السبت، 30 أغسطس 2008

زنقة الستات

اشمعنا زنقة الستات بس ؟؟؟؟لان احنا بنتولد مزنوقين من اهالينا وافكارهم وخوفهم اليى يخنق لانه بيقلب غلط
ومزنوقين من المجتمع اليى بتقالييده بتخنقنا لدرجة الموت
ومزنوقين لما نتجوز اى مشكله زوجيه اكيد انتى السبب فيها ...
ويا سلام بقه لو اتطلقنا او اترملنا بنتزنق زنقه ملهاش لزوم ..عشان كده دى زنقتنا احنا بس ..ربنا يفك زنقتنا جميعا..

مين فى الحياه متزنقش فيها
ومين مااتخادش من نظرة عنيها
ومين ما اتشبكش واتكلبش فى مشاكلها واهاليها
مزنوقه مخنوقه ومتطره اكون موجوده
ومش باختيارى اعيش
لكن باختيارى اصبر
وعشانه ابنى هعيش
وكمان عشانه هصبر
واحارب مليون جيش
لو عنه راح ابعد
امومتى وعشانها هكون
وانوثتى وفى الارض تكون
لو عنه راح ابعد....
عارفين يعنى ايه ام كل شويه تسمع جملة يا ستى ارميله ابنه واتجوزى ..الحمدلله مسمعتهاش من اهلى انما من المحييطين وكأن دى الجمله التقليديه لاى ام مطلقه او معلقه زى حالاتى ...فى الغالب الست ومشاعرها واحاسيسها فى الارض فى مجتمعنا يعنى اليى يفكر انه بيعمل معروف او بيجامل بالجمله دى يفكر الف مره قبل ما يطلعها من بقه لانها بتألم قوى قوى قوى ...والحكايه طبيعى مش ناقصه....

ورمضان كريم عليكم كلكم ..على اليى بيفرحنا واليي بيجرحنا
على اليى حاسسنا واليى مطنشنا ...واليى مدينا حقنا واليى ظالمنا
على ابو ابنى واهله واقرايبه على كل حد جرحنى واذانى وزعلنى

وعلى اجمل مدونيين العالم كلهم بلا استسناء ..مش هقدر ااقول اسامى عشان منساش حد
بس ايه رايكم فى تهنئه متأكده الكل عايز يهنيها لابو المدونيين كلهم ابو خالد ..كل رمضان وحضرتك بالف خير

الاثنين، 18 أغسطس 2008

زنوبه لبستنى السلطانيه..تاج الجزيره..



انا كل ما ادخل مدونه الاقى تاج ..تاج.فمعرفش الا من الاسئله ان تاج عباره عن اسئله




تاج كويتشن او كويتشن تاج يعنى.فعليه النهارده وانا بألقى نظرتى الصباحيه على بلوجتى ومهجتى الصغيره لقيت فى وشى تاج مش على راسى ومن مين من زوزه صاحبة




البحث عن زنوبه ماشى يا ست زنوبه وبتقول الفضول هيقتلها قال يعنى انا غامضه غموض ديفيد كوبر فيلد...ماشى يا زوزه برغم انى مبحبش الاسئله الكتير بس عشان تاجك بس هجاوب وانا ااقدر اعمل حاجه غير كده..على فكره التاج فى دماغى بيفكرنى بالسلطانيه ...وعليه ..


السلطانيه الاولى..اذكر خمسة احلام تخص ماضيك وتحلم فيها بتغيير اشياء ؟




1. مسبش مكان على الارض رجلى متتحطش عليه يعنى الف العالم كله وامنية حياتى انى اوصل للمحيط القطبى الشمالى يعنى لنهاية الارض وافضل ماشيه ماشيه لحد ما اجيب اخرها واروح كل مكان اثرى فى العالم من تل العمارنه لمدينة البتراء لاهرامات المكسيك لاماكن وجود الهنود الحمر يعنى معتقش مكان فيه ريحه قديمه ما اروحوش.


2.ايام حرب الشيشان كنت هموت واروح اجاهد مع المجاهدين لدرجة انى قدمت على دورة تمريض بالرغم انى لو شفت نقطة دم ركبى بتخبط فى بعض وبطلع اجرى ..بس كنت متعاطفه جدا مع القضايا الاسلاميه وكنت هموت واموت شهيده الكلام ده وانا فى تانيه جامعه على ما اتذكر من زمااااان بقه.


3.كان نفسى ابقى مخرجة افلام تسجيليه واعمل الافكار والحاجات اليى فى بالى ومسيطره على كيانى يعنى ابين واوضح صورتنا صح للغرب اصل اغلب اليى كنت بقابلهم فاكرينا بنركب جمال وبنقتل فى بعض فعايزه اوريهم مصر يا عبله.


4. زمان كنت هموت واحضر حفله ل ستينج ولما ستينج جه مصر قولت هاااا اخيرا هاحضرله حفله فقولت لماما قالتلى انتى اتجننتى اغانى وحفله واجنبى كمان فخفت انى ازعلها بس هو مين اتصلت بالمتعهد وكان سورى وحكيتله الحكايه لدرجة انى حسيت انه هينام منى وجاوبت على اسئلة المسابقه اليى بخصوص ستينج باستفاضه كمان وكان طلبى انى مش هقدر احضر الحفله فاحضر البروفه بتاعة الحفله وطبعا بعد ما الحيت والحيت والحيت واصريت ودوشته الموضوع متمش ومرحتش الحفله عشان مش ازعل ماما وستينج غنى ومشى وما ما مزعلتش بس زعلت انا نفسى بس مش مشكله .وحاجه تانيه كنت بحب قوى الرقص المسرحى الحديث اه والله وحاولت اشوف اى مكان التحق فيه بس لقيته كله مختلط قلت وعلى ايه مع نفسى احسن هو اشبه برقص الباليه بس بحركات عشوائيه على قد وصفى بس اليى متأكده منه انه بيطلع طاقه مخزونه جوه الانسان بشكل او باخر ..بس دلوقتى برقص على السلالم وانتوا عارفين الباقى.


5.كنت مبحلمش انى اتجوز الا لما احقق ذاتى وكل اليى بحلم بيه بعدين امعنت التفكير وامعنت التفكير وقولت دى تبق الحاجات دى حلوه لو مع حد بحبه وفيه بينا تفاهم فتمنيت انى اتجوز واحد مش حيلته ولا مليم وكل حاجه نعملها سوا ونبتدى من لا شى عشان لما نعجز ونكبر يبقى بينا ذكرى جميله وتاريخ او جغرافيا وكان نفسى يبقى عندى اطفال كتير كتير مع احترامى لتنظيم الاسره.بس ده الحلم الى صراحه قلب كابوس .




السلطانيه التانيه..اذكر خمسة احلام تخص مستقبلك؟


1.اربى ابنى بالطريقه اليى بتمناها احفظه القرأن كله زى بابا الله يرحمه ويلعب رياضه ويرتبط بيها قلبا وقالبا واعلمه لغتين وهو صغير الصينى والانجليزى طبعا واعمل منه انسان بجد بكل معنى الكلمه يكون مصدر فخر وحب لاى حد بيعرفه وتبقا معرفته معرفة خير لاى شخص حتى لو قطه فى الشارع.


2.احس انى انتصرت فى معركتى واخد حقى بالقانون نفسى اخده بالقانون عشان احس انه لسه فيه قانون فى البلد بيطبق اوامر قالها المولى عز وجل .


3.اصحى حلمى القديم بخصوص اخراج فيلم تسجيلى ودراستى فى المدرسه العربيه للسينما تجيب همها واعمل معرض صور فوتغرافيه عن المهن اليدويه انا كنت مصوره مجموعه حلوه قوى بس مش معايا دلوقت اللهم رد عليا ضالتى.


4.اعمل عمره فى رمضان واحج انا وابنى انا وابنى وازور الاثار الاسلاميه المتعلقه بالانبياء قبورهم والاماكن اليى عاشو فيها...وحاجه مهمه مهمه نفسى ابقى سبب فى ان شخص مش مؤمن بسيدنا محمد يشهر اسلامه وربنا يهدى اليى فى بالى..اه كنت هنسا حلم ربنا حقق نصه انا مغرمه بقراءات واصوات الشيخ مشارى راشد والصوت الملائكى ابو بكر الشاطرى وكان نفسى اصلى وراهم مره ربنا حققلى نص الامنيه وصليت المغرب ورا الشيخ مشارى كان فى نادى الصيد فى الاحتفال بالمولد النبوى والنادى يومها كان امم زى يوم الحشر بس كنت مبسوطه ان مشايخنا بقه ليهم شعبيه فاهمين قصدى طبعا كده باقى مين الشيخ الشاطرى اللهم حققهالى..


5.للمره اليى مش عارفه عددها نفسى الف العالم كله سفر تثقيفى واشوف معالم الدنيا وتشوفنى واحضر حفله لبراين ادامز واحضر مسرحيه من مسارح بردواى وبالاخص شبح الاوبرا اليى د. نور عارضه منها جزء فى مدونتها صعبان عليا حالنا.واشوف واتكلم مع يوسف اسلام كات ستيفنز سابقا وفيدل كاسترو ونتكلم عنه وعن جيفارا واشوف حسن نصرالله واشوف اشوف اشوف الخير كله....وفان جوخ اه هو مات من قبلى بكتيير كتيير خالص بس بحبه حب كان نفسى اشوفه قوى ..وبيبرس انا بحترم الشخصيه دى جدا وبيبرس مقتلش قطز ده افتراءات عليه..طبعا دول فى العالم الاخر انا بس كنت عايزه ااقول انى كان نفسى اشوف الناس دى ممكن فى زمن اخر ..انا مقولتش الصحابه والرسول ولا حد من الانبياء لان الحمد لله ربتنا نولهالى فى الحلم اه والله وانا فى ثانوى وانا متجوزه كمان فالحمدلله على ما اعطانى وعقبالكو ان شاء الله .واشوف كل المدونيين بقه واشوف الاطفال اليى مرميه فى الشارع ليها دار سكن ادميه تتطلع منهم اجيال مفيده وتحافظ على ما تبقى من ادميتهم..




السلطانيه التالته..اذكر شخصين على الاقل متواجدين فى حياتك الان كنت تود وجودهم قبل الان بزمن؟


1.عبد الرحمن ابنى وازاى معرفش بس كل يوم بيعدى بقول ياه يا ريت ربنا كان رزقنى بيه من زمان مع انى متاكده ان الرزق باوان ربنا محدده بعدين كان هيجى ازاى بخرف انا.


2.كل حد كويس عرفته وبيعرفنى وبيحبنى فى الله زى الناس المميزيين اليى هما انتوا ايها المدونون اليى معرفش عنهم غير معلومات يا عالم حقيقى ولا لا بس اعرف كويس انهم بيدونى نصيحه لوجه الله وبيدعولى دعوه بظهر الغيب هحتاج ايه تانى...اكتر من كده طمع.




السلطانيه الاخيره..لمن تهدى هذا التاج؟


لكل حد بيحب التاجات والاسئله دى سئلتها لاتنين معايا فى الشغل لقيت اجابات هايله..


ومش عايزه افرضها على حد مدون يمكن يكون مبيحبهاش بس ممكن تبقى مناسبه لمدونيين ومدونيين تانيين لا فحاسه انها مناسبه لي..


الريم صاحبة مدونة الوشاح


قررت اكون عانس ..هما مش انا


حاجات جوايا مع انها بتقول انه جالها قبل كده


د.نور صعبان عليا حالنا وحالى


رادار مدونة رادار واوعى المخالفه


الاغلبيه المخروصه لصاامته
سيبو فى حاله لو عجبك التاج خده مش عجبك مش هقولك سيبو فى كمل انتا بقه.

رصيف فريد شوقى رصيف نمره خمسه
do not prees f1 اتفضلى برس وجاوبى بقه
blue wave ادينا اجوبه شاعريه
نضال فلسطين ..حاسه ان التاجات مش لونك بس لو حابب تغير جو
اوريجنال هارت..ادينا اجوبه فى الصميم
ابن مصر..لا انا شفت فى مدونتك بتحب التاجات اتفضل يا ابن المحروسه
قصاقيص حبيبه ..اتفضلى قذقذى فى السؤالين دول بدال القصقصه
الاساتذه ..عصفور المدينه .ابو خالد.الطائر الحزين.الباحث عن الحقيقه .الجده فصيحه ...اهديكوا عنيه بس اعتقد ان التاج مش مناسب لحضراتكم وخايفه اسبب لكم ازعاج ....ومش مناسب يعنى سن حضراتكم ووقاركم بيناسبه تاجات اعوص من دى بكتيير اما الاخوه اليى فوق دول فرافير زى حالاتى ..ربنا ما يحرمنا من بركتكم وتشريفكم لينا و..يا رب ما ابقا عكيت الدنيا ...وكل رمضان وحضراتكم جميعا بالف خير ..
وشكرا يا زينب على السلطانيه الواسعه دى ويا رب يبقى فضولك شبع وجاتله تخمه كمان شكرا يا زوزه على اهتمامك يا قمره...


المعصوره من الاسئله واليى عايزه تتطلق محاسن..

كل حبايبى واخوانى واخواتى المدونيين بتأسف لاى حد مش ذكرت اسمه انا والله لو ااقدر اكتب اسامى بلوجاتكم فى سلسله واعلقها فى رقبتى ...ربنا وحده يعلم اى انسان بيشرفنى بزيارته وبتعليقه الكريم بيضفلى نفسيا ومعنويا بشكل غير عادى وبحمد ربنا ان لسه فيه محبه لوجهه من غير اى مصالح ناس بتدى اراء ومقترحات وبتخاف وبتدى نصايح الناس عمرها ما شافتها الحمدلله احنا كل واحد عنده مدونه يعرف انه فى نعمه كبيره ..واى شخص بيشرفنى فى مدونتى المزعجه ااقله ان حضرتك وحضرتك على دماغى من فوق بدون مبالغه ..ارجو انى مكنش دايقت حد ولا ازعجت حد ولا حد يتأثر سلبا بأى كلمه اكتبها او ااقولها ولو دايقت حد بأى شكل انا اسفه من هنا لكوكب المريخ بحبكم فى الله وكل رمضان وانتم بألف خير..وادام الله عليكم صفاء القلب وراحة الحال ودوام العافيه والوصول للسعاده ...اللهم امين ....




















الجمعة، 8 أغسطس 2008

انا والمحكمه وهواك(اليى جابلى برد)

يوم المحكمه زى يوم القيامه الكل بيتساوى فيه الغفير زى الامير والغفيره برضه زى الاميره تقدروا تقولوا تطبيق عملى لمبدأ المساواه ومبدأ مفيش حد احسن من حد ..ده المفروض قدام القانون طالما ظالم لازم وحتما ولابد تدفع نتيجة ظلمك وطالما مظلوم لازم واكيد ربنا يرفع الظلم عنك ويردلك حقك(وان شاء الله منصوره يا بنت جنسى دائما ابدا..ده لو مظلومه ولو ظالمه خدى على دماغك بقه اه الحق حق)انما وهيا انما دى اليى مجننانى دى ممكن الواحد..نخلى الكلام بصيغه انثويه عشان دى مشكلتنا احنا..ممكن الواحده يتحكملها وتاخد حقها اه ممكن انا جربت ده فى النفقه خدت حكم ب100جنيه لابنى و100 ليا شوفتوا الكرم ده وكأن اليى حكم مش عايش فى البلد ولاا هيدينى من جيبه المهم ادينى عامله استئناف يعنى جرى فى المحاكم لسنتين كمان يله انا ورايا حاجه يعنى لغاية ميتحكملى تبقى الدنيا ولعت اكتر وابقا انا وابنى قعدنا على باب الحسين(نشحت يعنى)..طب اتفرسنا من دى نتفقع من التانيه قضيه اتحجزت للحكم وخلاص رايحه اعرف الحكم..ايه اليى يخليها ترجع تانى للشهود حاجه غريبه قضيه بقالها سنتين وهو القاضى بلسانه وعقله قال خلاص جابت اخرها وحجزها للحكم يرجع فى كلامه ليييييه؟المهم انا حاسه كده لاما انا اموت وانا لسه ليا قضايا فى المحكمه او ربنا يكرمنى واشوف القضايا دى تخلص واخد حقى وحق ابنى على حياة عينى او موتها اهه اخده وخلاص على فكره انا دخلت المحكمه وانا فى اول ال26 سنه وما زلت فيها وانا برضه فى اول ال29 سنه اليى ساعات بيحزنى قوى ان والدى الله يرحمه كان دايما يقولى اتنازلى عن كل حقوقك وخدى ورقة طلاقك هو طبعا مش بيأيد كلام طليقى لا ده كان خايف ومشفق عليا من سكة المحاكم وحفرها..انا مش عايز اشوفك كده..الله يرحمك ..وانا اصر مع بابا اا قوله مش هسيب حقى وحق ابنى انا مش كنت بعقه لان بابا كان ديمقراطى جدا معانا يعنى يناقشنا ولو اقتنع خلاص..المهم لما لقيته بيدعيلى عرفت انه زعلان بس مش غضبان عليا الله يرحمه كان مغرقنى حنيه انا وابنى حنان واهتمام وطيبه الله يرحمك يا بابا...احلى حاجه ممكن تشوفها فى المحكمه بقه انك تلاقى الستات بتتضحك او بتبتسم يعنى فى عز البلاوى دى بيتضحكوا..يا كرمك يا رب..قاعده جنبى واحده وابنها كل مره بيبقى نفسى ابنى يبقى معايا بس بأشفق عليه برده ةالجو ملبش بالمشاكل والهموم وهوا لسه صغير كفايه اليى امه فيه ..على فكره انا مش خجلانه من نفسى ولاا زعلانه على روحى انا بس زعلانه على اليى بشوفه فى المحكمه..حصل بعد كده وخدت ابنى معايا مره عشان ماما كانت مسافره ومفيش حد اسيبه معاه الذيذ فى الامر انى قولتله انها فسحه وهو طلع ولاا فى دماغه حاجه عيل بس بموت فيه...

لملمت



لملمت احزانى وحضنت احلامى

ومشيت بيها بعيد

وحيد هعيش تانى ..وغريبه فى مكانى

قدرى وما عنه هغيب

صدمه وألمتنى لطمه ووجعتنى

فى خيبة ظنى فيه

احساس وياما خنى وصديق وضاع منى

وطريق وتايه فيه

ايام بقضيها وسنين بعيش فيها

نصيبى وهعمل ايه

حياه ويحليها بس النظر فى عنيه

ابنى وهعيش عمرى

بأسمه انادى عليه

واصحى وانام برضه جوه فى حضن عنيه

وصدمه تجيب لطمه

وغربه ومعاها فرقه

مرار عايشه عليه

لكن مفيش فايده

غير ان ايدى فى ايديه

نعبر طريق واحد

نمشى فى مصير واحد

ويا رب ما نضيع فيه


الخميس، 7 أغسطس 2008

دنيا وحدووووووه



حاجات تفوت ..اشخاص تموت

بيوت تقع

اشجار شوارع ..مطر وشمس

فى نهار زحل

دنيا ساعات ..

تضحك وتبكى..

وبالقديمه تضرب وتجرى..

ما هى ..دنيا فانيه

ودا العجب..

الأربعاء، 6 أغسطس 2008

فلسفة الضرب والطرح والقسمه والنصيب

(الضرب) مش ضرب الارقام فى بعض والعياذ بالله انما ضرب البنئدمين ومش البنئدمين كلهم طبعا لانهم فئات ومستقل يعنى راجل لا يمكن ضربه الا من راجل زيه وست يمكن ضربها من اى حد حتى لو ام تضرب من ابنها بالجزمه والمنظر ده شوفته قدام عينى اليى اتمنيت ياكلها الدود ومشفش المنظر المؤلم ده ..وضرب الست فى قاموس سلوك الرجاله شئ عادى جدا جدا جدا وطبيعى خالص مالص بل انه حق مكتسب فتلاقى كل ما تناقشى راجل فى مسالة الضرب يقولك (واضربوهن واضربوهن ) ويطنش عامدا متعمدا بمزاجه الرجولى الشخصى النابع من منطلق فرض العضلات والقوه والسيطره ينسى واهجروهن وعظوهن وينسى بسبق الاصرار ومش بفعل الزهايمر ان الرسول الكريم اليى هوا اسوة كل مسلم لم يضرب امراه قط وانه ارشد اذا لزم الامر مع المراه اليى مبتفهمش (اه فيه ستات والله ما بتفهمش ولو فهمت كانت عرفت ان اليى بتعمله غلط)والستات اليى باءت محاولات ازواجهم معاها بالفشل وهنا فيه مساله انا نفسى وانا بكتب البوست ده داست على كرامتى ووجعتلى قلبى ومفاصلى هوا لو انا مختلفه مع جوزى ومش عارفه اوصل معاه لاتفاق على شئ ما ممكن نتخاصم انا وهوا او نهجر بعض اكلينيكيا وعمليا انما يضربنى ليه هوا زايد عنى ايه هوا راجل وانا ست هوا بيحط البذره وانا بشيلها دا انا وانا وانا ويكفى انى انا ام يعنى ام كل البشر وام الانبياء كلهم وبنتهم وزوجاتهم وبنات عمهم فيه ايه دا انا ست حوا ام البشريه يتقال اتضرب ...ارجع اطس نفسى بشوية ميه من الحنفيه واقولى يا حماره بودان كبيره ربنا قال كده امر الهى لا انتى ولاا كل الستات اليى شايله همهم من اول حوا للست اليى لسه متخلقتش تقدروا تقولوا بم ولو قولتوا تبقوا مبتفهموش ولو فهمتوا مكنتوش فكرتوا تقولوا كده (استغفر الله العظيم يا رب)ربنا اليى خلقنا قال نتضرب بس مش ضرب مبرح..بالسواك زى ما الرسوت الكريم ترجمه ده بخلاف ان الرسول الكريم قال لا يضرب الا شراركم ..يبقى ربنا قال نتضرب ليه؟هوا بقه اليى خالقنا فهوا عزوجل ادرى بينا فمش هتكلم فى نقطه زى دى تانى عشان مش هقدر اجادل فيها انا لو ربنا امرنى ارمى نفسى من الامبايرستات هرمى ده ربنا وانا من الناس اليى عندها ايمان مطلق بكل ما نزل فى الكتاب والسنه....فمش هتكلم فى الجزئيه دى خالص من منظور الدين...انما ارجع للموضوع الرئيسى التعيسى والهدف من البوست ده ان انتا ايها الرجل المترجل المسترجل المستقوى على الست ربنا قال فاضربوهن الرسول ترجم بالسواك وامر صراحتا وبكل وضوح للى مش بيشوف واعمى بصيره ضرب لا يكسر عظما ولا يحدث عاهه انما الرجاله يا سلام يمسك مراته ولاا اخته ولاا امه او بنته كانه فى حلقة ملاكمه ولاا حلقة سمك وهاتك يا طحن فى الدره اليى قدامه فتخرج الست( وعن تجربه) مكبله بأثار الهزيمه الجسدىه من جروح وصدمات ولكمات وزرقان ده بخلاف اللون الاحمر اليى بيلون وشها نزولا وسياحا على جسمها ناهيك عن الهزيمه النفسيه والنظره الدونيه لذاتها المتمرمغه فى الوحل لدرجة انها متقدرش تبص فى المرايه (عن تجربه برضه)...فبنائا ....على كل ده وحفظا لان كلام ربنا مش بيتطبق صح ولاا افعال الرسول بتترجم زى ما امر انادى من بوستى هذا بعمل رقم خدمه مجانى نجده فى اقسام الشرطه زى 911 زى امريكا وزى ليه احنا المفروض نخاف على حريمنا اكتر منهم واى واحده تلاقلى جوزها اتحول لغول وهينقض عليها وهيا مش قادره تتحول زينه وتدافع عن نفسها تتصل بالرقم ده وده لو امهلها القدر لذلك...والمطلوب طبعا من الرقم ده انه يرد ومش يدى مشغول ومش يطنش ويقول ستات قلالات الادب مش عايزين رجالتهم تضربهم سيبهم يا عم يتربوا...والاهم بعد الرقم والرد والمجيئ الفعال لنجدة الست ان سعادة الغول ياخد جزائه يعنى يتحط فى القفص ويتحبس كده قيمة اسبوع ولاا شهر يعمله بقه مرضى فى الشغل ولاا عرضه واعتيادى او اجازة ضرب زوجه المهم يعرف ويتعلم انه متجوز كائن بشرى جسمه ومشاعره حرمه مش مباح ليه انتهاكها وملرمطتها واذيتها وكل ما ابقا مدايق افرغ فيها شحنة غضبى....من اقوال محرر المرأه والمدافع الابدى عن حقوقها الرسول الكريم..
(اكمل المؤمنين ايمانا احسنهم خلقا وخياركم خياركم لنسائهم)
(وعن معاويه بن حيده رضى الله عنه قال:يا رسول الله ما حق زوجة احدنا عليه؟قال:(ان تطعمها اذا طعمت وتكسوها اذا اكتسيت ولا تضرب الوجه ولا تقبح ولا تهجر الا فى البيت)
الرساله تكون ووصيته الشهيره فى حجة الوداع واليى كل الرجاله حفظاها صم ..وبكم..(ألا استوصوا بالنساء خيرا)..وتمت يا رب صلت

الجمعة، 1 أغسطس 2008

أتقوقع



واتقوقع على احتياجى وانسا انك هنا


واستنا يوم التلاقى سنه وراها سنه


واقول تعيش ليا


حنينى وحيدى انا


وتموت لو يوم تهنى


او تجرحنى انا


وبصاحب كل ماضى وبحلم ببكره كتير


واستنا يوم القيامه عشان بقول تغيير


هدخل منه النهايه


اليى هيا البدايه


لشئ اكبر بكتير..

الأرغام


عندما تأتى الدنيا مرغما وتتعايش مع مشاكلها

رغما عنك وتندمج فى موجاتها...وتأخذك للقاع فأنت

حقا حقا فى مصيبه يا .... كوارثى التى تأتى تباعا

كورس ايطالى

bambina stanza

camera sorella

amica porta

من احلى اوقات حياتى لما كنت بحضر كورس الايطالى انا وعبد الرحمن

وحضورى للكورس بخلاف حبى للغات الا انى حسيت ان مشاكلى ممكن

تجرفنى لحاجه غلط ومش لازم غلط يعنى حاجه والعياذ بالله تغضب ربنا

...انما غلط يعنى هفكر غلط ..هأحبط غلط...هتعامل فى الحياه غلط

فالحمد لله ..خطوة الكورس دى انقذتنى انقاذ الغرقان فى محيط بلاش البحر الاحمر..