الأربعاء، 6 أغسطس 2008

فلسفة الضرب والطرح والقسمه والنصيب

(الضرب) مش ضرب الارقام فى بعض والعياذ بالله انما ضرب البنئدمين ومش البنئدمين كلهم طبعا لانهم فئات ومستقل يعنى راجل لا يمكن ضربه الا من راجل زيه وست يمكن ضربها من اى حد حتى لو ام تضرب من ابنها بالجزمه والمنظر ده شوفته قدام عينى اليى اتمنيت ياكلها الدود ومشفش المنظر المؤلم ده ..وضرب الست فى قاموس سلوك الرجاله شئ عادى جدا جدا جدا وطبيعى خالص مالص بل انه حق مكتسب فتلاقى كل ما تناقشى راجل فى مسالة الضرب يقولك (واضربوهن واضربوهن ) ويطنش عامدا متعمدا بمزاجه الرجولى الشخصى النابع من منطلق فرض العضلات والقوه والسيطره ينسى واهجروهن وعظوهن وينسى بسبق الاصرار ومش بفعل الزهايمر ان الرسول الكريم اليى هوا اسوة كل مسلم لم يضرب امراه قط وانه ارشد اذا لزم الامر مع المراه اليى مبتفهمش (اه فيه ستات والله ما بتفهمش ولو فهمت كانت عرفت ان اليى بتعمله غلط)والستات اليى باءت محاولات ازواجهم معاها بالفشل وهنا فيه مساله انا نفسى وانا بكتب البوست ده داست على كرامتى ووجعتلى قلبى ومفاصلى هوا لو انا مختلفه مع جوزى ومش عارفه اوصل معاه لاتفاق على شئ ما ممكن نتخاصم انا وهوا او نهجر بعض اكلينيكيا وعمليا انما يضربنى ليه هوا زايد عنى ايه هوا راجل وانا ست هوا بيحط البذره وانا بشيلها دا انا وانا وانا ويكفى انى انا ام يعنى ام كل البشر وام الانبياء كلهم وبنتهم وزوجاتهم وبنات عمهم فيه ايه دا انا ست حوا ام البشريه يتقال اتضرب ...ارجع اطس نفسى بشوية ميه من الحنفيه واقولى يا حماره بودان كبيره ربنا قال كده امر الهى لا انتى ولاا كل الستات اليى شايله همهم من اول حوا للست اليى لسه متخلقتش تقدروا تقولوا بم ولو قولتوا تبقوا مبتفهموش ولو فهمتوا مكنتوش فكرتوا تقولوا كده (استغفر الله العظيم يا رب)ربنا اليى خلقنا قال نتضرب بس مش ضرب مبرح..بالسواك زى ما الرسوت الكريم ترجمه ده بخلاف ان الرسول الكريم قال لا يضرب الا شراركم ..يبقى ربنا قال نتضرب ليه؟هوا بقه اليى خالقنا فهوا عزوجل ادرى بينا فمش هتكلم فى نقطه زى دى تانى عشان مش هقدر اجادل فيها انا لو ربنا امرنى ارمى نفسى من الامبايرستات هرمى ده ربنا وانا من الناس اليى عندها ايمان مطلق بكل ما نزل فى الكتاب والسنه....فمش هتكلم فى الجزئيه دى خالص من منظور الدين...انما ارجع للموضوع الرئيسى التعيسى والهدف من البوست ده ان انتا ايها الرجل المترجل المسترجل المستقوى على الست ربنا قال فاضربوهن الرسول ترجم بالسواك وامر صراحتا وبكل وضوح للى مش بيشوف واعمى بصيره ضرب لا يكسر عظما ولا يحدث عاهه انما الرجاله يا سلام يمسك مراته ولاا اخته ولاا امه او بنته كانه فى حلقة ملاكمه ولاا حلقة سمك وهاتك يا طحن فى الدره اليى قدامه فتخرج الست( وعن تجربه) مكبله بأثار الهزيمه الجسدىه من جروح وصدمات ولكمات وزرقان ده بخلاف اللون الاحمر اليى بيلون وشها نزولا وسياحا على جسمها ناهيك عن الهزيمه النفسيه والنظره الدونيه لذاتها المتمرمغه فى الوحل لدرجة انها متقدرش تبص فى المرايه (عن تجربه برضه)...فبنائا ....على كل ده وحفظا لان كلام ربنا مش بيتطبق صح ولاا افعال الرسول بتترجم زى ما امر انادى من بوستى هذا بعمل رقم خدمه مجانى نجده فى اقسام الشرطه زى 911 زى امريكا وزى ليه احنا المفروض نخاف على حريمنا اكتر منهم واى واحده تلاقلى جوزها اتحول لغول وهينقض عليها وهيا مش قادره تتحول زينه وتدافع عن نفسها تتصل بالرقم ده وده لو امهلها القدر لذلك...والمطلوب طبعا من الرقم ده انه يرد ومش يدى مشغول ومش يطنش ويقول ستات قلالات الادب مش عايزين رجالتهم تضربهم سيبهم يا عم يتربوا...والاهم بعد الرقم والرد والمجيئ الفعال لنجدة الست ان سعادة الغول ياخد جزائه يعنى يتحط فى القفص ويتحبس كده قيمة اسبوع ولاا شهر يعمله بقه مرضى فى الشغل ولاا عرضه واعتيادى او اجازة ضرب زوجه المهم يعرف ويتعلم انه متجوز كائن بشرى جسمه ومشاعره حرمه مش مباح ليه انتهاكها وملرمطتها واذيتها وكل ما ابقا مدايق افرغ فيها شحنة غضبى....من اقوال محرر المرأه والمدافع الابدى عن حقوقها الرسول الكريم..
(اكمل المؤمنين ايمانا احسنهم خلقا وخياركم خياركم لنسائهم)
(وعن معاويه بن حيده رضى الله عنه قال:يا رسول الله ما حق زوجة احدنا عليه؟قال:(ان تطعمها اذا طعمت وتكسوها اذا اكتسيت ولا تضرب الوجه ولا تقبح ولا تهجر الا فى البيت)
الرساله تكون ووصيته الشهيره فى حجة الوداع واليى كل الرجاله حفظاها صم ..وبكم..(ألا استوصوا بالنساء خيرا)..وتمت يا رب صلت

هناك 16 تعليقًا:

الطائر الحزين يقول...

صدق رسول الله
انها شريعة الغاب

اللهم اجعلنا باهلنا بارين حتى يبرنا ابناءنا

mahasen saber يقول...

اللهم امين ..الطائر الحزين انا سعيده بأنك استريحة من الطيران شويه فى مدونتى ..حصلى الشرف والسعاده ..وصدقت بقة شريعة الغاب واغلب الرجاله مش كلهم طبعا نسيوا انا اساس الجواز موده ورحمه وان المولى عز وجل قال فى كتابه الكريم (لتسكنوا اليها )صدق الله العظيم .يعنى علاقه اساسها قائم على الامان والسكينه مش العنف ..جزاك الله خير على تعليقك الكريم واسمحلى اخلص الكومنت واسعد نفسى بدخول مدونتك ..الف شكر كمان مره وجزاك الله كل خير..فى رعاية الله وامنه.

الـجـدة فـصـيـحـة يقول...

السلام عليكم ورحمة الله وبركاته

متفقة معكِ في كل كلمة قلتيها
ولكن صدقيني هناك رجال بمعنى الكلمة لغويا ومعنوي في حياتنا
ولكن كثرة السلبيات غطت على الإيجابيات الموجودة

وطبعا لو في اتباع لسنة الرسول صلى الله عليه وسلم ما كان كل هذا يحدث فهو مبعوث رحمة للعالمين اما من يقمون بتعذيب للنساء باسم الدين فلم يقدر لهم فهم الدين ولو من بعيد


وشكرًا جزيلا على سرعة استجابتك وتكبير الخط
وتقدري ترجعيه كما كان
جزاكِ الله كل خير

دمتِ في رعاية الله

الباحث عن الحقيقة يقول...

بخصوص الضرب
الاية قالت وعظوهن
يعني اذا خالفن امرا شرعيا شرعه الله ورسوله فعليهم بوعظهن بكتاب الله وسنة رسوله
ولم تحددوقت لانتهاء هذه الموعظة
لذلك قال بعض العلماء ان الموعظة تكون دايما مستمره
بحيث لا يلجأ للضرب مطلقا
اما الضرب في الايه فهو اذا خالفت المرأة كتاب الله وسنة رسوله ولم ترجع إليهما ..فهنا الضرب عقوبة تعزيرية لمخالفتها كتاب الله وسنة رسوله فوض الله الزوج في القيام بها
وله شروط وضوابط

واخيرا انا عندي استفسار هي المدونة بعنوان عايزه اتطلق و
هو حضرتك مطلقه ولا مش مطلقه
وايه حكاية الواو دي
:)

mahasen saber يقول...

جدتى فصيحه..مشرفانى كالعاده وبدون مبالغه والله بتعليقاتك الكريمه وفعلا زى ما حضرتك قولتى فيه رجاله كتير محترمه وهنروح بعيد ليه انا معظم صحباتى ازواجهم كويسين جدا معاهم وربنا يحفظهم ويباركلهم فى بعض ويديم اخلاقهم المحترمه دى عليهم نعمه واخويا عمره ما شفته بيعامل مراته وحش ووالدى رحمه الله كانت اخلاقه وتصرفاته قدوه من الرسول الكريم انا متاكده ان زى ما فيه وحش فيه حلو عشان كده اتخلق النقيض ...بس برضه بقابل نماذج تقشعر لها الابدان ده لسه فيه بوستات هوضح فيها حاجات غريبه ولو الواحد ماااحتكش بالناس ومشاكلها مكنش هيعرفها...شكرا لتشريف حضرتك الكريم وتسلملى خطوة صباعك على الكيبورد اليى بتوصل حضرتك لهنا..جزاك الله كل خير وفى رعاية الله وامنه.

mahasen saber يقول...

اخى الباحث..الله ينور عليك ويكرمك انا كنت مستنيه التعليق ده منك لانه فادنى جدا واكيد هيضيف للى هيقراه..ومبسوطه ان ثقافتك الدينيه حلت عندى هنا نورتونى انتوا الاتنين تعلق فعلا فعلا مفيد جدا جدا..جزاك الله عنه كل خير..اما مطلقه ولاا لا فدى حكايه طوييييله هقولها للمره ال105 بس عشان خاطر عيون الصحيفه الكاشفه انا مطلقه شرعى يعنى 3 طلقات باتنات زى ما اتقال فى لجنة الفتوى اما ابو ابنى بيقولى انا مطلقك اه عايزه تاخدى ورقة الطلاق اتنازلى عن كل حقوقك وحقوق الولد يعنى السيناريو المعتاد عايزه دى هاتى دى ..بس انا خدتها مسالة مبدا قولت انا هفضل ضعيفه وملطشه كده علطول ابدا ابدا حقى ولو هاخده تراب اشرفلى من الاستكانه وده عشان انا متاكده انى كمان مظلمتوش بستصدق انا لازم اكتب الموضوع ده فى بوست اولا للتوضيح .ثانيا على الامساك بأكراه ده اليى بقه موضه..اما و دى بقه فحكايه يعنى عايزه اتطلق ومش عيب ولا حرام .عايزه اتطلق وحقى..عايزه اتطلق وماله ..عايزه اتطلق وبختى ..عايزه اتطلق ومش عايزه نظرات ريبه ...يعنى و دى متعدش بقه ..اما حضرتك دى كبيره عليا قوى يعنى انا اختك والصغيلره كمان ده كلها يادوب 17 سنه فرق بينى وبينك ..بلاش حضرتك دى مش بتكبرنى بس طالما مش فى محلها يعنى لا سنى يستاهلها ولامكانتى فملهاش لازمه ..نورتنى وشرفتنى جدا جدا جدا جزاك الله كل خير وفى رعاية الله وامنه .

الباحث عن الحقيقة يقول...

بس الوضع ده غلط
لانك شرعيا مطلقا
لكن رسيميا واوراق ..لسه
لو عندك ما يثبت لجؤك انتي وهو سوا للجنة الفتوى وقالت انها كده بينونه كبرى
يبقى ترفعي دعوى اثبات طلاق بائن بينونة كبرى
وبعدين ترفعى دعوى تعويض عن الفترة اللى امتنع فيها عن ايقاع الطلاق بشكل رسمي
علشان تاخدى فرصتك يا محاسن
وربنا يخلي عبد الرحمن

mahasen saber يقول...

اخى الباحث عن الحقيقه ..انا غلبت فى القانون ومتاهاته ولجنة الفتوى قالو منقدرش نديكى شهاده تثبت وقوع الطلاق الا لو هوا طلب وهوا كان موجود ورفض يعمل الشهاده دى ناهيك انه قال لموظف المحكمه لو عملتها اثبات طلاق هنكر فبس انا واخداها مسألة حق وقضيه وهدف ومبدأ ومحتسبه اليى انا فيه كله عند ربنا بعدين فيه احسن من كده كل يوم فى بلاء اكيد ربنا هيعوضلى ده كله خير علىالاقل حتى فى ابنى وبرضه انا احسن من ناس تانيه كتير انا فى السئ اكيد فيه الاسوأ وشكرا جزيلا على النصيحه الاخويه دى اهه ده علما نافع ينتفع بع\ه ربنا يصلح حالك ان شاء الله بس ايه رايك فى موضوع رقم النجده ده شايفه صح ولا الجلاله خدتنى..الف شكلر كمان مره..فى رعاية الله..

غير معرف يقول...

بالصدفه دخلت هنا والظاهر انه متاخر
بخصوص الضرب
سواك ايه الي هتضربو بيه
ما هو بردو مش ضرب مبرح ولا سواك
طب ما نجيب قشايه نضرب بيها بقي

وطبعا منجبش شومه

1:الوعظ
2:الهجر
3:الضرب
والضرب في الاخر لانه بيكون في اسؤ الحالات
بمعني ان الضرب بيكون مش هين لدرجة القشايه او السواك

يعني مش هنجيب ضرر الهجر زي ضرر ضرب السواك


««((¯`·«•AhMed•3LaM»·´¯))»»

mahasen saber يقول...

غير معروف..
نورتنى بالزياره وهيا لا متأخره ولاا حاجه بس معلشى اعذرلى فهمى البطئ او المنعدم ...حضرتك مش عاجبك ضرب السواك مش الرسول الكريم اليى قال كده .بعدين هوا المغزى مش ان انتا تـألم جسديا قد ما هو عقاب نفسى والله اعلم بس مش عاجبك السواك ينفع صاروخ وتوجهه عليها نتيجته اكيد اسرع...على العموم اهلا وسهلا ونورتنا حتى لو فيه اختلاف فى الرأى مهو لا يفسد للمدونه قضيه..فى رعاية الله وامنه.

طوبه فضه وطوبه دهب يقول...

بجد ربنا يصبرك على اللى شفتيه الموضوع ده فعلا معقدنى وخايفه ارتبط باى حد بسببه انا اضعف من انى انجرح بكلمه فمش قادره اتخيل ان حد مهما كان وخاصه لما يكون جوزى وعشره عمرى وابو اولادى يمد ايده عليا اويتطاول عليا حتى بالكلام ما تعرفيش انا كل ما اخش فى موضوع ازاى ارجع جرى وممكن اقفله بسب الخوف من الشعور ده ربنا يجعله فى مزان حسناتك وتاخدى حقك وتربى ابنك بالطريقه اللى ترضى ربنا وترضيكى واعتبريه هديه ربنا ليكى عشان تعوضك وهو ده اكبر حق اخدتيه من ابوه

mahasen saber يقول...

طوبه دهب وطوبه فضه...
اسعدتينى بالزياره الجميله قوى قوى بس ااقولك اليى بيخاف من العفريت بيطلعله يعنى لو فضلتى خايفه من موضوع الضرب ده ممكن يقلب غلط مستقبلا بعلاقتك بجوزك ويستشعر خوفك وقلقك فممكن تبقى نقطة ضعف مش فى صالحك ده لو لا قدر الله والزوج طلع بشع..ده جانب الجانب التانى ان الانسان لازم يامل خير دايما من المولى عز وجل فبالتالى ربنا ان شاء الله هيرزقه بالخير..انا حاسه بيكى وباحساسك جدا وعارفه الحاله دى جاتلى بس مع اختى جتلى شبه فوبيا ان يحصلها اليى حصلى وكل يوم بقول يا رب اسعدها هيا وكل ستات الارض ...ربنا يسعدك ويرزقك بزوج يحذو حذو الرسول الكريم فى تعامله معاكى...رجاء امسحى مخاوفك باستيكه عشان تقدرى تختارى صح وتعيشى التجربه صح ان شاء الله...شرفتينى واسعدتينى جدا ويسعدنى انى اكسب صديقه جديده وكل رمضان وانتى بالف خير وربنا يطمن قلبك يا حبيبتى ان شاء الله..

بلوجاتي يقول...

طبعا دي وجهة نظر نسائية بحتة

الراجل اللي بيضرب كتبر و مراته مش نافع معاها الضرب يطلقها كارم له

لكن فيه ستات مستفزة و لا تطيع زوجها و تتحداه
و مقاوحة الزوج و هو في غضبه بتكون نتيجتها الضرب !
و الراجل مش مستقصد الست لكن لو راجلين شدوا مع بعض هيضربوا بعض برضه - دة الراجل العصبي -

ثم الرسول فعلا لم يضرب أمرأة قط - لكن أزواجه اتفقوا عليه و ربنا نزل آيات تدافع عنه ! و لما الأيات نزلتت - اتعدلوا !
انما احنا دلو قت لو العظة و الهجر و الكلام بالحسنى مجابوش نتيجة - نطلق و نسيب العيال ؟ و لا نجرب الضرب جايز ينفع ؟

تحياتي

mahasen saber يقول...

بلوجاتى.......

ضرب ايه اليى ينفع... تحب لو اختلفت فى الرأى مع حد انه يقوم يعملك لحمه مفرومه
ازاى الضرب ينفع يعنى

لا يضرب الا شراركم..صدق رسول الله صلى الله عليه وسلم

Unknown يقول...

لا وتعرفي ايه اللي بضحك بالموضوع
بيعملوا كل هاد واكتر
وبسألوا ... يا رب انت ما بتنصرناش ليه عالأمريكان واليهود ؟؟؟

مهو اللي بظلم في حد هيجي ربنا سبحانه هيوكله بظلمه

بتعرف يا عربي
إزا بتظلم غيرك .. غيرك بيظلمك ..

انا بموت بالبلاد العربية وبعشقها كلها
لكن كلمة حق تنقال من حرمة
واسمعوها

ربي بعتهم ليذلوكم متل ما بتذلوا وبتظلموا بغيركم

تحياتي يا عرب

mahasen saber يقول...

rawan ....

رسمتى البسمه على قلبى ربنا يسعدك ..
كلامك صح يكون لسه مطلع طاقته المريضه فى زوجته بالضرب المبرح والأهانه وبعدين يرفع ايده ويقول يا رب .....
ومش بعيد لو فتحتى معاه موضوع يكلمك عن الرحمه واللين والخلق الحسن

للاسف اغلب الرجال الشرقيين بيعانوا من شيزوفرنيا الاخلاق وازدواج المعايير
خالص مودتى يا عزيزتى وشاكره ليكى شوية السعاده الليى ادخلتيها على قلبى بتعليقك الجميل