الاثنين، 29 يونيو، 2009

الجوازه الندامه والانسان القمامه

لما بيخيب الانسان بيخيب فى عقله ولما بيبقى حظه وحش ومخاصمه بيبقى فى جوازته هيا دى الدنيا قاحلة الالوان الغامقه ...
جالها العريس مره رفضته الف مره جالها مره ومره وهيا على الرفض مستمره ومصره لكن امها خايفه على بنتها من لقب عانس برغم ان عمرها لسه بيفتح بس بمشورة امها شكله هيودع
وافقت مرغمه ومضطره اصله بيسمع الادان يجرى جرى جرى على الجامع ويأم الناس فى الصلاه ولاا كأنه مشارى راشد العفاسى
اصله عصامى ومحترم وشاب رياضى وكمان فى نفس المستوى ومش هيخليها تعانى
قالت يا ماما لا مش مرتحاله وحاسه انه ياما بيدارى
ماما قالت لا لا يبقى انتى ناويه على موتى ولو افتريتى عليه عمرك ما هتشوفى غيره
سألوا عليه اهل الخير ويا ريتهم ما سألوا ولاا يا ريتهم ليه مهو النصيب بيصيب حتى لو بين اهله
وعليه اتجوزته المضطره ومن تانى يوم جواز بان اليى كان فى الجره اتارى المؤمن ايمانه كان ناقص سوى شويه طلع لا بيركع فرض ولا حتى ايمانه فى النيه
والعصامى اليى جاب من كفاحه شقه فى مساكن معرفش ايه الشيراتون طلعت قال شقه ايجار يعنى معلم من معالم الخطه ومرسم على الضحيه القطه
وعليه من اول اسبوع جواز بان كل شئ من وشه اليى عايز جاز وجنبيه ولاعه او بوتجاز
لا صلاه ولاا شغل ولاا حتى شقه وهيا دى الجوازه المحترمه
ومن اول اسبوع عسل بان على الغلبانه كل البصل وعنيها اتعمت من دموعه وعدى يوم فى شهر فى سنه وهيا مستنيه على امل او حتى فى انتظار عمر وزاد الضغط عليها هاتى دهبك هاتى فلوسك
قالتله اتجوزتنى ليه ولما انتا بتنافق قولى ايه يستاهل كده تغضب ربنا عشانه دى الدنيا فانيه ومبيفضلش غير حسن معاملة المرء واحترامه
طلعت مبتصليش ربنا يهديك ويغفرلك طلعت مبتشتغلش ربنا يرزقك ويعزك نقلتنى من مكان كويس لمكان يعنى ويعنى عادى اعيش فى جهنم بس تتقى ربنا فيا
اديك كل اليى حيلتى لو انا حاسه منك خير وحاسه معاك سعادتى مش سبب جوازك منى انك طمعان فى حاجتى
والبنت قصدى الست مازالت فى حيره فكل يوم هيا فى معركه عسيره وبيسيبها من غير فلوس وزادت وحاشة النفوس والبنت بنت ناس يعنى اتربت على المكسرات والمكنتوش والمحشى ومنها لحتى العيش الحاف بئه عندها زى الفسدق المملح اليى كانت بتئزئزه بتأنى
وعليه الغلبانه فى حيره تعمل ايه وهيا عايشه فى حيره وحيره تديله اليى وراها وقدامها وتخلص من معاملته الوحشه ولاا تصبر وتحتسب هيا اليى على لسانها انا وافقت عشان ارضى ماما وقلت يكفى انه بيعرف ربنا فاكيد حاسه ان ربنا مش هيخذلنى لانى عشان ارضيه برضا امى وانه عريس متدين
هيا واثقه ان نيتها فى الجوازه هتصلحلها حالها
وانا فى حيره مش قادره اديها رد قاطع غير انى بقلها لو اخدت منك حاجه هيرميكى بكره ولاا كأنك حاجه
فعليه انا عايزه نصيحتكوا تعمل ايه الغلبانه مع هذا الانسان القمامه.....
..الانسانه دى عزيزه عليا قوى قوى فمش قادره اديها رأى قاطع قوى لانى خايفه اغرقها وابقى عامله زى الدبه اليى قتلت صاحبها..
..آه مش هقول انا اسفه على تقصيرى معاكو وفى زيارتكوا لانى ببساطه استاهل ضرب النار...

هناك 167 تعليقًا:

صيدلانيه طالعه نازله يقول...

انا رأيى انها ترفع قضيه خلع او تلجأ للقضاء عموما لامه مش حينفع غير كده
لكن حكايه تصبر و تحتسب دى حتاخد وقت يمكن يكون عمرها كله لازم تاخد خطوه حاسمه معاه و بسرعه

ابو على يقول...

لو مكنشى فيه اطفال تخلعه بقى وخلاص ولو كان فيه تصبر على الجار السو يا يرحل يا يجيله مصيبه تاخده

Sweet Violet يقول...

اتفق مع صيدلانيه فى الرأى
و حتى لو فى اطفال .. مش ينفع تستمر لان كده مش هى بس اللى بتتعذب

nona يقول...

ازيك يا محاسن

قوليلها معلش خليها تستحمل لغاية ماربنا ينزل فرجه عليها

ربنا يهديه ليها وينتقم من حماتها اللى لو دى بنتها مش هتحب حد يعمل معاها كدة

دة حال الدنيا الدنية اللى احنا عايشينها تذل العزيز وتعز الذليل

nona يقول...

الطلاق كلمة مش سهلة يا جماعة
آدى محاسن شافت الويل علشان تاخد حقها اللى ربنا شرعهلها اللى هو الطلاق

صعب صعب وخصوصا ان فى اطفال
خليها تحاول معاه وتطلب الفرج من ربنا
ربنا مش هيسيبها

شبــ اون لاين ـــاب يقول...

السلام عليكم ورحمة الله وبركاته

انا والله رائ !!!!!!!!!

اممممممممم

سورى معرفش رد للبوست ده خبرتى لسه

على ادها

بس قولت اجى اقول السلام

فى رعايه الله

joker

عاشقه الرومانسيه يقول...

تطلق منه
وبما انه تيييييييييت
بالشكل ده يبقى تخلعه
لان النوعيه دى تاخد وماتديش
وربنا يوفقها

شمس النهار يقول...

مش فاهمه هي والا انتي بتاخدوا رأيينا في ايه ان شاء الله
ده انسان فاشل وكاذب ومخادع
ياريت تنفد بجلدها وترفع قضية خلع لو رفض يطلقها
وتحمد ربنا علي قد كده

فاتيما يقول...

محاسن يا بنت أبيها الغالى
من واقع تجربتى و تجربتك يا بنتى بنصحك إنك قوليلها على اللى فيها
و دون أن تخفى أى شىء
قوليلها تتطلق منه طبعاً
و متضعيش عمرها منتظرة حاله ينصلح لأن اللى زى دا ممنوش رجا
و لو إستنت عقبال ما ربنا يهديه هتكون هيا مخها ضرب ...
بس كمان و إنتى بتقوليها كدا
قوليلها الحقيقة كاملة
قوليلها إن تجربة طلب الطلاق
مش هتكون حاجة لطيفة
و هتتعرض أثنائها لكافة أشكال الاهانة و القهر و البشاعات التى لم تتخيل إنها موجودة ف يوم ...
بس العزاء الوحيد فى ذلك
إنها هتشوف بنفسها كل حد على حقيقته و هتعرف عدوها من حبيبها و فى الآخر هتفوز بنفسها
و هتعرف تحط راسها على المخدة كل ليلة و هيا حاسة إنها إنسانة كاملة
و لحقت الباقى من كرامتها
و إحترامها لذاتها
ربنا يكتبلها الخير و يخفف من حملها دون مشقة إن شاء الله
و بلاش حكاية ضرب النار دى عشان اللى هيفكر بس يهوب نواحيكى بالفرفر هنجطعه جطيع

mahasen saber يقول...

صيدلانيه طالعه نازله....

يا حبيبتى اولا اهلا وسهلا بيكى اعتقد ان ده اول تشريف ليكى فى مدونتى
بجد انا سعيده بزيارتك قوى وده شرف كبير ليا ويا رب متكونش الاخيره

ويالنسبه لرأيك فأكيد صح على الاقلل بالنسبه ليا وليكى ولغيرنا بس اخد الخطوه شئ فيعه مشقه واكيد فيه صعوبه عليها

ربنا ييسرلها كل خير

شاكره ليكى زيارتك جدا جدا ونورتينى يا حبيبتى وشرفتى المدونه يا صيدلانيه يا عزيزه

mahasen saber يقول...

ابو على.....

اعتقد يا ابو على يبقى التانيه لان فيه ما بينهم طفلين تؤم

ربنا يصلحلها الحال

نورتنى يا ابو على وشرفتنا بالزياره الكريمه دى

mahasen saber يقول...

sweet violet......

ضدتى الحبيبه ف وحشششششششششششانى اولا واخيرا وعلطول
ومنورانى دايما يا جميله

ورأيك ورأى صيدلانيه موضوعى جدا جدا بس اليى يقدر يا ضد على انه ياخد الخطوه بئه

mahasen saber يقول...

nona......

شفتى يا نها بنات الناس بيتعمل فيها ايه


عارفه يا نونا هيا مياله لرأيك قوى وده اليى مقعدها لحد دلوقت بس جدت احداث خلتها فى حيره

لما نتكلم ااقلك الهم كله

mahasen saber يقول...

شباب اون لاين......

جوك منور يا جوك بس كنت هتغرقنا بنورك لو قلت رأيك
بس ااقلك الاعتراف بالحق فضيله انتا برضه لسه صغنن ملكش فى الكلام الصعب ده

جبتش حاجه من عندى انا

نورتنى يا جوك يا غالى

mahasen saber يقول...

عاشقة الرومانسيه......

دودو حبيبتى للمره المليون كنت هغلط واكتب اسمك الحقيقى طبعا كنتى هتاكلينى بالهنا والشفا

شوفى يا دودو وجهة نظرك من وجهة نظرى الضعيف بس انا يجمع اكبر رأيى يتقال وااقلها عليه
والقرار ليها وربنا يكتبلها اولا واخيرا الصالح

نورتينى يا حبيبتى

ااقول اسمك ولاا اسكت
اعتقد اسكت احسن

mahasen saber يقول...

شمس النهار.......

فعلا يا شموسه اليى ايده فى الميه مش زى اليى ايده فى مية النار احنا ممكن بسهوله نقول رأينا ونصدر الحكم لاننا دايما بعيد على الشط اما اليى فى وسط البحر بيستنى قشايه تتديله امل فى النجاه

لو القرار يخصنا دايما دايما بنخاف ناخده وبنسأل وبنستخير وبنستشير لاخر امل

ربنا يكتبلها الصالح والخير
ويوفقها فى القرار الصائب

وبعدين دى حياه وعمر فأكيد هتسأل نفسها مليون مره ومره
مش كل الناس شجعان
ومش كل الناس ضعفا

mahasen saber يقول...

فاتيما.........

لا لا لا ام يوسف هنا منورانى يا حبيبتى يا حبيبتى وحشتينى وحشتينى بشكل
اخبارك ايه يا طمطم يا غاليه يا رب تكونى بالف خير

واخبار الملاك ايه يا رب دايما برئ من جواه زى مامته

وحشتينى جدا جدا يا طمطم

بنت ابيها الغالى بقلك انتى وحشاها جدا جدا
ودايما بتدعيلك بظهر الغيب انك تكونى فى افضل حال

وبالنسبه لرايك يا طمطم اعتقد انى هقلها تقراه وبتمعن
عارفه هيا خايفه من نقطة فيما بعد وما يترتب عليها

بس عارفه يا طمطم ندعيلها ربنا يصلحلها الحال يمكن بنيتها اليى عليها دى حاله يتعدل
ربنا قادر على كل شئ برضه
ربنا ييسرلها كل خير يا طمطم

ويكتبلها الصالح يظهر ان الجوازات السعيده بقت من نوادر الدنيا ولاا ايه

نورتينى يا غاليه يا شقيقة قلبى
بوسيلى يوسف جامد من قلبك لقلبه كده علطول
ربنا يجمعكوا على خير يا حبيبتى يا رب

وطنينى عليكى يا طمطم اه انا وحشه وبقصر فى السؤال بس انتى اكرم منى ومن مليون زى
ربنا يصلحلك حالك ياحبيبتى دايما

Bella يقول...

انا مش فاهمة ايه لازمة زوج بالشكل ده

يعني لامعاملة كويسة ولا اخلاق ولا اي حاجة

يعني اسم الله عليه نطع وبيعيش على فلوسها وبيعاملها معاملة سيئة
ايه بقى المفروض تنتظره من شخص بالمستوى ده

مفروض طبعا تخلع منه وقعدة الخزانة ولا جوازة الندامة

خوفها من لقب عانس هو اللى خلاها ترمي نفسها في هذا المستنقع دون تدقيق وخوفها من الطلاق سيجعلها في هذا المستنقع للابد ولن تكون وحدها

اذا لم يكن لديها اطفال حتى الأن فبمرور الوقت سيكون وفي هذه الحالة استمرارها يعني انها لم تظلم نفسها وحدها بل تظلم طفل او اكثر بالتواجد مع نطع بهذه الصورة

تحياتي

mohamed ghalia يقول...

محاسن الموضوع فعلا محتاج تفكير كبير
واضح انى الحياة بقيت مستحيلة بينهم

yoyo يقول...

صباحك سكر

اخبارك ايه يا وحشانى جدا جدا
يارب تكونى بالف خير يا قمر

اه والله هى فعلا جوازة الندامة
المشكلة ان الام والاهل دايما بيتسرعوا فى جوزاة البت لمجرد انها تهرب من كلام ناس ولقب عانس وخصوصا لو كل معارفها اتجوازا وهى اللى فاضلة يبدا الزن بقى على الودان و انت عاوزة ايه و مستنية مين بقى ؟؟
ماهو انسان محترم وابن ناس والكلام دا بقى
لحد ما الفاس تقع فى الراس
وهوب كرسى فى الكلوب بقى

اعتقد انها من جواها لسه عندها امل انه فى يوم ممكن ينصلح حاله و الوضع يتحسن بس صدقينى انسان بالوضع دا مستحيل ان حاله ينصلح
تحاول انها تطلب الطلاق منه رغم ان دا اصعب شىء على الست بس احسن من اللى هى فيه وان رد مش هيكون قدمها غير الخلع
وتحاول تبدا حياتها تانى من جديد وبشكل صح
ومش تفكر فى نظرة الناس اللى كانت سبب فى ارتباط فاشل من البداية

تحمد ربنا على كل حال

يويو

حاسوباتيه يقول...

تطلق طبعا لو هتدفع كل فلوسها ده مايتقعدش معاه ولا نص يوم كمان وانا في رايي بدل بهدله المحاكم تعمله الي عايزه ويسيبها وتعيش حياتها وربنا يعوضه عنها خير يارب

صوت من مصر يقول...

بصى هقولك حاجه حلوه وصغننه تعمل الى بيرو عمله فى شخص ما فى كوستا
والله هيطلقها ويسبلها الشقه والدهب والفلوس
لا بجد بقى شىء سهل تقدر تعمله
تجيب اهلها واهله وتخلى الناس تعرف حقيقته ومنها تقدر تطلب الطلاق العلنى قدام الناس كلها

ABOALI يقول...

اممممممممممممممممممم
رجعنا للمحاكم
ومالووووووووا
كله شغل
اختصارا العريس اشتغل اهل العروسة

اولا اذا كان فيه حكماء فى العائلتين يتدخلوا ويحاولوا الاصلاح

صمم على البطالة والعيشة البااااااطلة

يبقى ابغض ا لحال


بس خسارة فعلا
منظومة اجتماعية مختلة فعلا

احييكى على ا لعنوان بتاع البوست

لخص القضية وحلها كمان

لاءن لا عيش فى الندامة والانسان مكرم لا يعيش فى القمامة


تحياتى وخالص تقديرى

karim يقول...

سيدتى الفاضلة مابنى على باطل فهو باطل, زهذة الحياة بداءت بالغش و الخداع واكييد استمرارها مستحيل

أحــوال الهـوي يقول...

ما بني علي باطل فهو باطل

و من نافق الله لن يتقيه

الاولي ان تطلب الخلع او الطلاق ايهما اقرب
لان النتيجه من استمرارها المزيد من نزف الكرامه و ذل النفس

و اعرف ان الاهل سوف يخافون من لقب مطلقه و يفضلون قتل ابنتهم ببطئ علي الاعتراف بعدم تحريهم الدقه في الاختيار

ساعدها الله فهو عز وجل نصير المستضعفين

تحياتي

اسامه عبدالعال يقول...

مبروك النيو لوك
وحمدالله على السلامه

اما عن رايي انا فخساره قريبه ولا مكسب بعيد

momken يقول...

ازيك يا محاسن

احنا هنأجل ضرب النار لبعد التعليق

وكلامى لصديقتك

سيدتى...فى الاصل كان زواجك مبنى على خدعه كبيره
واعلمى ان من يكذب فى مشروع حياته ويعلم انه ذات يوم سينكشف امره
هو بالبجاحه بمكان حيث انه لا يعمل حتى على تصليح ذاته
فهو كمن يجاهر بالمعصيه

سيدتى اتركى كل كا شىء واحمد الله انك لم تنجبى منه واكسبى عمرك فهو راس مالك الحقيقى

سيدتى ربما الفقر له علاج
والمعصيه لها علاج
والمرض له علاج
اما سؤ الاخلاق فهى طبع والطبع ليس له علاج

هذا الشخص لا يحتاج الى زوجه لكنه يحتاج دائما لمن يستغله
ربما لو سأت امورك الماديه ولم يعد مع شىء يأمرك بالمعصيه او الرزيله لجلب المال
وربما لو رزقه الله البنات فعل معهم نفس الشىء
فمثل هذا النموزج ليس
لديه نخوة الرجوله
ولا شبق الدين
ولا عبق الاصل

اكسبى ذاتك ونفسك وفوزى بشرعه الله مع من لا تطقين معاشرته

هذا افضل الف مره من ان تجدى نفسك فى المستقبل تخونيه حتى بعقلك وتتخيلى غيره اثناء وجوده هو معكى

اعتذر عن الاطاله
هداكى الله الى سواء السبيل

تحياتى

MaNoOoSh يقول...

هي اذا استحملته شوية
مش هتقدر تستحمله بقية العمر

ولو اديتله اللي وراها واللي قدامها الوقتى.. ايه اللي يضمنها انه ميبتزهاش تاني علشان تجيبله من أهلها مثلا

الوضع اللي حصل كان فيه غلط من الاول
بس خلاص بقى أمر واقع

المفروض الوقتي نفكر ازاي هنعيش حياتنا
واذا كانت هتقدر تكمل حياتها وتستحمل بالشكل ده وللا لأ

انا رأيي انها متكملش معاه
وتنساه وتنسي اي يوم وحش عاشته
وان شاء الله ربنا هيعوضها بكل خير
ويرزقها بالزوج الصالح اللي يحفظها ويصونها ويكون راجل بجد

الطائر الحزين يقول...

تمشى ورا احساسها هى

مصطفى ريان يقول...

مش عارف اقولك ايه يا محاسن بس واضح انه عيل لبط ودة ماينفعش معاه إلا الحلول اللابط الصح لو دي اختى اشوف تلات .. اربع رجاله يضربوه العلقه الصح ويطلق او لو حد من العائله لواء ولا منصب فى الشرطة يتشدالشدة الصح ويطلق
قد يكون الحل دة مش مناسب من وجهة نظرك بس في رأيي دة انسب حل للي انتى قلتيه

ghorBty يقول...

السلامـ عليكمـ

لا حول ولا قوة الا بالله

هي الدنيا جرا فيها ايه والا الناس جرا فيهمـ ايه

انا من راي الراجل ممكن نستحمل منه اي شئ الا انه يكون كذاب ومنافق

دd حياتها هي تستخير وتدعي ربنا كتير وتمشي باللي هي حساه واللي قلبها بيقولها عليه كفايه مرة واحده مشيت ورا كلامـ غيرها وادي النتيجه .. الموضوع كله نصيب وقدر الله وما شاء فعل بس بلاش تبكي علي اللي فات وتضيع معاه كمان اللي جاي

ربنا ييسر لها اللي فيه الخير لها في الدنيا والاخره ..

رؤية يقول...

والله مش عارفة اقولك ايه؟
الحل المنطقى انها تسيبه لانه انسان مش كويس
بس الفكرة فى المجتمع من جديد
دا على حسب الوسط اللى هى فى
انهى الافضل ليها انها تكمل وتستحمل
ولا تنفصل وتعيش مع اهلها
دا يتوقف على رد فعل اللى حواليها
ودا من باب اخف الضررين لانى اسمع انها بتبقى مشكلة كبيرة عند بعض الناس
لكن انا من رايى تنفصل طبعا

وربنا يصلح لها الاحوال
بالمناسبة انتى وحشتينى
هابعتلك ايميلى على الفيس

تحياتى

kareem يقول...

حقنه هوا و هو نايم اكيد حتستريح منه خالص بعدها

عاشقة القمر يقول...

انا رايه احسن لا تسمر وطلاق سريع قبل ماتجيب طفل عيش في وسطهم كل مشاكل

حياة يقول...

لسه فى كده

تحياتى

romansy يقول...

اهلين اهلين
يا الاستاذه
الموضوع كبير قوى
النصب بقى فى كل مكان والحيره اللى مجننا احتلتنا خلاص الشباب مش لاقى حاجه يعملها نفسه يتجوز بس مش بالطريقه دى خالص دى مهما كان زوجته وهو متكفل يصرف عليها ويحسسها بالحب ولاامان
ربنا يهدينا
ويهديه لكل الشباب اللى فيه الخي ر

ومش زعلانين منك خالص

magi يقول...

الخلع على طول بصى اصل الجواز لو مفيهوش راحه وامان بلاش منه احسن وهى مش هتضيع عمرها مع بنى ادم زى ده وعشان ايه انا رأى انها تسيبه وتبدأ حياه جديده هتكون بكل تأكيد اسعد وربنا يوفقها

shemo يقول...

السلام عليكم.......ازى حضرتك الاول بس ابدى اعجباى باسلوب الرواية للحكاية ....... طبعا الجواز دا عمر مش حينفع تصبر وتحتسب علشان هو بدال كده من الاول عمره ما حيتغير وبدال هى بنت ناس ومش وخده على البهداله حرام تستحمل هى ولا كانت بتحبه يعنى ولا حاجة علشان تستحمل الارف دا وكويس ان مفيش اولاد يتظلموا انا رايى انها تطلق او ترفع قضية خلع وربنا يوفقها مع حد يستهالها وخليها تنسى حكاية انها تديلوا فلوسها ودهبها علاشن حيسبها فى الاخر بعد ما يخلص على حجاتها.
shemo

أحــوال الهـوي يقول...

و اضح انك مقطعاني

رغم اني بضاعتي مصريه و شرقاويه و مش اسرائيليه

رغم طلبك المستمر لعودتي للتدوين

بلاش تزوري مدونتي ردي علي ؟؟؟

تحياتي

من غير عنـــوان يقول...

أكيد النصيب حيصيب

وأكيد الطلاق أو الخلع هو الحل

ولنتريث ونتروى أكثر في زواج ابنائنا

تحياتي

المتبهـدلـون فـي الأرض يقول...

سلامن عليكم
تسمحيلي أرد

أنقلها حكمة قالها شخص حكيم/ شخصة (أنثى يعني)
تقول فيها (عندما ينعدم الأمان في الحياة الزوجية وتصبح الطمأنينة حلم بعييد المنال , فعندها مرحبن بأبغض الحلال) وهذا هو ما تعيشه هي.

عايش... ولكن !!!! يقول...

محاسن
عايزه رايي
انا دايما بقول على المواضيع اللى ذى دى
مهما اتحكالك عنها
هيا اقدر واحده تحكم على اللى هيا فيه
حتى لو وصفتلك كل حاجه
واعتقد انتى بالذات فهمانى كويس
قوليلها تقعد مع نفسها وتقيم اللى هيا فيه بالظبط وتشوف ايه اللى ممكن يكون فى مصلحتها ووصليلها بردو ردودنا مع انى شايف ان هيبقى فى رايين اللى بيقول تطلق او تخلع نفسها واللى بيقول تصبر وتحتسب عند الله
وانا بقول هيا الاجدر انها تحكم علشان لما تقرر تبقى واخده قرارها عن اقتناع وتستحمل كل حاجه هتقابلها بعد قرارها لان القرارين هيكونوا صعبين فى الاول واصعب كتير بعد ما يحصلوا سواء طلاق او عدمه
وان كنت اقول ان ابغض الحلال عند الله الطلاق فزوجك له عندك النصيحه سواء بقا بيصلى او لا قريب من ربنا او لا اتمنى انى اقكون قدرت اوصل شىء على قد معرفتى الخارجيه بهذه المواضيع

أحــوال الهـوي يقول...

mahasen saber

انت اختي التي لم تلدها امي

لا يمكن ازعل منك لانك من الشخصيات التي نعتز بوجودها بيننا و لو غابت تترك فراغ

لكن احنا لو غبنا قلما نجد من يسال عنا

معذرة فهذا قدرك و عليك التحمل

انتظر تعليقك
تحياتي

شيماء الجمال يقول...

محاسن
رائى الخاص بى هو اذا كان مفيش اطفال فالطلاق واجب اما اذا كان هناك اطفال فعليها ان تصبر وتحتسب وتعمل بقول الرسول عليه صلوات الله ( ايما امراءه صبرت على سوء خلق زوجها جازاها الله مثلما جازى زوج فرعون) وعليها ان تصبر الى ان ينفذ صبرها وتكون مرتاحه البال مطمئنه من اتخاذ قرار بالطلاق او الخلع ومعها الله ووفقها لما يحب ويرضى
تحياتى

بنوتة مصرية يقول...

يالهوى على العرسان
بجد عرسان ............ مش هينفع اقول عشان الرقابة
ياريتها احتفظت بلقب عانس
هو الرجالة معظمها لو ماقلتش كلها بقت عايزة الحرق لية
انا بجد اتخنقت
يافرحتى هو دة الحال ياعانس ياطالق
ااقولك قوليلها تشربلها كاسين جاز كانهامش واخدة بالها
او تقتلة وتريح امة لااله الا الله

بنوتة مصرية يقول...

من برة فرشتللك ومن جوة فرشتللك وانت مايل واية يعدللك

بنوتة مصرية يقول...

سيبك بقا من صاحبتك
اولا انتى وحشانى موت والله
فينك
ثانيا اناكتبت عنك فى اخر مدونة ياريت ماتكونيش زعلانة منى
ولو زعلتى عرفينى لانى هنزل الكتاب وهااذكر كل الشخصيات بما فيهم انا وانتى وصاحبتك وكل اللى دمه اتحرق من الرجالة

نـــــــــــــور يقول...

ازيك
واحشانى
انا زعلانه كمان علشان مابتساليش عنى :(

انا رأيى
تخلص منه وهى مش هتغلب انها تعيش من غيره اصل اللى زى ده قلته احسن
وبعدين يمكن لما تخلص منه ربنا يعوها خير بواحد احسن منه يعوضها اللى شافته معاه مادام هى مظلومه

اخبار خطيبى ايه؟؟
سمعت انك خطبتيه لواحده تانيه
شورتك لونها كحلى لو عملتى كده

marmar يقول...

ميسووو يا جميله ازيك وحشتيني يا قمر انتي عامله ايه يا اجمل انسانه في الدنيا وحشاني بحجم السما
اعملي حسابك هنزل مصر اخر 7 لازززززم لازززززززم لازززززززززززم اشوفك بقى



بصي انا من رأيي انها ادام عرفتو على حقيقتو وبان على اصله يبقى تطلق منو لو حتى اضطرت انها تديلو كل حاجه تملكها بس عل اقل هتخلص منو وترتاح بجد اصل كل ده حصل في اول سنه ولا تاني سنه حتى
ما بالك بعد عشره عشرين سنه هيحصل ايه الراجل ده صعب يتعاش معاه اكتر من كده بجد
ربنا يستر على كل الناس من الافترا ده ايه ده بجد في ناس كده في الدنيا :( ولا انا مش عايشه في الدنيا اللي هما فيها ولا ايه بجد يا محاسن :(

hasona يقول...

السلام عليكم

نصيبك لازم يصيبك
واللي مكتوب علي الجبين بتمشي في الرجلين

ولأن الجواز لا يبني علي رأي أحد ولو سألت أهل الارض جميعا

ولكن هي تستخير ربنا
ولو وجدت في الانسان ده خير - تكمل وتصبر وتحتسب
ولو لم ترجي منه خيراً أو نفعاً
فلن ينفعها ذهب الارض ولا مال السطان لأنه معاه سيزول

واللي مش جواه خير لايمكن يصلحه مال ولا طير
ولا أكل ولا شرب ولا خميرة

عليها أنها تشاور أمها في الامر
وان عزمت علي شئ تتكول علي الله
لعل الامر يكون يسيراً الان
فيما بعد لن تستطيع عمل شئ

لأن من كلامك شعرت ان ليس بينهما أولاد
ولا أُلفة ولا سكن ولا مودة

ميس الريم يقول...

نظرا لثقافتك العالية و مدونتك الاكثر من رائعة ... دعوة لزيارة مدونتي الثقافيه المتواضعة

مع احترامي

Soul.o0o.Whisper يقول...

السلام عليكم و رحمة الله و بركاته

سنسنتىىىىىىىىى
حبيبة قلبى

وحشانى والله يا محاسن
اخبارك ايه؟؟و اخبار بيرو؟؟

بصى يا قمر
هو الامر اولا و أخيرا ليها
هى اللى تاخد القرار عشان ماترجعش تقول دى هيا اللى قالت لى

انتى قوليلها انا ماعلى إلا النصيحة
و انصحيها فعلا بصدق
و اللى من رايى انه انسان بهذه المواصفات و هى استحملت معاه كتير
و مش ظهرت منه بادرة تغير

هذاانسان لا يستحق اى تضحية
بل سيزداد فى اخده حتى قد تتعب هى نفسيا ، و تاخد قرار فى وقت تكون الخسارة اكتر من المكسب

و مش ينفع حتى لو فى اولاد
لان الاولاد غصب عنهم فى بيئة زى دى هيطلعوا فيهم من باباهم

دا رأيى ..
بس القرار اولا و أخيرا ليها


دمتى بكل الود يا جميل

أسطى في زمن البلي يقول...

.

لا خاب من استخار

و لا ندم من استشار


هي بتطلب المشورة .. يعني قطعت ربع الطريق

لان الاستشارة ذاتها بتختلف فيها الآراء

انما الاستخارة بقى .. فربنا هو صاحب الشأن فيها

....


سؤال اسطواتي شوية .. فين الرجالة في الموضوع دا ؟ .. ليه الام هي اللي ماسكة الدفة ؟

يعني ابوها او عمها او اخوها الكبير او جدها او خالها .. ما هو ما فيش واحدة او واحد مقطوع الاهل يعني ..

و كلامي للحريم .. ما تزعلوش من كلامي .. انتو على العين و الراس .. و انتو عليكو عمار الدنيا .. على راي امي الله يرحمها .. لكن شورة المرة بخراب سنة دا لو صحت .. فما بالكو لو كانت ملخلخة .. برضه على راي امي الله يرحمها

ندخل في الكلام الجد .. العنصر الرجالي .. هو اللي ها يسال .. و ها يعامل .. و ها يعصر .. و ها يوزن معدن بسلامته .. و ساعتها ها يبقى القرار الصح يا بوووي


بجد عاوز اقول كلمة .. و اكيد مش ها تعجب ناس كتيرة

الجواز المبني على العواطف بس .. بيفور بسرعة زي الحليب اللي ع النار

انما جواز الاسر .. المبني على اقتناع .. و يكون فيه عامل تفكير و عقل .. و اكيد طبعا لازم يكون فيه قبول و استلطاف .. مش ضروري يكون عواطف مشعللة قوي .. بيكون فيه الاسر مقروءة لبعضها .. معروف كبيرها و مرجعياتها .. معروف اصولها و معادنها .. الجواز دا بيكون هااااادي و بيعمر ..

عاوز احط نقطة تاكيد .. الجواز للجواز و بس .. مش مصلحة او منفعة

...

الجواز مش ولد و بنت .. شاب و فتاه .. لا لا لا .. الجواز اب و ام .. عم و خال .. عمة و خالة .. جد و جدة .. علاقات متشابكة .. يعني ايه ؟ يعني الكل بيشارك برايه .. مش راي الزامي .. لكن وجهات نظر ممكن تفيد .. لان اي عنصر من دول ها يبقى له دور في وقت المشاكل .. فمن باب اولى يتاخد رايه الغير الزامي وقت القرار


يمكن كلامي غريب حبتين على اهل المدن .. اللي تاهت في ثقافتهم اساليب الاسر في الريف .. بتتجمع الاسر من اقصى الطرف لاقصى الطرف في المناسبات الاجتماعية .. اوقات الاتفاق بيتقدم الكبير .. علشان كدا الكلام بيبقى له احترامه ..


ام عبد الرحمن

تقبلي مروري

elsha3er يقول...

اولا ولله وحشانى جدا

ثانيا انا جيت كذة مرة ومكنتش عارف اعلق

ثالثا بجد انا بهنيكى على اسلوبك فى الكتابة نجحتى انه يكون فيها نغم جميل بطريقة غير متكلفة


رابعا انا شيف انها تطلق او تتخلع ما تفرقش لان الشخص اللى زى دة صعب اى حد يأمنله



تحياتى


يا احسن اخت


احمد الشاعر

ريمان يقول...

محاسن حبيبتى

وحشانى موووووووووووت

هاتى بوثايه بقه


هاتى يلا يا احلى حما فى الدنيا

ازى بيرو حبيبى


البوسه دى ليه
امواااااااااااااه

بجد وحشانى


يا رب تكونى بخير

ويا رب يطمنى عليكى يا رب

بحبك بجد اوى

بالنسبه للبوست هى الست دى لو تقدر تحمل تتحمل لو مش عندها عيال يبقى تخلعه فورا ده ايه رجاله اخر زمن دى انا قرفت من سيرتهم والله

اتعقدت يا اوختشى والله

ههههههههههههه


بس اعتقد يا محاسن انها مش ينفع تستمر معاه لانه بجد صعب اوى

ربنا يكون فى عونها

تعمل خلع وخلاص ويبقى اسمه مخلوع افندى

قيس بن الملووووح يقول...

ابنتي /محاسن
قبل ان اقول راي في قصة صديقتك ...انا اري ان الامهات تحديدا يلعبن دور في شقاء بناتهن ..انا مثلا بنتي تقدم لها اكثر من عريس ما بين طبيب ومهندس وصيدلي ولم يحدث نصيب وانا ارفض تماما ان ازوج ابنتي حتي ولو بالتأثير علي رايها فالعرسان الثلاثة كنت اري احدهم مناسبا جدا ولكن عندما صارحتني ابنتي بالرفض اعتذرت له رغم اني كنت اعطيت له الموافقة..والأن تقدم لها عريس انا اري انه غير مناسب ولكن ساوافق عليه نزولا علي رغبتها وانا متأكد ان هذا القرار مشوش حيث - وهذا هو الاهو- ان والدتها تقوم بعمل غسيل مخ للآبنة وتضغط عليها ليل نهار فلانه اتخطبت فلانه اتجوزت ...رغم ان ابنتنا خريجت العام الماضي يعني صغيرة السن وعلي قدر من الجمال....لقد اخذت تسرب الي داخل الابنه ان العرسان سوف يقل مستواهم التعليمي والاجتماعي كلما مضي الوقت( هذه الابنة لم تتعدي الاثنين وعشرون عاما وعل قدر كبير من العقل ايضا)...تردد دائما انا عايزه افرح ببنتي وتتهمني انني اقويها ولا اتقي الله فيها عندما اضع شرط موافقتها الكاملة علي العريس....ونجحت هي بعمليات غسيل المخ وفشلت انا باعطاء الحرية ...فلله الامر من قبل ومن بعد.
انا اري ان علي صاحبتك ان تنفصل عن هذا الزوج لان الانسان يعيش مرة واحدة وقد يكون الصبر منطقيا اذا كان الاختيار علي بصيرة وبارادة كاملة اما مع الخديعة فالطلاق احب الحلال لاابغضه.
تحياتي
كيف حال عبد الرحمن

سمكه واحده يقول...

صباح الخير يا سنسنه ياجميل
لا طبعا من غير اي تفكير
صحبتك تسيبه
اللي بيتبني علي غش وخداع من الاول مينفعش
واسوء صفه هي الكدب
تسيبه وتسيب اهله كمان
ده مفهوش نقاش اصلا وتحمد ربنا ان مفيش اطفال تنفد بجلدها
وربنا يصلح حالها

كيــــــــــــارا يقول...

لا طبعا مش تديله حاجه وتنفصل عنه دي مش جوزاه استمرار دي مصلحه يعني هياخد منها حاجتها ويرميها

EMMY BABY يقول...

محااااااااااااااااااسن والله مش انتى اللى عايزة ضرب النار انا اللى عايزة ضرب النار

بجد وحشتنى مدونتك اوى

بالنسبة للموضوع من رايى انها متدلهوش حاجة وتروح تقعد عند اهلها لحد ما يزهق ويطلقها

او تخلعه بلا قرف ايه اللى ممكن ييجى من وشه يعنى

لانها لو ادتله المرة دى مش هتبقى الاخيرة وهتفضل حياتهم كدة دى لو فضلت ومرمهاش اول ما فلوسها تخلص

بجد والله الواحد بقى خايف يجوز من اللى بيسمعه ده

ربنا يهدينا جميعا

تحياتى

ايمى

micheal يقول...

تتكل علي الله وتخلع أو تحاول تحصل علي الطلاق
بجد مش عارف ليه الامهات والاباء بقوا مستعجلين علي جواز بناتهم
:)

MaNoO يقول...

الخلع سواء فى أطفال او مفيش أطفال
لان الانسان لازم يكون حر وهيا ولا مرتاحة معاه ولا منتظرة حاجة عشان ترتاح معاه لازم بقى تشوف حياتها وتعمل اللى يعيشها مرتاحة حتى ول كانت مع نفسها ومتخافش من كلمة مطلقة دى مش مشكلتها دى مشكلة فى ثقافة المجتمع احس ماتعيش مقهورة طول حياتها وتضيع عمرها كدا فى الفاضى احنا بنتحاسب على عمرنا دا ومن حقنا اننا نستمتع بيه الخلع ةتبعد عن انسان معرفش يقدرها ولا هيعرف اتمنى انها تاخد القرار الصحيح تقبلى احترامى

عالم حبيب يقول...

السلام عليكم

في أمور الزواج لازم يكون في تأني وتدبر لكل الأمور .. يعني من السهل جدا ان ينصح أي انسان هذه الأخت انها تفارق هذا الإنسان

ان كان الحال كما وصفتي .. فعلى هذه الأخت أن تحاول وتجتهد مع زوجها قدر امكانها وتدعوا له .. وتحاول أن تُدخل في الموضوع بعض أقارب الزوج وأقاربها العقلاء

فإن انصلح الحال كان بها وان خافت على نفسها ودينها تختار نفسها ودينها أفضل لها

ربنا يصلحلهم الحال يارب

فشكووول يقول...

طبعا انتى مقصره فى الزيارات بس من غير ضرب النار .. احنا حنسامحك
شوفى يا بنتى .. الطبع يغلب التطبع .. واللى اتربى على طبع خلال مدة عشرين او 25 عام اللى هما المده اللى بيتجوزوا فيها يبقى صعب انه يغير طبعه
جات الحزينه تفرح ... ما لقتلهاش مطرح
وما فيش حد بيغير طبعه بسرعه كدا
ممكن يتغير طبعه بس بعد ما تزوق الامرين وحضرته الدنيا تضربه يمين وشمال والموضوع دا ياخد حوالى 15 او عشرين سنه تكون المسكينه راحت فى التوهان
الواحد ما يقدرش يقول اكتر من كدا لان الافتاء فى هذه الامور صعب صعب صعب
تحياتى

Love-Guru يقول...

سبحان الله ... نفس القصة سمعتها بتتكرر مع بنات كثير هذه الايام. الاندفاع اليائس وراء اي جوازة بدون التأني في دراسة العريس و البحث عن اصله و فصله و انتشار نوعية جديدة من الرجال اصبح الخداع و النصب هو وسيلتها في الحياة حتي في الزواج هما اكثر اسباب مثل هذه المشاكل. و لكن لي عتاب علي العروسة و اهلها كيف لم يفطنوا انه بلا عمل او انه يعمل عمل لا يفي يمتطلبات الحياة الزوجية؟ كيف لم يكتشفوا هذا قبل الزواج؟؟ و كبف لم تكتشف العروس و اهلها ان الشقة ايجار و ليس تمليك كما ادعي العريس النصاب؟ اما حكاية الجري الي الصلاة و الي امامة الناس فهذا قد يخدع بعض الناس و لكن قد يثير شكوك البعض الآخر.

خلاصة الكلام لا اعفي العروس و لا اهلها من الخطا في سوء الاختيار و اهمال التحري و السؤال الجقيقي عن العريس قبل الزواج.

الحل.... للاسف مثل هذه الجوازات محكوم عليها بالفشل و كلما اسرعت العروس بهذه الخطوة قبل ان تتعقد الامور و يكون هناك اولاد كلما كان افضل. و سوف تخرج العروس من هذه الجوازة بجروح نفسية عميقة و عليها ان تتقبلها و تتغلب عليها فهي ثمن سوء اختيارها.

توتة المخنوقة يقول...

انا بجد بزعل اوى كل ما بسمع حكاية زى دى بجد حرام الله يخرب بيت الزن الى بيخلى الواحد يرمى نفسة فى التهلكة يعنى مامتها مرتاحة دلوقتى وبنتها متبهدلة البهدلة دى يعنى لو كانت من الاول بطلت الزن الى جايبنا ورا ده وسابت البنت تتجوز واحد تكون مقتنعا بيه قلبا وقالبا بس هنقول اية المكتوب على الجبين لازم تشوفه العين
طيب هى اتسرعت ونصيبها كان منيل مش تنفد بجلدها بدل ما تحكم على اطفال ملهمش زنب يكون ده ابوهم والاطفال الى تتربى فى جو زى دة هتتطلع نفسيتهم ايه
انا بجد نفسى اقولها حاجه واحده بس استخيرى ربنا وامشى فى اجراءات القضاء وربنا يكرمك بالخير كله انشاء الله
وابوس ايديك متسمعيش للناس ولا للزن امشى ورا قلبك ودايما صلى استخارة وادعى ربنا يلهمك الصواب



ودى المدونة بتاعتى اتمنى تشرفونى
http://sr5etonsa.blogspot.com/

الازهرى يقول...

بعيد عن ان القضية تنفع والا لأ
انا باقول ان الطلاق صعب جدا والفراق اصعب حتى مع الكره
لانه لو كان سهل كانت قامت بيه من زمان
وعموما هى الاعلم بظروفها لو فى احتمال ول بسيط انها تنجح باذن الله فى اصلاحه يبقى يستمروا
انما غير كده يبقى كل واحد يشوف نصيبه بعيد عن التانى وباذن الله ربنا يوفقهم للخير بعيد عن بعض

**************************
تحياتى واتفاقى معاكى على اخر جملة

منايا يطلع النهار يقول...

السلام عليكم:

طبعا تسيبه لانه هيخلص على اللى

معاها ويروح لغيرها.

حياتها هتكون جحيم فى جحيم، لكن

اكيد

لما هتسيبه هتكون احسن وتعرف تعيش

حياة كريمة.

وان شاءالله ربنا يعوضها كل

خييييييير.

الازهرى يقول...

بالمناسبة انا كتبت التعليق ده والنت فصل
كنت ناوى اكتب واحد تانى اهنى فيه بالشكل الجديد
بجد جميل جدا
ولو ترتبى الكتابة بحيث يكون اول السطر على اليمين يبقى كده فل جدا جدا جدا

غير معرف يقول...

القمامة لا يصلح لها مكان غير سلة القمامة

Love-Guru يقول...

منورة اليوم السابع.

assafo anaroze يقول...

محاسن
اولا شكرا لزيارتك اللي اسعدتني كثيرا
ثانيا
الحكاية لا تحتاج الى مشورة او راي حد الامر يحتاج الى حاجة واحدة ان الست ديه ترفض المعاملة المنيلة بستين نيلة
في حاجة ثانية بتقول انها اتجوزت عشان ترضي امها بس في الدين ما فيش حاجة اسمها ان الام او الاب هما اللي يتحكموا في اختيار ابنائهم
و هناك قصة في عهد النبي بتقول ان فتاة جوزها ابوها بدون رضاها فجاءت تشتكي الى رسول الله فقال لها الرسول اذا كان غصبا عنك يبقى الجواز غير موجود و ان من حقك تطلقي منه فقالت : قد اجزت ما امضاه ابي و لكن ليعرف الاباء انه ليس من حقهم ان يغصبونا على ما لا نريد
يعني من حقك ترفضي و بدون رضا امك و لن تكوني بذلك قد فعلت معصية
ثالث حاجة لازم تطلب منه الطلاق لان قبلت ان تتزوجه لانه يصلي عنده شقة عصامي لكن تبين انه مخادع و منافق و كمان بيستغلها يبقى حتعمل مع انسان زي ده عفوا حيوان زي ده
لو القانون مش عايز يطلقها منو يبقى في الطلاق بالخلع
لكن انها تعيش و تقول اصبر يمكن ربنا يهديه ده اسمه جنان رسمي
مودتي الكاملة

Nabil يقول...

السلام عليكم...

اختى الغاليه الطيبه الرقيقه...

اخبارك ايه؟؟ يارب تكونى فى احسن حال

بالنسبه لموضوع البوست.

انا مع تصحيح الخطاء فى اى مرحله.

يعنى لازم تحسم الموضوع.

يارب تكون كل امورك ماشيه تمام

سلامى

Hossam يقول...

حبيبة قلبى وصديقتى محسان
وحشتينى جدا
قصة مؤثرة جدا ربنا يا رب يقف جنب صحبتك ويطلها من مشكلتها على خير ومحدش عارف يمكن يربنا يهدية ويبقى كويس
اعتقد انها تتدبر وتقرب من ربنا وتفكر بذكاء عشان تطور نفسها وتطور جوزها معاها عشان حياة افضل
تحياتى صديقتى وطمنينى عليكى
وخدى بالك مبقتيش تزورينى خالص

manmona يقول...

و الله ما اعرف ربنا معاها
بس بيتهيألى اللى زى ده ما تقعدش معاه يوم واحد

ahmed_k يقول...

بصي لو كانت حاولت معاه الإصلاح حتى يأست فعليها أن تلحق ما بقي من عمرها ولا تقضي على نفسها بالتعاسه
فأمثال هذا الرجل من بدأ حياته بالخداع لا يؤتمن ولا يرتجى منه إصلاح
فالوصوليون المتسلقون لا يستحقون الصبر عليهم بل عليها المطالبه بحقها المشروع وإثبات عدم نفقته عليها وإثبات خداعه لها ولأهلها في فبداية تقدمه لزواجها وسيحكم لها القاضي حتما
لكن تتنازل له عن حقوقها لأ طبعا
لنه بعدها حيعمل نفس المخطط مع غيرها
فالوقوف في وجهه وفضحه حماية لغيرها من الغافلات من شروره

قدر الله الخير لها دوما
في أمان الله

ديالا يقول...

مش عارفه بس فعلا الطلاق مش سهل

بس اكيد الي ربنا كاتبه هتشوفه

ربنا يصلح حالها

l0ma يقول...

smsma 7abebty wa7ashteny ma3lsh ana m2asara wba2aly kteeeeer mabafta7sh elmodawana bs enty awel wa7da azorha awel ma get wbelmonasba 7elw elnew look bta3 elmodawana ;)

ama belnesba lsa7betk fa ana mn wghet nazary en ely 7ataha fe elmoshkela de mn elasas hwa 7'ofha mn bo3bo3 elmogtama3 w3afret kelmt 3anes w3ashan keda etsara3aet wetgawezt sha7's 7'ata2 wel7al en hya termy elsha7's welmogtama3 fe a2rab sando2 zbala wtrmelo ely hay7'alasha mnno fe wesho wtenfd bgeldaha wt3esh bkarametha wisa tla2y ebn el7lal ely ykon shareha wtalama hya lesa so3'ayara yb2a msh 3eb abdn w7ata lw kanet kbera talama 7aga 7lal yob2a aham 7aga s3adetha wra7etha wtoz fe klam elnas wra2y elmogtama3 wrabena ywafa2ha wyrzo2ha ebn el7lal yarab isa

l0ma يقول...

wbelnesba lel2atfal ely benhom eltala2 delwa2ty whoma lesa so3'ayaren a7san bkteeeeeeer mn whoma kbar a7san lnafsythom wlmosta2balhom kaman l2n et7ala ay tefl mahma ykon 3a2el wmahma tkon tarbeto sawya nafsyan haykbar whw mabsot wsawy whw shayf en feeh mashakel ben amo waboh fa eltala2 aw elenfsal hawfrlhom be2a ahda wafdal letarbya

هانى زينهم يقول...

طب هى وافقت عاشت ترضى ماما ؟ ماما بقى رأيها ايه دلوقتى ؟

elsha3er يقول...

السلام عليكم

انا جيت اسلم بس يارب تكونى بألف خير وسلميلى على بيرو

تحياتى اختى الغالية


احمد الشاعر

الازهرى يقول...

تررررررررررن
ترررررررررررن
تررررررررررررررررررررررن

الو بوليس النجدة
عندنا واحدة اتغيبت فجأة كده وبدون اسباب اسمها ام بيدو
لو فى اى اخبار يا ريت تبلغونا

akeed يقول...

المفروض ان ربنا عمل الطلاق علشان لما بتكون فيه استحاله فى الاستمرار فهو امر حلال و يجب ان يقف كل منهما مع نفسه لهذا القرار

ريمان يقول...

محاسن يا قمر


وانا بكلمك ع الميل روحتى فين؟


النت فصل عندك ؟


المهم انا عرفت موضوع الراديو ده

اذاعه للمطلقات فقط


بجد فرحت جداااااااااااااااااااا

ربنا يوفقك يا رب

بس عايزين بقى تفاصيل عن الخبر الجميل ده


بحبك اوى يا محاسن

اموااااااااه

غير معرف يقول...
أزال أحد مشرفي المدونة هذا التعليق.
مهندس مصري يقول...

حتنوري شاشة العربية و لو إني مش بأحب قناة العبرية دي
دايماً واخدة صف أمريكا و إسرائيل و الحكومات

و سيبك من أعداء النجاح
واحدة و متغاظة من شهرة مدونتك
ربنا يهديها

عاشقه الرومانسيه يقول...

انا هاعلق هنا
لانك قافله التعليقات فى البوست الجديد
عارفه اكتر شئ استفزنى بجد ايه
اسلوبك الهادى فى الرد على ابن ال .....
انا مش هاغلط مش علشانه لا
هو احقر من كده
انا هاحافظ على لسانى علشان الناس المحترمه اللى بتيجى هنا

اياكى تكونى اتضايقتى من كلامه
صدقينى هو اتفهه من كده بكتييييييير

كلمه يقول...
أزال أحد مشرفي المدونة هذا التعليق.
كلمه يقول...
أزال أحد مشرفي المدونة هذا التعليق.
لقد خلقنا الله احرارا يقول...

اصبرى يابنتى
ان الله مع الصابرين
مش بيقولوا الشجرة المثمرة هى اللى بتقذف بالحجارة
ربنا معاك

elsha3er يقول...

السلام عليكم

ربنا يوفقك يارب

والله انتى حد كويس وعيب ان حد يقولك كدة

حسبنا الله ونعم الوكيل


ولا يهمك

تحياتى اختى الغالية

احمد الشاعر

كلمه يقول...
أزال أحد مشرفي المدونة هذا التعليق.
ذو الوجه المبتسم يقول...

السلام عليكم
يمكن الموضوع مش بالسهولة اللى الكل متوقعها دى
وموضوع الخل مش سهل على الست او الرجل
بداية الزواج اصلا كذب وخداع ونفاق
لكن السؤال فين الاهل ؟ ايه دورهم الحقيقي اللى المفروض يعملوه سواء قبل الزواج او بعده

نصيحتى للاخت صاحبة القصة
لو بتحبيه بجد وشايفة ان فيه امل
انتى الوحيدة اللى ممكن تحددي ده
يبقي بلاش انفصال
وحالولى واجتهدى انك تكسبيه

يمكن رايئ مختلف عن معظم اللى علقوا
لكن انا شايف انه هو ده الصح
مش دفاع عن الرجل ولكن دفاع عن علاقة زوجية ممكن تدمر وتدمر وراها حاجات كتير

على فكرة يا محاسن
البوست الاخير ... هو اللقاء بقناة العربية يوم ايه الساعة 9

علشان عاوز اشوفه
تحياتى

جنّي يقول...

السلام عليكم

كيف حالك اختنا محاسن وازي بيرو ..

بالنسبة للبوست الجديد ومغلق التعليقات .. انا من رأي انك كنتي تجاهلتيها تماما ولا كأنها موجودة بعد ازالة تعليقاتها السخيفو وبدون ان تعبريها ولا بكلمة وهي ها تتغاظ وتبطل من نفسها ولازم تبطل لانها ها تتحرق من تجاهلك ليها .. اما شماتتها ومعايرتها فاسمعي قول الرسول صلى الله عليه وسلم :

عن معاذ بن جبل قال قال رسول الله صلى الله عليه وسلم من عير أخاه بذنب لم يمت حتى يعمله .. سنن الترمذي

اما البوست الحالي فلماذا تتعجل الاسرة في زواج ابنتهم .. والشخص لا يستحق المعاشرة لكذبه فالمؤمن لا يكذب .. ولكن على العقلاء من اهلها ومن اهله محاولة اصلاحة قبل اللجوء لطلب الطلاق ولكن ان فشل اصلاحه فلا بد من الطلاق ..

تحيتي

عاشقه الرومانسيه يقول...

محاسن
انا زعلانه منك
لانك بتعتذرى عن غلط انتى مالكيش ذنب فيه
بتعتذرى ليييييييييه؟
هو انتى غلطتى فيا؟
انتى كده زعلتينى اكتر
بالله عليكى ما تحطى الكلام الفارغ ده فى دماغك
واللى بيحصل ده لو دل على شئ
يدل على نجاحك مش الفشل زى المتخلفين ما بيقولوا
ثم انك بكده بتدى لهم اكبر من حجمهم
وشوفى تعليق ابو شنب فى الشات بوكس بيقول ايه وانتى تفهمى قصدى
وانا لو اتدخلت فى الموضوع فده لانك حد محترم وتستاهلى كل خير
وربك اسمه المنتقم ياستى
سيبيها على الله ولا ايه؟
(:
امووووووووه

همس الاحباب يقول...

ازيك يا ام بيرو
يا رب تكونى بخير
تصلى صلاة استخارة وتدعو ربنا
وان شاء الله ربنا هيكرمها
تحياتى وتقديرى

ايمى يقول...
أزال المؤلف هذا التعليق.
mahasen saber يقول...

Bella .....

كلامك صح يا بيلا بس فيه سبب بيمنع ستات كتير بيحاولوا يطلقوا فى بلدنا وهو رفض الاهل للطلاق يعنى بتكون بين نارين نار زوج اسما فقط ونار رفض الاهل بجانب ضغطهم عليها للرضخ والتسليم بالامر الواقع وفى النهايه بتدفع الزوجه التمن هى واولادها ان وجد

mahasen saber يقول...

mohamed ghalia


الحياه مستحيله مع ازواج من هذه العينه والطلاق مستحيل ايضا وليس بالشئ الهين لمن هى فى مثل هذه الظروف

mahasen saber يقول...

yoyo


فى الغالب الجواز فعلا يا يويو بطيخه مقفوله ومن الصعب التكهن بفشله او نجاحه الحياه ياما فيها وفى بشر بتعرف تتصنع كويس قبل الجواز وبعد الزواج بيبتدوا فى خلع الاقنعه وهنا بتبدأ الكوارث الاسريه

الطلاق فى مثل حالتها حل صعب المنال اعتقد

mahasen saber يقول...

حاسوباتيه ....


عارفه يا حاسوبه الست الليى بتكون اتقهرت فى جوازها لما بتاخد قرار الطلاق مبيكنش فى دماغها انها تقتنص منه اى حق مش من حقها انما بيكون صعب عليها جدا انه يكون انتصر عليها وهزمها وكمان خرج بدون اى خسائر وبالنسبه لاشباه الرجال فالخساره الوحيده ليهم هى الماده
فالمساله بالنسبه للست كرامه مش اكتر

mahasen saber يقول...

صوت من مصر



يا قلبك يا كيمو هههههههه انتا لسه فاكر الليى بيرو عمله معاك فى كوستا هههههه

mahasen saber يقول...

ABOALI .......


تصدق يا ابو على انتا نبهتنى ان عنوان البوست فى الصميم فعلا وحكم من اهله واهلها للاسف مع زوج زى ده بتطور الامور لكوارث مش احترام كبير وسماع بحكمه

mahasen saber يقول...

karim


بالضبط كدا فعلا يا كريم بدأت حياتهم الزوجيه بماسكات فاكيد لازم يوم والماسك يوقع

mahasen saber يقول...

أحــوال الهـوي


فعلا يا دكتور عصام دايما تخوفات الاهل ورفضهم ان بنتهم تخوض او تفكر وتطلب الطلاق هو وصمة اللقب وكلام الناس
وفعلا افضل حل لوقف نزيف الكرامه ده هو الطلاق بس لمن تقدر ان تحصل عليه

mahasen saber يقول...

اسامه عبدالعال


فعلا يا اسامه ده افضل حل ... والله يبارك فيك كلك ذوق

mahasen saber يقول...

momken


ياه يا ممكن ايه الكلام النارى ده بس عندى نقطه حابه اوضحها الست مبتخضش معركة الطلاق من حيث نكسب مادى وخساره انما بتكون هدفها اننها تخرج بكرامتها وتجرح كرامة الزوج طلليقها على قدر ما كال لها من اهانات وللاسف فيه رجاله كتير كرامته تتعلق بماله ليس الا فاذا خسر مليم عنده كأنه خسر الدنيا وفيه ستات بتحب ساعتها تخسره الدنيا عشان تعرفه انها مكانتش لعبه

ده نقطه للايضاح بس

mahasen saber يقول...

MaNoOoSh


يعنى رأيك يا منوشتى زى رأى الاغلبيه تنفد بما تبقى لها من عمر وشويه كرامه على حياه

mahasen saber يقول...

الطائر الحزين


كتير ستات فى الظروف دى بيحتاجو الدعم ولو بكلمه مع اتخاذ القرار الصعب فى مجتمعنا ده

mahasen saber يقول...

مصطفى ريان


يا درش بدات كتابة سيناريوهات اهه بعد الكتب بس كلامك ده بيحصل على ارض الواقع اكيد عرفت ناس لجأوا للطريقه دى

mahasen saber يقول...

ghorBty


لللاسف يا غربتى يا حبيبتى اصبح فى مجتمعنا انصاف او ارباع لا اشباه للرجال وكذا فى بعض الحالات اشباه للنساء حتى لا نظلم طرف على الاخر

mahasen saber يقول...

رؤيه


عارفه يا رؤيه يا حبيبتى مشكلة الطلاق ونظرة الناس مبتختلفش من مستوى اجتماعى لغيره فى النهايه النظره والتعامل والتصنيف واحد صدقينى

mahasen saber يقول...

kareem


ههههههه وبعدها تخسر حريتها للابد وتقضيها فى السجن ده ان منتهتش حياتها على ايد عشماوى
كم انتا فى صالح الست يا كريم

mahasen saber يقول...

عاشقة القمر



صح كلامك يا سومه ... بس تاخد القرار

mahasen saber يقول...

حياه



كتير يا حياه الحياه ياما فيها

mahasen saber يقول...

romansey



اهلين ومراحب بيك .. ده مش فكر شباب ده فكر اجرامى وزواج بنى على الخديعه البحته للاسف

mahasen saber يقول...

magi


فعلا يا ماجى بس تقدر الست تاخد حريتها بالخلع بسهوله حتى

mahasen saber يقول...

shemo


يا عزيزتى نورتينى وشاكره ليك ذوقك وان اسلوب المدونه نال اعجابك
وفعلا كلامك مضبوط بالشكل ده هيسيبها مسلوبه من كل شئ حتى الماده

mahasen saber يقول...

احوال الهوى



يااااااه يا دكتور عصام وهل اجرؤ انا على مقاطعة مدونة اخويا الشرقاوى الغالى
الحكايه بس الوقت مش اكتر

mahasen saber يقول...

من غير عنوان


بالضبط كدا فعلا يا باشمهندس

mahasen saber يقول...

المتبهدلون فى الارض


هههههههه انا بشبه على الجمله دى

mahasen saber يقول...

عايش .. ولكن


كلامك عاقل قوى يا عايش احسنت لو انا معرفش سنك كنت قلت رأى من حد كبير فى السن وده بيدل انك عندك حكمه وعقل راجح

mahasen saber يقول...

احوال الهوى


يا الله الكلام ده كتير عليا قوى قوى يا دكتور عصام يا اخويا الغالى
خالص شكرى وتقديرى لشخصكم الكريم ولكلماتك الطيبه

mahasen saber يقول...

شيماء الجمال


رأيك صائب يا شيماء بس فيه حالات الصبر فيها بيبئا خطر على حياة الزوجه نفسها .. عارفه الضرب والعنف الاسرى

mahasen saber يقول...

بنوته مصريه


لا لا لا يا نشوى صوابعك مش زى بعضها وربنا خلق البشر مختلفين اطمنى نصيبك هيكون افضل واحسن بكتير يا حبيبتى

وانتى كمان وحشتينى جدا يا حبيبتى

mahasen saber يقول...

نور


متزعليش منى ابدا انا يا حبيبتى انا قصرت فى زيارة مدونات كتير وفى الرد حتى على تعليقات مدونتى واهه برد وبتفاعل بعد سنيين

mahasen saber يقول...

marmar


يااااااااه يا ناس على الجمال والكلام الحلو الليى ميسو متستاهلوش تسلميلى يا مرمر يا حبيبتى ايه الكلام الطيب ده ربنا يزيدك حلاوة روح ولسان وقلب يا مرمر يا حبيبتى

mahasen saber يقول...

hasona


اههى تشاور امها دى المعضله الكبرى يا حسونه لان المسكينه وافقت بناء على رغبة والدتها وحاليا من الصعب ان الام توافق لبنتها وتباركلها على طلب الطلاق
عارف انتا امهاتنا وحدوتة الطلاق ونظرة المجتمع

mahasen saber يقول...

ميس الريم


شكرا يا غاليتى على كلماتك الطيبه دى وان شاء الله انول شرف زيارة مدونتك ان امكن

mahasen saber يقول...

Soul.o0o.Whisper


تسلميلى يا سولو يا حبيبتى انتى وحشانى اكتر اتمنى تكونى بكل خير بعد السنيين دى كلها

ورأيك اكيد سليم يا حبيبتى بس تواتيها الشجاعه

mahasen saber يقول...

اسطى فى زمن البلى


قطعت نص الطريق عجبنى قوى اختيارك للجمله فى موضعها ده
بس تكملة الطريق فى مجتمعنا بتكون اصعب من البدايه عارف ضغوط الاهل برفضهم خوض بنتهم للطلاق يعنى الست محاطه بضغوط من الزوج وضغوط من الاهل

mahasen saber يقول...

elsha3er


بما ان الكلام ده من شاعر وان اسلوبى فى الكتابه متناغم وعجبك كدا فانا بشكرك جدا جدا يا احمد ومبسوطه ان اسلوب طرح المشكله عجبك

mahasen saber يقول...

ريمان


حبيبتى الغاليه تسلميلى ويسلم حبك وقلبك الطيب ودماثة خلقك

وهى لسه يا ريمو على حافة الخلع والطلاق والتفكير بين اه ولا

mahasen saber يقول...

قيس بن الملووووح


سعدت قوى قوى بتعليق حضرتك بشكر حضرتك جدا جدا على طرحك لتجربة عرسان بنت حضرتك فعلا نستفيد

شاكره لحضرتك جدا جدا رايك السديد يا فندم

mahasen saber يقول...

سمكه وحده


سمكمك تسيبه قول بس فعل صعب قوى فى مجتمعنا يا سمكمك لازم الست تجاهد

mahasen saber يقول...

كيارا


تمام يا كيارا بس التنفيذ حقيقى صعب ليها وعليها

mahasen saber يقول...

EMMY BABY


يا حبيبتى يا ايمى بعد الشر عنك
وبالنسبه ليها التعليقات اجمعت على انها تنفصل تخيلى وبعد السنيين دى لسه بتفكر

mahasen saber يقول...

micheal


مستعجلين عليهم عشان يلحقوا يطلقوا باين يا مايكل

mahasen saber يقول...

MaNoO


عاجلا ام اجلافعلا يا مانو الخلع او الطلاق هيحصل اذا فضل الزوج بالتعنت ده

mahasen saber يقول...

عالم حبيب

هى موصلتش لده يا حبيب ولتفكيرها فى الطلاق كحل الا بعد ان اسنفذت كل الطرق فى اصلاح ما بينهم لاحظ ان الست بطبيعتها بتميل للمحافظه على البيت لاسباب عده
كون الست تكون مطلقه فى مجتمعنا صدقنى تجربه مش سهله بالمره

mahasen saber يقول...

فشكوول



فعلا يا عمنا الغالى الطمع يغلب التطبع انا اعرف ستات اتجوزوا عن حب وكانوا مدركين عيوب الزوج على امل انهم يصلحوه وللاسف اتصدموا بواقع صعوبة التغيير بس بعد فوات الاوان

mahasen saber يقول...

Love-Guru


للاسف اى قصة طلاق او شروع فى طلاق وراها قصص شبيهه كتير فى بيوتنا فعشان كدا مبستغربش لما اسمع مشكله بين زوجيين ما وافتكر انى سمعتها قبل كدا
يظهر ان المشاكل فى حالات كتير فيها جوانب مشتركه

mahasen saber يقول...

توته المخنوقه


ياه يا توته عارفه قد ايه اصعب شئ يقلب المزاج ويعكر الصفو ان الواحد يسمع عن مشكله اجتماعيه بس دى طبيعة الحياه مشاكل

نورتينى يا غاليه

mahasen saber يقول...

الازهرى


صعوبة الطلاق فى مجتمعنا من نظرة الناس والمجتمع يا زهر وبعدين الطلاق رحمه لبيوت كتير وابناء ده رخصه كبيره قوى من ربنا بس لمن يدرك انها سلاح ذو حدين مش اكتر

mahasen saber يقول...

منايا يطلع النهار


كلامك صح يعنى تنفد بما تبقى دلوقت افضل

mahasen saber يقول...

الازهرى


اول السطر على اليمين اول السطر على اليمين امممممم ندعبس ونشوف

mahasen saber يقول...

غير معروف


يعنى تترك القمامه اذا

mahasen saber يقول...

Love-Guru


ده نورك شاكره ليك ذوقك جدا ودماثة خلقك

mahasen saber يقول...

assafo anaroze


العفو يا اسافو ده شرف ليا

ورأيك انها تطلق منه على فكره ده اجماع الى الان من التعليقات بوجوب طلاقها منه

mahasen saber يقول...

Nabil

تسلم يا نبيل شكرا على سؤالك الغالى

mahasen saber يقول...

Hossam


للمره الكتير بقولك يا حسام انتا جميل قوى قوى واتمنى اشوف عبيد زيك كدا فى ثقافتك

mahasen saber يقول...

manmona


ده اجماع يا منونا الى الان بوجوب طلاقها

mahasen saber يقول...

ahmed_k



حاولت معاه قطعا يا غردقاوى هو فيه ست بتفكر فى قرار زى ده بسهوله كدا الا بعد ما بتكون استنفذت كل الطرق لتقويمه واصلاحه

mahasen saber يقول...

ديالا


فعلا الطلاق شئ مر ومش سهل بالمره بس الاصعب منه العيشه بدون امان شئ بشع بجد

mahasen saber يقول...

Ioma


يا حبيبتى انتى وحشانى اكتر يا حبيبتى والليى حطها فى الاختيار ده والدتها وهى رافضه انها تخوض تجربة الطلاق يبئا عندئذ شو الحل يا ترى

mahasen saber يقول...

هانى زينهم


هههههههه رافضه بنتها تجيب سيرة الطلاق على لسانها من الاساس

mahasen saber يقول...

elsha3er


تسلم يا احمد وشاكره ليك ذوقك وسلامك وسؤالك الغالى ده

mahasen saber يقول...

الازهرى



ههههههه بوليس النجده عشان تغيبت طيب ترن ترن اما اشوفك هههههه

mahasen saber يقول...

akeed


اكيد يا اكيد كلامك صح جدا بس فين العقول الليى تدرك كدا وتتعامل مع الطلاق والمطلقات من المنظور ده

mahasen saber يقول...

ريمان


تسلميلى يا ريمو يا حبيبتى

mahasen saber يقول...

مهندس مصرى


اخونا محمد تسلم بجد على كلامك الطيب ده

mahasen saber يقول...

عاشقة الرومانسيه


دودو حبيبتى الغاليه تسلميلى يا حبيبتى انتى

mahasen saber يقول...

لقد خلقنا الله احرار


شاكره لحضرتك جدا جدا كلماتك الطيبه دى بلسم

mahasen saber يقول...

elsha3er


تسلم يا احمد يا اخونا الغالى كلك ذوق

mahasen saber يقول...

ذو الوجه المبتسم


ابدا مفيش ست بتفكر بس تفكر فى خطوة الطلاق الا بعد ما بتكون استنفذت كل كل الطرق المتاحه لو مش حبا فى زوجها خوفا من هدم البيت وحصولها على لقب مطلقه بتبعاته

mahasen saber يقول...

جنى



اخونا الغالى جنى نورتنى وشاكره ذوقك وطيب اخلاقك

mahasen saber يقول...

عاشقة الرومانسيه


يا حبيبتى يا اسكندرانيه يا جدعه يا دودو انتى تسلميلى يا حبيبتى

mahasen saber يقول...

همس الاحباب


اكيد يا ابو همس