مخليه بيتها جنه لانه مينفعش يبقا غير كده واحده جوزها بيخاف تحط ايديها فى المايه ل ظوافيرها تبوض واحده جوزها لو لقى فى بيته غلطه بيجرى يصلحها وبيهتم بقفص العصافير وحوض السمك كأنهم ولاده عايز بيت فيه راجل زى ده يبقا جهنم
هي :ومرات صاحبك مرات صاحبك حاتم ده لانه فعلا حاتم ولاا الطائى نفسه كان عمل كده مع مراته لو تخنت تمن كيلو يشتركلها فىى جيم ومركز تجميل يبقى عيب على اهلها لو مغلبتش نيللى فى رشاقتها (وقصدها تقوله يا بخيل يا جلده استسمر فيا 250 جنيه وهبقا قمر )
هي : وورا كل راجل عظيم ست اعظم منه ده لانه عنده استعداد للعظمه وعنده الشجاعه انه يبقا عظيم وبيسعى لكده مش يروح الشغل ينام فيه تلات تربع الشهر....

.. بعد شويه مش كتير يعنى نقدرنقول فى نفس اللحظه ...
هو : اخد الجاكت وبصلها بأحتكار واشمئزاز و كأنه بيبص لكيس زباله وراح واخد بعضه كده على بعضه ورازع باب الشقه وراه
هي : علامات الغل المشوبه بأنتصار انها اخيرا نطقت وفرغت شحنة الغضب اليى جواها وراحت داخله الليفنج اوضة المعيشه يعنى تشقر على العيال


.. هو على القهوه مع صاحبه وصاحبه بيحكيله عن مرات صاحبهم اليى رفعت قضيه نفقه على صاحبهم ..
هو: هو طلقها
صاحبه :لا رفعتها وهما متجوزين مهو ينفع الست ترفعها وهي لسه متجوزه
هو: ليه مبيصرفش عليها
صاحبه :لا بيصرف وكل مصاريف البيت على دماغه بس خناقه زى كل الخناقات على مصروف البيت
هو: ياه ده انا مراتى اتخانقت ياما معايا على مصروف البيت وعمرها ما عملتها ياه ده انا سايب فى البيت ملاك (فى سره طبعا)
.هي :.شويه سمعت صوت جارتها وجوزها بيتخانقوا وكانهم فى مدبح و آي و طاخ يا سيد( البواب يعنى ) والله لاقتلك ..
هي : يا لهوى بيضربها وبيقلها ااقتلك انا جوزى عمره ما عملها يا حبيبى داانتا ابن ناس قوى (وفى سرها برضه)


..هو يفتح باب الشقه بشياكه غير معهوده ويدخل الشقه برجله اليمين وبهدوء مش متعوده مراته عليه ...
..هي تطلع جرى عليه..
...ابتسامه على وشه وابتسامه على وشها ..تجرى وتترمى فى حضنه يسبقها على حضنها ...
هو :حبيبتى انتى كنتى بتعملى ايه
هي : شكشوكه للعيال
هو : بحبك بكل بصلك وتومك يا اكثر نساء الأرض انوثه بس ميمنعش تحطى شوية ميك اب ومزيل بصل ارحمونا ..فى سره برضه)
هي :بحبك يا اوسم رجال الأرض حتى لو كرشك كبر شويه وحتى لو شديت فى البيت حبتين بس ميمنعش انك تدينى 250 جنيه اروح ال اسبا.. فى سرها برضه).....

الاثنين، 6 أكتوبر 2008

احنا والتراب والذكرى الحلوه و ب

عندما تسير بنا الأيام
تتقدم بنا الأعمار
وتسارعنا الآجال
فعاجلا ام آجلا
سيوارينا التراب
ويغمسنا فى ذراته وحبيباته الرمليه الصامته
وتخرس معه اصواتنا التى ملئت الافق ولطالما ازعجت الغير ربما
ويلتف برفق حول عقولنا
التى طالما هداها تفكيرها
للصواب كما هداها للخطأ والشر احيان
وسيحلل قلوبنا التى حملت من الحب لاناس
كما حملت من الكره لاناسا غيرهم
سنذوب فى ذراته وتذوب معه ذكرانا ولاا يبقا من هذا الجسد العنجهيى
الا ذكرى الروح التى فاضت عند بارئها
وستبقى كلمه صدق لتخلدنى بعد الممات
ومعامله برفق لطالما اسعدت انسان
وربما صدقه تقبلها منى الرحمن
اعطت الروح والحياه
لانسان وانسان
وعاجلا ام آجلا سيحتضننى التراب
ولاا يبقا من طوحى وتطلعاتى شئ
الا دعوه بظهر الغيب
وصدقه توسع لي امتار الفناء
انا ساعات ببقا ماشيه فى حالى حلو قوى وبتضحك ومغطيه المى او افتقادى لشخص او شئ
ما ببطانيه طبقتين فى عز اغسطس بس ساعات الالم او الافتقاد لحد معين من قوته بيشيل البطانيه دى
ويقوم من جوايا يكركبلى مشاعرى واحاسيسى ويوجعلى قلبى للصبح...
بابا الله يرحمه وحشنى قوى بحنيته واحتوائه وخوفه على ابنى
وكلامه ومناقشاته معايا اليى لو عندى ذرة معرفه او ثقافه فهيا منه
وانا واحشه نفسى قوى ونفسى اريحها من القضايا واحسسها بأدميتها تانى
وابنى وحشنى ان يبقا ليه اب بيحتويه ويسأل عليه ويعيشه الابوه المحروم منها
..وده مش معناه انى عايزه اتجوز ..انا مش هغير مبادئى ولاا اليى رسمته لنفسى..
وصحباتى وحشونى مع انى شايفه اغلبهم من اسبوع ويومين

انا حاسه بالعتمه فى عز النهار...واعتقد الخرافات اليى قريتوها فوق كانت نتاج الاحساس ده حاجات نزلت من قلبى اترسمت على الورق اتنقلت هنا اه ممكن متهمش حد بس يكفى انها تهمنى وانى لما كتبتها هنا هزمت الحزن والوجع
وغطيته تانى بالبطانيه ام راقين ..بفكر اجيبله لحاف فايبر يمكن يتهد...

السبت، 27 سبتمبر 2008

من غير نفاق..

فى ظل موج الحياه المليئه بالصخب والكفاح

وتحت وطأة موجها الثائر ...دائما يطل علينا

شعاع من نور ويدا صادقه أمينه
ومحبه دافئه بريئه لأنها ... محبه فى الله ..

( انهم الأخوه المدونون والمدونات )

عيد سعيد عليكوا وعالم التدوين مليئ بيكوا وبوستاتكو محسسانا بيكو..
.. كل عيد وانتو بألف خير..
تهنئه منى ومن الحب كله عبد الرحمن ...اهه نخفف حدتت النكد شويه

.. هيا حدتت دى مكتوبه صح ولاا بتتكتب كده حدت بس..

السبت، 20 سبتمبر 2008

تلات سلاطين فى البوست تفرح

على حين غره ومن غير ما يتبادر الي ذهنى تاجات وسلطانيات فؤجئت بالعزيزه الجميله sometimes ربنا يجمعها على جوزها على خير ويرضيهم ببعض بعتالى سلطانيه جميله لونها اخضر فسدقى وعليها رسومات ورد وبعديها بشويه ليست بالقليله الزميل الأخ العزيز عايش ولكن ..باعتلى هو كمان سلطانيه بس كبيره شويه فقولت ادمج الاتنين سويا فى جلستا واحده (قصدى سفرتا واحده)...وعليه لسه هقول يا هادى فؤجئت برنا الحبيبه النائمه فى الارياف بعتالى تاج تالت فقولت ادمجهم سوا لقيت الموضوع هيبقا طويل وانا لسه مفوقتش من البوست اليى فات وطوله فهجاوب او بالاصح هشرب السلطانيتين sometimes و عايش ولكن..والبوست القادم يبقى انتى يا رنا ..
وعليه نبدأ وحبايبنا يستعدوا عشان هيشربوها هديه....
تاج منمن sometimes
1.. بدأت تدوين امتى ودخلت العالم دا ازاى ؟
مش فاكره اه والله مش فاكره التاريح بالضبط ممكن لا اكيد ااقل من سنه لأنى عملت كذا مدونه اليى المدونه النهائيه وكلهم بأسماء مشابهه ونفس المغزى والهدف...اما دخلته ازاى وانا على النت وقع تحتت ايدى بالصدفه البحته مدونة خالد الصاوى اعتقد وبعد كده مدونه جابت كتير بعديها بخلاف انى كنت شفت موضوع المدونيين على الجزيره.2.. آيه كان انطباعك فى البدايه ؟
مذهوله من اليى شفته فى المدونات ذات الطابع السياسى ومبهوره من خفة الدم وتناول المواضيع بجاذبيه واسلوب شيق فى باقى المدونات وعجبنى قوى الموضوع وشبطت انى الآقى نفسى على النت ابص الآقى روحى قدامى بصالى مش طالعت.
3.. مين اكتر حد بتهتم بتعليقه على البوست الجديد ؟
أى حد كلف خاطره وخد من وقته عشان يقرالى بوست ويعلق ويبدى رآيه ..تعليقه بالنسبه ليا بيهمنى جدا جدا
..كفايه انه عبرنى.

4.. آيه اهم حاجه اتعلمتها من عالم التدوين ؟
ما اخجلش من انى اعبر عن اليى جوايا واواجه مخاوفى...واخلى ظروفى مهما كانت عتبه اطلع
بيها لفوق مش انزل بيها لتحت.

5.. أيه اكتر حاجه كرهتها ؟
مدونات بلا هدف ولا هويه غير السب فى الدين الأسلامى لأنى لاحظت ان مفيش دين بيسلط عليه اللسان الا الاسلام مع انه الدين اليى احترم كل الاديان ولو كارهينه قوى احترم مشاعر المسلمين وانه دين سماوى من عند اليى خلقك وصنعك بنىآدم تعيش وتتعايش ومستقبلا ممكن تمشى على اربع.
6.. حاسس ان التدوين ليه تأثير ؟
أى نعم ..بيخلينا نقرا بعض صح وعرفنا دماغنا ماشيه فين ..ولو مش بيأثر فى حد كفايه انه بيأثر فيا.
7.. تهدى التاج لمين ؟
آه جاينا بقه للهدايا..فى آخر البوست ههدى التاجين لكل الحبايب..
تاج عايش ولكن ..لكن ايه يا عايش...
1 .. أذكر ستة اسرار لا يكتشفها من يقابلك لاول مره ؟
السؤال ده لخبطنى اسرار محدش بيعرفها من اول مره يقابلنى بيتهيآلى هو او هيا اليى هتقابلنى فهيا او هو اليى هيحكوموا اكتشفو او مكتشفوش ايه عنى مش عارفه بس اعتقد ان اليى هيشوف فيا صفه طبيعى يتوقع عكسها فى الغالب يعنى انا كتومه...بس اليى يعرفنى مش هيكتشف كده لانى فضيحه وبس اى حد يسالنى عن اى شئ يخصنى وتلاقى اسرارى كلها مبقتش اسرارى ..يعنى بلا فخر مبعرفش اكتم سرى ولا حاجه تخصنى ومبحبش كده من اساسه ..انما فى اسرار غيرى فى الحفظ والصون عشان كده كل صحابى بيحكولى اسرارهم عشان عارفين لسانى سايب فيما يخصنى بس ....وعليه اى صفه فى الغالب المقابل بتاعها عندى يعنى مكانى الطبيعى عند دكتور نفسانى.2.. سبع حاجات نفسك تعملهم ؟
1..احفظ القرآن كله انا وابنى ونعمل باليى فيه
2.. احج واعمل عمره انا وماما وابنى كل من احبه جمعاء
3.. اسافر والف العالم كله ولو بدأت بأول دوله هجيب التانيه والتالته والعالم كله وبرضه انا وابنى .
4.. اخلص من المشاكل القضائيه على خيربس لو فيها ثواب وتخفيف ذنوب يبقا اليى ربنا يريده احسن.
5.. حد يا عالم يا هوو يغير وجهة نظره فى الاسلام بسببى .. يا رب اجعلنى سبب فى حاجه عدله.
6.. اعمل فيلم قصير ويكون عن حاجه فى بالى ومجهزاها ...وعلى فكره تسجيلى مش بورنو.
7.. اربى ابنى زى ما بتمنا والبسه بدلة الفرح بأيدى زى ما كنت بلبسه السالوبيت وهو صغير ..ابنى ومحدش يتدخل .
3.. سبع حاجات معرفتش تعملهم ؟
1.. معرفتش اكون اسره سعيده واعيش حياه طبيعيه زوج وزوجه واولاد بس رغم عن ارادتى والحمد لله على كل حال ...اللهم لا اعتراض.
2.. حاولت احفظ القرآن كذا مره ومعرفتش لان مقدرتى على الحفظ صعبه قوى بس بحاول وهحاول علطول بس بحمد ربنا برضه لان اكيد ثواب المحاوله عند ربنا مضاعف.
3.. معرفتش ادرس فى معهد السينما زى ما انا عايزه ولما جاتلى فرصة انى اكون مساعد مخرج محفظتش عليها يعنى تلات اربع شهور وكانسلت.
4.. امسك لسانى شويه دايما مفلوت ..ولو شفت حاجه غلط نفسى مره اسكت واكتف لسانى واشغل التتطنيش.
5.. معرفتش لما ابو ابنى كان بيمد ايده عليا انى أدافع عن نفسى وكل مره ااقول مش هسكت بس اليى كان بيمنعنى خوفى من ربنا يعنى مره مسكت ابريق سلفربلاتيت وقلت ههبده على نافوخه بس قلت ميستهلش ربنا احسن ..ولاا يمكن كنت خايفه على الابريق.
6.. معرفتش احافظ على قلبى ابيض يعنى كنت لفتره طويله والله بجد مكنتش بكرهه حد وكنت عايشه دماغ وروح لوحدى بس دلوقت بقيت بعرف اكرهه واحب والون قلبى بألوان الطيف بس الحمد لله هيا خبططتين على ايدى لما احس ان قلبى حود غلط وبتظبط علطول.
7.. معرفتش اتحكم فى دموعى لغاية دلوقت لو شفت شئ مؤثر او غير مؤثر فكرنى بحاجه مثلا ..الاقى نافوره وبتنزل من عنيه وده شئ مش حلو خالص ...لدرجة انى فكرت انى عندى مشكله فى عنيه.
4.. 7سبع حاجات دايما بتقولهم ؟
عادى ..يا جميله..اتقى ربنا..اى خدمه مش محتاج حاجه لدرجة ان كل اليى بيعرفنى ملاحظها ولما بيتطلب منى خدمه بصراحه مبسدش..بكشوا ...بوكى بيرو ..يا ماما.
5.. سبع مشكلات فى حياتك ممكن تحلهم بالفلوس ؟
بلاش اولا 7 دى هما مش كتير انا مش شكليه..بس الفلوس حاليا مفيش مشكله ليا واقف حلها عليها ..
بس اعرف واحد قريب ماما كان غنى جدا جدا جدا وربنا اصابه فى اولاده بالمرض الصعب وبالتالى فى ماله فلو معايا فلوس كتير بحجم ديونه هقدر اساعده واحلله مشاكله..
وست اعرفها بتربي فى سبعه ولد وست بنات بس كلهم بسم الله ما شاء الله متفوقين دراسيا بصوره رائعه فلو معايا فلوس هساعدها فى تجهيز بناتها.
...اه ليا بقا بس مش مشكله عويصه لو معايا فلوس كفايه هدخل عبدالرحمن مدرسة الغات اليى عايزه ادخلهاله يعنى التعليم الحكومى رائع وفوق مدرسة ابنى مينفعش ابنى يتعلم ااقل من مستوى تعليم ابوه مع ان التجربه اثبتتلى ان العلم فى الراس مش فى الكراس بس المدرسه اليى قدامى وااقدر ااوفر مصاريفها بينى وبينها نص ساعه بالعربيه فهحاول ادخله فيها بس ال200 جنيه هيعملوا ايه دول هيعملوا البدع..انا مش غاويه منظره بس مش عايزه اخلى ابنى قليل قدام عيلته ونفسى اعلمه تعليم كويس مع انى متأكده بس ان الاهم من المدرسه متابعتى انا ليه واهتمامى بيه وبمخه بس اهه ام بقه.
6.. سبع اماكن بتحبها ؟
1.أوضتى وربنا محرمنيش منها ورجعتلها تانى .
2. اى مكان فيه خضره ومايه والوجه الحسن موجود بيرو ابنى.
3. قبر الرسول والكعبه وقبور الانبياء ونفسى ازورهم.
4. المحكمه..لو جابت حق مغتصب لحد.
5. الشيشان وكوسوفو واى مكان فيه مسلم عارف قيمة دينه وبيحافظ عليه بعدين دول حبايب الرسول .
6. رشيد بلد بابا الله يرحمه بلد رائع .
7. كل الوطن العربى بحبه وحبيبى وفلذة كبدى اصلى من اليى هيموتوا عل الوحده ..والامارات بالذات ليها عندى معزه ومكانه خاصه عشنا فيها برهه من الزمن ومشفناش من اهلها الا كل خير .
7.. اشخاص بتحبهم غير بابا وماما واخواتك ؟
ابنى ايه رايك فى الاجابه دى..
اى حد مسكين بحبه وبحب اتمسح فيه كمان اللهم احشرنا معهم وعلى فكره انا اكتر مسكنه منهم.
اى طفل او طفله يتما وحاليا بخاف يكون ابنىمستقبلا منهم وبخاف قوى كمان.
اى حد قريبى عشان صلة الرحم
صحابى صحابى صحابى وصحاب ومعارف بابا وشويه من صحاب ومعارف ماما..
اى حد بقله يا حبيبى يا اخويا يا عزيز عينى يعرف انى بحبه لانى مبقولش كلمة حب لحد مش بحبه بتاتا..يعنى بحب كل المدونيين اليى بيزورونى وبيساندونى ويعلقوا عندى بكلام حلو وموضوعى اه والله العظيم بحبهم بحبهم بحبهم من غير ما اشوفهم وده حب انقىكمان.
اى حد حنين وطيب بحبه علطول طول طول طول وعشرة زمان بقه نها ودعاء عويضه وسماح ونسرين وايمان ومها وسميه ورشا وحنان ومروه .. تانت احلام وورده وهبه عشرة المقطم الغاليه قوى..واى حد بيحب ابنى وبيسأل عليه وبموت فى صحابه اليى مش بيضربوه.

8.. مدونيين بتحب تقرالهم ؟
سؤال غريب لو اتنطط مجاوبش عليه عشان هما كتير كتير كتير ومينفعش حد فيهم ميتذكرش ..
بس كل مدونه فيها احساس صادق وروح حلوه وموضوع مفيد وشيق بحب ااقراها واتابعها ...يعنى اى مدونه مش ملحده او شاذة الفكر عن فكرى يعنى بحبها طبعا وبتابعها ..بس نفسى ااقول بس مش هقدر هذكرهم ازى كلهم دول.
9.. تمرر الواجب لمين ؟
اهلا اهلا وسهلا فينك من زمان..كونتى اكون او لا..قصقوصة حبيبه..اوريجنالتى الجميله..ريموووحبيبتى قلبى ..ايمى الجميله رصيفوو..كيا كيارتى الشقيه.. نيجا نيجار العسوله..مونى مونى مونى اظن خلصنا اليى ورانا..بنوته مصريه اتفضل يا قمر..شمس النهار الدافئه.. شهرزاد الرقيقه..نهر الحب الفياض.. انى احبكم فى الله وانا كمان.. البنت السيناويه.. انت وانا وهما ليه لا.. انا ودماغها الشقيه.. تصويره تصويره حبيبتى ..وكله يوسع فرىكيلر يا مجرم..والباقى التاج الجاى يا نهارى
الرجاله بئه بس مش كتير ...غير ما يكون اخو ماما خالو الصباغ.. الشخصيه اليى زى السكر استاذ احمد سكر..رئيس جمهورة الصدق محمود.. استاذى من غير ما يدرسلى استاذ هانى.. the fuhrer اتفضل يا دوكت.. اخى واستاذى الفاضل طارق الغنام.. وحسام وكلامه الجميل شملولى سابقا..
اما بقه التاج القادم فده من نصيب حبايبنا الباقيين والسبب انى حاساه مناسب ليهم قوى قوى





الأربعاء، 10 سبتمبر 2008

البلوج ما بين الريدر والفيد والكاونتر وسيبو فى حاله

انا مليش اى علاقة موده بينى وبين اى اكواد فى الدنيا ولما ابو ابنى سافر لندن شهر اتفقت معاه اشغل وقتى فى حاجه مفيده فقولت لما اجرب اهزم ضعفى واخد كورس من الكورسات العويصه بالنسبه ليا زى الفيجوال بيسك او الداتابيس حته واحده مش حتيتين والبدايه والنهايه كانت مع كورس html لانى خدت الكورس بجداره وتانى يوم نسيته بنفس المستوى من الجداره ناهيكم بقه ان كتر التفكير عجزلى مخى والزهايمر ضربنى فى الصميم ده بجانب ارتفاع خط الغباء فى عقلى واليى واخد مساحه وافره لا يمكن اغفالها ...المهم كنت عايزه اغير شكل المدونه واحمدك يا رب انى بعرف أأقرا واكتب وعليه عرفت اغير شكل القالب لوحدى من غير مساعده من حد ..جينا بقه للأهم كنت بتكلم مع زميل مدون من فطاحل المدونيين خالو احمد الصباغ وتتطرقت لانى بحاول ادخل ريدر وكاونتر واخلى المدونه ليها شكل ولون كده فقالى ممكن اساعدك وقد كانت الطامه الكبرى وهو اليى جابه لنفسه بصراحه او ممكن دى ساعة عدم رضا من امه عليه فضل المسكين يقول ويعيد ويلف فى دواير مغلقه معايا يقولى حاجه اعمل عكسها اعملى كليك يمين واسحبى الكود
انا:اسحبه ازاى يعنى من ايده ولا ا من شعره

الصباغ:يا ستى عندك بيانات امليها

انا:وايش ضمنى ان الموقع ده امين وموثوق منه انتا واثق فيه(ده على اساس انى عملت الفيد من مدونة الصباغ)

الصباغ:زى ما واثق انى هتجنن

انا:طب اصبر كده شويه(طبعا اصبر دى بتاخد بتاع عشره خمستاشر دقيقه على النت)

اليى اعمله مره اكرره عشره وفى الاخر فشل ذريع

الصباغ:انتى هنا ولا موتى

انا:لا موتت الكود بتاع الفيد مش عارفه اسحبه

الصباغ:صمت رهيب لاما الهدوء الذى يسبق العاصفه او جاتله هارت اتاك

انا:يا صباغ زهقت مش عارفه اعمل ايه

الصباغ:لا اله الا الله (احنا كده منعرفش ربنا الا فى الزنقه)

ووسط مناقشاتى المفيده اليى هيا متعداش صلب الموضوع واليى برضه مقدمتش ولا اخرت (لا لا انا عارفه نفسى فاشله مش عارفه اعمل الكود حتة كود مش عارفه اسحبه )

الصباغ:معلش بس هيا حاجه سهله ركزى وهتفهمى علطول

انا :اه اه الفيد عندى

الصباغ:مذهول فين

انا:فى المدونه ومنور اهه بس ده جه ازاى دا انا مش عارفه انقل كوده ولا اسحبه

الصباغ:مش عارفه جه ازاى

انا:لا ولو اعرف كنت سالتك

الصباغ:احمدى ربنا واسكتى

انا:لا لا لا لازم اعرف ولا ااقولك على ايه انا عبقريه بس ساعات مبخادش بالى من قيمة مخى (اوعى اوعى تحسدنى)

يا صباغ الا الفيد ده بتاع ايه ومهمته ايه

الصباغ:صمت الحملان ولا كلمه طبيعى توقعت اليى حصله..

...تانى يوم بقه على نفس الماسينجر لقيت رساله حد بيقولى ازيك

انا:مين حضرتك وحضرتك مدون

هو:ايون شريف سيبو فى حاله

انا:استعنا عل الشقا بالله يا ضحاياكى يا سونسن

شريف:عامله ايه واخبار ابنك ايه

انا:الحمدلله وبيبوس ايدك

شريف:ههههههههههههه

انا:بعد شوية رغى لما دوشته ..بقلك انا بضبط فى مدونتى تساعدنى

شريف:تحت امرك شئ يسعدنى(شكله متربى)

انا:بص انا من امبارح مش عارفه اعمل ريدر وهموت واعمل ريدر عشان بلف لما صوابع ايدى بتورم على المدونات عشان اعرف الجديد والريدر هيسهلى المساله دى

شريف:انا للأسف مبعرفش اعمله

انا:(شكله ربنا بيحبه)

شريف:ممكن اساعدك فى اى حاجه تانيه ممكن تعرفى اكتر ناس بتعلق عندك

انا:لا مبحبش احرج حد اليى يعلق يعلق براحته كلهم حبايبى

شريف:ليه ده حلو قوى

انا:لا مش بالنسبه لى (وبتشرط كمان)

شريف:فيه الشات بوكس

انا:ايه الشات بوكس ده مهمته ايه

شريف:ده اليى مش ليه مدونه او عايز يستسهل ويسيبلك رساله

انا:ياه ماشى حلو ليه لا

شريف:طب افتحى الصفحه وبعتلى لينك املى البيانات وكوبى وبيست

انا:استنا استناانا فاتحه صفحة الكاونتر بعمل كاونتر

شريف:الشات بوكس الاول

انا:الكاونتر

شريف:الشات بوكس الشات بوكس الشات بوكس

انا:الكاونتر الكاونتر الكاونتر

شريف:سحبتى كود الكاونتر عندك

انا:لا مش عارفه اسحبه

شريف:افتحى المدونه الداشبورد بعدين اضافة اداه بعدين

انا:ايوه ايوه

شريف:اعملى كوبى وبيست وهيتحط

طبعا عملت الكوبى والبيست وانا واثقه انه مش هيتحط زى اليى قبله او تطلع معايا كده زى اليى قبله برضه

شريف:ها عرفتى

انا:اه وصل لا لا انا فى قمة سعادتى

شريف:طب اعملى okوشوفيه عندك فى المدونه

انا:اكيد طبعا واضح ان مفيش حاجه صعبه عليا ..بفتح المدونه عشان اشوف الكود ابو نجوم البحر اليى انا حطاه الاقى الكود بحاله وبرموزه عندى فى المدونه اه والله الكود مش النجوم ااقول يمكن تظهر كمان شويه ابدا

انا:يا شريف الكود بحاله عندى فى المدونه

شريف:صمت تام زى اليى كان بيحصل مع الصباغ

انا:شريف شريف ونفس القلق اليى كان على الصباغ حرام لسه شباب وفى عز شبابهم أأذيهم كده

شريف:انا معاكى متقلقيش بس مذهول من اليى بتقوليه افتحى الصفحه وانا افتح صفحة الكاونتر

انا:ماانا مليت البيانات وجبت الكود

شريف:طب بصى اعملى معاينه..انا منيين دى ..شريف من نفس صفحة html..انا فين منيين وليه وفوق ولا تحت

شريف :سيبك من الكاونتر وتعالى نعمل الشات بوكس

انا:لا ازاى الكاونتر ينتصر عليا لازم اعمله الاول

شريف:اسمعى كلامى الشات بوكس

انا:لا ال.............ماشى الشات بوكس..بس ازاى لا لا قلبى مش مطاوعنى الكاونتر الاول

شريف:اديلى الباسوورد واليوسروانا هضبطلك المدونه واديهالك على المفتاح

انا:ههههههه سلمه القط مفتاح الكرار

شريف:مش واثقه فيا انا امين

انا:لا انتا شريف سيبو فى حاله

شريف:اسف انا كنت عايز اساعدك بعدين انا امين مش انسان وحش ولا حرامى

انا:انا مش قلقانه منك ولا من حاجه يعنى هيا عليها اسرار عسكريه انا بس محرجه منك يعنى هتضيع وقتك عشان تضبط مدونتى كتر خيرك وفاض

شريف:لا هضبطهالك فعلا واديهالك عل المفتاح

انا :ماشى بس بشرط

شريف:اامرى (مش قولتلكو شكله مؤدب) تعمل الكاونتر تحت وفوقه الشات بوكس وفوقهم المدونات وفوقهم كلهم الفيد

شريف:بس كده حاضر بس الشات بوكس الاول
انا:لا لا لا زى ما قولتلك لاما بلاش
شريف:لاحظى ان انا اليى هساعدك
انا:هههههه(بسحب ناعم ماانا متشكره خالص وجدا وخجلانه والله)
شريف:هاتى بقه الباسوورد واليوسر
انا:اتفضل كا كا كا كا كا لى لى لى لى
شريف:شوفى بقه هعمل ايه
انا:ايدى على قلبى وعقلى لشوية الفهم يطيروا..بص انا هقوم اصلى العصر عبقال ما تخلص
شريف:وانا مليش نفس اصلى
انا:وانا قلتلك متصليش انتا هتركبنى ذنب ياابنى
شريف:طب بصى كده
انا:على ايه
شريف:على مدونتك
انا:طب وسع كده..ايه ده لا لا استحاله ايه ده الشات بوكس اه هو ده الشات بوكس ماانا بعلق عند مدونيين زملاء فيه بس محطتش فى بالى الاسم
شريف: اهه هو ده
انا: الف شكر يا شريف انا محرجه منك بس مش قلنا الكاونتر الاول
شريف: اصبرى على رزقك شوفى الشكل ده
انا: اه الكاونتر تفاح لا انا عايزه نجوم البحر
شريف: فين دى وريهالى ..وبعد مهاترات من عينة اهه تحت البط ..لا مش عايزه كاونتر التفاح .. مبحبش التفاح وبعد انا عايزه نجوم البحر وبعد ما شريف فقد نص عقله وكان فى طريقه لفقد النص التانى اتعمل الكاونتر
انا: شكرا شكرا شكرا جزاك الله كل خير آلهى ربنا يكرمك (بس انتا كويس)
شريف :انتى بتشكرينى على ايه انا معملتش حاجه بعدين احنا اخوات
انا: انتا انسان محترم حتى لو كنت مش هتساعد انا هشكرك فى بوست دى ااقل حاجه وااقل شكر كفايه الشلل اليى سببتهولك بعدين انا فعلا شاكره لوقتك اليى ضيعته فى مدونتى
شريف: يا ستى ولا يهمك المهم سعادتك
انا:الله يكرمك سعادتى مبسوطه خالص انتا سهلت عليا المهمه بالك انا كان ممكن انجز الامور دى بس كانت هتاخد منى وقت يعنى قرايه وفهم وانا معنديش استعداد لتشغيل مخى فى الحاجات دى مشغلاه فى حاجات تانيه
شريف: واضح ولا يهمك

اعزائى واحبابى وعزيزاتى وحبيباتى دى كانت القصه الخفيه وراء تضبيط العالم الاخر ليا بلوجتى ومهجتى ..طبعا كلكم بتدخلوا على مدوناتكم اى شئ بسهوله ااقولكم الذكاء نعمه حافظو عليها
(هههههه لا والله انا مش غبيه حرام اتهم نفسى كده بس اى حاجه فيها رياضه او اكواد مبحبش اشغل مخى فيها خالص ومخى كتابه وقرايه بس بعيده عن التكنولوجيا والرياضه والحمدلله انى خلصت نحو الاميه)
بس البوست ده كتبته لسبب انى حبيت اشكر شريف على اولا: ادبه الجم معايا وثانيا : تعبه معايا والمجهود المضنى فى المدونه .ثالثا : انا بحب لما اشكر حد اشكره بأفاضه واستفاضه وده بيبقى بحب فعلا ومن داخل اعماق قلبى لانى اصلا بحب ااقدر الناس كلها الكويس والوحش فما بالك الكويس بقه ...فيا شريف الف شكر ومليون كمان يبقى الف ومليون شكر على ذوقك وربنا يكرمك ويوفقك فى البنت اليى تسعدك وتتقوا ربنا فى بعض والغى من دماغك فكرة الغاء مدونتك حرام تسيب العالم ده وبعدين مدونتك تحفه ده كفايه بوست البطيخه...

وسلسلة الشكر طويله ...خالو احمد الصباغ خدلك الف ومليون شكر كمان على ذوقك واحترامك وعلى فكره انا والصباغ واحنا بنتكلم هلكنا من الضحك وحسيت انى اعرفه من زمان فعلا فعلا تحس انه ابن البلد دى وتحس ان كل شئ بيشع منه مصرى فى مصرى بس هو زعل واتقمص من شئ ما يا صباغ هو انا حد يزعل منى ولا بعرف ازعل حد يا ظالمنى....بس بحترمك بقه لانك رجعت قولت مفيش حاجه انا فهمت غلط بحترم اليى بيعترف بغلطه..

والف ومليون شكر كمان وشكر واجب ودائم لاستاذ محمد عصفور المدينه لانه هو اليى قالى اانقل مدونتى من البلوج للبلوج سبوت وكل ما بلاقى تفاعل فى مدونتى بحس بعرفان جامد تجاهه الف شكر يا استاذ محمد وحاجه تانيه كنت بعلق عنده فى الشات بوكس بالايميل بتاعى فقلى لما تعلقى فى الشات علقى بلينك المدونه مش بالايميل بتاعك ..عادى يا استاذ محمد مش حاجه مهمه ده ايميل مش تليفون بيتنا ..وبعدين الحمدلله كل اليى اتعاملت معاهم لحد الان من افاضل الناس وقمه من قمم الاخلاق بس شكرا على المعلومه.
..وشكر حار ومليون شكر كمان للطائر الحزين لانه عرفنى ازاى اعمل قايمه باسم مدوناتى المفضله مع انى مش كملتها عشان عجبنى الريدر ..استاذ طائر الف مليون شكر عارف الطريقه اليى قولتلى عليها علطول عملت غيرها وطلعت معايا برضه .شاكره ليك المعلومه المفيده جدا جدا واحترامك وذوقك

اما بقه كل التشكرات اليى فى الدنيا وكل العرفان والاحترام والتقدير فعلا وحب ابنى فىقلبى بجد بشكر وبدعى بالخير لكل مدون بيزور مدونتى وبتعليقه بيمدنى بقوه نفسيه وشجاعه ادبيه عجيبه ..اه كلام البوستات كلام والتعليقات كلام بس الكلام اليى بيمد الانسان بالحياه واليى بتحس ان كل حرف فيه بيطول العمر والشئ الخفى ورا اى تعليق هو الاهتمام ان حد ياخد من وقته ولو مساحة دقيقه عشان يقرا بوست ويسيب تعليق يمد بيه حد بالقوه او ينورله بصيرته او يهديه لحاجه كويسه وينهاه عن شئ مش سليم من غير ما نتعامل فى الحياه الواقعيه ونحتك وجها لوجه....
فعلا هو ده الحب فى الله وفعلا برغم الظروف الوحشه دى علامه من العلامات اليى بتقول للانسان ابتسم واحمد ربنا ربنا بيحبك وراضى عنك......
انا لو مريضه بزيارتكم بخف ولو حزينه بيها بفرح ولو يومى كله فى المحاكم لما بشوف تعليق من القلب بنسا همومى ورايا وكأن اتحكملى فى القضايا كلها وودعت المحكمه بالتلاته
فمن قلبى اليى بحاول طول عمرى انه يبقا نقى وربانى وماشى على تعاليم ربنا واليى واجعنى ومودينى فى داهيه برضه لا مانع واليى بقه اسود خفيف ومش عاجبنى ...بقول لكل حد نورنى وبينورنى جزاكم الله كل خير والف شكر من قلبى على زيارتكم ودعمكم ويا رب ما تشوفوا حد عزيز عليكم فى نفس مشكلتى ولو عندكوا حد فى نفس المتاهه ربنا يفك كربه وكربها على خير
شكر الدنيا كله لاخوات واحباء فى الله بجد ..انا كتبت اسامى ومسحتها حسيت انى نسيت كتير ومش عايزه ازعل حد ومحمود وكونه عارفين كده...
انا طولت بس انا رغايه بالفطره ولازم ااقول واعبر عن اليى جوايا ليحصلى حاجه وحاجه تانيه انا مكسوفه وانا بكتب كده لان مدونتى لا شئ بجانب مدوناتكم وانا ااقل المدونيين كفاءه فى الكتابه بس والله ولفظ الجلاله العظيم ده كل كلمه فى البوست مكتوبه ومغموسه فى جردل حب واحترام وتقدير ربنا وحده يعرف مقداره...
رمضان كريم فى رعاية الله وامنه وربنا يطول روحكم على البوست ده


العزيزه sometimes البوست الجاى هيكون اجابة التاج اليى على راسى وهديه مقبوله
واخوانا اليى ههديلهم التاج يستعدوا وبالذات خطيبة ابنى وهيا عارفه روحها( ابنى بيتخطب يا رجاله)


..اه نسيت انا عايزه اعمل ريدر ألا مفيش حد عايز يساعدنى..

.




السبت، 30 أغسطس 2008

زنقة الستات

اشمعنا زنقة الستات بس ؟؟؟؟لان احنا بنتولد مزنوقين من اهالينا وافكارهم وخوفهم اليى يخنق لانه بيقلب غلط
ومزنوقين من المجتمع اليى بتقالييده بتخنقنا لدرجة الموت
ومزنوقين لما نتجوز اى مشكله زوجيه اكيد انتى السبب فيها ...
ويا سلام بقه لو اتطلقنا او اترملنا بنتزنق زنقه ملهاش لزوم ..عشان كده دى زنقتنا احنا بس ..ربنا يفك زنقتنا جميعا..

مين فى الحياه متزنقش فيها
ومين مااتخادش من نظرة عنيها
ومين ما اتشبكش واتكلبش فى مشاكلها واهاليها
مزنوقه مخنوقه ومتطره اكون موجوده
ومش باختيارى اعيش
لكن باختيارى اصبر
وعشانه ابنى هعيش
وكمان عشانه هصبر
واحارب مليون جيش
لو عنه راح ابعد
امومتى وعشانها هكون
وانوثتى وفى الارض تكون
لو عنه راح ابعد....
عارفين يعنى ايه ام كل شويه تسمع جملة يا ستى ارميله ابنه واتجوزى ..الحمدلله مسمعتهاش من اهلى انما من المحييطين وكأن دى الجمله التقليديه لاى ام مطلقه او معلقه زى حالاتى ...فى الغالب الست ومشاعرها واحاسيسها فى الارض فى مجتمعنا يعنى اليى يفكر انه بيعمل معروف او بيجامل بالجمله دى يفكر الف مره قبل ما يطلعها من بقه لانها بتألم قوى قوى قوى ...والحكايه طبيعى مش ناقصه....

ورمضان كريم عليكم كلكم ..على اليى بيفرحنا واليي بيجرحنا
على اليى حاسسنا واليى مطنشنا ...واليى مدينا حقنا واليى ظالمنا
على ابو ابنى واهله واقرايبه على كل حد جرحنى واذانى وزعلنى

وعلى اجمل مدونيين العالم كلهم بلا استسناء ..مش هقدر ااقول اسامى عشان منساش حد
بس ايه رايكم فى تهنئه متأكده الكل عايز يهنيها لابو المدونيين كلهم ابو خالد ..كل رمضان وحضرتك بالف خير

الاثنين، 18 أغسطس 2008

زنوبه لبستنى السلطانيه..تاج الجزيره..



انا كل ما ادخل مدونه الاقى تاج ..تاج.فمعرفش الا من الاسئله ان تاج عباره عن اسئله




تاج كويتشن او كويتشن تاج يعنى.فعليه النهارده وانا بألقى نظرتى الصباحيه على بلوجتى ومهجتى الصغيره لقيت فى وشى تاج مش على راسى ومن مين من زوزه صاحبة




البحث عن زنوبه ماشى يا ست زنوبه وبتقول الفضول هيقتلها قال يعنى انا غامضه غموض ديفيد كوبر فيلد...ماشى يا زوزه برغم انى مبحبش الاسئله الكتير بس عشان تاجك بس هجاوب وانا ااقدر اعمل حاجه غير كده..على فكره التاج فى دماغى بيفكرنى بالسلطانيه ...وعليه ..


السلطانيه الاولى..اذكر خمسة احلام تخص ماضيك وتحلم فيها بتغيير اشياء ؟




1. مسبش مكان على الارض رجلى متتحطش عليه يعنى الف العالم كله وامنية حياتى انى اوصل للمحيط القطبى الشمالى يعنى لنهاية الارض وافضل ماشيه ماشيه لحد ما اجيب اخرها واروح كل مكان اثرى فى العالم من تل العمارنه لمدينة البتراء لاهرامات المكسيك لاماكن وجود الهنود الحمر يعنى معتقش مكان فيه ريحه قديمه ما اروحوش.


2.ايام حرب الشيشان كنت هموت واروح اجاهد مع المجاهدين لدرجة انى قدمت على دورة تمريض بالرغم انى لو شفت نقطة دم ركبى بتخبط فى بعض وبطلع اجرى ..بس كنت متعاطفه جدا مع القضايا الاسلاميه وكنت هموت واموت شهيده الكلام ده وانا فى تانيه جامعه على ما اتذكر من زمااااان بقه.


3.كان نفسى ابقى مخرجة افلام تسجيليه واعمل الافكار والحاجات اليى فى بالى ومسيطره على كيانى يعنى ابين واوضح صورتنا صح للغرب اصل اغلب اليى كنت بقابلهم فاكرينا بنركب جمال وبنقتل فى بعض فعايزه اوريهم مصر يا عبله.


4. زمان كنت هموت واحضر حفله ل ستينج ولما ستينج جه مصر قولت هاااا اخيرا هاحضرله حفله فقولت لماما قالتلى انتى اتجننتى اغانى وحفله واجنبى كمان فخفت انى ازعلها بس هو مين اتصلت بالمتعهد وكان سورى وحكيتله الحكايه لدرجة انى حسيت انه هينام منى وجاوبت على اسئلة المسابقه اليى بخصوص ستينج باستفاضه كمان وكان طلبى انى مش هقدر احضر الحفله فاحضر البروفه بتاعة الحفله وطبعا بعد ما الحيت والحيت والحيت واصريت ودوشته الموضوع متمش ومرحتش الحفله عشان مش ازعل ماما وستينج غنى ومشى وما ما مزعلتش بس زعلت انا نفسى بس مش مشكله .وحاجه تانيه كنت بحب قوى الرقص المسرحى الحديث اه والله وحاولت اشوف اى مكان التحق فيه بس لقيته كله مختلط قلت وعلى ايه مع نفسى احسن هو اشبه برقص الباليه بس بحركات عشوائيه على قد وصفى بس اليى متأكده منه انه بيطلع طاقه مخزونه جوه الانسان بشكل او باخر ..بس دلوقتى برقص على السلالم وانتوا عارفين الباقى.


5.كنت مبحلمش انى اتجوز الا لما احقق ذاتى وكل اليى بحلم بيه بعدين امعنت التفكير وامعنت التفكير وقولت دى تبق الحاجات دى حلوه لو مع حد بحبه وفيه بينا تفاهم فتمنيت انى اتجوز واحد مش حيلته ولا مليم وكل حاجه نعملها سوا ونبتدى من لا شى عشان لما نعجز ونكبر يبقى بينا ذكرى جميله وتاريخ او جغرافيا وكان نفسى يبقى عندى اطفال كتير كتير مع احترامى لتنظيم الاسره.بس ده الحلم الى صراحه قلب كابوس .




السلطانيه التانيه..اذكر خمسة احلام تخص مستقبلك؟


1.اربى ابنى بالطريقه اليى بتمناها احفظه القرأن كله زى بابا الله يرحمه ويلعب رياضه ويرتبط بيها قلبا وقالبا واعلمه لغتين وهو صغير الصينى والانجليزى طبعا واعمل منه انسان بجد بكل معنى الكلمه يكون مصدر فخر وحب لاى حد بيعرفه وتبقا معرفته معرفة خير لاى شخص حتى لو قطه فى الشارع.


2.احس انى انتصرت فى معركتى واخد حقى بالقانون نفسى اخده بالقانون عشان احس انه لسه فيه قانون فى البلد بيطبق اوامر قالها المولى عز وجل .


3.اصحى حلمى القديم بخصوص اخراج فيلم تسجيلى ودراستى فى المدرسه العربيه للسينما تجيب همها واعمل معرض صور فوتغرافيه عن المهن اليدويه انا كنت مصوره مجموعه حلوه قوى بس مش معايا دلوقت اللهم رد عليا ضالتى.


4.اعمل عمره فى رمضان واحج انا وابنى انا وابنى وازور الاثار الاسلاميه المتعلقه بالانبياء قبورهم والاماكن اليى عاشو فيها...وحاجه مهمه مهمه نفسى ابقى سبب فى ان شخص مش مؤمن بسيدنا محمد يشهر اسلامه وربنا يهدى اليى فى بالى..اه كنت هنسا حلم ربنا حقق نصه انا مغرمه بقراءات واصوات الشيخ مشارى راشد والصوت الملائكى ابو بكر الشاطرى وكان نفسى اصلى وراهم مره ربنا حققلى نص الامنيه وصليت المغرب ورا الشيخ مشارى كان فى نادى الصيد فى الاحتفال بالمولد النبوى والنادى يومها كان امم زى يوم الحشر بس كنت مبسوطه ان مشايخنا بقه ليهم شعبيه فاهمين قصدى طبعا كده باقى مين الشيخ الشاطرى اللهم حققهالى..


5.للمره اليى مش عارفه عددها نفسى الف العالم كله سفر تثقيفى واشوف معالم الدنيا وتشوفنى واحضر حفله لبراين ادامز واحضر مسرحيه من مسارح بردواى وبالاخص شبح الاوبرا اليى د. نور عارضه منها جزء فى مدونتها صعبان عليا حالنا.واشوف واتكلم مع يوسف اسلام كات ستيفنز سابقا وفيدل كاسترو ونتكلم عنه وعن جيفارا واشوف حسن نصرالله واشوف اشوف اشوف الخير كله....وفان جوخ اه هو مات من قبلى بكتيير كتيير خالص بس بحبه حب كان نفسى اشوفه قوى ..وبيبرس انا بحترم الشخصيه دى جدا وبيبرس مقتلش قطز ده افتراءات عليه..طبعا دول فى العالم الاخر انا بس كنت عايزه ااقول انى كان نفسى اشوف الناس دى ممكن فى زمن اخر ..انا مقولتش الصحابه والرسول ولا حد من الانبياء لان الحمد لله ربتنا نولهالى فى الحلم اه والله وانا فى ثانوى وانا متجوزه كمان فالحمدلله على ما اعطانى وعقبالكو ان شاء الله .واشوف كل المدونيين بقه واشوف الاطفال اليى مرميه فى الشارع ليها دار سكن ادميه تتطلع منهم اجيال مفيده وتحافظ على ما تبقى من ادميتهم..




السلطانيه التالته..اذكر شخصين على الاقل متواجدين فى حياتك الان كنت تود وجودهم قبل الان بزمن؟


1.عبد الرحمن ابنى وازاى معرفش بس كل يوم بيعدى بقول ياه يا ريت ربنا كان رزقنى بيه من زمان مع انى متاكده ان الرزق باوان ربنا محدده بعدين كان هيجى ازاى بخرف انا.


2.كل حد كويس عرفته وبيعرفنى وبيحبنى فى الله زى الناس المميزيين اليى هما انتوا ايها المدونون اليى معرفش عنهم غير معلومات يا عالم حقيقى ولا لا بس اعرف كويس انهم بيدونى نصيحه لوجه الله وبيدعولى دعوه بظهر الغيب هحتاج ايه تانى...اكتر من كده طمع.




السلطانيه الاخيره..لمن تهدى هذا التاج؟


لكل حد بيحب التاجات والاسئله دى سئلتها لاتنين معايا فى الشغل لقيت اجابات هايله..


ومش عايزه افرضها على حد مدون يمكن يكون مبيحبهاش بس ممكن تبقى مناسبه لمدونيين ومدونيين تانيين لا فحاسه انها مناسبه لي..


الريم صاحبة مدونة الوشاح


قررت اكون عانس ..هما مش انا


حاجات جوايا مع انها بتقول انه جالها قبل كده


د.نور صعبان عليا حالنا وحالى


رادار مدونة رادار واوعى المخالفه


الاغلبيه المخروصه لصاامته
سيبو فى حاله لو عجبك التاج خده مش عجبك مش هقولك سيبو فى كمل انتا بقه.

رصيف فريد شوقى رصيف نمره خمسه
do not prees f1 اتفضلى برس وجاوبى بقه
blue wave ادينا اجوبه شاعريه
نضال فلسطين ..حاسه ان التاجات مش لونك بس لو حابب تغير جو
اوريجنال هارت..ادينا اجوبه فى الصميم
ابن مصر..لا انا شفت فى مدونتك بتحب التاجات اتفضل يا ابن المحروسه
قصاقيص حبيبه ..اتفضلى قذقذى فى السؤالين دول بدال القصقصه
الاساتذه ..عصفور المدينه .ابو خالد.الطائر الحزين.الباحث عن الحقيقه .الجده فصيحه ...اهديكوا عنيه بس اعتقد ان التاج مش مناسب لحضراتكم وخايفه اسبب لكم ازعاج ....ومش مناسب يعنى سن حضراتكم ووقاركم بيناسبه تاجات اعوص من دى بكتيير اما الاخوه اليى فوق دول فرافير زى حالاتى ..ربنا ما يحرمنا من بركتكم وتشريفكم لينا و..يا رب ما ابقا عكيت الدنيا ...وكل رمضان وحضراتكم جميعا بالف خير ..
وشكرا يا زينب على السلطانيه الواسعه دى ويا رب يبقى فضولك شبع وجاتله تخمه كمان شكرا يا زوزه على اهتمامك يا قمره...


المعصوره من الاسئله واليى عايزه تتطلق محاسن..

كل حبايبى واخوانى واخواتى المدونيين بتأسف لاى حد مش ذكرت اسمه انا والله لو ااقدر اكتب اسامى بلوجاتكم فى سلسله واعلقها فى رقبتى ...ربنا وحده يعلم اى انسان بيشرفنى بزيارته وبتعليقه الكريم بيضفلى نفسيا ومعنويا بشكل غير عادى وبحمد ربنا ان لسه فيه محبه لوجهه من غير اى مصالح ناس بتدى اراء ومقترحات وبتخاف وبتدى نصايح الناس عمرها ما شافتها الحمدلله احنا كل واحد عنده مدونه يعرف انه فى نعمه كبيره ..واى شخص بيشرفنى فى مدونتى المزعجه ااقله ان حضرتك وحضرتك على دماغى من فوق بدون مبالغه ..ارجو انى مكنش دايقت حد ولا ازعجت حد ولا حد يتأثر سلبا بأى كلمه اكتبها او ااقولها ولو دايقت حد بأى شكل انا اسفه من هنا لكوكب المريخ بحبكم فى الله وكل رمضان وانتم بألف خير..وادام الله عليكم صفاء القلب وراحة الحال ودوام العافيه والوصول للسعاده ...اللهم امين ....




















الجمعة، 8 أغسطس 2008

انا والمحكمه وهواك(اليى جابلى برد)

يوم المحكمه زى يوم القيامه الكل بيتساوى فيه الغفير زى الامير والغفيره برضه زى الاميره تقدروا تقولوا تطبيق عملى لمبدأ المساواه ومبدأ مفيش حد احسن من حد ..ده المفروض قدام القانون طالما ظالم لازم وحتما ولابد تدفع نتيجة ظلمك وطالما مظلوم لازم واكيد ربنا يرفع الظلم عنك ويردلك حقك(وان شاء الله منصوره يا بنت جنسى دائما ابدا..ده لو مظلومه ولو ظالمه خدى على دماغك بقه اه الحق حق)انما وهيا انما دى اليى مجننانى دى ممكن الواحد..نخلى الكلام بصيغه انثويه عشان دى مشكلتنا احنا..ممكن الواحده يتحكملها وتاخد حقها اه ممكن انا جربت ده فى النفقه خدت حكم ب100جنيه لابنى و100 ليا شوفتوا الكرم ده وكأن اليى حكم مش عايش فى البلد ولاا هيدينى من جيبه المهم ادينى عامله استئناف يعنى جرى فى المحاكم لسنتين كمان يله انا ورايا حاجه يعنى لغاية ميتحكملى تبقى الدنيا ولعت اكتر وابقا انا وابنى قعدنا على باب الحسين(نشحت يعنى)..طب اتفرسنا من دى نتفقع من التانيه قضيه اتحجزت للحكم وخلاص رايحه اعرف الحكم..ايه اليى يخليها ترجع تانى للشهود حاجه غريبه قضيه بقالها سنتين وهو القاضى بلسانه وعقله قال خلاص جابت اخرها وحجزها للحكم يرجع فى كلامه ليييييه؟المهم انا حاسه كده لاما انا اموت وانا لسه ليا قضايا فى المحكمه او ربنا يكرمنى واشوف القضايا دى تخلص واخد حقى وحق ابنى على حياة عينى او موتها اهه اخده وخلاص على فكره انا دخلت المحكمه وانا فى اول ال26 سنه وما زلت فيها وانا برضه فى اول ال29 سنه اليى ساعات بيحزنى قوى ان والدى الله يرحمه كان دايما يقولى اتنازلى عن كل حقوقك وخدى ورقة طلاقك هو طبعا مش بيأيد كلام طليقى لا ده كان خايف ومشفق عليا من سكة المحاكم وحفرها..انا مش عايز اشوفك كده..الله يرحمك ..وانا اصر مع بابا اا قوله مش هسيب حقى وحق ابنى انا مش كنت بعقه لان بابا كان ديمقراطى جدا معانا يعنى يناقشنا ولو اقتنع خلاص..المهم لما لقيته بيدعيلى عرفت انه زعلان بس مش غضبان عليا الله يرحمه كان مغرقنى حنيه انا وابنى حنان واهتمام وطيبه الله يرحمك يا بابا...احلى حاجه ممكن تشوفها فى المحكمه بقه انك تلاقى الستات بتتضحك او بتبتسم يعنى فى عز البلاوى دى بيتضحكوا..يا كرمك يا رب..قاعده جنبى واحده وابنها كل مره بيبقى نفسى ابنى يبقى معايا بس بأشفق عليه برده ةالجو ملبش بالمشاكل والهموم وهوا لسه صغير كفايه اليى امه فيه ..على فكره انا مش خجلانه من نفسى ولاا زعلانه على روحى انا بس زعلانه على اليى بشوفه فى المحكمه..حصل بعد كده وخدت ابنى معايا مره عشان ماما كانت مسافره ومفيش حد اسيبه معاه الذيذ فى الامر انى قولتله انها فسحه وهو طلع ولاا فى دماغه حاجه عيل بس بموت فيه...