السبت، 24 يناير، 2009

امتى نقول للمطلقه مبروك

ده مش تحديث ده اعتذار.......

بعتذر بشده عن تقصيرى فى زيارتكم او تكملة الرد على التعليقات ..امبارح هاجمتنى موجة برد غريبه اول مره تحصلى تكسير غريب فى العضم مع اعتلال ملحوظ فى الصحه انا قلت هدوس على نفسى وارد على التعليقات بس والله مش قادره والبوستات الجديده عينى اليى عماله تحرقنى دلوقت هتطلع عليها عشان ااقراها واتابع جديدكم
انا اسفه والله وخجلانه جدا جدا منكم ..حتى حاولت ازور مدونات مقدرتش هيا مدونة مرمر وكنت هأغمن على روحى

وحاجه كدهمهمه قوى استاذ ابو شو شو حضرتك نورت المدونه تانى وتالت ونفسى الاقى لحضرتك مدونه مفتوحه
اتمنى فعلا ...وبعدين انا مش عارفه لينك الفيديو اليى حضرتك بعته بتاع ايه هو عامتا مش بيفتح بس يا ريت تكون حاجه حلوه واكيد هو حاجه حلوه طالما من حضرتك....
اسفه والله وارجو محدش يزعل من تقصيرى ارجوكم ارجوكم
وادعولى بيرو مياخدش البرد ده منى اصل الحكايه مش ناقصه دى بالذات
...تحديثاتى زى وشى عايزه تجميل ....اسفه كمان مليون مره بس انا التعب مبهدلنى فعلا

تحديث وتحفيز وبينهما خبر.....
.................
السلام عليكم ازيكم يا جماعة الخير بجد انا لسه راجعه من القاهره حالا واول ما دخلت البيت على المدونه علطول بجد انا مبسوطه بتعليقاتكم وفرحتكم ارآكم قوى قوى

فقرة امبارح من برنامج كل ليله كانت من اروع ما يكون انا كالعاده اتبسطت قوى قوى استاذ شعبان يوسف اليى كان معايا فى الفقره من اروع ما يكون هو اديب وليه اهتمام خاص بالمدونات وكان شريك من افضل واروع ما يكون فى البرنامج ....والحوار وموضوعه كان حلو قوى
حتى المذيعين من اجمل واظرف ما يكون اسامه منير واضح جدا ان مش صوته بس اليى مميز لا وروحه كمان شخصيه متحدثه وودوده جدا جدا
وهبه الاباصيرى من ارق ما يكون ولا تقل ود والفه وروح حلوه عن اسامه يعنى بجد حلوه من بره وجوه

والاستاذتين الرائعتين الجميلتين الظريفتين المميزيتين.. هو الجمع ده تانيث اعتقد..
هما على العموم معدتتين فى البرنامج استاذه وفاء الرائعه واستاذه محاسن الجميله ام قصة شعر حلوه وام اسم على اسمى ..... الاتنين من اروع واجمل ما يكون
شكرا ليكم جدا على كرم اخلاقكم وذوقكم معايا
انا يا جماعه بجد اتبسطت قوى قوى من الفقره الذيذه دى ويا رب اليى شافنى تكون عجبته
.....................
انا هستريح شويه وهرجع علطول ازوركم واشوف جديدكم وارد على حبايبى وكلامهم الجميل فى التعليقات ..اذا حييتم بتحيه ...

اشوفكم ان شاء الله على خير كمان شويه ........
وشموسه شوفى عرفت اعمل التحديث اهه ...يموت المدون وايده على الكيبورد بتلعب..




آه انا ملخبطه ومتلخبطه ومش عارفه ابتدى الكلام ازاى ولا على اى شاكله ... بس اليى هعرف ااقوله

لما تبقى الست قضت جزء غير هين من عمرها فى جو حضرت المحكمه وتكون عاشت على اعصابها سنوات فى انتظار حكم يعوض ما فات وتستنى وتستنى عشان يتحقق المراد اليى بيعجزه بعد كده طريق تانى فرعى ورئيسى اسمه استئناف ولما يكون بان قدامها من وسط طريق الضباب شعاع بسيط بيقول ممكن نغير الاتجاه ونسلك طريق اخر فى سبيل اشياء اخرى ...تبقى غلطانه لو ما مشيتش وجريت ورا هذا الشعاع حتى ولو سراب

واتكلم بوضوح بدل المتاهه اللغويه اليى انا عملاها دى

يا جماعه انا بعد المشوار الطويل نفسى اتقطع ومش ضعف لا انا صحتى ولا صحة تايسون ابو عضلات انما لان انا مشيت فى الطريق لاثبات حق ما وعشان اضمن حق ابنى وما انقصش من حقه شئ ممكن اتحاسب عليه فيما بعد قدا ربنا ولانى كنت عايزه احقق شئ ربنا بغضه بس حلله الا وهو الطلاق للضرر

بس لقيت ان فيه بادرة خير ومعاهدة سلام ولاا كامب ديفيد ولقيت ان سكة المحكمه مش هتوصلنى لشئ الا لو نويت انى احتفل بعامى الثمانيين فيها ..وبرضه هيفضل الدافع لانى احقق شئ مش مستمتع بلا شئ الا وهو ابنى ..فلقيت ان ممكن بشوية تنازل كتير او بسيط منى اضمن لابنى انه يعيش حياه مستقره فيها حب من عاتلتين ورعايه من بشر كتير اعمام وجدود واب مكنش يعرف شكله ايه واخوات من ابوه يحبهم ويبقى قدوتهم واخوهم الكبير ولقيت انى ممكن اخد ورقة طلاقى وانعم برؤية ابنى فى جو ناعم وخالى من المشاحنات وعليه انا اتطلقت فعلا يوم الثلاثاء الماضى وده نصر ليا مش هزيمه وعرفت انه نصر بعد ما ابنى قضى يوم الجمعه مع والده واعمامه وجده وجدته شفت فرحه فى عين ابنى وحسيت بحب ليه

يبقى ليه اكابر واحارب على شئ فى النهايه ممكن اوصله بطريق تانى وليه احارب على حق ابنى وهو اكيد الحب والرعايه والحنان اليى هيشوفه اهم اهم بكتير

.............

انا حاليا وفى الظروف دى مقدرش اشجع واحده على انها تفضل مستمره فى طريق المحاكم ده اليى تقدر على انها تاخد حقها من غير الطريق ده تاخده

وثغرات القانون مش هسيبها انا وراها والطريق طويل فيه خطابات شجب ..حلوه شجب دى زى تصريحات القمم العربيه .. وادانه بالمره

وفيه وقفات ستتزامن مع وقفات عيدى الاضحى والفطر للمطالبه والتحفيز على سد الثغرات القانونيه دى ومسح المعاناه المريريه عن كاهل ستاتنا الغلابه والمساكين والدعاء صدقه لينا

وطبعا هعلنكمبكل جديد وسأخطركم باليى هيحصل اولا باولا



...............

حته على جنب

....

على فكره وانا فى الطريق ورايحه بابنى اول زياره لبيت جده كنت حاطه امل كبير فى ربنا وبدعى كتير وكانكل همى اننى امسح لى شؤائب متبقيه من سكة النزاع اليى فاتت دى فقولت ايه يمسح كده غير انى ارجع اعمل زى ما كنت بعمل زمان الحاجات البسيطه اليى كانت بتحسسنى انهم اهلى وعليه

اول ما شفت جدى ابنى ميلت على ايده عشان ابوسها زى زمان لنه برضه فى مقام والدى

وبوسة دماغ جدة ابنى وقلتلها ماما تانى بعد ما كنت بقول طانت

وبكده اكون كسرت حدة وعنفوان النفس الاماره بالسوء عندى

وزوجة ابو ابنى بوستها ورغيت معاها لما صدعتها لانها برضه هتبقى ان شاء الله ام اخو او اخت ابنى فمينفعش يكون فيه اى ضغائن تجاهها

وابو ابنى بقئه بمثابة اخ لانى الحمد لله دى تالت طلقه وفعلا يسعدنى جدا انه يكون اخ وبار كمان



انا كنت يوم الجمعه بسعادة عبد الرحمن فى قمة واوج سعاتى

وبان الامور ماشيه كما ارجو من الله سبحانه وتعالى فى قمة افرست بحالها من الرضا والسعاده

وحسيت ان اى شئ راح واتنازلت عنه سعادة ابنى باهله وبيوم زى ده لا يعوضه اى شئ وفداه كل شئ



الستات اليى فى المحاكم والله ما هتخلى عنكم ولا عنى لان فيكم مستقبلا وبعد الشر يعنى اى حد عزيز عليا واليى هقدر عمله وقفات ووقفات لما يجيلى دوالى ساقين كمان عشان نعدل شئ فى قانون الاسره

وربنا عالم ان نيتى خالصه لوجه انا كده مليش مصلحه زى ما عمرو حبشتكنات وشموستنا كانت قالت انك حتى محدش هيقول دى بتحارب عشان نفسها..شموسة النهار او ملاك النهار بالاحرى



........................

معلش الكلام ملخبط والبوست غير متزن بس انا مستعجله ومرتبكه النهارده فيه ليا لقاء فى برنامج اسمه كل ليله على النيل للمنوعات الساعه 9 انا قلت للمعده هما اكيد اتصلوا عليا غلط فيه مدونيين كتير افضل منى فهيا قالت عشان المدونه قلت ماشى يمكن نعرف نعمل حاجه

انا قلت مع انى مبحبش ااقول اصل بصراحه شكلى بيبقى وحش فى التليفزيون انا فى ارض الواقع ااقرب ما اكون لصوفيا لورن بس وهيا كبيره

كل اليى بيسألوا عليا ربنا يكرمكم من كرمه الواسع وانا اسفه انا غبت انا شكلى اتعملى عمل مع كل بوست جديد يحصلى حاجه ومشاغل واغيب عنها عن التدوين بس راجعه ان شاء الله للزيارتكم ودوشتكم تانى وهرد على تعليقات البوست اليى فات

بس بعد بكره ان شاء الله

دعواتكم واسفه لو صدعت حد او خيبت امل حد فيا

انا طول عمرى وحشه وتصرفاتى هوجاء وعمياء وغبيه انا اسفه جدا ليه ولمين وعشان ايه الله اعلم بس اسفه وخلاص

آ ه صحيح خلاص ايه وعليه لما تكون الامور انتهت بالصوره المريحه دى او على الاقلل لحد كده يبقى نقدر نقول للمطلقه مبروك ويا ريت متشوفيش غيرها

بس المدونه واهدافها مستمره لحد ما اروح المكان اليى متر فى متر ..لا لا مش السجن ..القبر قصدى القبر فاتطمنوا ستظل عايزه اتطلق و هيا عايزه اتطلق و

ويمكن فى يوم اكون سبب ما فى راحة بال واحده فى يوم كانت معاناتها زى معاناتى

شموسه انا حاولت انقل التحديث من تحت لفوق زى ما قلتيلى معرفتش خالص مبيتاخدش كوبى بتاتا فايدى اخدتنى لبوست جديد وخلاص ...اصل متعرفيش دماغى نصها حشو فاضى وساعات كتير مبفهمش فى التكونولوجيا ولاا ابجدياتها حتى فاسفه معرفتش اعمل اليى وعدت حضرتك بيه
اسفه جدا جدا كمان

الأحد، 18 يناير، 2009

كل واحده ونص وواحد يحطوا نفسهم مكانى لا مكانها

كان املى انى انزل بوست غير ده شاغلنى بقالى فتره
بس مفيش طبعا شئ يشغل ويبهدل الكيان ويعصف بالحاله النفسيه زى اليى انا فيه دلوقت
القضايا بقالها من 2005 وهيا بتتأجل وبتتأجل يعنى لحظة سعاده وانتصار ما من عمرى بتتأجل معاها
انا يا ساده عمرى راح فى المحاكم وشعرى ابيض من هول ثغرات قوانينها
واليى طلعت بيه من ال تلات سنيين ونص او اربعه مش فاكره هو قرار تمكين مناصفتا بشقة الزوجيه اليى سعرها وصل حوالى 700 الف جنيه زى ما جارتى العزيزه شقتها جابت فى اخر تتمين ليها ..
وبخلاف القرار المصيرى بنفقه شهريه للصغير ب100 جنيه ليه و100 لامه رضا رضا رضا قوى ده حتى المبلغ ده بيكفى اى صغير ويفيض ده على اساس ان الصغير كتكوت بكبيره قوى شوية دره يشبعوه
المهم انا هسبنى منى ومن حالى الممل ده وهدخل فى حال قريب ليا
دلوقتى واحده عزيزه عليا وعليكوا والله ودى مش فزوره خالص خالص دى لزوم ترويق الجو العاصف بقنابل الفوسفور والدردنيل
المهم عزيزتى دى بعد ما كان طليقها بيقلها اتنازلى عن كل شئ واديكى ورقة طلاقك دلوقتى الامر اتطور بعد قرار التمكين وبئه بيقلها طب خدى الحاجات اليى جبتيها ونص مؤخرك وكتى وقولى يا فكيك
طب نفقة الولد ؟
ابد ابدا ابدا
طب لا لا لا وانا والمحاكم والله المستعان

شويه بعد البلطجه والملطجه والعب بالقوانيين حوالين الشقه يعنى لقي ان قرار التمكين صعب العب بيه او مش بالساهل والشقه يا ناس كانت متاجره على عفش الغلبانه مفروش بخمس تلاف جنيه فى الشهر فالراجل الراسمالى العصامى بيتجنن كل ما يفتكر ان الشقه كل يوم بيمر من غير ايجارها بيخسره فلوس وهو يخسر عمره وفلذة كبده اليى اكبر من كبد الحوت ولاا يخسر مليم حتى ولو على شئ مش من حقه بالضبط ..
ده حتى اتجوز وقعد فى الشقه عشان يضيع عليها التمكين لقى الامر برضه صعب .. والله لسه فى قضائك خير يا محروسه... والمواسم عماله تيجى الموسم ورا الموسم والشقه سعرها بيزيد وكل ما التقييم المادى ليها يعلى يزداد جنونه وشغفه اكثر واكثر بالشقه يعنى مش برؤية الغلبان ضناه وعليه رجع للست اليى احلىسنيين عمرها اتفنت من اجل حقها وانها تنول شرف انها تاخده بالمحاكم طالما الذل للمرأه للركب يا عينى وااقل حاجه تتقال خلى المحاكم تنفعك المهم رجع بعد اخر تسعيره للشقه ولاا تسعيرة اللحمه وبعد ما غلب حماره الحكيم فى العب المتين فى قرار التمكين مش بفعل ضميره يعنى
انه يعرض على الست ام كعب داير فى المحاكم دى انها تاخد مؤخرها اليى هو 20 الف جنيه مش يورو و5 الاف جنيه نفقه متاخره عليه حيث انها بقالها حوالى 8 شهور بتصرف نفقه للكتكوت قصدى الصغير البرئ يعنى قبل كده 3 سنيين اهلها هما المتولينه ومتولينها بس عايشين ايه منتهى الدلع ربنا برضه مش بيخلى كل شئ غوامق غوامق لازم طاقة نور فى النص
المهم و5 كمان زيهم اسمعوا دى قيمة دهبها اليى الزوج المغوار سرقه واليى اصلا كان عباره عن محبس الماظ وواكمل ولاا كده كفايه كده كفايه يعنى الخمس تلاف دول ميصلحوش حاجه منه لو اتكسرت
وفوق كل الكرم ده كان مصر بصراحه على 100 جنيه نفقه و150 اجر مسكن ده على اساس انها هتسكن بابنها فى عشش فيلم حين ميسره .. وبعد طبعا ما قالته الشقه هتجيبلك ايجار 7 الاف جنيه زى ما انتا قلت بعضمة لسانك قالها خلاص هما 350 جنيه واذا كان عاجبك ودلوقتى ام عمر ضايع فى المحاكم دى محتاره قوى وواقفه على تراتيف صوابعها مش من رقص الباليه لا ابدا ده من التفكير
تعمل ايه ..تعمل ايه..؟
دلوقتى قدامها خيار ومش مغسول كويس انها تفضل فى طريق ضئ القناديل وفى سكة المجبرين المحكمه وتفضل فى التشتت ورحمة ان ممكن فى يوم تسمع بودانها انها اخدت حكم ويا سلام بئه لو بعده مفيش استئناف وده من المستحيلات الاربعه وانها كمان تفضل تحارب تحارب على تعديل الثغرات بس ما هيا عارفه انها ممكن تموت وتتحلل والثغرات تفضل ثغرات بخلاف انها مش حاسه انها بتعمل حاجه لغيرها قوى قد ما هو لنفسها الشريره الست الوحشه دى
او انها ترضى بالقهر الراهن قصدى يا جماعه الوضع الراهن وتقبل وتستعوض المولى عز وجل فيما اخذ وتنفد على راى طليقها بجلدها املا واملا وعمرا فى انها تربى ابنها فى ارجاء اهدئ من قاعات المحاكم وان ابنها مش يلاقيها لابسه الصبح ويقلها رايحه فين يا ماما ؟
تقله رايحه اشم هواء مرافعات فى المحكمه
وانها تتفرغ بكل حرقتها وكبتها ومرارة ما حصلها وتدافع بروقان بال عن كل اليى زيها يمكن فى يوم تقدر تعملهم حاجه ويكون ده سبب قوى فى دخولها الجنه اليى صاحيه قايمه بتحلم تشوفها من بعيد حتى
وانها كمان تنفذ امل ورغبة والدها الله يرحمه اليى مكنش راضى على الطريق ده من البدايه وكان مصر على تنازلها عن كل شئء وتنفد بجلدها هيا وابنها اليى كان بيزعقلها لو بس صوتها عليى عليه وقالتله ده غلط
بحجة ايه انه محدش يزعق لبيرو حفيدى وانا عايش ده ابن روحى وياخده فى حضنه حضن مش هيحس زيه تانى لا هو ولا امه
هيا مش كانت واخده طرق ا لمحاكم دلع هيا لجئت ليها مرغمه لانها اتزلت وهيا متجوزه وعانت وهيا مطلقه وشافت ان الست كوره شراب فى رجل الراجل وده اليى حصل معاها اتضربى اتبهدلى اتنازلى اتمرمطى اصلكوا ملكوش قيمه واخرتكوا بتترموا فى المحاكم .. هيا الغلبانه حبت تثبت لنفسها وللمجتمع وليه انها قويه وان المجتمع والشرع كفلها حقوق من الصعب والعار انه تتنازل عنها
لقيت الغلبانه الامر غير كده لقيت ثغرات قانون تذل وتطول العمر فى المحاكم بس مش فى الدنيا
ولقيت مجتمع فيه ناس بيبصوا للست اليى بتحارب على حقها على انها طماعه وجشعه مع ان ده اليى ربنا شرعهه لها او انها ست يا سلام على سلوكها المنحرف وبجاحتها منقطعت النظير
واه البيه الطليق معتمد على ان ابوها قضى عمره فى الغربه وانه راجل كان حيلته قرشين وانهم عايشين كويس فباصص ليها انها تصرف على الولد ما انتوا تصرفوا على قاره ..قارة ايه دى انا معرفش يمكن اطلنتس القاره المفقوده

يا جماعه الست الغلبانه ام الولد اليى بتحارب على اى مليم عشانه واليى خايفه عليه من الدنيا ومرعوبه لتسيبه فى ثانيه وترحل لعالم اخر ميبقيش حد يحن عليه ويتغمده بالعطف الا اهلها طبعا اليى مش محسسينه بحاجه ولا حارمينه من اى حاجه

تعمل ايه هيا تتنازل وتقبل
ولاا تكمل فى سكة الالف مطب وثغره

ارجوكم افيدوها عشان هيا محتاره ومقهوره ومخنوقه وتعبانه وخايفه كل لحظه انها تكون بتعمل شئ ضد ارادة باباها وانها تكون بتضيع استقرار وامان ابنها من ايديها يعنى ولد يكبر يلاقى امه فى المحاكم شئ يدعو للنشأه الغير سويه نفسيا على الاقل

بس هيا ايه مصره على تعديل القوانيين دى وهتعمل وقفات احتجاجيه ولاا وقفة عيد الاضحى وناوياها نيه انها تفنى ما تبقى من عمرها عشان تدافع عن كل حق وليه ..ست ..امرأه..حرمه يعنى ..مكسورة الجناح وبتصوصو ولاا مؤاخذه
معلش البوست طويل بس صبركم شويه
وبعدين يعنى معرفش اكرم صاحبتى يعنى عندى فى المدونه ولا ايه واعرض مشكلتها من طئطئ للسلام عليكم...
اه نسيت ااقولكم واوضح لكم برضه ان الزوج عامل تمكين للزوجه التانيه فى الشقه وان ابو الزوج جد الولد البرئ عامل لنفسه تمكين كمان بس لسه متحكملهمش يعنى الكل بيحارب صحبتى فى الشئ الوحيد اليى القانون ادهولها فا التوضيح ده لازم منه عشان تعرفوا تدوها راى سليم ..على اساس ان الشقه ام 700 الف حديده وحديده على مهب الريح معاها برضه وده لو لو التمكين طاله من الثغرات ما طال باقى القوانيين...
ومعلش طولت عليكم انا وصحبتى رغيين بئه من شابه صديقته فما ظلم...

............................
تحيث واخر الاخبار...
على فكره اليى خلا صاحبتى تفكر انها تخلص باى شكل هيا نصيحه مدونه معروفه ومحبوبهوحد من ارق كائنات البشر واكثرهم دماثة خلق وحلاوة روح ....
الا وهى شموستنا شمس النهار
بصراحه مكالمه تليفون منها فيها نصيحه صادقه من انسانه حبيبه وعزيزه ولا يهمها الا مصلحتى ومصلحة ابنى ..قصدى مصلحة صحبتى يعنى ومصلحة ابنها
وعليه عشان قلبها طيب ونصيحتها صادقه انا سمعت النصيحه
....انا رايحه انا وصاحبتى يعنى اخلص الموضوع الطويل والمجهد ده
ارجو منكم الدعاء والدعاء والامن من مكر اى ماكر
استودعكم الله وصباح الخير
ومحدش ينسانى من دعائه لحد ما ارجع
قصدى صاحبتى برضه

السبت، 10 يناير، 2009

حتى لا تكونى لصة اندروير

المقهوره والندله على باب شقتها اليى هيا مطروده منها واليى واخداها تمكين (بالنص يعنى هو حيطه وهيا )

مقهوره:ازيك يا علان ؟
الندله: انتى جايه عايزه ايه؟
مقهوره : هيا الشقه دى مش تمكين بينى وبين جوزك انتى اليى المفروض بتعملى ايه هنا بس معلش مش عايزه ارميكى فى الشارع كفايه عليكى علان هديه من ربنا بصراحه تكفير ذنوب
علان :هيا ليها فى الشقه زى ما ليكى ؟
مقهوره :فى قانون مين انا فاهمه القانون كويس بس انا سايباها وسايباك لما اخد ورقة طلاقى هيطلعكوا القانون مش انا
علان :خلى القانون ينفعك اديكى فى محكمة الاسره عملتلك ايه ولا حاجه
..وبعد كلام يحرق الدم واحنا اكيد دمنا محروق طبيعى من حال غزه والعراق ومنتظر اليى مش عارفين عنه حاجه..فنقصر ونكمل
مقهوره : وهيا مذهوله ايه ده هدومى ( ممسكه بقطعه شديدة الخصوصيه ) قميص نوم واندروير يا لهوى
قميص نومى بيعمل ايه هنا (بصوت عالى) مقهوره بئه
الندله :دى مش حاجتك دى حاجتى انا (زى ما اسرائيل بتعمل كده ارضى انا وربنا كتب عليهم الشتات اصلا)
مقهوره :ازاى افهم واكسسواراتى يا ربى الاندروير حتى انتى مبقرفيش
الندله : الحاجات دى حاجتى ومنتيش واخده حاجه
مقهوره : بموجب اى قرار سياسى .. علان دى حاجة مين (سكت شويه حاجتك)
مقهوره : وهيا مذبهله ان الدنيا فيها بشر كده ..طب ازاى تقبلى على نفسك تغتصبى حاجتى وتغتصبى كرامتى على بعضها تسرقى حاجتى وادق خصوصياتى كمان انا مش زعلانه على الهدوم والاندروير دى حاجات بتدوب وبتنتهى زى أعمارنا انا زعلانه على البشر اليى بتلبس الاندروير اليى مش بتاعها
الندله : ملكيش دعوه وامشى اطلعى بره قبل ما اتبلى عليكى
مقهوره : سبحان الله اعترفتى اتبلى عليكى انتى مش حاسه ان اليى بتعمليه فيا وفى ابنى ده حرام مش حاسه انك بتساعديه على ظلمى
الندله : لا طبعا انتى اليى مش عايزه تتنازلى يعنى غاويه مشاكل
مقهوره : ااقولك حاجه الدنيا بتلف بسرعه زى عقرب الثوانى كلها مش اكتر من سنيين معدوده ده لو مكنتش سنتين بالكتير وهتتعاد الكره فيكى وسيناريو محدث ومضاعف وبعدين يا بنتى ده مطلقنى شرعا هو اليى مش عايز يدينى حقى
الندله :بنظرات شرانيه وغلانيه زى نظرة نظرة جنود المرتزقه للشعب العراقى ملكيش دعوه
مقهوره : ربنا يهديكى وينورلك بصيرتك واه نسيت حسبى الله ونعم الوكيل اصلك تستاهلى الدعوه دى قوى
يا حرامية الاندروير حاجه تكسف لا تقرف

اوعى تكونى يوم من الستات اليى بتسرق الملابس الجونايه لست تانيه بمعنى لو قدرلك بشكل ما انك تكونى زوجه تانيه على زوجه طبعا او زوجك المغوار يكون متجوزك على طليقته شرعا اليى طبعا مطلع عنيها ومبهدلها واكيد اكيد ام اولاده (شوفتى الوفاء اتعظى) شوفى يا ستى وما ستك الا جدتك اوعى تبقى السلاح اليى بيحاربها بيه وحطى نفسك مكانها وانك فى يوم ممكن تكونى زيها او نقول ده اكيد فمتجيش تتقمصى دور اللص الندل وتدعبسى فى خصوصياتها وتسرقى محتويات ما كانت شقتها والاربع حيطان بتوعها يعنى عيب قوى تسرقى هدومها الشى اليى بيبقى لازق فيها يعنى ده شئ فاق النداله والوضاعه بمراحل
ولو انتى قدرلك انك يتقدملك بشكل ما برضه راجل متجوز او عايز يتجوزك على مراته بدون علمها او ليه طليقه مجرجرها فى المحاكم اوعى اوعى اوعى (تلاته اوعى ) وحذارى انك تكونى سبب فى خراب بيت حد ..اوعى تسرقى زوج واحده تانيه لان دى زى سرقة الاندروير بالضبط
.. الموضوع ده انا شفته حصل فعلا والعبره مش فى الهدوم دى ماسافة ما بتتلبس بتبقى باله زى ما بيتقال العبره هنا فى السرقه المعنويه وان ست تناطح ست فى حقها وتكون سلاح للزوج يضرب طليقته بيه
ثانيا الشقه مش الكفاح عليها عشان ثروه ما الشقه بالنسبه للمطلقه وقف حال يعنى مش من حقها تستنفع بيها الا للحياه فيها فقط ولو اتجوزت بتروح منها للزوج فتخيلوا الست بتضحى بحياتها ومستقبلها وعمرها عشان تضمن لاولادها مسكن اربع حيطان ابوهم مستخسرهم فيهم ..
ثالثا انا مش مصدقه نفسى انى فى الداشبورد وبكتب انا كنت غايبه وغيبتى طولت بس كان غصب لان كان عندى مشاغل لا حصر لها ومشاكل للركب يا دنيا والنت كمان كان مغمن عليه والدنيا كانت مبهجه قوى كالعاده بس الحمدلله بس الغيبه دى اكدت لى ان انا مليش حياه مثاليه واوكسجين نضيف استنشقه الا هنا فى عالم التدوين والمدونه حصلها حاجات حلوه قوى كتابيا فى الصحف وانا هنزل الموضوعات دى تباعا
بس والله وحشتونى بشكل مش هعرف اعبر عنه وبجد ربنا يبارك فى العالم ده وميخصسوش البلوجر يا رب
والناس اليى سالت عليه مش عارفه ااقدرهم ازاى بس يكفى انى كل ما اشوف تعليق او استقبل مكالمة تليفون من حد بدعى لصاحبها بالغيب ودعوه من قلبى لان ده هو الحب فى الله فعلا ربنا يكرمكم ويسعدكوا جميعا فى اولادكوا وحياتكوا ويبعد عنكوا شياطين الانس اليى غلبوا فى مكرهم شياطين الجن
..........................................

تحديث تحديث تحديث واحنا لسه بنقول يا هادى

يا جماعه مش انا اليى اتسرقت انا كنت شاهد عيان فقط

وبالنسبه للناس اليى صدمها كلمة الاندروير فى البوست يا جماعه مكنش ينفع انى اكتب الموضوع من غير ما اكتبه بصورته الفعليه لان الانحطاط وبشاعة ووقاحة الموضوع مش هتبان ويظهر مداها الا بكده بصورتها الفعليه

فللى شعورهم اتجرح انا اسفه بس شعور الست اليى حصلها كده اتجرح واتقطع اكتر وطرنشات كمان

واسفه لو الكلمه مش حلوه او انتوا مش اتعودوا منى انى اكتب كده بس واقع موضوعات الحياه ومقالبها اكثر جرئه من الكلمه نفسها

اسفه كمان مره لو مشاعركوا اتجرحت

وللمره التالته برضه مش انا صاحبة الموقف ده او مش بالضبط (سامحنى يا رب ) ههههههههه ااقول ايه معلش استحملوا بقى