الخميس، 20 نوفمبر 2008

,وكمان الحاجه روز وبنتها علياء بيجيبوا فى سيرتى

كتبت..علياء ابو شهبه
يا جماعه يظهر ان اول بطوله سينمائيه فى انتظارى خلاص وانى هتعمى قريب من كاميرات التصوير .....طبعا بهزر بس المدونه شكلها بتعيش حالة اهتمام اعلامى وشهره فى الاجواء المحيطه وده شئ طبعا يسعد ويفرح ان الصوت اليى اتنبح ده اخيرا اتسمع .....موضوع البديل مفيش لسه اجوائه هديت الا وتانى يوم لقيت اتصال من صحفيه رائعه وانسانه خلوقه جدا استاذه علياء ابو شهبه وطلبت منى انها تعمل موضوع عن المدونه وطبعا انا سمعت اسم روزاليوسف علطول جالى حول ...يعنى دى روزاليوسف اليى كنت مضيعه عليها فلوسى فى ثانوى وجامعه هيكتبوا عن مدونتى لا لا لا
ده شئ يفرح طبعا
شفتوا الكلام بيفرح ازاى يعنى اهه كلام ممكن واحد يقراه وعشره لا وممكن واحد يحسه ومليون لا وممكن يتقال فيك او فى غيرك بس فى الاخر الكلام اكيد اكيد بيفرح وبيمثل دافع ما سواء ليك او لغيرك
وفعلا الكلمه الطيبه صدقه
وابطل رغى واسيبكوا مع الموضوع .....
وانا هكتب الموضوع لو مش باين للقرايه ......واستاذه علياء ذاكره ومنوهه عن تعديلات قوانيين الاسره اليى انا عملاها وانا هكتبها بوست او تحديث لانى احب تشاركونى رايكوا فيها ستات ورجاله واههى حاجه للمستقبل يمكن تنفعنى فى قبرى قدام

وربنا ييسر الخير
على فكره يا جماعه اليى عايز يقرا الموضوع يضغط على الصوره ويكبرها ويقراه والمعلومه دى من دكتور محمد اليى يا عينى هيعتزل الطب ويحول معهد صحى من عمايلى وهو صاحب مدونة رادار على الوردبريس وكل ما اسأله فى حاجه يقولى ماله الوردبريس ...فعلا السؤال لغير الله مذله...
//اه يا جماعه محمد بيقولى انه مش دكتور وبيعترض وبشده انى الصق اللقب ده بيه وبيقول ان زمايله لو دخلوا البلوج هيشرحوهزى الضفادع اليى مش عتقينها عشان يطلعوا منها مفتاح الجنه
طب بذمتكوا مش اليى فى صيدله بنقولوا يا دكتور ولا بنقولوا يا باشمهندس ولا يا اسطا على اساس انه بيصنع دوا تركيب يعنى ساعات
وبعدين دى جزاتى اديك لقب اكراما للتسعه وتسعين ولاا التمانيه وتسعين اليى جبتهم فى ثانويه عامه ...انا غلطانه وفكرنى المره الجايه احط لقب ..اليى مش دكتور...
دايما عاملى استبحس فى مزاجى اللغوى..


هناك 122 تعليقًا:

رئيس جمهوريه نفسى يقول...

الاول من نفسى عند ام بيرو

رئيس جمهوريه نفسى يقول...

الف مبروك يا ام بيرو علي الشهرة العريضة دى ورغم تحفظى على روز وبنتها وسمعتها الوحشة حاليا في الدفاع عن الحكومة غير ايام ثانوي بتعتك ايام ما كان رئيس التحرير بتعها عادل حمودة
وحيث انى الشهر بتطرق ابوابك بقوة فا انا وافقت انى اكون مدير اعمالك وعلشان خاطر العيش والملح حتواضع فى الاتعاب وحاخده بالدولا بدل اليورو
loooooooooooooooooooooooooool
قبلأتى لبيرو

أمل حمدي يقول...

الحمد لله يا ام عبد الرحمن

ربنا يوقفلك ولاد الحلال يارب

ان شاء الله هايوصل صوتك وربنا هايجيبلك حقك

سلام

mohamed ghalia يقول...

دا الموضوع كبر قوى
أنا خايف بس الشهره تخدك مننا ههههههه
ربنا يسعدك دايما سلميلى على عبدالرحمن
تحياتى يا أغلى أخت
دمتى بكل الود

Sweet Violet يقول...

الحمدلله ان صوتك بدأ يسمع

و ان شاء الله تاخدى حقك

مبروك ياجميل (:

غير معرف يقول...

أنا صيدلي مش طبيب ،
الاعتراض مش على لقب دكتور ، إنما على تجاهل كوني صيدلي ....

عموماً ، المدونة شكلها الجديد .... يع

ههههه

في آمان الله

محمد (رادار)

mahasen saber يقول...

رئيس جمهورية نفسه.....

السلام الجمهورى لجمهورية احلامه الهاديه
منورنى يا محمود فينك فينك فينك
ومنورنى ومنور البلوج ومشرفنا يا ريس اجمل جمهوريه واطيبها على الاطلاق

Nabil يقول...

السلام عليكم.
الحمد لله انى من العشره الاوائل اخيرا..

فعلا من طلب العلا سهر الليالى. ^_^

من قلبى الف مبروك...

وبعدين عقبال ((نيو يورك تايمز)) لم تكتب عنك.

ارق تحيه وتمنياتى بالتوفيق

mahasen saber يقول...

والريس تانى وتالت ومقدرش مردش التعليق......

محمود باشا وافق يبقى مدير اعمالى طمعا فى اعمالى طب افرض اعمالى دى طلعت لون الليل كده والدنيا وهيا ضلمه
ينفع ساعتها تتسجن بدالى بوصفك مديراعمالى

وباليورو اهه احنا اليى بنمسح بايدينا قيمة السحتوت المصرى
وده شئ يدايقنى بس لو اليورو فى شنطتى انا ممكن امسح المبدأ ده باستيكه وهشتريها باليورو برضه

منورنى يا حوده الجن
عمرك شفت ريس اسمه حوده الجن

كلام حسام يقول...

اذا انها الحرب
انا عايز مدونة تطالب بحقول الرجالة الغلابة
ونتقابل بقي مدغشقر

ربنا يسعد ايامك مدام محاسن ويحفظ ابنك من كل شر

mahasen saber يقول...

ماما اموله....

اهلا اهلا وسهلا والبلوج نوربخطوتك يا ماما

وربنا يكرمك على ذوقك
والحمد لله انا اخدت حقى كده وزياده مش بحارب عليه حتى لو مش خدته حاسه برضه كانى اخدته

منورانى دايما يا اجمل مامات البلوجر

mahasen saber يقول...

mohamed ghalia.....

محمد الغالى واخويا الصغير انا الشهره عمرها ما تنسينى حبايبى ابدا ابدا ابدا يعنى مش قبل شهرين تلاته ههههههه

بس انتى عامل ايه وعملت ايه فى الموضوع اليى كنت قلتلى عليه
يا رب يكون خير
واخبار الدراسه ايه ..يله عايزين تقديرات يتعمل عشانها حفله

mahasen saber يقول...

mohamed ghalia.....

محمد الغالى واخويا الصغير انا الشهره عمرها ما تنسينى حبايبى ابدا ابدا ابدا يعنى مش قبل شهرين تلاته ههههههه

بس انتى عامل ايه وعملت ايه فى الموضوع اليى كنت قلتلى عليه
يا رب يكون خير
واخبار الدراسه ايه ..يله عايزين تقديرات يتعمل عشانها حفله

mahasen saber يقول...

ضد التيار.....

ضد الجميله منورانى يا حبيبتى
اخبارك ايه يا رب تكونى بالف خير
بس صورتك القديمه فين

بس فى اى شكل ضد الجميله برضه

mahasen saber يقول...

radarblog.....

وجنت على نفسها الست براكش
طبعا هتموت وكنت تشرحها بس اههى استريحت من مشرطك منذ ما يقرب من السنيين الكتار قوى ....

بئه انا شكل المدونه يع ماشى يا راجل يا حقود لا ااقولك يا دكتور يا دكتور يا دكتور ها بتعذبك الكلمه دى

بس منورنى يا رادار الا قولى انتا لو اشتريت عربيه والرادار مسكك هتبقا انتا مسكت نفسك

واحده بخمسه وعشرين

mahasen saber يقول...

nabil.....

نبيل النبيل ابو النبل كله
بئه النيويورك تايمز حته واحده ده انا بئه مش هعرف اكلم نفسى تانى
بس هعرف اكلم نبيل ازيك يا نبيل يا رب تكون بافضل حال وزهور الياسمين بتاعتك تكون يانعه دايما مش هتدينى شوية ياسمين ازرعهم ولاا روح شايلوك هتظهر

أكون أو لا أكون يقول...

مبروك حسونتي...
ان شاء الله تقدري توصلي صوتك وتحققي اهدافك ...
سلامي لعبد الرحمن...

mahasen saber يقول...

كلام حسام.....

لا احنا عايزين مدونة زى مدونة كلام حسام عشان دى خير سفير للرجل عند المرأه بما ان الستات بيموتوا فى الكلام ويا سلام لو حلو زى كلام ورغى حسام

منورنى دايما وبيسعدنى زيارتك يا شاعرنا الرومانسى الجميل
بس بذمتك حقزق رجل ايه دى اليى بتقول عليها
انا راضيه ذمتك الشعريه والادبيه...

mahasen saber يقول...

اكون او لا اكون.....

حبيبتى حبيبتى كونتى الجميله الله يسلمك يا قمر الدنيا بحالها
وحشتينى فوق الوصف
وحاضر هبلغه السلام
وانتى سلميلى على مامتك واختك

وخلى بالكمن نفسك
ربنا يسعدك يا حبيبتى يا رب

Kiara يقول...

للولولولولولولولولولللىىىىى

احلي زغروطه بجد فرحت اوي لما قلتيلي في الفون

مبروك ياقمر

امممممممممممممممموه

عاشقة القمر يقول...

ازيك بنت السودان
ميروك علي الشهرة كبير
ان شاءالله ربنا يساعدك
هايجيبلك حقك
و ان شاء الله تاخدى حقك

نـــــور يقول...

مش قلنا البلد دى ظالمه :)

من شو لشو ياعم ياجامد انت
نايس ياعمنا وان شاء الله تقدم
مش انا دعيتلك فى التليفون وقلتلك بكره تلاقى اسمك فى بقيه الجرايد
ادى دعوتى
من بقى لباب السما
هو اللينك لسه ضايع منك؟

صحيح نسيت اباركلك
مبروك النيو لو ياوحش
كان وشه حلو عليكى
سلااااااااام

موناليزا يقول...

ياواد ياجامد وكمان هتلعبى فى قوانين الاسرة
طب شدى حيلك بقى الناس بدأت تخلل من الركنة وتأجيل القضايا

محمد فارس يقول...

السلام عليكم يااخت محاسن ام عبد الرحمن
انا فكرت الف مره ومره قبل ما اكتب تعليقي وترددت كثيرا ولكن قلت لنفسي ياواد اعذرهاالهنا اللي هي عايشاه اليومين دول اكيد هاينسيها ناس كتير بس يخساره بدأتيها بالغلبان عموما تلاقيكي بتقولي ايه سبب الكلام ده لكن لورجعتي لموضوعك السابق هتلاقي ان هناك تعليق لي
وانت رديتي علي كل الناس الا العبد لله
عموما الف اااالف مبرووووك علي النجاح الباهر اللي حققته المدونه وانا كنت متوقع هذا النجاح العظيم لكن لي رجاء عندك اوعي تنسي الناس اللي انت اسعدتيهم بمدونتك وهما كمان اسعدوكي بتعليقاتهم لكن لو جت عليه انا مش مشكله
كفايه عليكي كده علشان تشوفي باقي الناس اللي فرحانين ليكي

حواء يقول...

أولا مبروك ياحبيببتي وان شاء الله تاخدي حقك
ثانيا انا دايما اقول كل حق وراه مطالب
ثالثا انا اللي برده دايما اقول كل قوي في اللي اقوي منه
وحسبي الله ونعم الوكيل في كل ظالم ومفتري
واستغفري كتير
وربنا يكتبلك اللي فيه الخير

prince4ever يقول...

مبروووووووووووك
مش بقولك محدش هيعرف يكلمك بعد كده
اهو من يوم ما عرفتي طريق الشهره محدش لا بيشوفك ولا بيسمعلك حس...ماشي ماشي
ربنا يزيدك يا استاذتي يارب و تشتهري كمان وكمان و تاخدي حقوقك كامله
سلامي لعبده العسل

SHAPE YOUR LIFE (ABOALI) يقول...

الله معاك ومعاك قلوبنا
انتى الشراع وانتى حبيبتنا
الله معاك ومعاك قلوبنا
ايوه كده يارافعة راياتنا
الله معاك ومعاك قلوبنا
من غيرك انتى مين كان سمع صوتنا
الله معاك ومعاك قلوبنا
روح واحده وحرف واحد
انك دايما غاليه فى قلوبنا

انطلقى يااااااااا عايزه اطلق
الانطلاق جاء من اواسع ابوابه
بعيييييييييييييييييد
عن الرجاله وهمومهم

mahasen saber يقول...

مولان......

مولانتى مولانتى اليى مشطبه على اسامى شخصيات الكارتون وحشانى موتجدا قوى خالص وبعدين يا قمر يعنى انا ااقولك حاجه غلط فى التليفون ده حتى كان التليفون زعل منى

منورانى فى اللوك الجديد يا مولا

عايش... ولكن !!!! يقول...

مبرووووووووووووووووووووك يا ام بيرو
ايه ده كله
انا هحسدك على فكره
:)

mahasen saber يقول...

عاشقة القمر.....

بنت بلادى الجميله ازيك يا سومه وكيف احوال السودان وام درمان

والله كل شئ سودانى فى القلب يا سومه محفور
موطن راسى بئه

وشكرا على كلامك الجميل ده ربنا يكرمك يا حبيبتى يا رب

mahasen saber يقول...

habiba......

انا قلت البت مرات ابنى دى مش هتجيبها لبر ....
لمى الادوار كلها من الاول للعاشر يا هندسه بدل ما اقلب الترابيزه عليكى
وانتى عارفه ااقل حاجه هعملها..معنديش ولاد للجواز..
بس سيبك انتى وحشتينى جدا يا حبوبهوقليلى اخبار الدراسه ايه يا هندسه الجوهرى بيقولى انه شافك مره فى الجامعه بس انا ايه مسكتلوش قلتله بطل لف فى كافتيرية هندسه ههههههههه يعنى شركته بس والنبى الواد غلبان بس يستاهل

ربنا يسعدكوا بس والله وحشتونى جدا جدا

mahasen saber يقول...

موناليزا......

مونتى حبيبتى مهو ياجميله القوانيين دى فى فى اغلبها حاجات قضمه وسط وضهر وقفا الست
وبعدين دى قوانيين من صنع البشر يعنى مش تشريعات سماويه فتبقى اكيد فيها الصواب والخطأ
واكيد قابله للتعديل

بس ادعيلى انتى نقدر نعمل حاجه

mahasen saber يقول...

محمد فارس......

يسلام يسلام يسلام بئه حضرتك تتخيل انى ممكن ازعل حضرتك منى او اتجاهل كلمه لحضرتك عندى ....
انا مشغوله للركب ومش عشان حاجه غير ان ابنى تعب منى الاسبوع ده فى اوله واخر الاسبوع كان كله سفر ومشاوير بعيده ومهمه فكنت بدخل كده اليى بقدر اعمله بعمله فى البلوج بسرعه

وبعدين ده اصلا عندى حاجات لسه مش عملتها يعنى حضرتك لو شفت تعليقات البوست اليى قبل اليى فات فيه تعليقات ولسه مردتش عليها والبوست اليى فات والبوست ده بحاول اجمع واركز واتفادى المشاغل

يا استاذ محمد حضرتك ايها الفارس ليك مكانه فى المدونه لايمكن زعزعتها وكل شخص بياخد من وقته عشان يقرالى كلمه وياخد وقت تانى عشان يقول رايه ويناقش على دماغى من فوق
بس والله هيا المشاغل يا رب تنسانا شويه اصلى اتشحورت الاسبوع ده واليى قبله برضه

اسفه جدا جدا لو حضرتك زعلت
وعارف الريجر كمان ده مشكله لوحده لانى لما عرفت اعمله ازاى مسكت الورقه اليى لقيتها وحطيت اللينكات اليى موجوده فيها وده زعل حبايبى منى لانهم فاكرين انى مش حطاهم فيه بمزاجى بس انا لفيت تانى على البلوجات وكتبت اللينكات وان شاء الله هحط لينكاتهم لما افضا كده
يعنى اظن مش فيه اعتذرات بعد اللعبكه اليى قلتها دى
وبصراحه كده عايزه مساعده محدش يساعدنى

بس حضرتك وعتابك ومدونتك على دماغى ودماغ مدونتى من فوق والله
وزعلك لو حتى هزار برضه عزيز عليا جدا

mahasen saber يقول...

زوجه......

الزوجه الوفيه الحبيبه ياحبيبتى انا شاكره لشعورك الطيب ده وحرقة قلب الاخت على حال اختها واليىحسيته فى كلامك يا حبيبتى
بس المساله حاليا معايا اكبر من مشكلتى واكبر من اى مواضيع تخصنى
وبعدين انا عمرى ما حسيت بكره تجاه ابو ابنى بالدرجه القصوى يعنى برغم كل اليى حصل وبيحصل بفتكر انه ابو ابنى وفيه ابنى يعنى احترامى ليه من احترامى لابنى
وبيفضل اننا كنا متجوزين عن حب
وبيفضل انى مش عايزه ابقى اكفر بالعشيره يعنى كانت فيه ايام سوده بس كانت فيه ايام كحلى مخطط برضه

فنقول ربنا يهدي ويهديله حاله ده ابو بيرو
انا عارفه احنا ساعات يا ستات بنبقا متغاظين بس ساعات كتير بنبقى متسامحين
وعارفه شعورك يا حبيبتى ومقدراه
انا فعلا ربنا رزقنى باخت جديده من البلوجر

ربنا يسعدك ويهنيكى ويجعلك انتى وزوجك سبب لدخول بعض الجنه
اللهم امين

mahasen saber يقول...

prince4ever.....

انا برضه اليى التشريح فى جثث الخلق والامتحانات مش مخلينى فاضيه

يا برنس انا كنتتايه الاسبوعين اليى فاتوا والله شويه سفر وشويه بيرو تعب
وبعدين انتا اليى يزورك لازم يقرا كل كلمه بتأنى واخر بوست انا دخلت قريته وعلقت عندك عليه يادكتور
بس انتا شكلك بتفكرتاخد دكتوراه فى النصب وبتضحك عليا عشان فاكرنى مش عارف انى مقدرش على زعلك ولا انى اغيب عن بلوجك صح
اوعى كده وسع ..يا ناس يا بلوجر رامى ده اخويا الصغير ومحدش يقربله
انا حشت عنك الناساهه
والله يا رامى بتمنى لسه ابنى يكون فيه منك لما يكبر
وحاضر هوصله السلام

mahasen saber يقول...

aboali.....

لاده كده لازمنى ترشيح فى مجلسى الشعب والشورى مش الشعب بس
ايه الكلام الجامد ده يا ابو على
خلاص هخليك تدريلى حملاتى الدعائيه
بس والله كون ان الرجاله تبقوا مبسوطه بمدونه زى دى ان دل بيدل على اصلهم الطيب وان الدنيا لسه فيها رجاله موضوعيين وعقلانيين وساميين كتير

الله يكرمك ويباركلك فى رقة احساسك
وعقلك الراقى والعالى ده
واردهالك فى الحملات الاعلانيه يا ابو على

mahasen saber يقول...

عايش ولكن.....

لولوالله اليى اعرفه محدش بيحسد مدونته
وبعدين انتا تدخل المدونه براحتك تحسد تنئق تقر تشخبط فيها تهدها وتبنيها
البلوج بلوجك ومقدرش ااقولك تلت التلاته كام
الا يا هندسه تلت التلاته كام
وعلى فكره كانسلينا على معهد امناء الشرطه

حـــــ الــجــنــة ـــــور يقول...

السلام عليكم
وحشاااني ياقمر إنتي تستاهلي كل خيير ياغالية ربي يديم عليك الخير والبركة والسعاااده
سلامي للوالدة ولعبد الرحمن وهما أكيد فخورين بيك زينا تماما وأكتر دمتي في نجاح وتفوق
تقبلي مروري وخالص ودي ومحبتيي
في أمان الله

غروب يقول...

الف مبروك

محدش هيعرف يكلمك بعد كده بقه

وحشانى جداااااا

مهندس مصري بيحب مصر يقول...

و لو إني بأكره روزا اليوسف بشدة
لإنها دلوقتي منبر للحزب الوطني و لجنة السياسات و الحكومة
لكن الف مبروك يا أم عبد الرحمن
:)

انا حره يقول...

ايه الجمال دا

ماشاء الله ياقمر ربنا يكرمك ويبعتلك دايما الحاجات الحلوه اللى تفرحك وتخفف عنك

انتى اكيد تستاهلى

بس هوا انتى اللى فالصوره دى ؟؟؟؟؟؟؟

ههههههههههههه

مواااااااااه

عالم ماريونت يقول...

حبيبتي محاسن:
ألف ألف مبروك على النشر وعلى الشهرة كمان
انتي عارفة رأيي فيكي
انتي تستاهلي كل خير
ربنا معاكي ويوفقك يارب
وسلامي لعبد الرحمن
رنا

DR.HAMAS يقول...

ربنا ينفع بيكى يا أستاذتنا

و يوصل بيكى صوت الحق





د.حماس

blue-wave يقول...

الف مبروك يا ستى
بعد كدا مش هانعرف نكلمك والتعليقات عندك هاتبقى بجنيه:))

Dr.Mohammed Gohary يقول...

محاسن
مبروك يا باشاا

في انتظار اللقاء التليفزيوني عالمحور
ربنا يوفقك

NIDAAL .R يقول...

الف مبروووووك
وعقبال كدة لما تتحل المشكلة دى للستات فى مصر كلها بسبب كلمة كتبتيها
الف مبروووووووووووووووووووووووك
مبروووووووووووووووووووووووووووك
مبروووووووووووووووووووووووووووك

حاجات جوايا يقول...

إزيك يا سنسن
مبروك يا جميل
عقبال متتنشر فى الدستور وتيجى فى قناة الجزيرة والسى ان ان
ويارب يكون بفايده وتساعد فى حل المشكلات القائمة

سلامى ليكى ولبيرو وماما
ربنا يحفظكوا ويبارك فيكوا

فشكووول يقول...

والنبى يا استاذه محاسن اعملى حسابى اكون مدير اعمالك وانا عندى فكره وحاكون مدير اعمال كويس خالص وحاجيب لك شغل من كل حته بس 50% دا يعنى عشان خاطرك ولو كدا صحيح يبقى انت جبت فى ثانويه 150% احسن من دكتور محمد اليى وانا كمان بالـ 50% بتوعى ابقى جبت اكتر من 150% ولو ان ايامنا كانوا بيدخلوا الطب والحاجات دى ب 75% ما تنسيش انا مدير الاعمال القادم ان شاء الله .. تحياتى وما فيش كسوف ولا حاجه انتى زى بنتى بس فى حكاية الـ 50% دى العموله ما بعرفش حد .. تحياتى

إيمان قنديل يقول...

ياستي الف مبروك

عالم حبيب يقول...

ربي يوفقك يأم عبد الرحمن وييسرلك الخير حيث كان .. وفعلا المدونات تستحق كل الإهتمام ده لأنها من قلب وواقع الناس " مع تحفظي طبعا على روز اليوسف " :)

محمد حمدي يقول...

ايوا يا محاسن

باينها لعبت يا كبيره وبقيتى مشهوره

ربنا يوفقك وتطلعى من نجاح لنجاح ان شاء الله

mahasen saber يقول...

حور الجنه....

يا حبيبتى والله انتى كلك رقه وذوق وده مش غريب عليكى ابدا

شكرا يا حبيبتى على ذوقك وكلامك الجميل
ربنا يديم عليكى الروح الحلوه والاحساس الراقى نعمه

mahasen saber يقول...

غروب.....

ههههههه طب راحت فين ما بعد الغروب
ولاا ااقول كلمات ساسو
يا جميل يا متعدد المدونات انتا

لا طبيعى محدش بيعرف يكلمنى تقدرى تقولى كده على وشى الهيبه هههههههههه يا ساسو يا حبيبتى على ايه يعنى اكونش اخترعت علاج للايدز وانا معرفش
منورانى يا قمر
وانا جايالك هخلص الرد على التعليقات وجايالك جهزى القهوه

mahasen saber يقول...

مهندس مصرى....

الله يبارك فيك يا باشمهندس بس بقولك يا محمد يعنى افهم انها هتتحب عشانى بئه

على فكره من كام يوم عدينا على دمنهور واخويا فضل يشرحلنا معالمها
اصلنا كنا رايحيين رشيد وطبيعى مرينا عليها
بس افتكرتك يا هندسه علطول

mahasen saber يقول...

انا حره.....

بئه معقول انا بالجمال والخضار ده هههههههههه
والله ضحكتينى يا جميله
زالف الف شكر لرقتك يا قمر
يا اجمل حره فى البلوج بحاله

mahasen saber يقول...

يوميات نائمه فى الارياف....

رنا حبيبتى الله يكرمك يا جميله
وشكرا يا حبيبة قلبى على ذوقك ومأزرتك ورقتك معايا يا رنا

بس قوليلى يا قمر
سلمتيلى على ويلسون

mahasen saber يقول...

d.hamas......

اللهم امين
الله يكرمك حضرتك قلت بالمختصر باليى بتمناه

ربنا يجازيك خير
وحضرتك نورتنى وشرفت المدونه

EMMY BABY يقول...

هههههههههههههههههههههههههه

ممكن تمضيلى الاوتجراف ده يا محاسن

طب ممكن بقى صورة كدة افرجها لصاحبى

هههههههههه بهزر طبعا

ربنا يسعدك يارب وتفضلى كدة دايما صوت للستات

تحياتى

ايمى

mahasen saber يقول...

blue-wave......

الله يبارك فيك يا دكتور /عمرو يا شاعرنا الرقيق
بس يعنى معقول بجنيه بس طب لو جنيه استرلينى ماشى

منورنى يا دكتور والله يا عمرو مجرد تواجدك بيبعث على السعاده

mahasen saber يقول...

d. mohammed gohry.....

الكابتن الدكتور اليى منور البلوج

ماشى يا محمد
خليك منتظر بئه ههههههههه
محمد بخ

mahasen saber يقول...

niddal pal.....

الله يكرمك يا نضال شكرا يا محمد على ذوقك
ويارب يا رب يا محمد لو المدونه دى وصلت لعمل لشئ للستات وكل اليى زى هحس ان ربنا فعلا راضى عنى واعتقد انى هموت مرتاحه فعلا

mahasen saber يقول...

حاجات جوايا.....

سالى الجميله قمر دمياط
منورانى يا حبيبتى والله يبارك فيكى وفى كل من تحبين

وفعلا ده اليى بتمناه يا سالى ان المدونه دى تقدر تساهم بشئ ايجابى
اظن ده دور التدوين الاخر

منورانى يا حبيبتى
يا ارق سالى فى دمياط

مهندس مصري بيحب مصر يقول...

لا لا لا لا لا
أنا فرحان علشانك لكن مازلت بأكره روزا
:)
و ابقوا تعالوا في شهر 5 الجاي في دمنهور حأكون في أجازتي و موجود فيها و نعرف نقوم بالواجب

mahasen saber يقول...

fashkool.....

استاذى فشكول ما بلاش سيرة ال فى المايه دى انا بتعصب
هو محدش بيعمل حاجه لحد كده ببلاش الله شوف حضرتك الكلمه مريحه ازاى ههههههههههه
ده حضرتك تاخد عينى مش فلوس بس
يا سلام بئهحضرتك تبقى مدير اعمالى
هو لو فيه اعمال ماشى

mahasen saber يقول...

maksofa.....

لا لا يعنى كده لغينا كباريه طب كنت بدلع حضرتك كابرى على اساس كباريه
دلوقت ادلع بئه ايه اه ااقول ماك يعنى مكسوفه يعنى

الله يبارك فى حضرتك وحضرتك نورتينى

mahasen saber يقول...

عالم حبيب.....

اخونا الكريم حبيب الله يبارك فى عمرك وصحتك
وجزاك الله كل خير على كلماتك الطيبه دى

بس الكل ليه متحفظ على روزا ههههههه يا ناس دى بتواكب العصر ههههههه

نورتنى يا حبيب بجد
ربنا ييسرلك ويرزقك بكل الخير

mahasen saber يقول...

mohamed hamdey.....

الله يبارك فيك يا كبير وتعيش وتهنئ ههههههههه
الف شكر يا محمد على ذوقك ورقتك
واخبار رجلك ايه دلوقت
يا رب تكون اتحسنت بالذوق

mahasen saber يقول...

emmy babey......

طبعا ممكن يا جميله تدفعى كام باليورو لو سمحتى ههههههههه

والله يا جمبله انتى وحشتينى
وشكرا على ذوقك يا ارق بيبهات الكون

elsha3er يقول...

ربنا يكرمك يارب وتعلى كمان وكمان ودة حقك ويارب الكل يسمع صوتك ومشاكلك تتحل


احمد الشاعر

mahasen saber يقول...

مهندس مصرى.....

شكرا ياهندسه بس يا محمد كأنك قمتبيه وزياده
وتيجى بلدك بالف سلامه
انتا شخصيه محترمه يا محمد ومدونتك فعلا من المدونات اليى مديه البلوج قيمه

ربنا يباركلك ويسعدك دايما يا رب
وعارفه انك فرحانلى بس الكل شانن هجوم على روزا ليه ده ياما مصروفى راح عليها هههههههههه

mahasen saber يقول...

elsha3er.....

الله يكرمك يا احمد يا رب
وتحقق كل اليى بتتمناه
وتبقى من اكبر شعراء مصر ومن اكثرهم قيمه زى اليى حاطط صورته كده
عمنا نجم

منورنى يا احمد وشكرا على كلامك الطيب يا شاعر المستقبل

فشكووول يقول...

استاذه محاسن انت تزعقى لمحمود وابو محمود كمان .. هو انت شويه عندنا .. وبعدين انا مدير اعمالك .. ايه يعنى محمود ده دول 50% يا استاذه ما هماش شويه يعنى .. تحياتى

مـجـنـووون يقول...

بجد أنا فرحان قوي علشان بلاقي فكرك بينتقل بين الناس

ودي حاجه كويسه علشان تدفعي عن حقوق ناس كتيرة في الموقف إلي أنتي فيه

والف مبروك علي الظهور في الجرائد وعقبال أول بطولة فلم سينمائي هههههههههههه

تقبلي مروري أختي الغاليه
مجنووون

mahasen saber يقول...

fashkool.....

ههههههههههه استاذ فشكول معقول النسبه والتناسب تخليك تبيع محمود فى ثانيه كده

لا ده محود وابو محود على دماغى من فوق كمان انا ااقدر ااقول بم ولا بم بم حتى

mahasen saber يقول...

مجنون.......

الله يكرمك يا اخى الغالى مجنون
وده المطلوب اثباتنه ان صوت الستات المنكوبه يظهر
وان الحقوق اليى سالبهلهم القانون ترجع

ربنا يكرمك ونورتنى يا اخويا الغالى

من غير عنـــوان يقول...

ما ضاع حق وراؤه مُطالب

mahasen saber يقول...

من غير عنوان......

فعلا ويا رب بس نعرف نجيبه قبل ما توافينا المنيه

حضرتك نورت البلوج وشرفتنا بالزياره

إبن مصر يقول...

السلام عليكم ورحمة الله يا ام عبدالرحمن

من اول يوم دخلت مدونتك وهى دخلت قلبى بشرحك الوافى لمشاكلك اللى مش لاقيه حد يدلك للطريق ويخلصك من مشاكلك دى وحسيت ان ربنا هيقف جنبك هذا ما يحدث الأن وان شاء الله فيلم قريب جدا بعنوان عايزه اتطلق
هههههههههههه

بجد والله فرحان جدا ليكى وربنا يوفقك دايما
ام عبدالرحمن لكى كل تقديرى

عالم ماريونت يقول...

ههههههه
ايوة يا محاسن
ويلسون بيسلم عليكيوعلى عبد الرحمن كمان
بموت فيكي والله يا محاسن

mahasen saber يقول...

SON OF EGYPT......

الله يكرمك يا ناجح يا ابن مصر البار يعنى انتا شايفنى بطله سينمائيه ولا محكمتيه هههههههه
بس كل كلامك على دماغى من فوق
وانتا ومدونتك ليكوا مكانه خاصه غير قابله للزعزعه او التنافس
انتا فعلا اخ وعزيز كمان

ربنا يكرمك ويسعدلك حالك

Unknown يقول...

يا محاسن
ربنا معاكى يارب ويرزقك
وتشتهرى كمان وكمان
بس اوعى تنسينا هههههههههههه

حاسوباتيه يقول...

الف الف مبروك ويارب التقدم دايما

princess يقول...

محاسن صابر تقول"الشهرة مغيرتش فيا حاجة"ههههههههه
انا بهرج معاكى
مبسطوة ليكى جدا والى الامام
تحياتى

ريمان يقول...

سيدى يا سييييييييييدى

ايوة يا عم

ومين قدك بقه

لاء بجد انا فرحت اوى وحاسه انك فرحانه كمان

على العموم يا قمر مبروك

لاء بجد انتى بقيتى مشهوره بقه يا قمر ومش هنعرف نكلمك بعد كده

وادى زغروطه حلوه اهى عشان المناسبه الجميله دى

لولولولولىىىىىىىىىىىى

وكمان واحده عشان بيرو عريسى

لولولولولولىىىىىىىىىىىىى

بقولك ايه

مهما اشتهرتى اوى تتكبرى عليا اه بيرو ليا وانا لبيرو

اه
وهيفضل عريسى

انا بقولك اهو

ههههههههههههههه

والمدونين دول كلهم شاهدين انه عريسى اوعى تغيرى رايك

ههههههههههههههههه
بحبك بجد

اموااااااااااه

ريمان يقول...

والف الف الف مبروووووووووووووك مره تانيه

وادى كمان زغروووووووطه

لولولولولولووللىىىىىىىىىىىىىىى

لولولولولولولىىىىىىىىىىىىىىى

لولولولولولىىىىىىىىىىىىىىى

هييييييييييييييييييييييييييييييه

ريمان يقول...

عقبالى يااااااااااااااااا رب

Ahmed Mohamed يقول...

مش عارف اقولك مبروك ولا اقولك ايه

بس ليه الشهره الي الواحد ياما حلم بيها
مش بتيجي الي لما يكون في مصايب وكوارث
يعني الواحد يقتله قتيل عشان يتشهر بقي او يتمرمط في المحاكم عشان يجيب حقه


عموما انا مش هاقولك مبروك الا لما تاخدي حقك تالت ومتلت وتحسي انك راضيه عن حياتك وبعد كده نشوف طريق الشهره الغامض ده

متزعليش انا كلامي بيطلع كده وخلاص

بعبعه يقول...

مبروك يا محاسن واتمنى من قلبي لكى النجاح والشهره فعلا

Ahmed Mohamed يقول...

هاقولك مبروك ان صوتك وصل ويارب حد يشم ويغير القانون الي بيرد المظالم بعد ما كعوب الواحد تحفي

هى فوضى يقول...

عايزة تطلقى و اية؟؟؟؟؟؟؟؟؟
تعيشى ؟
تحبى ؟
تتجوزى؟
تنطلقى ؟
تحلمى ؟
تحسى بالحرية ؟

أحمد المسلم يقول...

مبارك لك يا أم عبد الرحمن .

وأسأل الله أن تكون هذه المدونة ، طريق خير ونفع لك في الدنيا والآخرة والسلام ختام .

انسانةعادية فى عالم مش عادى يقول...

الف مبروك لحضرتك ربنا يوفقك يارب حضرتك تستاهلى اكتر من كده وربنا يحققك كل اللى نفسك فيه يارب

ahmed_k يقول...

الجوكر يا محاسن !!!!
بتروحي الجوكر من ورايا يا محاسن هههههه
إنتي تنوري الغردقه في أي وقت
وأنا كنت ماشي في السقاله من كام يوم لقيت حد بينده علي أووووم أيه بصيت
لقيت الجوكر هو اللي بينده وبيقولي تبقى تسلملي على محاسن أووووم أيه
سألت نفسي وهو ده عرف محاسن منين ؟؟؟
أووووم أيه جيت أبلغك السلام لقيته هو واحشك كمان هههههههه وعرفت السبب
إتبسط يا باشا وأنت كمان واحشه مووووووت , فتعالى بس وأنا أعرفك على مطعم سمك جديد وأشد من الجوكر كمان وأسعاره أحسن كتير ... متكسليش منتظرينك
وبالنسبه لما نشر في روزاليوسف
فأقولك ولسه كلها كام يوم ونلاقي خبر عن مدونتك في الأهرام
أنتي بجد مدونتك رائعه وتستحق كل هذا التقدير وأكثر
ربنا يوفقك دايما
وتقبلي خالص تحياتي

Mona Shereif يقول...

مبرووووووووووووووووووووووووك يا حبيبتى
هو لو مكانش كلام كويس وفى محله مكانش وصل للناس ودخل قلوبهم

ربنا يوفقك يا محاسن الى ما يحبه ويرضاه

mahasen saber يقول...

يوميات نائمه فى الارياف....

رنا اصلك متعرفيش غلاوة المذكور ويلسون
بس لعلمك احنا بنحبه من حبك فيك مش اكتر
الا هو عامل ايه
اوعى يكون فاصل شبكه

mahasen saber يقول...

نهر الحب......

ايناس الحبيبه انا عمرى ما انسى بداياتى ههههههههه
والله يا نوسه منوره
بس قولى يا رب نعرف نعمل حاجه عدله

mahasen saber يقول...

حاسوباتيه.....

الله يبارك فيكى يا حاسوبه
ومنوره يا قمر

mahasen saber يقول...

princess.....

ماشى يا برنسيستى هههههههههه
هرج براحتك يا قمر
اخبارك ايه يا جميل

mahasen saber يقول...

ريمان.....

ريمو حبيبتى تدفعى كام ههههههههه قصدى لاستمرار الخطبه من المحبوب ابنى
يعنى هو الواد كده يتخطب بلوشى

والله يا قمر انتى وحشانى وحشانى
وعبدالرحمن معاكى يزيد ومينقصش بس بقول برضه مفيش مانع من اليورو فى الموضوع

منورانى يا جميله

mahasen saber يقول...

ريمان.....

يا بنتى كفايه زغرطه صوتك راح هههههههه
والله انتى قمر وعبالك كل الخير يا ريمو يحصلك
لانك تستاهلى كل حاجهحلوه
يا ملاك انتى يا ملاك

mahasen saber يقول...

ahmed 3alam......

كلامك منطقى جدا يا علام
بس انا حاسه ان الحاله النفسيه السيئه تأثيرها لسه مستمر معاك

ربنا يستر ومتتوغلش

mahasen saber يقول...

بعبعه.....

الله يبارك فيكى يا بعبعتى
وجميلة بعبعات البلوجر بحالهم

منوره يا قمر

mahasen saber يقول...

ahmed 3lam.....

للمره التانيه يا منطقى يا ابو كلام عاقل انتا
كلامك مضبوط بس انا متخوفه عليك فعلا
انتا كويس يا علام

mahasen saber يقول...

هى فوضى.....

اهلا بيكى اولا ونورتى يا جميله

بس و
ومش عيب
ومش حرام
وحقى اليى ربنا شرعهولى
وكفايانى ضعف
واكيد اكيد ربنا معايا
بصى هيا و دى حطى جنبها كل الحاجات المقفوله فى وشى الست لمجرد انها ست فى حين ان ده شرع ربنا مش اكتر ولا ااقل

mahasen saber يقول...

احمد المسلم.....

اللهم امين يا احمد
وشاكره دعائك الطيب ده
واحساسك الراقى
ربنا يجازيك خير

mahasen saber يقول...

انسانه عاديه فى عالم مش عادى....

يا اهلا بالناس الحلوين الغير عاديين بالمره

الف شكر على ذوقك ورقتك يا جميله
والله يبارك فيكى
ويكرمك بكل خير

mahasen saber يقول...

ahmed k.......

بئه الجوكر كان بينادى عليك ماشى يا احمد ....
طب مش اداك حاجه توصلهالى
يعنى كام كيلو جمبرى على شوية سمك فيليه
على حلة شربة سى فود

اصله قالى انه بعتهم معاك
عامتا لو اتاكلو بالهنا والشفا
بس الا حلة السى فود انا اموت فى كل ما هو شربه

بس بجد يا احمد والله الغردقه منوره بيك وبأهلها
وشكرا على ذوقك وخفة دمك
ربنا يكرمك بكرمه ان شاء الله

بس قولى انتا غردقاوى المنبت والمنبع والمصب
ولاا وافد
ولاا مهاجر عن طريق البحر

mahasen saber يقول...

some times.....

منى منى منى فينك يا جميله الله يصلح حالك يا قمر
ونورتينى واسعدتنى زيارتك
والله يكرمك دايما يا منى رايك فى المدونه بيسعدنى وبيزيدنى شرف
جزاكى الله كل خير

وانتى اتجوزتى ولا لسه

شمس النهار يقول...

انت تستهلي كل خير وحب وتقدير يا محاسن مش بس روز اليوسف
عقبال ما ارجع من الحج الاقي موضوعك خلاص بح
ربنا يهديه ويخليه يفك اسرك
مش عايزه حاجه من هناك

أحــوال الهـوي يقول...

رب ضرة نافعه
و عسي ان تكرهوا شيئا و خير لكم

ان تعديل قوانين الاسرة هو اساس الموضوع و جل ما سعيت اليه و تعبك و جهدك قد يكون سببا لاسعاد اخرين يمرون بنفس ظروفك لازواج يخالفون شرع الله اذا ما استحالت العشرة مع زوجاتهم

اثابك الله علي جهدك و اصلح بالك و حالك

تحياتي

romansy يقول...

تسمحيلى بقى
انا هلزق فى المدونه دى

جايز ينوبنى من الشهره جانب

الله ينور
ايوه كده

مبروك مبروك

Empress appy يقول...

الف مبروك يا نجم
مع انى مش بحب رزوا اليوسف الكدابين دول
بس انت عقبال لما تطلع فى التلافزيون
والاهم من كل ده يا رب يا رب يحل لكى كل مشاكلك يا رب

mahasen saber يقول...

شمس النهار....

عايزه سلامتك يا جميله وتروحى وترجعى بالف الف سلامه
يا مدام شمس
ويا اجمل شموس التدوين بحاله

mahasen saber يقول...

احوال الهوى.....

الله يكرمك على كلامك اليى يرفع المعنويات الهبطانه

فعلا الكلمه الطيبه صدقه
وحاجه تشرح القلب فعلا

mahasen saber يقول...

romansy....

شرفنا بالزقان وانا احب طبعا ان اليى يدخل عندنا ميطلعش الا على مدونه صديقه تانيه

وانتا شرفت المدونه واسعدتنى طبعا زيارتك

mahasen saber يقول...

appy....

ابى الجميله الجدعه..الله يبارك فيكى يا قمر
وعبال ما اشوفالخرفان منورين ال b b c
بس قوليلى هو الكل بيعلق نفس التعليق على روزا ليه هههههههه

غير معرف يقول...

حاجه تشجعك
صوتك ابتدي يتسمع..

ربنا يوفقك يارب

أحــوال الهـوي يقول...

السلام عليكم

كل عام وانتم , والاسرة بخير ..بمناسبة عيد الاضحى المبارك ..أعاده الله عليكم و علي المسلمين بالخير والبركات .


تحياتى

my dream يقول...

محاسن
انا تابعت الحلقة وكانت جامده بجد
وانت كنت زي القمر انامتوقعتش انك قموره اوي انا اول مره اعلق بس كنت بزور المدونه كتير
ربنا يلرب يحققلك كل احلامك انت وابنك ويحفظه يارب
مع وافر حبي
مروه

mahasen saber يقول...

hager za3bal....

الحمدلله يا هاجر
وكفايه ان اليى بكتبه يتحس

mahasen saber يقول...

احوال الهوى......

اخويا الغالى احوال
وانتا بالف خير وصحه وسلامه وستر

ودايما فى افضل حال

mahasen saber يقول...

my dream.....

يا حبيبتى ده من ذوقك ومن كرم اخلاقك

بجد الف شكر على ذوقك وكلماتك الجميله دى

ونورتينى وشرفتينى بجد بالزياره الكريمه دى