الأحد، 18 يناير 2009

كل واحده ونص وواحد يحطوا نفسهم مكانى لا مكانها

كان املى انى انزل بوست غير ده شاغلنى بقالى فتره
بس مفيش طبعا شئ يشغل ويبهدل الكيان ويعصف بالحاله النفسيه زى اليى انا فيه دلوقت
القضايا بقالها من 2005 وهيا بتتأجل وبتتأجل يعنى لحظة سعاده وانتصار ما من عمرى بتتأجل معاها
انا يا ساده عمرى راح فى المحاكم وشعرى ابيض من هول ثغرات قوانينها
واليى طلعت بيه من ال تلات سنيين ونص او اربعه مش فاكره هو قرار تمكين مناصفتا بشقة الزوجيه اليى سعرها وصل حوالى 700 الف جنيه زى ما جارتى العزيزه شقتها جابت فى اخر تتمين ليها ..
وبخلاف القرار المصيرى بنفقه شهريه للصغير ب100 جنيه ليه و100 لامه رضا رضا رضا قوى ده حتى المبلغ ده بيكفى اى صغير ويفيض ده على اساس ان الصغير كتكوت بكبيره قوى شوية دره يشبعوه
المهم انا هسبنى منى ومن حالى الممل ده وهدخل فى حال قريب ليا
دلوقتى واحده عزيزه عليا وعليكوا والله ودى مش فزوره خالص خالص دى لزوم ترويق الجو العاصف بقنابل الفوسفور والدردنيل
المهم عزيزتى دى بعد ما كان طليقها بيقلها اتنازلى عن كل شئ واديكى ورقة طلاقك دلوقتى الامر اتطور بعد قرار التمكين وبئه بيقلها طب خدى الحاجات اليى جبتيها ونص مؤخرك وكتى وقولى يا فكيك
طب نفقة الولد ؟
ابد ابدا ابدا
طب لا لا لا وانا والمحاكم والله المستعان

شويه بعد البلطجه والملطجه والعب بالقوانيين حوالين الشقه يعنى لقي ان قرار التمكين صعب العب بيه او مش بالساهل والشقه يا ناس كانت متاجره على عفش الغلبانه مفروش بخمس تلاف جنيه فى الشهر فالراجل الراسمالى العصامى بيتجنن كل ما يفتكر ان الشقه كل يوم بيمر من غير ايجارها بيخسره فلوس وهو يخسر عمره وفلذة كبده اليى اكبر من كبد الحوت ولاا يخسر مليم حتى ولو على شئ مش من حقه بالضبط ..
ده حتى اتجوز وقعد فى الشقه عشان يضيع عليها التمكين لقى الامر برضه صعب .. والله لسه فى قضائك خير يا محروسه... والمواسم عماله تيجى الموسم ورا الموسم والشقه سعرها بيزيد وكل ما التقييم المادى ليها يعلى يزداد جنونه وشغفه اكثر واكثر بالشقه يعنى مش برؤية الغلبان ضناه وعليه رجع للست اليى احلىسنيين عمرها اتفنت من اجل حقها وانها تنول شرف انها تاخده بالمحاكم طالما الذل للمرأه للركب يا عينى وااقل حاجه تتقال خلى المحاكم تنفعك المهم رجع بعد اخر تسعيره للشقه ولاا تسعيرة اللحمه وبعد ما غلب حماره الحكيم فى العب المتين فى قرار التمكين مش بفعل ضميره يعنى
انه يعرض على الست ام كعب داير فى المحاكم دى انها تاخد مؤخرها اليى هو 20 الف جنيه مش يورو و5 الاف جنيه نفقه متاخره عليه حيث انها بقالها حوالى 8 شهور بتصرف نفقه للكتكوت قصدى الصغير البرئ يعنى قبل كده 3 سنيين اهلها هما المتولينه ومتولينها بس عايشين ايه منتهى الدلع ربنا برضه مش بيخلى كل شئ غوامق غوامق لازم طاقة نور فى النص
المهم و5 كمان زيهم اسمعوا دى قيمة دهبها اليى الزوج المغوار سرقه واليى اصلا كان عباره عن محبس الماظ وواكمل ولاا كده كفايه كده كفايه يعنى الخمس تلاف دول ميصلحوش حاجه منه لو اتكسرت
وفوق كل الكرم ده كان مصر بصراحه على 100 جنيه نفقه و150 اجر مسكن ده على اساس انها هتسكن بابنها فى عشش فيلم حين ميسره .. وبعد طبعا ما قالته الشقه هتجيبلك ايجار 7 الاف جنيه زى ما انتا قلت بعضمة لسانك قالها خلاص هما 350 جنيه واذا كان عاجبك ودلوقتى ام عمر ضايع فى المحاكم دى محتاره قوى وواقفه على تراتيف صوابعها مش من رقص الباليه لا ابدا ده من التفكير
تعمل ايه ..تعمل ايه..؟
دلوقتى قدامها خيار ومش مغسول كويس انها تفضل فى طريق ضئ القناديل وفى سكة المجبرين المحكمه وتفضل فى التشتت ورحمة ان ممكن فى يوم تسمع بودانها انها اخدت حكم ويا سلام بئه لو بعده مفيش استئناف وده من المستحيلات الاربعه وانها كمان تفضل تحارب تحارب على تعديل الثغرات بس ما هيا عارفه انها ممكن تموت وتتحلل والثغرات تفضل ثغرات بخلاف انها مش حاسه انها بتعمل حاجه لغيرها قوى قد ما هو لنفسها الشريره الست الوحشه دى
او انها ترضى بالقهر الراهن قصدى يا جماعه الوضع الراهن وتقبل وتستعوض المولى عز وجل فيما اخذ وتنفد على راى طليقها بجلدها املا واملا وعمرا فى انها تربى ابنها فى ارجاء اهدئ من قاعات المحاكم وان ابنها مش يلاقيها لابسه الصبح ويقلها رايحه فين يا ماما ؟
تقله رايحه اشم هواء مرافعات فى المحكمه
وانها تتفرغ بكل حرقتها وكبتها ومرارة ما حصلها وتدافع بروقان بال عن كل اليى زيها يمكن فى يوم تقدر تعملهم حاجه ويكون ده سبب قوى فى دخولها الجنه اليى صاحيه قايمه بتحلم تشوفها من بعيد حتى
وانها كمان تنفذ امل ورغبة والدها الله يرحمه اليى مكنش راضى على الطريق ده من البدايه وكان مصر على تنازلها عن كل شئء وتنفد بجلدها هيا وابنها اليى كان بيزعقلها لو بس صوتها عليى عليه وقالتله ده غلط
بحجة ايه انه محدش يزعق لبيرو حفيدى وانا عايش ده ابن روحى وياخده فى حضنه حضن مش هيحس زيه تانى لا هو ولا امه
هيا مش كانت واخده طرق ا لمحاكم دلع هيا لجئت ليها مرغمه لانها اتزلت وهيا متجوزه وعانت وهيا مطلقه وشافت ان الست كوره شراب فى رجل الراجل وده اليى حصل معاها اتضربى اتبهدلى اتنازلى اتمرمطى اصلكوا ملكوش قيمه واخرتكوا بتترموا فى المحاكم .. هيا الغلبانه حبت تثبت لنفسها وللمجتمع وليه انها قويه وان المجتمع والشرع كفلها حقوق من الصعب والعار انه تتنازل عنها
لقيت الغلبانه الامر غير كده لقيت ثغرات قانون تذل وتطول العمر فى المحاكم بس مش فى الدنيا
ولقيت مجتمع فيه ناس بيبصوا للست اليى بتحارب على حقها على انها طماعه وجشعه مع ان ده اليى ربنا شرعهه لها او انها ست يا سلام على سلوكها المنحرف وبجاحتها منقطعت النظير
واه البيه الطليق معتمد على ان ابوها قضى عمره فى الغربه وانه راجل كان حيلته قرشين وانهم عايشين كويس فباصص ليها انها تصرف على الولد ما انتوا تصرفوا على قاره ..قارة ايه دى انا معرفش يمكن اطلنتس القاره المفقوده

يا جماعه الست الغلبانه ام الولد اليى بتحارب على اى مليم عشانه واليى خايفه عليه من الدنيا ومرعوبه لتسيبه فى ثانيه وترحل لعالم اخر ميبقيش حد يحن عليه ويتغمده بالعطف الا اهلها طبعا اليى مش محسسينه بحاجه ولا حارمينه من اى حاجه

تعمل ايه هيا تتنازل وتقبل
ولاا تكمل فى سكة الالف مطب وثغره

ارجوكم افيدوها عشان هيا محتاره ومقهوره ومخنوقه وتعبانه وخايفه كل لحظه انها تكون بتعمل شئ ضد ارادة باباها وانها تكون بتضيع استقرار وامان ابنها من ايديها يعنى ولد يكبر يلاقى امه فى المحاكم شئ يدعو للنشأه الغير سويه نفسيا على الاقل

بس هيا ايه مصره على تعديل القوانيين دى وهتعمل وقفات احتجاجيه ولاا وقفة عيد الاضحى وناوياها نيه انها تفنى ما تبقى من عمرها عشان تدافع عن كل حق وليه ..ست ..امرأه..حرمه يعنى ..مكسورة الجناح وبتصوصو ولاا مؤاخذه
معلش البوست طويل بس صبركم شويه
وبعدين يعنى معرفش اكرم صاحبتى يعنى عندى فى المدونه ولا ايه واعرض مشكلتها من طئطئ للسلام عليكم...
اه نسيت ااقولكم واوضح لكم برضه ان الزوج عامل تمكين للزوجه التانيه فى الشقه وان ابو الزوج جد الولد البرئ عامل لنفسه تمكين كمان بس لسه متحكملهمش يعنى الكل بيحارب صحبتى فى الشئ الوحيد اليى القانون ادهولها فا التوضيح ده لازم منه عشان تعرفوا تدوها راى سليم ..على اساس ان الشقه ام 700 الف حديده وحديده على مهب الريح معاها برضه وده لو لو التمكين طاله من الثغرات ما طال باقى القوانيين...
ومعلش طولت عليكم انا وصحبتى رغيين بئه من شابه صديقته فما ظلم...

............................
تحيث واخر الاخبار...
على فكره اليى خلا صاحبتى تفكر انها تخلص باى شكل هيا نصيحه مدونه معروفه ومحبوبهوحد من ارق كائنات البشر واكثرهم دماثة خلق وحلاوة روح ....
الا وهى شموستنا شمس النهار
بصراحه مكالمه تليفون منها فيها نصيحه صادقه من انسانه حبيبه وعزيزه ولا يهمها الا مصلحتى ومصلحة ابنى ..قصدى مصلحة صحبتى يعنى ومصلحة ابنها
وعليه عشان قلبها طيب ونصيحتها صادقه انا سمعت النصيحه
....انا رايحه انا وصاحبتى يعنى اخلص الموضوع الطويل والمجهد ده
ارجو منكم الدعاء والدعاء والامن من مكر اى ماكر
استودعكم الله وصباح الخير
ومحدش ينسانى من دعائه لحد ما ارجع
قصدى صاحبتى برضه

هناك 72 تعليقًا:

mohamed ghalia يقول...

إلى أختى العزيزة محاسن
صاحبتك صاحبة قضية ومبادىء يجب أن تسير عليها للنهاية
فلتستمر فى قضيتها ورزقها سيأتيها هيا وابنها
دمتى وهيا فى حفظ الله

NIDAAL .R يقول...

انا ماليش دعوة .. انا كنت اول تعليق

راااجع

mahasen saber يقول...

mohamed ghalia.....

محمد كلامك مضبوط بس الواقع مرير بزياده

وبزياده قوى كمان

mahasen saber يقول...

nidaal.r.......

راجع فين تعالى هنا ااقرا البوست

مـجـنـووون يقول...

أختي الغاليه

طبعا أنا مقدرش ااقولك اتنزلي عن حقك وعن حلمك في أنك تخدي حقك من الي ظلمك وأذاكي

بس في نفس الوقت حرام تضيعي عمرك وحياتك علشان واحد ميستهلش

وبعدين أنا بعتقد أنك اخدتي التمكين ودي في حد ذاتها اكبر صدمة للزوج وبجد قمة الذل والمهانة أنك تدخلي المكان الي كان حرمك منه من غصب عنه

أنتي لو موكله عندي كنت نصحتك أنك تحولي تخدي اكبر مكسب منه يعني حولي تخدي أكبر مكاسب منه علشانك وعلشان مستقبل ابنك

وأحب بس انبهك لحاجه القانون غدار والمحاميين ممكن يقلبوا الحق باطل والباطل حق
بمعني أنه ممكن يعملك أي حوار ويخلي حقوقك تضيع عليكي مش بالنسبه للفلوس بس ولكن بالنسبه لأبنك

الدنيا والله متستهلش ان الواحد يضيع أي لحظه فيها في حزن او زعل

وشوفي نفسك وعيشي حياتك وكفاية الي انتي شفتيه خلال الفترة الي عدت

تقبلي مروري اختي الغاليه
مجنووون

mahasen saber يقول...

مجنون.......

وانتا محامى يا مجنون وبتقالى كده وبرضه كتير محاميين بيقولوا نفس الكلام
بس المحترمين منهم بس

مش عارفه قعلا بس كلامك وانتا من اهل البيت وادرى بالقوانيين بيجبرنى انى اؤؤمن بيه واايده

متشكره يا مجنون على صدقك
وعلى انى دايما بحس ان اخويا اليى بيكلمنى

NIDAAL .R يقول...

محتاااااااااااااااااااار
فى اختيار حل لصحبتك
تحارب وتصبر .. على المشوااار الطوووووويل
ولا تاخد اى حاجة تخلع و تنفد بجلدها من مشوااار المحاكم الرخم ده

بجد .. مش هقدر أحدد اختيار
بس هى لوحدها هتكون صاحبة القرار و الاختيار طبقاً لظروفها .

mahasen saber يقول...

nidaal.r.........

افدت يا محمد يعنى ده رايك
طب تنصحها بايه
تقلها ايه ايه

انتا رجعت عشان انا اتخانق معاك بئه

romansy يقول...

اقولك حاجه انتى جدعه قوى بجد انتى وصديقتك
الاساليب الغير مشروعه كتير فى القانون بس لانك انسنه تعرف الحق والاصول اكيدمش بتبعيها
بس المهم
ربنا معاكى
ومع صديقتك
اصبرى شويه كمان
بس

mahasen saber يقول...

romansey......

شويه كمان يعنى حوالى ربع قرن تانى يا دسوقى
ما تشفلنا فكره تانيه اسهل من دى

بس كلامك جميل قوى الله يكرمك
بس اليى يشوف ثغره ومش يتبعها عبيط واخرته هيبقى زى حالاتى

بس شكرا على كلامك يا احمد
كلك ذوق يا ساهر

NIDAAL .R يقول...

هو لازم يعنى نقول .. لو هى محتاجة للفلوس يبقى فيه حل وسط فى حالة انها هتقدر السنين الى جاية ان شاء الله تتكفل بمصاريف ابنها .
وهو انها تاخد الطريق من قصيره وده عكس طوويله .. بس تخلى بالها من المخالفات .
وتاخد الفلوس وتحاول تستغل الراجل ده اسوء أستغلال و تحاول ترفع المبلغ اكتر و بتلعب على وتر الشقة يعنى هتقوله الشقة هتجيبلك 5 الاف جنيه فى الشهر و سعرها كاملة 700 او 70ألف فتتفاوض على انها طول ما هى مش متنازلة عن الشقة هو مش هيقدر يتصرف فيها و بالتالى حاله هيقف .. فتقوله ايه بقى .. يا أبن الناس انا مش طماعة بس لو عايزنى اخرج واتنازل عن الشقة مش أقل من 250 او 25الف جنية علشان انت تقدر تستنفع بيها ده بالنسبة للشقة غير مؤخرها ده مالوش دعوة بحاجة
وبعد ما تخلص الليلة دى تبتدى بقى تشوف مشوارها فى ازاى تقدر انها تلفت انتباه الدولة ان فيه اسر بتموت بسبب البطء و الثغرات فى الاحكام القضائية سواء عن تقديم مشروع قانون او وقفات احتجاجية او او او .. تسأل فيها محامى بقى .

yoyo يقول...

و الله يا محاسن الموضوع محير اوى
صعب الانسان يتنازل عنه حقه عارفة بتحسى كانك بعد الف شر عليكى يعنى بتنكسرى احساس بالانهزام قاتل

المحاكم حبالها طويلة اوى والمحاميين لهم الاعيب و اساليب كفيلة بجعل الباطل حق والحق باطل

مش هاقولك كلام شعارات وكلام مش له اهمية يعنى حاولى توصلى لحقك او نقول شىء يعادل حقك و حق ابنك على الاقل
بمعنى انها تحاول توصل لحل وسط منه راحة لها من المحاكم و نارها و محاولة للوصول لحقوقها وحقوق ابنها بشكل اسرع من المحاكم شوية

حبيبتى ربنا يكون فى عونك يارب و ينصرك ان شاء الله

تحياتى
يويو

حروف يقول...

ربنا يكون في عونك وعون صحبتك بسلو عليالفلوس هو في حد ذاتة مش ضامن عمرة وكمان الفلوس كدةبتضيع محاكم وقواضي شوفي حياتك
دمتي بالف خير

غير معرف يقول...

مش عارفة يا محاسن اقولك اية بس انا شايفة انها تاخد منة الفلوس وكمان تحاول تسومة على اكبر مبلغ عشان خاطر ابنها وتتنازل عن القضايا وتخلص من وجع القلب دة لان طريق المحاكم طويل قوى وبيسرق العمر من الواحد غير كمان حرقت الدم والضغط الاى بيجى للواحد من الاى بيشوفة
ولانة كمان بياثر على نفسية الواحدة ودة بيخليها ديما عصبية وممكن ياثر على ابنها كمان
وباذن الله ربنا هيعوضها خير فى حاجة تانية وكفاية ان ابنها معها دية بالدنيا ومافيها
وحسبى الله ونعم الوكيل فى كل انسان يسمح لنفسة انة ياخد حق مش حقة
وكفاية ان يوم الحساب هتاخد حقها منة قدام البشر كلهم وقدام ربنا
وحقنا لما ناخدة فى الاخيرة افضل مليون مرة من الدنيا
وربنا يعينك انتى وكل واحدة فى ظروفكم دية
وقال اية محاكم الاسرة هتنصفنا بلا خيبة


انين الصمت

dodda يقول...
أزال المؤلف هذا التعليق.
dodda يقول...

انا عندى حل جامد اوى
احنا نعمل قعدة صلح
انتى وابو ابنك وصحبتك وجوزها

وانا بشاهمتى حعزمهم عندى عالغدا
كل اللى يحبوه
بس كلام فى سرك ححطلهم سم فى الاكل
و الستات ميكلوش بقى عشان عاملين رجيم

ايه رأيك بقى؟؟؟


اوعى تسيبى فتفوته من حقك ولا حق ابنك
ان الله مع الصابرين

انسانةعادية فى عالم مش عادى يقول...

اوعى تسيب حقها ابدا طبعا لا يضيع حق وراءه مطالب اذا كان طليقها بيساوم بالشكل ده علشان خايف ان تكسب القضية تستمر فى موقفها وربنا عمره ما بيظلم حد وحقها هيرجع هيرجع

عاشــــــ النقاب ـقــــة"نونو" يقول...

السلام عليكم
بصي بمظرة عملية حبتين
العمر بيجري ودة شكله باين ان ابوه وعمه الجنيه
فالافضل انها مثلا تساومه على ان المبلغ لايقل عن 100 الف جنيه وهو الكسبان جدااااا
والف جنيه شهري
ولو رفض تتمسك شويتين وما تضعفش علشان يبقى معاها اللي اقله تجيب شقة لابنها تقعد فيها وتبقى له بعد كدة ويبقى له مبلغ تربيه بيه شهري
ولما ربنا يكرمها وتبتدي مع رجل تاني الشقة تبقى استثمار وتربي برضه منها ابنها بس بني ادم بالعقلية والتفكير دة هيرفض الاول وبشدة ويبتدي يفاصل ويهاتي
هي تتمسك شوية وتصبر خاصة لو جابت حد من القسم بقى يمكنها من الشقة وقرفته شوية
هيجيب ورا ويدبر لها الفلوس
وممكن تساعد شوية في انه يقسط لها المبلغ على دفعات في خمس شهور مثلا وربنا يرشدها يارب للصواب
معلش صبرت كتير
تصبر شهر كدة ولا حاجة
ربنا معاكي يا سنسن

صبرني يارب يقول...

بصي يا محاسن

انا ضد التنازل عن الحقوق تمامااااااا وباقول ان له حق ويسيبه يبقى يستاهل انه يتاخد منه حقه

لكن يا حبيبتى ما تضيعيش عمرك على حق مش هاتخديه بالشكل ده

انا عندي تنامي مرتاحه وتفكري فى بكره بشكل احسن وتربي ابنك فى هدوء
وتبدأي حياتك من جديد بقلب مفتوح وتردمي على الماضي
احسن بكتير من انك تاخدي حقك وقت ما تكوني اصلا خلاص مش عايزاه ومش محتاجاه

وان كان على ابنك بكره ابنك يورث ابوه الى ميت على القرش

وانتى اشتغلي واكبري وانجحي واتجوزي حد محترم تحبيه ويحبك ويعوضك الى شوفتيه

ما تقوليش مش عايزه جواز

ما تضيعيش عمرك عشان تجربه فاشله مع واحد ما يستاهلش عمرك يضيع

لكن فاوضيه من مركز قوه وخدي منه الى تقدري عليه

وفى الاخر قوليله حقى هاخده منك فى دار الحق يوم الحق بيد الحق جل وعلا

وقوليله انا اتنازلت مش عشانك ولا عشان فلوسك ولا عشان ضعفت من المحاكم

انا اتنازلت عشان افضى اربي ابنك عشان ما يطلعش زيك على الاقل

اسمعي كلام بابا الله يرحمه يا محاسن وسيبك من كل حاجه واردمي الى فات وعيشي يا بنتى

وافتكري انك اتنازلتى من موقع قوه وبمزاجك ودي تفرق كتير

اه وفى حاجه مهم استخيرى ربنا

ودايما قبل كل خطوه تعمليها استخيري ربنا
واعملي الى يمليه عليكى ضميرك وقلبك ومهما ان كان ان شاء الله ربنا يجعله خير ويرضيكى به

تحياتي ليكى يا محاسن واسفه على الاطاله وربنا يكرمك يارب ويعوض عليكى عوض الصابرين

صبرني يارب يقول...

اه نسيت اقولك الكلام الى فات ده كله لصاحبتك ابقى بلغيها بليييييييييييز

أشرف يقول...

**********
قل لمن يحمل همـاً إن هـمـاً لا يدوم
مثل ما يفنى السرور هكذا تفنى الهمـوم
**********

أحــوال الهـوي يقول...

واضح ان الزوج لديه طمع مادي
و صاحبتنا لا تهمها الماده

انا هزود المشكله لها علشان تقدر تقيم هذا الشخص الطماع
بكرة هيقايضها علي ابنها لانه مدرك انها تموت و لا تتخلي عنه
و ساعتها كل اموال الدنيا هتضحي بيها

ممكن هي اللي تبدا بالضغط علي نقطة الطمع اللي فيه و بلاش تعمل مثله و تحسب كل شئ ماديا لانها تتعذب كل يوم بعدم وجود راحة بال

اذا كانت الشقة مناصفة تقترح و احد منهم يخلص الثاني ماليا بشروط الطلاق و التنازل عن حضانة الولد

اقصد ان في المستقبل سعر الشقه هيبقي مليون هتتنازل عنهم في سبيل ابنها

يعني خسارة قريبه افضل من البعيدة و تكسب عمرها لان العند بيولد الكفر

اسف للاطاله لاني بتاذي من هذه الشخصيات التي تستقوي علي حقوق الناس و اظنها محاولةلاثبات لالرجوله المفقوده


تحياتي

عمرو يقول...

صباح الخير يا مدام محاسن أزيك ؟ و أزى عبد الرحمن ؟
يا ستى أنتى بتضيعى أحلى سنين عمرك فى أروقة المحاكم و بتهدرى جمالك و شبابك وراء شىء أغلب الظن أنه ناتج عن العناد و العند ليس اٍلا ..
طيب ابلله عليكى اٍزاى حتقدرى تربى أبنك فى جو صحى مستقر و أنتى أيامك بتقضيها ما بين مكاتب المحامين و ما بين قاعات المحاكم فى حين أن الولد أحق بهذا الوقت و المجهود و الطاقه اللى بتهدريها و أنتى على يقين أن الموضوع غير ذى جدوى ؟
خدى منه ما تقدرى عليه يعنى أستفيدى منه و أسترجعى أقصى ما يمكن اٍسترجاعه من حقوقك و الباقى سيرثه أبنك عن قريب اٍن شاء الله و أبتدى أفتحى صفحه جديده مع نفسك و حتلاقى اللى يحبك و تحبيه و يتجوزك و تجوزيه و تخلفى منه و يخلف منك و تعيشى فى تبات و نبات و كمان اٍبنك حيلاقى أب بديل يعوضه عن حنان الأب المفتقد فيكبر فى بيئه صحيه سليمه
أما بقى موضوع الثغرات فى القاوانين و ما اٍلى ذلك فممكن برضو تكافحى و تجاهدى فيهو أنتى مستقره نفسيا و اٍجتماعيا و ده حيكون أفضل من الوضع الحالى على الأقل لن يقال أنها بتحارب و بتجاهد لأن لها مصلحه شخصيه فى التغيير
صدقينى يا محاسن العمر بيجرى بسرعه و كلما طال أمد القضيه كلما ماتت و خفت جذوتها يعنى لو أنتى النهارده شايفه أن وسائل الاٍعلام و الفضائيات و الصحف بتتهافت على عمل لقاءات معكى لشرح قضيتك فبمرور الأيام ستخفت هذه التوهجات و حتلاقى الموضوع أتنسى و مش حيتبقى غير عمرك و عمر أبنك اللى بيجرى من غير هواده
شىء من التنازل يا محاسن أحيانا بيكون أفضل من التمسك بحق لن يأتى أبدا
و لك كل التحيه و التقدير

غير معرف يقول...

وكانت نسائي تملئ الاثير
ومن كل حدب لقلبي تطير
تملئ جوى سعادة وسرور
وتمنح ثقة لقلبي المغرور
فزاد غرورى وطردت النساء
ومن بعد حبي ظل لى البكاء
تحيه لرجل يوصف بالغباء

saheda.com يقول...

حَيَّ عَلَى الْجِهَادِ.. لدعم المقاومة بالسلاح فى مواجهة الآلة العسكرية الصهيونية.

حَيَّ عَلَى الْجِهَادِ.. بالوقت والعلم والمال والدم لتتحقق الوحدة بين كافة طوائف الأمة..

حَيَّ عَلَى الْجِهَادِ.. بفتح المعابر والحدود وأبواب التطوع ودعم المجاهدين بكل الوسائل.

حَيَّ عَلَى الْجِهَادِ.. لتبرأ الأمة إلى ربها من تقصيرها في حق ربها ودينها ورسالتها.

حَيَّ عَلَى الْجِهَادِ.. لنصرة المظلوم وإعادة الحق لأصحابه.

حَيَّ عَلَى الْجِهَادِ.. للوقوف في وجه الظلم والاستبداد والاستكبار الصهيوني غير المسبوق على مرأى ومسمع من العالم بأسره.

حَيَّ عَلَى الْجِهَادِ.. جهادًا نرفع به سقف مواجهتنا لهذه المحرقة لأقصى درجاتها الممكنة.

حَيَّ عَلَى الْجِهَادِ.. لنحسن علاقتنا بربنا ونتقرب إليه وندعوه آناء الليل وأطراف النهار، وبخاصة وقت السحر، لنصرة المجاهدين الصابرين الصامدين.

بنت الغربة يقول...

حبيبتى يامحاسن
احيانا كتيرة القانون مابيعملش حاجه
ودايما المحامين الشاطرين بيعرفوا يفكوا الثغرات دى ويستفيدوا منها
انا هاقولك على حاجه حصلت ..ومن حقك ترفضى او تقبلى اللى حصل ان صاحبنك تعمل زيه..
نفس المشكله تقريبا حصلت لواحده صاحبتى
وجوزها مش عايز يطلق ولا يديها حقها
ولا يمكنها من الشقه مع ان عفشها فيه
ابوها جه ومعاه ناس اخدوا العفش من غير ماحد يشوفهم ..كان بالليل..
وبعد كده رفعوا عليه قضية تبديد للعفش والدهب ..
حسب القايمه...ودى فيها سجن..
ساعتها البيه طلق .. واداها مستحقاتها..والنفقه غصب عنه..
علشان يتنازلوا عن القضيه..
ودلوقتى بيتحايل عليهم علشان يشوف بنته...
فى ناس ماتجيش غير كده..صدقينى
معلش طولت عليك
تحياتى

حاجات جوايا يقول...

حبيبتى سنسن
ازيك وحشتينى
بصى يا جميل أكبر مكسب طلعتى بيه من الحكاية كلها وسنين العمر اللى فاتت هى ابنك بيرو ربنا يخليهولك يارب ويباركلك فيه .. فاديله حقه فيكى هو اولى بوقتك اللى بيضيع فى المحاكم .. واولى بابتسامتك وفرحتك بيه اللى ممكن يضيعها الحزن والقهر

عيشى حياتك بقى طالما الحمد لله عايشة مرتاحة ..وحقك هيرجعلك بإذن الله غصب عنه ربنا مش بيضيع حق حد
ربنا يخليلك اهلك وابنك يارب

وصدقينى بكره هو اللى هيندم لما يلاقى ابنه مش بيحبه ولا سائل فيه

ربنا معاكى يا حبيبتى
بوسة كبيرررررررة لبيرو

princess يقول...

انا عايزة اعرف هو لسه فيه بندامين كده ؟؟؟؟؟؟؟؟
بجد مش قادرة افهم فين كرامة اللى يقبل على نفسه واحدة مش قادرة تعيش معاه وعمال يتكلم فى فلوس وشقة ويبخل على ابنه بمصاريفه
بجد دى دنيا وحشة اوى........

غير معرف يقول...

من واقع خبرة فى المحاكم احب اقولها تكمل وتستحمل لانى بمنتهى البساطه هى موقفها ااقوي لانى الزواج مش حيقدر يتصرف اى تصرف فى الشقة لانى فى ايديها قرار تمكين ودة بيقتل سعر الشفة لانى محدش حيقبل يشترى او ياجر شقة صادر ليها قرار تمكين فصحبتك هى الطرف الاقوي وعامل الوقت فى صالحها هى معاها ابنها والحمد لله ربنا مقدرها توفر ليه كل طلباته ومش محتاج حاجه وقرار التمكين بالشقة موجود لحد ما يكبر ابنها ويعدى سن الحضانه وهى طبعا مش حتتنازل عنه الا لو انتهى الموضوع بس هى محتاجه تصبر شوية
بالنسبة للزوج هو بيعمل قرارت تمكين لمجرد انه يزهقها مرة الزوجة التانية ومرة الاب ودة لا يهدر حجية قرار التمكين بتعها وهو بيحاول يزهقها ويخليها تسيب الشقه بس طبعا قبل دة ما يحصل حيكون هو زهق لانه عايز ياجر الشقه وعارف انى موقفه ضعيف فابتدى يلجاء للتفاوض ولانه مادى وشاطر كتاجر زى ما هو واضح ابتدى التفاوض من تحت الصفر على اساس انى صحبتك تقدم طلبات اعلى يتم التلاقى فى النص ويبقى خرج باقل الخسائر اللى ممكن تندفع اللى مطلوب من صحبتك حاجه ترفع دعوى يالحبس يا الدفع الخاصة بمتاخر نفقتها ونفقة ابنها ودة حيشكل علية ضغط جديد لانه حيبقى معرض للحبس فحيلجا للتفاوض تانى على اساس يلغى حكم الحبس وينهى الموضوع ودى وممكن تطلب صحبتك اللى هى عايزاة

المحاكم والقانون بيدى المراة حقوقها كاملة بس بشرط تتحلى بفضيلة الصبر لانها بتاخذ وقت طويل وافكرك (ما ضاع حق خلفة مطالب ) فمن الاخر خلى صحبتك تكمل للاخر المشوار اللى بدءت فيه go on

بذرة امل يقول...

أنا رأيى أنها تستمر ومش تضيع حقها ولا حق ابنها
وابنها لما ينشأ يشوف امه بتدافع عن حقها وحقها وانها عندها مبادىء مش اتنازلت عنها اكيد هتكون بالنسبة له قدوة
ده رأيى انها تستمر

هانى زينهم يقول...

العند يورث الكفر .
طبعا عارفة المثل ده . وصدقينى العمر اقصر من محاولة تعديل القوانين هو بيروح بس انما كل حاجة بتفضل زى ما هى . مين بقى اللى بيدفع التمن ؟؟ العيال . الضحية الوحيدة للماراثون القضائى ده . خلى صاحبتك تقرى التعليقات اللى عندك وتاخده من قصيره وتطوى الصفحة د بحلوها ومرها وتبدا صفحة جديدة عشان خاطر ابنها وطليقها منه لله واللى ما يتقيش ربنا فى ابنه مش هيتقى ربنا فى حد .

شمس النهار يقول...

شوفي يامحاسن
انت عارفه ان انا كنت من الاول ضد انك تضيعي عمرك في المحاكم
بس عايزه انبهك ان اللي هتعمليه دلوقتي بد ماجنح هو للسلم من وجهة نظره الشريره
هيرده لك بعد شويه ليييه
عشان انت معاكي ولد
ممكن لما يوصل لسن الحضانه ياخده منك
وبالقانون اللي مليان ثغرات
وماتقوليش لأ القانون شئ والحقيقه القانونيه شئ
وفي كلمه رخمه للمحاميين بيقولوها
جعل القانون كي يخرق بالقانون وياثغراتك ياقانون الاحوال الشخصيه
يعني ممكن يلاعبك بالولد اللي هو ناسيه دلوقتي
وساعة الجد تسمعي ابني حبيبي يربيه راجل لحسن يتقله بعدين انت تربية ست
وانا شفت الكلام ده وعيشته مع اعز صديقاتي
وهكلمك في التليفون احكيهولك بس ربنا يكرمني كده وتليفونك اللطيف ده يرد
انا مع عمرو في رأيه تماما
سوميه علي قد ماتقدري وانفدي بجلدك وافضي لأبنك والقضيه الكبري
وجيبي حق نساء لاحول لهم والا قوه
وهو ربنا هينتقم منه وهيوريكي بعينك هذا الانتقام

محمد حمدي يقول...

ابقا كداب لو قولت انى عندى حل لكل المشكله العويصه دى

وفعلا انا عارف ان يوم المحاكم بسنه وان تاخر تحقيق العدل ظلم

وربنا مع الجميع

غروب يقول...

سنسن حبيبه قلبي

وحشتينى اووووووووووووى جداااااااا

انا قربت اخلص

هانت باذن الله

وربنا ميحرمنيش من سؤال

بالنسبه بقه للموضوع

مش عارفه اقول ايه والله

بس بجد مش متوقعه ان الحكايه بتطول كده

كل ده عذاب ؟؟؟؟؟؟

وايه الثغرات دى اللى كلها حاسه انها ضد الست

وازاى الراجل يقبل ان اللى كانت في يوم مراته وام اولاده تتبهدل كده

وايه المتين جنيه دول

دول ميكفوش مواصلات داخليه

سبحانك يارب

هو ده اللى رفقا بالقوارير
واستوصوا بالنساء خيرا؟؟؟؟؟؟؟

لا اله اللا الله

ربنا على الظالم

وان شاء الله يا حبيبتى كل صاحب حق يرجعله

وربنا مع الكل

انا حره يقول...

جيت بس اطمن عليكى

واشكرك على سؤالك واهتمامك

موناليزا يقول...

مش عارفة انصحك بايه
فمازلت اعانى من قوانين الاسرة والتأجيل المستمر رغم طلاقى عايزة حاجة اكتر من كده!!
بس ارجع واقول برضه اياكى تتنازلى هو مش هيعرض عليكى التنازل الا لو كان خايف من اى حكم ممكن تاخديه ويتنفذ
بصى ياسونا انتى صبرتى كتير فماتجيش دلؤتى وتتنازلى
ده رأيى لكن عايزة برضه اعرف راى المحامى بتاعك يمكن يكون له وجهة نظر مختلفة
ربنا يهيئلك كل الخير ويختارلك الصالح وينصرك ويجيبلك حقك وتخلصى من اللى انتى فيه على خير اللهم امين

marmar يقول...

ست الكل محاسن الجميله
انتي دايما طيبه ومحترمه واتعودنا عليكي كده دايما
وقوفك جمب كل الناس وجمب صحابك
ربنا يقدرك على فعل الخير
عارفه اصعب شعور بجد انك تتنازلي عن حقك لأي سبب ان كان بس هيا كده الحياة
لازم تتنازلي عن حاجة حتى ولو بسيطه او كبيرة عشان تقدري تعيشي
حاولي متتنازليش عن ولا حاجة حتى صحابتك نفس الحكايه

Soul.o0o.Whisper يقول...

سوووووووونة

بجد مش تعرفى اد ايه كلامك قطع فيا ،
دا كدا و انا بس باقرأ كلماتك ..
ما بالك باللى عايش الموقف ..

بجد ربنا يعينك و يعينها ،
و مش عارفة أقولك ايه ..


لو هنبص للموضوع من جهة المبادئ و تبنى القضية .. يبئا لازم تصبرى
و تمشى وراها مكان ماتوديكى ،
لأن المبادئ شئ لا يتنازل عنه ..
لكن اكون باضحك عليكى ،
لأنه فى وقتنا دا ... دا كلام فى الفاضى ،و على حساب حياتك و مشاعرك ..

ولو قلت لك حققى منه مكسب ،
و بصى للواقع ، و عيشى حياتك..
فكدا انتى بتتنازلى عن (انتى)
بتتنازلى عن حاجات بتؤمنى بيها ..
و برغم ان دا بيسبب اذى معنوى
لكن البعض احيانا يفضله عن الاذى المعنوى و المادى و الجسدى الناشئ عن الحل الاول ...


مش هاقدر اقولك غير ان دورنا هو توضيح المميزات و العيوب لكل حل من الحلول ..
و انتى الوحيدة اللى قادرة على اتخاذ القرار ..
مش استبيان و هتاخدى بالاغلبية ..

لأنك يوم ما هتاخدى قرار أنتى اللى هتعيشى تبعاته مش حد تانى ..

عشان كدا لازم تكونى مقتنعة تماما

ربنا يبارك لك يارب و ييسرلك ،
و يكتب لك الخير أينما كان

حقيقى قلبى معك ...





دمتى بود

عالم ماريونت يقول...

محاسن
بجد انا مش عارفة اقولك اية؟
ربنا يكون في عونك انتي واللي زيك
ويستر على ولايانا
هو الاعلام فالح بس يقولك المرأة خدت حقها تالت ومتلت
ربنا يكون في عون الجميع
وتحياتي ليكي
رنا

Nabil يقول...

السلام عليكم......

اختى الكريمه.....بصى ياستى انا لو عليا اقولك اثبتى وخليكى على الطريق وقاومى والكلام ده.

او اقولك خدى الى تاخديه او صا حبتك يعنى
وتريح نفسها

بس فى النهايه خلينا واقعيين انا وغيرى وكل اللى هايقولو رايهم ها يقولوه وكل واحد بعدها هايروح ويشوف مصالحه .
.
والنتائج كلها تعود ععليها هى.

شوفى انا بجد والله حاسس بيها جدا وبفكر فى مشكلتها.

هو حقها مهم جدا بس الهدوء وراحة البال ليهم تمن وتمن كبير جدا كمان.

فانا شايف انك كده تحسبى الموضوع ((صاحبتك يعنى)) على كذا متغير يعنى تحط فى اعتبارها كرامتك وحالتها الماديه وراحة ابنها وهدوئه واستقراره النفسى

وتاخد نقطه وسط بين المتغيرات دى وتتوكل على الله.

وربنا ان شاء الله مش بيضيع حق

ارق تحيه ليكى وسلامى

وردشان smilyrose يقول...

الأخت الغالية محاسن

اعانك الله على مساعدتها

وهكذا هو واقعنا الأليم

فليعينك الله عليه

ويعينك على مساعدة هؤلاء


أخى أحمد

اسمح لى بالرد

كيف تسالنى أن لا أسألك

كيف تطلب من قلبى ان يبحث عن حب آخر

ابتلك السهولة عن قلبى تتخلى

عن حبى تبتعد اين حبى بداخلك

اين قلبى الذى ينبض بداخلك

اين عيناى التى طالما احببت رؤياها

اجب قلبى ولا تهرب فالحب ليس كلام ونصوص

وانما احاسيس ونبضات بين الضلوع ترتعد

تخاف مما سيكون عليه اللقاء

لا تخف وان كنت ستبحث يوما عن عشق آخر

فارتحل فقلبى يعرف اين طريقه وارحل فى طريقك

انت كما تريد ان ترتحل

ابدعت فى كلماتك

رغم انك لمست جرحا عميقا بالقلب يئن بدون توقف




smilyrose

روح الحب الصادق

SHAPE YOUR LIFE (ABOALI) يقول...

حواء المظلومه او الظالمة الله اعلم

لله الامر من قبل ومن بعد

متى سترتفع انفسنا واخلاقنا وقيمنا
فوق كل رخيص ودنيوى الى ماهو ابعد من ذلك
سيدتى
هناك رب اسمه العدل القوى العزيز المقتدر
يمهل ولا يهمل

لما لا تتمتلاء انفسنا باليقين
ان هناك قاهر لكل ظالم
وان كان لك حق ستاءخذيه عاجلا ام اجلا
ان عجل لك به فى الدينا فهو خير وبركة
وان بقى لك فى الاخرة فهو الجزاء الاوفى

ان النزول بالمستوى الانسانى
الى مستوى الغابات حيث مرتع من لا عقول لهم
لهو بالتاءكيد متاهة بين الوان اشجارها
وحيواناتها

ان كان لك الحق سيدتى
فقولى
اللهم انى افوض امرى كله لك
بيدك الخير وبيدك العزة وبيدك الجبروت
وانى استجير بك على من ظلمنى فاءجرنى
اللهم انى ظلمت وانت تجيب دعوة كل داع
فما بالك ياربى بدعوة المظلوم
يارب اجرنى فى مصيبتى واخلفنى خير" منها

توكلى على الله سيدتى
واريحى نفسك
و ارتفعى بها من مرتع الغابات
الى رحب الصفوة من العقلاء
ولا تراودك نفسك ان هذا تنازل عن حقك
او حق ابنك
فبعد ان سلكتى الطريق الشرعى
وجدتى فيه الاشواك وانعدام الانسانية

لذا فقد نلتى يوم دافعتى عن حقك كل الاحترام والتقدير
ولكن الموج عالى
وثقى ان الله قاااااااااااااااادر
ان يعيد اليك حقك
وانتى تجلسين فى بيتك
فالظلم ظلمات يا سيدتى

ارجو الا اكون اطالت او تتدخلت فيما لا يعنينى

تحياتى

عاشقة القمر يقول...

ربنا يعينك و يعينها انا بشوف انو مش تضيعي عمرك عمرك وحياتك في المحكام انا شافيه احسن خاجه انو تكوني فاضيه لي ابنك وتكسبي ابنك بادين ابنك اهكون عارف انبك تعبتي عيشى حياتك بقى طالما الحمد لله عايشة مرتاحة ..وحقك هيرجعلك بإذن الله غصب عنه ربنا مش بيضيع حق حد
قدايه ربنا معاكي لاتضيع عمرك في المحكام وشوفي نفسك وعيشي حياتك وكفاية الي انتي شفتيه وربنا يكرمك يارب ويعوض عليكى عوض الصابرين

ريمان يقول...

ااااااااه والف ااااااه من دول بشر


بصى يا حيببتى
الواحده فى الزمن ده لو بتدور على حقها تبقى بجحه ومش محترمه وجشعه وطماعه وعنيها فارغه


الواحده عشان تاخد ورقه طلاقها لازم تتنازل وتمضى على وصولات امانه وتنازلات عن حقها وحق طفلها لازم تقفل بقها وتكست خالص

مش من حقها تتكلم

مش من حقها تقول فين حقى

هننتظر ايه فى الزمن ده يا محاسن؟

هننتظر حق؟

زمن الحقوق ولى وفااااااااات ومات

حسبى الله ونعم الوكيييييييل

اقول ايه بس

والله ما انا عارفه اقول ايه

ما انا قدامك اهو عشان الص مضيت على خمس ووصولات امانه على بياض ومضيت على تنازل عن القايمه عن حقى عشان اخلص

واخدت حته علقه من اهلى مالهاش مثيل

وعلى فكره

برضه مش اتطلقت الا اما طلع عينى وعين اللى جابونى

فين ايام عهد الرسول صلى الله عليه وسلم اما كان بيجيب لكل واحد حقه حتى لو من فم الاسوود والجبابره

فين الالتزام بشريعه الله؟

انا بقول لكل واحد ظالم بص

افتح القرءان

افتح سوره الطلاق

بص فيها

واقرا

اقرا يا مسلم

شوف ربنا قالك ايه
شوف حق المطلقه ايه

واعطيها حقها

اعطيها نفقتها ونفقه طفلها

ربنا نزل سوره الطلاق عشان ايه؟

لعلكم تتقوووووووووون

والله الغرض من سوره الطلاق ان الناس تتقى الله وهى بتتطلق

بلاش قرررررف رجاله معندهاش ضميييير

الجواز و سنينه يقول...

مش عارفه اقولك ايه
اولا ربنا معاكى
ثانيا استخيرى ربنا تعملى ايه؟
و اكيد هايدلك للى فيه الخير ليكى

ستيتة يقول...

عارفة كل اللي شفتيه
حتى من غير ما أقرأه انا شفته مع اعز الناس بس كان معاها تلات عيال
وكانت القوانين اقسى وأمر
انا هاأقول غير كل الناس
اولا ارميه ورا ضهرك مش عن ضعف أو ذل أو ضياع حقك أو حق ابنك بس الحياة جميلة وقصيرة
معقول تقضي ثلثها بالإنتظار أو اجترار المرار؟
ثانيا اقسم بالله الذي لا اله الا هو ها تشوفي ثأرك بعينك في الدنيا وأقسم بالله انه حق وأن اعز الناس شافته بدون ما تشمت أو حتى تحس بالثأر
عارفه ليه؟
لأنها قبله بكتير قوي قوي شافت فلاح ونجاح ضي عنيها ولادها ورزقها الله مال لا تعلم من اين اتى او في ماذا تنفقه على كثرته وحجت واعتمرت وضحكت وولادها تحت رجليها يتمنوا لها الرضا

اشتري محاسن هي تستاهل انك تشتريها وانتي في حرب يا تكسبي ماده وتخسري محاسن
ياتخسري ماده وتخسري محاسن
شوفي انتي عاوزة ايه؟

سمكه واحده يقول...

اقلك ايه يا محاسن والله منا عارفه
خايفه اقولك سيبك من كل ده وتضيع في وقت وعمر يبقي حرام لان ده حقك وحق ابنك

وارجع تاني واقول متسبيش حقك وافضلي في المحاكم سنين وسنين بردو حرام تضيعي عمرك وتفكيرك وكل حياتك زي ما بتقولي تقومي الصبح علي محكمه وهم وقرف بدل ما تقومي تصحي بيرو وتشوفي ابتسامته وانتي قاعده معاه وبتفطريه وتعيشي حياتك في هدوء وامان ومن غير هم

صلي استخاره وشوفي اللي ربنا كتبهولك ان شاء الله خير
عايزه اقولك الدنيا متستهلش ان احنا
نزعل او نضيع يوم فيها في هم او حزن
وعمرنا يعدي واحنا منحسش بيه

ربنا يصلحلك الاحوال ان شاء الله ويفك كربك مش عارفه اقولك ايه اصبري وربنا معاكي بس متسبيش حقك بس بردو عيشي حياتك عارفه انها نظريه صعبه بس حاولي
سمكه بتحبك

شهرزاد يقول...

عزيزتي محاسن

أنا حاسة انك حتوهي من كتر التعليقات ومن كتر الآراء المطروحة..

الحقيقة لو كنت مكانك سأكون أيضا محتارة,, ولكن عليك أن تدركي ان الحياة هي مجموعة من الاختيارات.. فنحن في كثير من مراحل حياتنا نحس أننا في متاهة او واقفين في مفترق طرق ولازم نختار بين الطريق الأول والطريق التاني

ولازم تكوني عارفة أن ما فيش طريق اسمه طريق السعادة وبعده مش هنتعب..

لأ..
لأن الحياة هي مجموعة من الاختيارات ولكل اختيار ثمن, وعندما نختار الطريق لازم نكون راضيين عن قرارنا وراضيين أننا ندفع الثمن بكل قتاعة ورضا..

وكل اختيار له ايجابيات وسلبيات يجب أن ندرسها جيدا, وأيضا نستشير أهل الرأي والخبرة (المحاميين في حالتك) وأهلنا وأصحابنا المقربين, ولا ننسى أن نستخير رب العالمين وبعدها نأخد قرارنا ونحن متوكلين عليه ومفوضين أمرنا له

أرجو ان أكون أفدتك
وأن تستطيعي أخذ قرار وأنت راضية وسعيدة به

تحياتي لك

همس يقول...

بجد الله يكون فى عونك

مش بيخاف ربنا دا

حسبنا الله ونعم الوكيل فيه


استخيرى ربنا وتوكلى عليه

وربنا يوفئك لما فيه الخير

ويحميكى ويحفظك يا رب

محمد فارس يقول...

السلام عليكم ورحمة الله وبركات
ياه ياه ياه ياام عبد الرحمن الاخت محاسن الغاليه حمد الله علي السلامه مش عارف انا اللي كنت مسافر ولا انت عموما اولا وقبل كل شئ دعواتي لك بالصبرعلي ما انت فيه ودعواتي ان تحققي حلمك وحلم عبد الرحمن وتبقوا دائما في احسن حال
ثانيا انا اسف جدا مش عارف حاسس ان انت ليكي حق عليه زي ما انت ليكي حق علي كل من حولك ولكني حاسس بالعجز
وخصوصا ان اليأس تمكن منك او يكاد
وكنت اتمني ان تتمسكي بالامل لان ما تفكري في التنازل عنه مش حقك لوحدك دا كمان حق عبد الرحمن وحق كل واحده مظلومه وبتعاني مما انت فيه الان
وارجوك رجاء اب واخ وابن ومش بس كده وكمان ام انك ما تفقديش الامل علي الاقل ما تحسيش في يوم من الايام انك قصرتي في كل ما ذكرته من اسباب
ودعواتي لك ان يرزقك الله بمن يقويكي
ولا يحبط من عزيمتك

شهرزاد يقول...

محاسن
عندي راي تاني برضو أحب أقوله
وهو بعد متابعتي لمدونتك وجدت أن قضيتك ومدونتك قد لاقت انتشارا إعلاميا واضحا وأنك وقد قطعت نصف الطريق وقد اخترت منذ البداية الإصرار على استرداد حقك بالكامل
فأجد أنه من الأفضل إكمال الطريق إلى آخره طالما أنك بدأت فيه ولا يضيع حق وراءه مطالب وخاصة أن قضيتك لم تعد قضيتك وحدك ولكنها أصبحت قضية كل إمرأة ضاع حقها على أبواب المحاكم وأمام ظلم الرجل وفي مجتمع ذكوري لا يرحم
أرجو لك التوفيق من كل قلبي
ويا ريت أكون قدرت أساعدك ولو شوية في توجيه قرارك ودائما وأبدا نوكل أمرنا لربنا فهو أعلم بما هو خير لنا
وفي رعاية الله
وألف تحية

شمس النهار يقول...

الف مبروك الف مبروك يامحاسن علي الطلاق
ربنا اخيرا فك اثرك
انت فعلا مطلقه من 3سنين
بس الحمد لله انك قدرتي تحرري نفسك من شر المحاكم والعند
انتبهي لأبنك ولنفسك وكفايه اللي ضاع من عمرك وشبابك في القضايا
بس ماتنسيش حق الستات عليكي
ومشروع القانون وسنينه
كفااااااااااره ياام عبد الرحمن
صوتك امبارح في التليفون برغم الاجهاد اللي كان باين عليه
لكن كنت حاسه انك فرحانه وكأنك اتولدتي من جديد

ضــى القمــر يقول...

محاسن حبيبتى
واضح انك أخذتى القرار .
والقرار ده شوفته وانا بقرأ البوست .. وحسيت ان ده اللى انتى مايله ليه اكثر .
وده من خوفك على ابنك ولتنفيذك لوصيه والدك .
وبصراحه معاكِ حق يا محاسن .
ده القرار المناسب .
لأن المحاربه مش بشرف .. المحاربه بألاعيب واساليب ملتويه .. ومش هتقدرى عليها حبيبتى .
كفايه التعب النفسى اللى عشتيه .
ومن قرآتى للتعليقات قرأت المباركه لكِ بالطلاق .
وحقيقه لا اعرف هل ابارك لكِ أم اقول حمد لله على حصولك على راحة البال بعد طول مشواركِ
محاسن حبيبتى .
كفايه ألم ولف وتعب فى نفسيتك علشان خاطر ابنكِ
انتبهى لنفسك ولحياتكِ .
وتعوضيك هيكون من ربنا إن شاء الله .
كل الحب لكِ اختى الجميله .
ادعو لكِ من كل قلبى وربى بالتوفيق الدائم يا قمرى الغالى :)

mostafa rayan يقول...

محاسن
انا رأيي زي رأي NIDAAL .R
حاولي تتطلعي منه باكبر استفادة ممكنة وتمسي الوتر اللي بيضعف قدامه وتر الفلوس وهو شكله طماع ونوع دةيضحي علشان الاكتر فطضغطي عليه وحاولي تتطلعي منه باكتر فلوس مستفادة لأن طريق المحاكمدة طويل قوي وانتي قلتي ان محكمة الأسرة زي قلتها ومابتنصفش الست ومش هينفع تقضي طول عمرك في المحاكم
لكن السؤال هو مش زي اي اب بيحب ابنه وعايزه يعيش كويس هل الابن دة هيعيش كويس ب 100جنيه في الشهر
وابوه يقدر يخليه مش محتاج لشئ
اوهل هو يقبل على كرامته ورجولته ان اهل مراته يصرفو على ابنه
المفروض انه يتسأل الاسئلة دي
ربنا يا محاسن يوفقك للخير وييسر لك الصعب ويفك ازمتك
لككل التحية والود

م/ الحسيني لزومي يقول...

هل انتهت الحرب علي فلسطين؟
هل انتهي التأمرالرسمي العربي والدولي علي المقاومة؟
كيف نفعل روح المقاومة المدنية بيننا؟
كيف نطور الهبة الشعبية العربية والاسلامية لصالح القضية الفلسطينية ؟
شارك معنا بافكارك واطروحاتك
حتي لايكون جهدنا قبض الريح
مدونة مواطنون ضد الشعب
نحن في انتظارك

Unknown يقول...

التنازل عن الحق شيء صعب جدا بس الأصعب منه المطالبة بيه وسط الحيتان الي احنا وسطهم وطبعا الراجل هيعمل المستحيل بس عشان يزل الولية وياخد الشقة وووو
يعني كله ضياع وقت
مش بقول تتنازلي عن حقك
بس ارضي بحكم ربنا وانسحبي وافلتي بجلدك وربي الواد وخلاص
تحياتي

ghorBty يقول...

لا حول ولا قوة الا بالله

ربنا يفك كربك وتخلص علي خير

بس بجد هما الناس ديه مش بتخاف من ربنا فين الرجاله دول من قول الله تعالي

وَإِذَا طَلَّقْتُمُ النَّسَاء فَبَلَغْنَ أَجَلَهُنَّ فَأَمْسِكُوهُنَّ بِمَعْرُوفٍ أَوْ سَرِّحُوهُنَّ بِمَعْرُوفٍ وَلاَ تُمْسِكُوهُنَّ ضِرَاراً لَّتَعْتَدُواْ وَمَن يَفْعَلْ ذَلِكَ فَقَدْ ظَلَمَ نَفْسَهُ وَلاَ تَتَّخِذُوَاْ آيَاتِ اللّهِ هُزُواً وَاذْكُرُواْ نِعْمَتَ اللّهِ عَلَيْكُمْ وَمَا أَنزَلَ عَلَيْكُمْ مِّنَ الْكِتَابِ وَالْحِكْمَةِ يَعِظُكُم بِهِ وَاتَّقُواْ اللّهَ وَاعْلَمُواْ أَنَّ اللّهَ بِكُلِّ شَيْءٍ عَلِيمٌ


بس ربك بكل شئ عليم

والتمسك بالحق دا واجب ما تتنزلوش عن حقوقكم ابدا لان دا هيدي فرصه انهم وامثالهم يتمادوا في الظلم وحسبي الله ونعم الوكيل

فيه اخره ولكل واحد ياخد حقه هناك


اسال الله لكم الصبر والتوفيق والسداد وربنا يعوضكم خير ان شاء الله

ان مع العسر يسرا


قلبي معاكم


غربتي

مطلق يقول...

متزعليش اوي انا بنتي عمرها سنتين و بقالي سنه و نص مشفتهاش رغم اني واخد حكم رؤيا من ست شهور

Kiara يقول...

الف الف مبروووووووووووووووووك ياسنسنتي

خرجت من الاجازه مخصوص عشان اباركلك وربنا يقدرك علي تربيه بيرو

غروب يقول...

الف مبروووووووووووووووووك

وربنا يخليلك عبد الرحمن ويعينك على تربيته يا قمرايه

نبض الروح يقول...

الله يكون في عونك وينصرك ويحقق لك ماتريدين ولن يضيع حق وراءه مطالب
امممممممممم لا أملك سوى الدعاء لكِ أقصد لصاحبتكِ ههههههههههههههه
ويارب يارب يفرج عليك ويرزقك ويسعدك ويعوضك بكل خير :)

كلام على بلاطة يقول...

Nagehyossef Fahmy at 3:09pm January 22
لوكان الفــــــــقر بشرا ما قتلنه
لان القاتل يقتـــــل وانما نصحته
واقنعلة بكف اذاه وحيـــــــــدته
ليحيا البشر بكرامةمثلما تمنيته
ويعيش كل فى حاله كما اوصيته
وان نقض العهد ........عاودته
وحاولت معه مرارا لانى احببته
ففيه زهد وتواضع ...قد تبنيته

Write a comment...

طوبه فضه وطوبه دهب يقول...

انا رئيى كفايه اوى لحد كده عمرها اللى ضاع فى المحاكم وتحافظ على الهدوء فى الحبه اللى بقيين من حياتها يمكن تقدر ترمم اللى اتكسر وتبدء تانى من جديد وربنا يتولاها بقى

blue-wave يقول...

تصدقى انى مبقتش بقدر اقرأ بوستاتك؟
ياااااة
احنا ليه بقينا وحشين كدا؟
ليه بنظلم بعض؟
ليه بنعذب بعض كدا؟
ليه من الأول الإختيار مايكونش صح؟
معرفش حاسس انى جوايا مليون ليه
استحملينى بقى

موناليزا يقول...

ربنا يوفقك ياحبيبتى
عايزينك تحكيلنا بالتفصيل:)

موناليزا يقول...

الكيان الإرهابي الصهيوني أعد لنا جيشاً من المدونين فأين جيشنا ؟






وَأَعِدُّوا لَهُمْ مَا اسْتَطَعْتُمْ مِنْ قُوَّةٍ ,,,

كلنا مقاومة

http://kollonamoqawma.blogspot.com

عالم ماريونت يقول...

عزيزيتي محاسن

ازيك عاملة اية؟
واخبار عبد الرحمن اية؟
ياترى عمل اية في الامتحانات؟

جنّي يقول...

السلام عليكم

كيف حالك اختنا ام عبد الرحمن .. لعلك بخير والحمد لله ..
وازي عبد الرحمن ..

كنت ناوي اكتب ربنا يديكو طولت العمر مع المحاكم وزواريقها ..

ولكن انا اميل لرأي صاحبتكم بشرط عدم التفريط في كل حقوقكم وخير الأمور الوسط ..

ربنا معاكم

تامر علي يقول...

والله أنا كنت فاكر ان الكلام ده اتغير من ساعة محكمة الاسرة اللي بقت الامور فيها مستعجلة وفيها محكمين جاهزين .... وكنت عاصرت بعض الحالات القريبة وافادوا بكده برضه .... بس الظاهر ان المسألة حسب شطارة المحامي واللعب على الثغرات زي ما حضرتك تفضلتي .....طبعاً لابديل عن خيار المحكمة بغض النظر عن المعاناه حتى لاتندم وتتهم نفسها بالتقصير في حقوق ابنها فيما بعد ... كذلك لايضع حق وراءه مطالب ... وكذلك علشان مقاومة الظلم اللي لازم يكون من اساسيات افكارنا. اعانكم الله انتي وصاحبتك(أول مره اشوف حد مصاحب نفسه امال انا مش طايق نفسي ليه):)

من غير عنـــوان يقول...

ربنا معاكي


تحياتي

انا حره يقول...

محاسن هوا ايه اللى حصل

شايفه ناس بتباركلك

يارب يكون خير ويكون اللى فبالى حصل يااااارب

مش تدخلى تطمنينا ياهانم؟

دعاء مواجهات يقول...

ربنا معااكى يااارب وينصرك

ويهيئلك الامور كلها

ويحميكى من المكائد

سلامى وحبى