الجمعة، 8 أغسطس 2008

انا والمحكمه وهواك(اليى جابلى برد)

يوم المحكمه زى يوم القيامه الكل بيتساوى فيه الغفير زى الامير والغفيره برضه زى الاميره تقدروا تقولوا تطبيق عملى لمبدأ المساواه ومبدأ مفيش حد احسن من حد ..ده المفروض قدام القانون طالما ظالم لازم وحتما ولابد تدفع نتيجة ظلمك وطالما مظلوم لازم واكيد ربنا يرفع الظلم عنك ويردلك حقك(وان شاء الله منصوره يا بنت جنسى دائما ابدا..ده لو مظلومه ولو ظالمه خدى على دماغك بقه اه الحق حق)انما وهيا انما دى اليى مجننانى دى ممكن الواحد..نخلى الكلام بصيغه انثويه عشان دى مشكلتنا احنا..ممكن الواحده يتحكملها وتاخد حقها اه ممكن انا جربت ده فى النفقه خدت حكم ب100جنيه لابنى و100 ليا شوفتوا الكرم ده وكأن اليى حكم مش عايش فى البلد ولاا هيدينى من جيبه المهم ادينى عامله استئناف يعنى جرى فى المحاكم لسنتين كمان يله انا ورايا حاجه يعنى لغاية ميتحكملى تبقى الدنيا ولعت اكتر وابقا انا وابنى قعدنا على باب الحسين(نشحت يعنى)..طب اتفرسنا من دى نتفقع من التانيه قضيه اتحجزت للحكم وخلاص رايحه اعرف الحكم..ايه اليى يخليها ترجع تانى للشهود حاجه غريبه قضيه بقالها سنتين وهو القاضى بلسانه وعقله قال خلاص جابت اخرها وحجزها للحكم يرجع فى كلامه ليييييه؟المهم انا حاسه كده لاما انا اموت وانا لسه ليا قضايا فى المحكمه او ربنا يكرمنى واشوف القضايا دى تخلص واخد حقى وحق ابنى على حياة عينى او موتها اهه اخده وخلاص على فكره انا دخلت المحكمه وانا فى اول ال26 سنه وما زلت فيها وانا برضه فى اول ال29 سنه اليى ساعات بيحزنى قوى ان والدى الله يرحمه كان دايما يقولى اتنازلى عن كل حقوقك وخدى ورقة طلاقك هو طبعا مش بيأيد كلام طليقى لا ده كان خايف ومشفق عليا من سكة المحاكم وحفرها..انا مش عايز اشوفك كده..الله يرحمك ..وانا اصر مع بابا اا قوله مش هسيب حقى وحق ابنى انا مش كنت بعقه لان بابا كان ديمقراطى جدا معانا يعنى يناقشنا ولو اقتنع خلاص..المهم لما لقيته بيدعيلى عرفت انه زعلان بس مش غضبان عليا الله يرحمه كان مغرقنى حنيه انا وابنى حنان واهتمام وطيبه الله يرحمك يا بابا...احلى حاجه ممكن تشوفها فى المحكمه بقه انك تلاقى الستات بتتضحك او بتبتسم يعنى فى عز البلاوى دى بيتضحكوا..يا كرمك يا رب..قاعده جنبى واحده وابنها كل مره بيبقى نفسى ابنى يبقى معايا بس بأشفق عليه برده ةالجو ملبش بالمشاكل والهموم وهوا لسه صغير كفايه اليى امه فيه ..على فكره انا مش خجلانه من نفسى ولاا زعلانه على روحى انا بس زعلانه على اليى بشوفه فى المحكمه..حصل بعد كده وخدت ابنى معايا مره عشان ماما كانت مسافره ومفيش حد اسيبه معاه الذيذ فى الامر انى قولتله انها فسحه وهو طلع ولاا فى دماغه حاجه عيل بس بموت فيه...

هناك 90 تعليقًا:

عصفور المدينة يقول...

يا بنتي ما تضيعيش وقتك رغم إني مش عارف التفاصيل بس باقولك
آخر طريق المحكمة هما 200 جنيه
إلا إذا كان زوجك السابق من كبار رجال الأعمال المثبتة أملاكهم ومشهورة
وبعدين طرائق المحامين دائما تنجح مع المتهرب من أداء الحق ولا تنجح في استجلاب الحق

mahasen saber يقول...

استاذى عصفور المدينه..
الظاهر ان انا جتنى لوسة حب تضييع الوقت فى المحاكم شكله اليى بيدخلها بيدمنها ..يعنى يا استاذ محمد انا لايه سكه تانيه واليى كوميدى فى الموضوع انه فعلا غنى جدا وجدا كمان يعنى الغنا اليى وصل مارينا والسفر للشوبنج بره ...بس سيبك انتا حضرتك نورت المدونه وحمدالله على السلامه اخبار الامتحان ايه واخبار عبرنى شكرا ...والله حضرتك نورتنى وشكرا الف شكرا كمان ...وكل سنه وحضرتك طيب فى رعاية الله وامنه.ونورتنى كمان مره جدا جدا جدا ..

غير معرف يقول...

معلش احب اوضح ليكى حاجه او حجات متعلقه بالقضايا بتاعت الاسرة عموما
بالنسبه للحكم بتاع النفقة واللى اتحكم ليكى فيه ب200 جنيه بالتساوى بينك وبين ابنك "ربنا يخليه ليكى يارب" احسن من احكام كتير انا صادفتها فى شغلى بتكون حوالى 50 جنيه او ااقل وجاتلى المكتب واحده احكامها بالزيادات كانت 25 جنيه عارف انى فى فرق قوة شرائيه بين البلد اللى انتى فيها وبين البلد اللى احنا عايشينه فيها بس اوضح ليكى انى حكم النفقات عموما حكم وقتى بمعنى انك بعد مضى فترة من الحكم ليكى من حقك ترفعى دعوى زياده عن ما قرر ليكى وان شاء الله الاستئناف بتاعك يتعدل ويزيد المخصص كنفقة ليكى
بالنسبه للقضيه التانية اللى كانت محجوز للحكم واتحولت للشهود انا مش عارف ايه نوعها بالضبط او موضوعها ان كانت اعتراض على انذار طاعه او تطليق للضرر بس المهم انك لازم تعرفى انى فى بعض القضايا بتحجز للحكم لصدور حكم تمهيدى بسماع شهود الطرفين لبيان ان كان فى ضرر يبيح التطليق او ان كان فى مبرر للاعتراض على انذار الطاعه مثلا
كل اللى عايز ااقولة ليكى الصبر ثما الصبر حقك هو من قبيل ما شرع ليكى شرعا متتنازليش عنه وحتى لو مش محتاجه وربنا موسعها عليكى من الممكن انك تفتحى دفتر توفير بالفلوس دى باسمك بس تكون نيتك انك تدخريهم لابنك
وربنا يكرمك ان شاء اللة

غير معرف يقول...

نسيت اقولك لو كان عندى اى استفسار سيبيها فى التعليقات وان شاء الله حرجع تانى يمكن اقدر افيدك

نـــــور يقول...

سلامتك منن برد المحكمه
والله انا مشفقه عليكى وعلى تعبك
بس مش هقولك غير اثبتى على مبدأك مادمت صح لانها قلبت بتحدى وبصراحه ياشيخه انتى طماعه قوى ماهو 200 جنيه دول زى الفل ماهى كل حاجه رخيصه اهه
اصل البيه القاضى كان محوش خزين بيته من اكل ولبس من الاربعينيات علشان كده مش حاسس بالدنيا
يلا ربنا يهدى او يهد
وربنا يخليلك ابنك يارب ويعوضك بيه
دمت بخير

sebofy7alo يقول...

طيب أنا كنت عايز أتجوز, كدة بقى أرجع أنا وأروح أقولها مع السلامة علشان أوفر عليها وعليا مشاوير المحاكم من الأول.
والله ربنا معاكي وتبقي تدخلي مدونتي تخففي عن نفسك حبتين.
سلام ليكي ولأبنك.

mahasen saber يقول...

الاخ المحامى...
شاكره ليك ايضاحك القانونى للامور جدا جدا بس لو ركنا الامور القانونيه على جنب هل من الادميه ان قضية اسره يعنى مش جنائى تاخد المده دى كلها وازاى الاجراءات الروتينيه تتماشى مع القانون بالشكل ده بتتسبب فى تعطيله القانون يعنى على العموم ...جزاك الله كل خير على وقتك الثمين اليى قضيته فى كتابة الافاده والايضاحات دى الف الف الف شكر وجزاك الله كل خير مره تانيه واكيد اى استفسار يسعدنى ويشرفنى انى اسألك فيه وكل سنه وانت طيب..فى رعاية الله وامنه.

mahasen saber يقول...

habiba...
ايه الجمال ده يا حبيبه الله يبسطك ضحكتينى نورتينى يا حبيبتى قوى وشرفتى المدونه واسعدتيها بتعليقك الجميل وشكرا على ذوقك ورقتك بس انا فكرت فى حاجه حلوه لما اتزنق اخر الشهر هروح استلف من القاضى ده ..ايه رأيك عشان يحرم يدى احكام كده تانى..نورتينى يا حبيبه وشكرا على الزياره الجميله..فى رعاية الله وامنه.

mahasen saber يقول...

sebofy7alo...
انتا ناويها من دلوقت ولاا ايه لا انا عايزه الراجل اليى يدخل المدونه يتعلم انه ميعملش كده يتعظ يعنى بعدين بتقدر البلا ليه مش يمكن لما تتجوز تتروض وتبقى مطيع حاضر حاضر..انتا نورتنى وتبقا شرفنا مره تانيه بخطيبتك يمكن يعجبها حاجه..انا بهزر اهه مش نكديه وزعلانه يعنى..شرفتنى واسعدتنى وبعيد عن همى فرحتنى ...فى رعاية الله وامنه..

غير معرف يقول...

موضوع الروتين انا معاكى فيه بس للاسف الشديد دى جات على مصالح ناس كتير جدا وتعطيل للسير فى الدعوي وده بخصوص موضوع تقديم طلبات تسوية ومناقشتها فى محكمه الاسرة بلجان فض المنازعات اللى كانت تقليد اعمى للنظام المتبع فى الدول الاوروبية وكانت فرصه لتعيين المحاسب واصحاب الوساطه فى وزارة العدل كمان اللت والعجن اللى بيحصل فى القضايا مش بيكون ذنب القانون شق من المشكلة دى بيكون بسبب المحامين وخاصه انى فى قضايا الاسرة بيكون دور محامى الزوج هو اطالة زمن التقاضى بس ومش حيقدر يمنع الحكم بالنفقة او التطليق الا ما ندر وبعدين كمان احنا كمحامين للاسف البعض بيستغل اطالة زمن القضايا فى نهب الموكلين وابسط حاجه لما تيجى تحاسبى المحامى حيقولك انا شغال فى القضيه لمدة 3 سنين ويكون كل اللجلسات اللى اتنظرت حوالى 4 او 5جلسات بس
بالنسبة لموضوع الادمية انا معاكي لانى للاسف الشديد فى احوال كتيرة الزوجه بتكون مقطوعة من شجرة هى وولادها وبتفضل تتطموح بيهم فى المحاكم علشان تلاقى نفقة تصرف منها عليهم وده راجع للقانون اللى ممكن يحط قواعد واسس تحصل بمقتاضاه الزوجه والابناء على جزء او نسبة معينه من مرتب الزوج بعد التحرى عنه خاصة انى اعتقد انى مفيش ما يمنع ده فى الشرع و الاسلام كمان للاسف ازواج كتير بتنسى قول المولي عز وجل بخصوص التسريح باحسان
نظرا لانى قابلت كتير من اللى بيعانوا نفس مشكلتك فانا لا املك ليكى الا الدعاء
بعد اذنك انا خت ميلك من البروفيل وحبعت ليكى ايميل من عندى علشان تحتفظى بيه عند الضرورة

mahasen saber يقول...

الاخ المحامى ...
مش عارفه اشكرك ازاى على ايضاحاتك وكلامك وتفهمك للموضوع وسرعة ردك انا شاكره ليك جدا جدا جدا ويشرفنى معرفتك .. بس انا هعمل حاجه قريب واكيد هحتاج رايك فيها شاكره اهتمامك وكرم اخلاقك جعله الله فى ميزان حسناتك...فى رعاية الله وامنه..

mahasen saber يقول...

الاخ المحامى...
ممكن تبعتلى عنوان مدونتك يسعدنى قوى انى ازورها ...فى رعاية الله وامنه..

إبن مصر يقول...

السلام عليكم ورحمةالله
اولا انا بحيكى جدا جدا على جرأتك فى عرض مواضيعك
وثانيا لازم اشكرك على زيارتك الجميله وزوقك فى كلامك الأجمل
ووالله مشفق عليكى جدا من المشاكل دى كلها عليكى وواضح انك لاتملكى من الدنيا سوى والدتك بعد وفاة والدك رحمه الله
اتمنى ان ربنا يعجل فى القضيه وتنتهى كما يحب ويرضى جل فى علاه
ولكى منى خالص التحيه
وتمنياتى بمزيد من التواصل
nageh

mahasen saber يقول...

son of egypt...
نورتنى وشرفتنى جدا وانا اليى بشكرك على كلامك الجميل ده جعله الله فى ميزان حسناتك وان شاء الله يبقى فيه تواصل مستمر ده شئ يسعدنى ويشرفنى الف مليون شكر ليك ولذوقك ولزيارتك الكريمه ..اتركك فى رعاية الله وامنه.

AHMED SAMIR يقول...

نصيحة بقى
سيبي ربنا هو اللي يحكم
لو انتي مظلومة اكيد هتاخدي حقك
دة ربنـــــــــــــــــــــــا
اعتقد ان طريق المحاكم مصاريف ع الفاضي
معلش
العدالة البطيئة هي قمة الظلم
تحيااااتي

غير معرف يقول...

عزيزتي

لا تنسي ابدا

دعوة المظلوم ليس بينها وبين الله حجاب

غني فقير مش تفرق

الفلوس مش بتسعد

اقولك

لا مش قايلك

خدي بالك من نفسك

وياريت

تكوني ام مثالية

واوعي تنسي ان لهذا الطفل والد

لا يمكن ان ينهي علاقته به بورقة او حكم محكمة

ربنا يحفظكم

NIDAAL .R يقول...

نفسى أقرأ البوست بس للاسف الخط صغير جداً و مش شايف حاجة الا بصعوبة
و انا عنيا بايظة اساساً
ممكن حضرتك تكبرى الخط شوية و ياريت اللون

اسف لازعاج حضرتك بس عايز اقرأ البوست

mahasen saber يقول...

a.samir...
كلامك مضبوط فعلا العداله البطيئه هى قمة الظلم انا بشوف حالات صعبه ملهاش حد يوقف جنبها ازاى ستات زى دى تفضل بالسنتيين مستنيين حكم نفقه عشان يأكلو عيالهم ولو طلع الحكم بيفرس ويشل احنا عاييزين نظره برحمه لمشاكل وقضايا الست حرام كفايه عليها المجتمع وارائه...على العموم نورت المدونه جدا جدا وشرفتنى بالزياره الكريمه...فى رعاية الله وامنه..

mahasen saber يقول...

afew good men..
كل ما ااقرا الاسم افتكرافلام الويسترن الامريكى كلامك فى محله وكل ما الضغوط بتزيد بتلاقى نفسك بتمسك فى الدعاء اكتر اولا لفضله المعروف ثانيا هتروح فين ملكش ولا حيلتك فى الدنيا الا ربنا ...جزاك الله كل خير ونورت المدونه وشرفتها ..اتركك فى رعاية الله وامنه.

mahasen saber يقول...

nidaal pal...
الف سلامه على نظرك انا ظبت الخط وكبرته بس المشكله ان فيه كلام بيتمسح فبيضيع المعنى واصلا وانا بكتب البوست كتبته بخط كبير فوجئت بقه بكلام ممسوح فأضريت اعمل كده...على العموم انا زبطه واسفه جدا على الازعاج وانتا نورتنى وشرفتنى جدا جدا ...فى رعاية الله وامنه..ويا رب البوست يعجبك على قد ما كان نفسك تقراه..وميخيبش ظنك..

الربان يقول...

تحياتي

أشعر بالحزن حين اري شخصين كان بينهما حياة و احلام مشنركة...كانت بينهم مودة و رحمة...و بينهما أيضا اطفال ابرياء...اشعر بالحزن حينما يلجأ الي
او يلجأ أحد منهما الي عرقلة حصول الثاني للحصول علي حقوقه بما يرضي الله
بعد ان الانفصال...

الدنيا دار ممر و الاخرة مستقر...فليؤد
كل منهما حق الاخر عليه بما يرضي الله
و يتقيا الله في تصرفاتهما..

لك الله...و رحم الله والدك الكريم...و بارك لك في صغيرك...وان شاء الله تستردي
حقوقك المشروعه.

تحياتي و تقديري

mahasen saber يقول...

الربان...
جزاك الله كل خير على دعائك لابى واسال الله له الرحمه والمغفره هو وجميع موتى المسلمين وشاكره ليك كلامك الجميل وفعلا لو كل شخص عمل بان الدنيا دار ممر مش مستقر مااعتقدش كان حد ظلم التانى ..شاكره ليك ذوقك وكلامك الراقى وشرفتنى واسعدتنى جدا ...اتركك فى رعاية الله وامنه..

oRiGiNaL HeArT يقول...

انا كان نفسى اعلق بس
اصلا معرفتش اقرا البوست بقالى اكتر من تلت ساعه عاوزة اقرا بس لون الخط مش مخلينى اركز خالص
هروح اريح عينى شوية وارجع اقرا البوست:)
تحياتى

mahasen saber يقول...

original heart...
انا اسفه جدا جدا ان لون الخط دايقك بس والله انا مش عارفه الون بحس انه كويس يعنى الباكجروند بتاعة المدونه غامقه فلون الخط فاتح ...على العموم هغير الون بس قوليلى واضح ولا لا اسفه جدا كمان مره ...ونورتينى جدا والله ..فى رعاية الله وامنه..

NIDAAL .R يقول...

انا بكره بجد مشوار المحاكم المصرية وروتينها و ممكن القضايا تقعد يها اكثر من 20 سنة.. ده ايه ده .. ده ذل او كأن القضاء بيقول للناس يا أما تسكتول عن حقوقكم يا أما تتبهدلوا فى المحاكم
طب صح .. هو عقبال القاضى ده لما يحكم فى الاستئناف او الطعن ده بالزيادة هتكون ساعتها الحياة عاملة ازاى "زى ما حضرتك قولتى " .. ده على كدة ممكن حياة اسر كتير اوى تضيع بسبب التاخير .. ربنا مع حضرتك وينصرك ان شاء الله ويبارك لكى فى ابنك
تحياتـــــى

mahasen saber يقول...

nidaal pal...
اولا انا مبسوطه انك اخيرا تمكنت من قرايت البوست وثانيا كلامك مضبوط جدا امال بقه لو مره تبقى معايا وتشوف الستات اليى ملهاش اى دخل دى معايشه على فيض الكريم فعلا هتعرف ان فيه ربنا هو اليى بيرزق وانه فعلا لو ربنا ساب رزقنا على بعض كنا موتنا بعض من الجوع ..شكرا ليك وشكرا لزيارتك الجميله ولتفهمك للبوست الف الف شكر...فى رعاية الله وامنه..

blue-wave يقول...

اول زيارة للمدونه
وعجبتنى بصراحه
ولو انى انا كمان مشفق على اى بنت من جو المحاكم
لكن ربنا يعينك
تحياتى

oRiGiNaL HeArT يقول...

الحمد لله قريت وبتركيز كمان
هونى عليكى وربنا ينصرك ان شاء الله
بجد هدعيلك من قلبى من ضمن اللى بدعيلهم
اصلى اعرف ناس كتير كدة
والله نفسيتى بتتعب من الظلم اللى واقع عليهم مش كفاية اهم ارتبطو بحد لا عرف يحافظ عليهم ولا يعيشهم فى استقرار لا ويوم لما قررو ينفصلو قرر هو انه يطلع عينها ويدخل فى عند وميصرفش على ولادة ولا كانه كدة بقى بطل والله المفروض الرجاله اللى زى كدة تتكسف من نفسها وتصرفاتها الغبية
المشكلة بقى ان المحاكم بتاعتنا -حسبى الله ونعم الوكيل- مش منصفة ابدا والقاضى يفضل ياجل وكانه بيذل الواحده عشان تاخد حقها وياريت بتاخده كامل لا دة كمان بعد مابيطلع روحها فى تاجيل القضايا يديها فتافيت من حقوقها وكانه زى ماقولتى بيديها من جيبه
او ممكن يكون غبى مش فاهم ان الطفل دة بيصرف اكتر من الانسن الكبير اللى ممكن يستحمل ويستغنى عن بعض متطلباته
ربنا ينصرك بجد وتوصلى لحقك
بس صدقينى لو عرفتى تاخدى حقك ودى يبقى احسن بس متتنازليش عن حقوق خالص
اسفة على الاطااااااااله دى :)

Unknown يقول...

السلام عليكم ورحمة الله وبركاته
أ.محاسن صابر
عن تجربة عائلية واسرية فى سكك المحاكم اقولك الداخل فيها مفقود والخارج منها مولود .
اولى التجارب احوال شخصية ونفقة وخلافه وحكم ب25جنية(الكلام ده من سنين)ولم ينفذ الحكم ابدآ لعدم الاستدلال على المدعى عليه(هاجر للقمر.......!!!!)
الثانية اغتصاب جحرة البواب وهدم حوائطها وادخالها ضمن الجراج (ومالكوش عندى حاجة ......اية رأيكو بقى؟!!!
لوحكيت عن تفاصيل مش حأخلص لكن المجز والمفيد قررنا انا واخوتى الاندخل محكمة تانى ابدآآآآآآآآآآآآآآآآآآآ
ولو كنا اصحاب للحق!!!!!!!!!!!!!
ويغفر لنا ربنا تنازلنا عن حقنا ولكننا مضطرون الى هذا لتقليل الخسائر.
قلبى معاك فيما أنت فيه وفيما أنت مقدمه عليه(وكما يقولون وعفوآ للتعبير العامى الذى سأذكره
((((التقيل جااااااااااااى))))))

mahasen saber يقول...

blue wave...
نورتنى واسعدتنى الزياره ومبسوطه جدا ان المدونه عجبتك والرجاله المحترمه بس اليى بتشفق على اى بنت او ست من سكة المحاكم الباقى بيقولك يستاهلو ....شكرا ليك جدا على الزياره الكريمه وزرت مدونتك وسبتلك تعليق طويييييل عريض ..شاكره ليك الزياره الكريمه ..فى رعاية الله وامنه..

mahasen saber يقول...

original heart...
الحمدلله تمت عملية قرايت البوست بنجاح نهنئ انفسنا نورتينى يا قمر ومبسوطه انه عجبك بس عارفه اليى يقولك المضطر يركب الصعب مش عربيه اهه سكت المحاكم هيا اساس الاتطرار كله لان مفيش واحد دخلتها زى حالاتى الا لانها مش عارفه تاخد حاجه ..يله الحمدلله وربنا ما يوريكى ونورتينى جدا وهغير لون البوست بقه شرفتينى يا جميله قوى قوى قوى..فى رعاية الله وامنه..

mahasen saber يقول...

norahaty..
اختى وحبيبتى برغم معرفتى البلوجيه البسيطه بيكى الا ان سبحان الله قلبى ارتحلك وااقولك بقه يا نور ان انا شوفت احكام زياده بالعشره جنيه زى ما سمعت فربنا يهدى القاضى اليى بيحكم حكم بالشكل ده لانه بيشيل وزر ليوم الدين ..اما سكة المحاكم فعلى قد ما هيا بشعه بس ادينلها بالفضل انها خلت خبرتى فى الحياه اكبر شويه وانها خلتنى اشوف حاجات لو سمعت عنها من حد هقول ده بيبالغ فالحمدلله الحمدلله الحمدلله على التجربه دى فعلا كل حاجه خير وحاجه للعلم انا جربت ودى من البدايه فبائت كل المحاولات بالفشل واتاريه كان رافع قضايا عليا واحنا بنعمل جلسات ودى وانا معرفش بيستغفلنى يعنى عشان تبقى كملت يله كل خير بس ربنا يكرمنى فى ابنى ويبارك فيه...شكرنى على جرعة الحب اليى بحسها فى تعليقك حتى لو مش فيه اى حاجه تدل على كده يكفى انى بحسه ...الف شكر فى رعاية الله وامنه..

mohamed ghalia يقول...

كل واحد فينا بيتعرض لإبتلاءات ودع إبتلاء وإنشاء الله تنجى فيه خدى بالك قوى من ابنك وعلمية وحاولى تفيده من التجربة إلى مريتى بيها
وربنا معاكى
تحياتى

mahasen saber يقول...

الاخ المحامى...
الاستاذ الاخ الكريم المحترم الموقر الذى لا يبخل على اى شخص بالنصيحه جعلها الله فى ميزان حسناتك ارجوك ارجوك واتمنى انه لو حضرتك عندك مدونه تبعتلى اللنك عشان اتشرف بالزياره اصل المدونات دى بقيت بقرا بيها الناس وافكارهم يعنى انشئ مدونه حتى استطيع التعرف عليك ...بجد لو عندك ابعتلى النك وجزاك الله كل خيير ..فى رعاية الله وامنه..

كلام حسام يقول...

انا زرت حضرتك امبارح وضفت تعليقي ودخلت تاني النهاردة للاسف ملقيتوش !!!
يمكن عيب من النت عندي
باي حال انا في الاول افتكرت العنوان ساخر لكنه طلع عنوان بيترجم الوجع
انا متعاطف جدا مع ابنك لان واضح انه هحروم من حقه اتمني ان ربنا يكرمك ويوفقك في اللي انتي عايزاه

أبو خالد يقول...

أبنتي الفاضلة /محاسن
لا يضيع حق و راه مطالب لو هذا الحق مطلوب أما قضاء عادل هناك محترفون تزييف الحقائق و أثباتها رأي أنا شخصيا
مثل رأي و الدك رحمه الله و حسبنا الله و نعم الوكيل في كل ظالم
و نصيحة من أب أبتعدي و أبنك عن المحاكم لأنها لها تأثير قاتل علي علي الأولاد أبنتي الغالية أستعوضي الله في حقك
و أهتمي بتربية أبنك و أعانك الله علي ذلك
دمتي أبنة غالية

بنت الاسلام يقول...

معلش تجربة وتتعملي منها

بس ماتاخديش ابنك معاكي تاني المحكمة المرة دي ماحسش المرة الجاية هيحس

ربنا ينولك اللي في بالك عن قريب ان شاءالله

غير معرف يقول...

يقول الله عز وجل
(وان يتفرقا يغن الله كلا من سعتة)
فالصبر الصبر .....
مدونة نسمات لمحمد الشيمى

غير معرف يقول...

السلام عليكم ورحمة الله وبركاته
انا حبعت ليكى لينك المدونة على الايميل بتاعك ان شاء الله ومعلش محفضحش عن شخصيتى هنا لا سباب خاصه بس من ما يلى البوست ده ان شاء الله حعلق بالمدونه بتعتى

dodda يقول...

ربنا يعينك ويردلك حقق عاجلا وليس اجلا ان شاء الله

ربما يكرمك فى ابنك
وادعى واطلبى من ربنا كل اللى انتى عايزاه وربنا قال ان دعوة المظلوم لا يحجبها شىء
وسبحانه وتعالى بيرد على المظلوم ويقسم وعزتى وجلالى لانصرنك ولو بعد حين...
وده كفايه ربنا يقسم يردلك حفك فى وقت هو شايفه الافضل ليكى
قبل ما نوكل محامى نوكل ربنا وناخد بالاسباب..
وربنا يهون عليكى مشوار المحكمه ومتيأسيش..بس كمان متضيعيش حياتك وتنسى نفسك
ربنا يتولاكى انت وابنك برحمته

mahasen saber يقول...

mohamed ghalia....
نورت المدونه وشرفتنى وكلام مضبوط كل واحد ليه ابلائه فى الدنيا واليى ربنا بيحبه بيبتلئه (اكثر الناس بلاء الامثل فاالامثل) فالحمد لله على كل شئ وكله خير بشكل او باخر...وابنى ده المكافأه الى ربنا رزقنى بيها فى الدنيا جزاك الله كل خير وكل رمضان وانتا بألف صحه..فى رعاية الله وامنه..

mahasen saber يقول...

شملولى ابن سحلولى...
شرفتنى جدا فعلا انا لقيت لحضرتك تعليق جميل على بوست لملمت ..وبالنسبه للاسم ده مش بيترجم وجعى انا بس لا ده وجع والم كل واحده رجليها خطت عتبة المحكمه ربنا يهون علينا جميعا ويكرمنا بفضله شكرا على زيارتك الكريمه وتعليقك الاجمل كل رمضان وانتا بخير..فى رعاية الله وامنه..

mahasen saber يقول...

ابو خالد...
الاب الفاضل ابو خالد انا سعيده بتشريف حضرتك ليا جدا جدا الزياره دى اسعدتنى لانها من شخصيه فاضله مثل حضرتك ..اما بخصوص رأى حضرتك اليى بيأيد راى بابا الله يرحمه..فأنا مش عايزه اتخاذل واسيب حقى ابنى وحقى حاسه ان ربنا سابنى فى اختبار فلازم احتسب واصبر واسيب الامور فى يد المولى عز وجل بعدين مش عايزه ابقا ضعيفه ومهزومه وانا زوجه وانا كمان متطلقه يمكن ربنا يكرمنى من فضله وااقدر اعمل حاجه تنور لغيرى من بعدى ..وده مع احترامى الشديد لرأى حضرتك واعتزازى الاشد بتشريف حضرتك ليا ..جزاك الله كل خير وكل رمضان وحضرتكبألف صحه وسلام ولا اراكم الله مكروه فى عزيزا لديكم ..حضرتك ادخلت على قلبى السرور بزيارة حضرتك الكريمه ..جزاك الله كل خير وفى رعاية الله وامنه..بنتك محاسن..

mahasen saber يقول...

بنت الاسلام...
نورتينى يا حبيبتى قوى وكل تجربه بتضيف للانسان شئ نسأل الله انها تكون ضافتلى كل خير ويا رب ربنا يكرمنا جميعا ويحقق لنا امانينا فى الايام المباركه الجميله دى اما بالنسبه لعبد الرحمن انا مخدوش الا فى الظروف القصوى يعنى هسيبه مع مين بس من يومها بعمل حسابى بمراحل هو ناقص ..الف شكر على زيارتك وتشريفك وكل رمضان وانتى بالف خير..فى رعاية الله وامنه.

mahasen saber يقول...

محمد الشيمى...
احنا فى ايام مباركه والناس هتتسابق على ختم القرأن الكريم يا رب الناس تتدبر فى اياته وتعمل بيها ...جزاك الله كل خير على زيارتك للمدونه وان شاء الله هزور مدونت حضرتك ..وكل رمضان وانتا بالف خير ..نورتنى جدا فى رعاية الله وامنه..

mahasen saber يقول...

الاخ المحامى...
زيارتك بتشرفنى جدا وانا بحترم رغبتك فى تعليقك باى شخصيه بس انا يشرفنى جدا جدا انى ازور مدونتك واطلع على ما فيها ..شاكره اهتمامك ونورتنى جدا جدا ..وكل رمضان وانتا بالف خير ..فى رعاية الله وامنه.

mahasen saber يقول...

dodda...
كلامك جميل ربنا يكرمك ويا رب ربنا يحتسبنا عنده من المظلومين ويكرمنا بكرمه دنيا واخره اللهم امين ..نورتى المدونه واسعدتينى جدا وشاكره ليكى يا دعاء كلامك الطيب الجميل ده وكل رمضان وانتى بالف صحه وسلام ..فى رعاية الله وامنه..وعارفه ساعات بزهق من المحاكم وتعبها واتعابها ومشاكلها واقول اتنازل وخلاص بس برجع ااقول انا بجاهد على حقى وحق ابنى اكيد ربنا هيجازينى خير ويحتسبلى ده عنده اللهم امين لا تنسينا بالدعاء ونورتينى قوى ..فى رعاية الله وامنه.

صاحب المضيفة يقول...

انتي أخدتي بالأسباب

وباقي بقى الدعاء والتوكل على الله في انه يرجع لك حقك من الطرف الاخر


قدامك فرصة كبيرة في زمضان .. هو داخل على الأبواب

ابتهلي فيه الى الله تعالى واطلبي منه العون والمدد

وثقي تماما انه هايجيب لك حقك كويس جدا


تحياتي الطيبات

رصيف نمره خمســــــه يقول...

ربنا معاكى بجد المحاكم دى تخنق وتجيب مصايب وفى الاخر 100 جنيه
هيقزز بيهم لب طول الشهر يعنى ولا ايه؟

ايمى

سلااااااااااام

mahasen saber يقول...

صاحب المضيفه..
الدعاء ده الشئ اليى مبيسبش قلبى مش لسانى كمان وبعدين مش دعا على حد ده دعاء ربنا يفرج كربى وكرب غيرى وربنا يهدىابو ابنى لانه مهما حصل ابو ابنى وكان زوجى وكان فيه بينا حب فمقدرش ومش قادره برضه ادعى عليه او اكرهه مع انه طلع عينى وروحى كمان الحمدلله على كل شئ ودعائى ليك ربنا كرمك ويجازيك خير عن كلامك الطيب ده وحضرتك نورت المدونه وشرفتها بعدين حضرتك صاحب المدونه..وده يشرفنى كل رمضان وحضرتك واسرتك بألف خير ..وشاكره للزياره الكريمه والتعليق الاجمل ..فى رعاية الله وامنه.

mahasen saber يقول...

رصيف نمره خمسه...
ده جوها مفعم بالعظه طول ما انتى قاعده تبصى يمين الحمدلله شمال الحمدلله قدامك وراكى حتى السقف طول ما انتى قاعه الحمدلله الحمدلله ربنا ما يكتب دخولها على اى حد ..بس تصدقى يا ايمى مينفعش الاستغناء عنها ده لو مش موجوده كانت الناس كلت بعض (شوفى كلمة حق فيها اهه)..بس بخصوص ال100 جندى امن مركزى مقولكيش بعمل بيهم ايه هما مبيلحقوش يتحطوا فى الشنطه..نورتينى يا ايمى وكل شهر رمضان وانتى بالف خير...فى رعاية الله وامنه.

الريم يقول...

ربنا معاكى فعلا

mahasen saber يقول...

كاشف الاوهام ....
لو سمحت متعلقش ولا تبعت اى كلمه عندى ارجوك انا مش ناقصه حرقة دم ..

الدفاع يقول...

ربنا معاكى نصيحتى ان الطريق المستقيم مفيش افضل منه
حددى هدفك واتحركى له ووالدك الله يرحمه كان عنده حق فى كلامه
ربنا يوفقك للخير دايما

mahasen saber يقول...

الريم...
نورتى المدونه وجزاكى الله كل خير على الدعاء وزرت مدونتك جميله وخفيفه على قلبى قوى قوى قوى ربنا يوفقك..

mahasen saber يقول...

الدفاع..
اهلا وسهلا بيك وكلامك فى محله بس ساعات الظروف تسحبك لطريق هيا عايزاك فيه ..بالاصح انا اريد وانتا تريد والله يفعل ما يريد فاحنا بين ايدين المولى عز وجل كما يشاء يفعل بنا واللهم لا اعتراض ...شرفت المدونه ونورتها وكل عام وانتابخير ..فى رعاية الله وامنه.

mahasen saber يقول...

استاذ اسامه الدفاع..
انا لسه داخله المدونه حضرتك الاخ ال... شرفتنى جدا جدا جدا وايوه كده عايزيين مدونات وتدوينات ربنا يكرمك ويوفقك ونورتنى وشرفتنى وكل رمضان وانتا بالف خيير ...فى رعاية الله وامنه.

القناطر الثانوية بنات يقول...

علي فكرة ... أنا معجب جدا بطريقتك في الحياة وطريقةمعايشتك للأزمة اللي انتي عايشاها..كل الأصدقاء قالوا كل الكلام اللي ممكن يتقال ...بس انتي قلتي كل حاجة مضايقاكي....ونسيتي تقولي إن الدنيا زي ما ضايقتك ...كمان أعطتك كنز ربنا يخليه ليكي(ابنك) بكرة حتعرفي إنه كان تعويض مناسب جدا وتقولي : خلاص ....رضيت يارب.
وبعدين فيه رجالة المفروض يتعاملوا زي ذكر العنكبوت ..بعد التلقيح الأنثي ...بتقتله ...هههه
اضحكي بقي ...بس من قلبك ....صدقيني الدنيا جميلة ..بس الأشرار والأغبياء هم اللي بيخلوا دمها تقيل شوية ...شكرا عي زيارتك لمدونتي المتواضعة..وعلي فكرة رائد ده اسمي مش شغلتي.

عصفور المدينة يقول...

أستاذة محاسن لحذف التعليق يوجد رمز سلة مهملات أسفل التاريخ

غير معرف يقول...

راحة البال اهم من النفقه
ليه تتعبي نفسك واعصابك وتضيع عمرك في محاكم
طبعا ده حقك واحنا منسيبش حقنا
بس لماالحق يكون بيبهدل صاحبه
يبقي التنازل عنه اكبر صح

وهتلاقي انك هتصرفي علي المحامين ما يذيد عن المائتان جنيه دي

المهم ان انتي معاكي كنز ومش واخده بالك
معاكي ابنك
ربنا يخليه ليكي
........
عجبتني مقولة عصفور المدينه
وبعدين طرائق المحامين دائما تنجح مع المتهرب من أداء الحق ولا تنجح في استجلاب الحق


علي فكره اكتر حد بيكسب في الموضوع ده
المحامين
مع الاعتزار للجميع

««((¯`·«•AhMed•3LaM»·´¯))»»

mahasen saber يقول...

رائد عبد السلام...
شرفت المدونه بتعليقك بس انا عارفه انه اسم انا كنت بهزر دعابه بريئه.اما ابنى فحضرتك مقريتش المدونه ولا ايه دا هوا الشئ الوحيد اليى محسسنى انى عايشه ده اوكسجين حياتى وربنا عمره ما بينزل بلاء الا معاه الصبر وابنى هو الصبر والرحمه والنسمه اليى ربنا رزقنى بيها فى عز اذميتى يعنى لو من غير ابنى كنت دفنت نفسى بالحيا الامومه دى احلى احلى واطهر شئ فى الدنيا ...شكرا على زيارتك الكريمه ونورتنى ولو بقه الجواز زي ذكر انثى وذكر العنكبوت تروح فين الموده والرحمه...كل رمضان وانتا بالف خير ..فى رعاية الله وامنه..

mahasen saber يقول...

عصفور المدينه..
استاذ محمد حضرتك عارف انا جديده فى عالم التدوين فأعذرلى جهلى دا انا من ساعت ما شفت التعليق ولفيت حوالين المدونه امسحه ازاى ده ..جهل بقه بعيد عنك بس الحمدلله انا كده استريحت ومن علمنى حرفا شوف بقه يا استاذ محمد مكانت حضرتك ايه..جزاك الله كل خير واحتسب السخافات اليى بتتبعت فى ميزان حسناتك وربنا يهدى ...نورت المدونه وشكرا لحضرتك على المعلومه الكريمه ..وكل رمضان وحضرتك والاسره الكريمه بألف خير ..فى رعاية الله وامنه..

mahasen saber يقول...

احمد علام..
الاخ الكريم احمد شاكره زيارتك وتعليقك جدا بس صدقنى انا محتسبه اليى بعمله انى بجاهد على حقى لان الساكت عن الحق شيطان اخرس ولما ابنى يكبر يعرف انى متخاذلتش عن حقه وطنشت وريحة دماغى اما موضوع النفقه وال200 جنيه بحمد ربنا ليل نهار على اهلى انا فضلت عايشه 2 انا وابنى وفى عز ما الطفل بيحتاج مصاريف واهتمام ورعايه ومكنش اتحكم ليا بولا مليم وباباه مبعتش فلوس الا 450 على 4 شهور فتخيل لو مش اهلى موجودين كنت عملت ايه ومكنتش بشتغل كمان وعمرهم ما حسسونى باى شئ بالعكس بابا الله يرحمه مكنش بيبوس ابنى الا من دماغه ورجله ويقلى الاحفاد والاطفال اجمل نعمه من ربنا فالنفقه مش فارقه معايا من اساسه وده لان اهلى بيساندونى ماديا ومعنويا انما ده حقى وحق ابنى وحق ربنا شرعه ازاى اسكت عليه يعنى هفضل ضعيفه لحد امتى ...ده للتوضيح ليس الا ...والحمد لله على كل حال ومنورنى جدا يا استاذ احمد وشرفت المدونه وصاحبتها ..وكل رمضان وحضرتك بالف خيير ...واسعدتنى جدا بالزياره والله.بس لو عند حضرتك مدونه يا ريت تبعتلنا اللنك عشان نزورها ..جزاك الله كل خير وفى رعاية الله وامنه...وعلى فكره المبلغ 450 جنيه على 3 شهور كل شهر 150 المحامى قالى ده بعتهم عشان يقدم مستند انه بيصرف فتضيع القضيه وفعلا لما ملقيش من الموضوع ده فايده ولا سلاح فى القضيه بعديها مبعتش ولا مليم ..فالفلوس والرزق ده بايد ربنا وللمره المليون لو رزق العبد على العبد كنا موتنا بعض من الجوع..

بنت سيناء.. يقول...

اللى شدنى لاسم المدونة..غريب عن جد..ابغض الحلال..اشعر ان طفح الكي بكى لدرجة انكى تسمين مدونتك بهذا الاسم...ربنا يخليلك ابنك..الحمدلله احنا عندنا الحكم فبلى..يعنى شيخ القبيلة بيحكم وفى الغالب دون الذهاب للمحاكم..لى قريبة ارادت ان تخلع زوجها اشترط عليها ان ترجع الذهب فرفضت وهى معها طفل..المهم فضلت فى المحاكم سنتين ودون فائدة..الان اخذت بكلام والدك..ان تترك حقها وترجع الذهب حتى هو يتزوج منة وهى تشوف طريقها..بينى وبينك دة الصح طالما هى التى ارادت ان تخلعة..وسبحان الله ..الله عوضها بوظيفة تصرف منها على ولدها..

حاسوباتيه يقول...

ربنا معاكي ويوفقك للي فيه الخير ليكي ولابنك صحيح انا ماعرفش ايه وجه الخلاف بس ربنا معاكي يارب

mahasen saber يقول...

بنت سيناء...
اى طريق غير طريق المحكمه افضل بكتيير بس لليى يمشى ويقتنع بالطريق ده يعنى قريبتك كان قدامها حلى ودى وهيا حاسة انه ظالم ليها يعنى رفضت الحل الودى ولجات للمحاكم..مع انى شايفه ان الحكم القبلى افضلها .ربنا يكرمها ويكرمنا انتى نورتى المدونه وشرفتينىوشكرا على تعليقك والزياره الكريمه .وكل رمضان ولنتى بالف خير ..فى رعاية الله وامنه..

mahasen saber يقول...

حاسوباتيه...
اهلا بيكى نورتى المدونه وكل رمضان وانتى بالف خير وربنا يقبل الدعاء ان شاء الله ..وانا هزورك دلوقتى عشان اعرف الحاسوباتيهفيها ايه شاكره الزياره الكريمه الف الف شكر..فى رعاية الله وامنه.

Unknown يقول...

وانت بألف خير ورمضان كريم علينا وعليكي
بجد شكرا لإهتمامك بمدونتي
شاكر لك ترددك عليها ويارب يكون بشكل مستمر
كل ودي ومنتظرك دايما ومنتظر جديدك..
ياترى هتشاركينا في الحملة الي على مدونة أوراق وأسرار
هتلاقي اللينك في البروفايل بتاعي
كل ودي

غير معرف يقول...

أقترح إنشاء منظمة حقوق المطلقات على غرار منظمة حقوق الإنسان ، على أن مقرها أمريكا ، ساعتها بس هتقدري تاخدي حقك وزيادة ، ويمكن أمريكا تستخدم القوة العسكرية لأخذ حقوقكم ، وسلااااام كبير للقضاء المصري اللي يعني الحكومة اللي تعني الفساد اللي يعني مصر ورقصني يا جدع على واحدة ونص

Zanooba (Zeinab sab9n) يقول...

إزيك يا محاسن عاملة إيه ؟ ليكي عندي تاج تعالي و خديه :)
سلام

قررت أكون عانس يقول...

شر البلية مايضحك ...

mahasen saber يقول...

محمد رمضان...
اهلا بيك وباقتراحاتك واليى تقول عليه يمشى بس كويس قوى بعد كل النكد اليى شوفته فى المدونه وليك نفس ترقص ولا دى اليى بيقولوا عليها رقصة سالومى الاخيره ..نورت المدونه وشكرا على تعليقك المفرح الراقص ده..ولو عندك مدونه رجاء ابعتلى النك عشان نرد الزياره..كل سنه وانتا بالف خير فى رعاية الله وامنه.

mahasen saber يقول...

zanooba (zainab sab9n)...
الله يسامحك هو انا عملتلك حاجه ..تاج واسئله وتقليب فى الذاكره يعنى تقليب فى المواجع ماشى يا زوزه مع انى مش من هوات التاجات بس عشان خاطرك انتى بس وعشان خاطر فضولك يا قمر هو انا ااقدر ااقول لا لزينب..

mahasen saber يقول...

قررت اكون عانس..
كويس ان لسه فيه حاجه بتضحك دلوقتى ..كل رمضان وانتى وصحبتك بخير ..فى رعاية الله وامنه..

Desert cat يقول...

اعتقد ان لو المحامى بتاعك مخضرم يقدر يجيب اثباتات بثروة طليقك الحقيقية ويقدمها كحافظة مستندات بس المشكلة ان لو عنده املاك مثلا مكتوبة باسم والدته او حد من اخواته
فى الحالة التانية دى بقى يبقى ربنا معاكى ومع ابنك
تحياتى ليكى يا جميل

حياة تستحق الانقاذ يقول...

ربنا يهون عليكي ..ابحثي عن الامل ونصف الكأس الممتلئ حتى في الآمك ومتاعبك فعلى الاقل انتي تعلمتي اشياء كثيرة
وميرسي للمرور ويسعدني ان مدونتي اعجبتك :)

أم المييس

عاشــــــ النقاب ـقــــة"نونو" يقول...

السلام عليكم
بصي الموضوع فعلا محتاج منك وقفة مع نفسك
انتي حاولتي تاخدي حقوقك منه وما دام وصلت للمحاكم يعني الودي ما جابش نتيجة
دلوقتي يا اما تتكفلي بابنك وتتوكلي على الله وتحاولي في طريق المحاكم الطويل دة
وقصاد كدة هتنسي نفسك كست
او انك تتكفلي برضه بابنك وتصرفي عليه من اي طريق شرعي بعيدا عن ابوه
وتكوني برضه ام
او انك تنتظري العدل شرطا يتقبل وجود ابنك معاكي
وربنا يكرمك يارب ويروق بالك وحالك
ويعوضك في ابنك خير
لازم تحسمي الامر لان العمر بيعدي
وما تسيبيش نفسك بدعوى انا وراه والزمن طويل
تحياتي

mostafa rayan يقول...

ربنا يعينك وان كنت مع والدك رحمه الله المحاكم سكة بهدلة واللي ماشي فيها هيتوه
شوفي لو ممكن تتحل القضية بالتفاهم او حد كبير هو بيسمع كلامه ويرضى حكمه لأن المحاكم بجد بهدله
سؤال : هو مش محكمة الأسرة بردة وظيفتها تعجيل الحكم في مثل هذه الظروف طيب ايه المشكلة عندك
مرة اخرى ربنا يعينك

mahasen saber يقول...

desert cat...
والله يا قطه انا مش عارفه اعمل ايه انونو على حالى ولا اصوصو المشكله البشعه انه عنده فلو ادانى حقى او اضعف الامور صرف على ابنه لن ينقص من ماله مثقال شعره ..بس تقولى ايه الحمدلله اكيد ربنا هيفرجها بشكل او باخر خدت حقى او محدوش المهم انى بجاهد عليه يعنى مبقاش ملطشه فى الجواز ومتمرمطه فى الطلاق ربنا مخلقنيش ضعيفه فانا والقانون لما اشوف الطريق ده بيوصل لايه...وكل رمضان وانتى طيبه يا قمر القطط كلها ااقول ناوو ولا مع السلامه..

mahasen saber يقول...

مجموعة حياه...
الامل موجود طول ما الواحد فيه نبض وعايش امال الحياه تبقى حياه ازاى جرب تاكل حلو علطول هتزهق بجانب انك هتعيا وجرب تاكل طرشى علطول هتزهق وهتعيا هيجيلك املاح ...فانا بقيسها كده طول ما الانسان عايش وعنده شرف الحياه يبقى لازم يدوق من كل الوان والاعيب ومتاعب وجمال الحياه الحمدلله على كل شئ اكيد انا احسن من ناس كتيييير ...نورت المدونه..وكل رمضان وانتم بالف خيير فى رعاية الله وامنه..

mahasen saber يقول...

عاشقة النقاب نونو...
اختى الكريمه المسأله مش مسألة فلوس وماده المساله مسالة حق وانى مش عايزه ابقى ضعيفه واتهاون عن حقى وحق ابنى فى سبيل ابعدى عن المشاكل او ارمى وراكى وخدى ورقة طلاقك واتجوزى تانى لا المساله اطكبر من كده بكتير انا مبسوطه انى بحارب وبجاهد على حقى وحق ابنى يعنى مش ضعيفه انا اكتفيت ضعف واستكانه وبهدله فالحمدلله لانى متاكده انى بأاجر خير لانى مش بطلب ولا بدافع غير على حقنا انا وابنى ارجو انى اكون عرفت اوصل وجهت نظرى ...وشاكره لمرورك الكريم وكل رمضان وانتى بالف خير.بغض النظر عن وجهة نظرى فى النقاب انه تفضل بس الخلاف فى الراى لا يفسد اننا فى الاخر من دين واحد وبشر فيبقى لا يفسد للود الانسانى قضيه ان شاء الله ...ودخلت مدونتك جميله وربنا يرزقكم بالشقه المناسبه ان شاء الله مع انه الايام دى بقت حلم صعب المنال ..نورتينى كمان مره فى رعاية الله وامنه..

mahasen saber يقول...

mostafa rayan..
اخى الكريم هو لو انا لقيت طريقة تفاهم غير المحاكم وسكتها والقانون ودهاليزه كنت هسيبها ...اما وظيفة محكمة الاسره الرئسيه فهى انها تقعد الست جنبها لحد ما تعجز او تريحهم وتموت يعنى وظيفتها انها بروتينها تحب تشوف الستات بتتعزب...كل رمضان وانتا بالف خير وشاكره لمرورك الكريم..فىرعاية الله وامنه..

شهرزاد يقول...

ربنا معاك
ولا يضيع حق وراؤه مطالب

ربنا على الظالم

ربنا معاك ويحميكي

مدونتك رائعة فعلا

شكرا لزيارتك

تحياتي واحترامي
وامنياتي بالتوفيق والسعادة

عالم ماريونت يقول...

بصي يا محاسن:
مش عارفة اقولك اية بجد
انتي فكرتيني بفيلم اريد حلا
طبعا الواحد مفيش في ايدة غير انه يدعيلك
ربنا معاكي ويوفقك ويوصلك لغرضك لو كان خير ليكي
تحياتي

مطلق يقول...

انا مطلق و بدفع 100+100في الشهر و برده الهانم مش عاجبها رغم ان القانون بيقول كده زي برده مبيقول اني اتحرم من بنتي طول الاسبوع و اشوفها ساعتين بس و يرتها بتيجي
من الاخر العين بالعين

mahasen saber يقول...

kareem...
انا حزينه لحالك وبتمنا ان ربنا يصلح حالك ويجمعكوا ببعض تانى لو فيكوا لسه خير لبعض والمسأله مش مسألة عين بعين ولا حاجه قد ما مسألة حق كل واحدياخد حقه بما يرضى الله وبعدين مش معنى ان احنا فشلنا كزوجين ان نفشل كبنئدمين بيتعاملو مع بعض وبينهم ابناء...المساله مش كده يا اخ كريم ...شاكره مرورك الكريم على مدونتى وسبتلك تعليق عن موضوع مشابه فى مدونتك ربنا يكرمك ويصلح لك حالك ورمضان القادم يكون فيه احداث ساره ان شاء الله..

غير معرف يقول...

راجل عايز الحرق

والقضاء عندنا هيحكملك قريب اوى قبل اما تطلعى على المعاش بسنة ماتخافيش قربنا خلاص

هااقولك اية ربنا يصبرك على مابلاكى
وربنا قادر ينتقملك فى ثانية

mahasen saber يقول...

بنوته مصريه...
الله يطمنك ... قبل المعاش بسنه
لا دى اسمها سرعة الفانتو ثانيه...
الحمدلله على كل حال ..
بس هوا والله مش عايز الحرق اصلها جات فى قلبى يا جميله الكلمه دى هو بس نقول ربنا يهديه لانه ابو ابنى فى كل الاحوال..
الف شكر على اهتمامك ورقتك وزيارتكالجميله يا قمر..
منورانى دايما..

haninalnada يقول...

ربنا معاكي يا حبيبتي ويرجع لك حقك
عموما مافيش حد خالي من المشاكل صدقيني
كا الناس بتحارب في الحياة
ومش هيرتاحوا غير في الاخرة
ربنا معاكي ا قمر ويحميكي انتي وابنك من الدنيا دي
وسلامي ليكي

mahasen saber يقول...

haninalshaera...
انا مش عارفه اشكرك ازاى على ذوقك ورقتك وكلامك الجميل ده...
جزاكى الله كل خير وهيا فعلا الدنيا دار تعب ومشقه بس يا رب يبقا الجزاء
الجنه فى الاخر....
بتنورينى بالزياره وبذوقك وبعمك بكلامك الجميل ده...
ربنا يكرمك والف شكر على ذوقك يا حنين..
اسيبك فى رعاية الله وامنه...
والف شكر على ذوقك ودعمك كمان مره...