ثغرات قانون الاسره..معقول يحصل كده وسوزان مبارك السيده الاولى

من غير كلام كتير عشان انتوا عارفينى مصاحبه الرغى كأنه صديق طفوله
انا من واقع السنين والشهور اليى خللتها فى المحاكم ادركت كده وجالى الهام بس مش شاهين ان قوانيين الاسره فيها مطبات وحفر ومنحدرات تجرف الست لقاع الدنيا
وعليه طلعت بشوية رمل ممكن تردم الحفر دى لعل وعسى نعرف نردمها بأذن الله تعالى
او حد غيرى يردمها اهه المهم تتردم وتتصلح طرق المحاكم اليى بتمشى فيها الست وعليه شوفوا كده....لا ااقروا وحسوا كده
1. رفع الطاعه مره واحده من قبل الزوج (حتى لا تكون أداه فى يد الزوج لتعذيب المرأه قضائيا )
ليه الطاعه تترفع ستين مره لما ممكن تترفع مره
يمكن قانون الطاعه العمياء الرجل من ان يرفع مئات من طلبات الطاعه على الزوجه وهيا مجبره ان ترد عليها برفع مئات من الدعاوى القضائيه مما يهلكها ماديا ونفسيا
واذا لم ترد المراه برفع دعوى فى خلال 30 يوم من تسلمها الانذار تعتبر ناشز وتضيع ومعها يضيع كل حقوقها
فعليه رحمه ونور بالست ان الطاعه متترفعش الا مره واحده ( وماذا يحدث اذا تلاعب المحضر مع الزوج وكأن الزوجه استلمت الاعلان وهيا لم تستلمه ولم تعلم عنه شئ سيتطبق عليها القانون بلا ادنى تفهم ولاا رحمه ..ده مثال فرضى

2. سرعة البت فى قضايا النفقه (يعنى الست اليى ملهاش دخل تانى تأكل ولادها منيين تأكلهم فى نفسهم )

سرعة الحكم فى قضايا النفقه يعنى دى مش قضيه جنائى يعنىلو اتحكم فيها من جلستسن ميزانيةجيب الزوج مش هيحصلها حاجه
...وسرعة صرف نفقات جميع الزوجات والمطلقات من بنك ناصرحتى اذا لم يستلم الزوج الاعلان ولم يستدل له على عنوان ويحصل من الزوج لاحقا ..البنك مش هيفلس ..بس الست وولادها ممكن يتشردوا
(يعنى ست ربة منزل تاكل منيين هيا واولادها لو الهوا بيتاكل ماشى بلاش يتصرفلها نفقه )

....تعديل احكام النفقه للزوجه والابناء بما يلائم الواقع الاقتصادى الحالى الذى نعيش فيه فلا يعقل ان تأخذ زوجه وابنائها 150 جنيه مأكل وملبس ومدارس الا اذا كان زمانها غير زمانا

3. الحكم بتتطليق الزوجه التى مر عليها فى المحاكم اكثر من عام
اذا كان الشرع بيأمر الزوج ان لا يغيب عن زوجته اكثر من 6 شهور فما هو الوضع بالنسبه للزوجه التى مر عليها فى المحاكم والنزاع اكثر من سنه وسنيين فى المحاكم والزوج بالطبع تزوج من اخرى (الحكم لها بالتتطليق فورا لأنه الزوج عايش حياته بطبيعيه مره اخرى اما الزوجه فحياتها توقفت عند باب المحاكم )

4.اثبات المنقولات الزوجيه للزوجه
بوجود قايمه او قاعده ..المنقولات الزوجيه من حق الزوجه كما امرنا الشرع بأن كل ما تدخل عليه الزوجه متاع وعليه فلابد ان تثبت كل المنقولات الزوجيه للزوجه سواء بقايمه واثبات رسمى او لا بمعنى ان لا تسرق الزوجه اذا اخذت عفشها وهيا لا تملك القايمه

5. خصخصة الاجراءات الروتينيه للقضايا ( يعنى الست ممكن تموت وهيا لسه مخدتش حكم الطلاق )

تكون خطوات قضايا النفقه والطلاق فى خطوات محدده حتى لا نعطى للروتين فرصه للبطء فى القضايا وتعطيل سيرها من حيث التأجيل كل فتره فتكون القضايا
-الطلاق مثلا
1.رفع الدعوى (من الزوجه) سواء رد على طاعه او ضرر
2 جلسة الصلح والتفاوض
3 جلسة سماع الشهود
4 جلسة الحجز للحكم ثم الحكم
..يعنى صلح ومنفعش شهود وزوجه اثبتت ان عليها ضرر تبقى تفضل فى المحكمه اكتر من كده ليه ايه الهدف لو البنئدمين بيتخللوا كنت قلت هيعملونا مخلل )

.....النفقه مثلا
1. رفع الدعوى
2 الصلح والتفاوض ..يعنى يدفع بالتى هيا احسن..
3. تحريات وحجز للحكم
4.الحكم ويا ريت والنبى ينفذ
..فيه اجراء فى سيرقضايا النفقه اسمه تحقيق وسماع شهود طب بالذمه مين هيتطلع على خصوصيات واحده واولادها ويعرف بيصرف ولاا لا وهيا فيه ست هيعجبها انها تدخل المحكمه برجليها كده لمجرد انها ترفع قضيه ..معتقدش ان المحكمه فسحه حلوه..
( الهدف قص كل التأجيلات والتعطيلات فى مجرى سير القضايا )

6.قانون 1 لسنة 2000بينص ان الطلاق لا يعتبر بات الا من قرار من محكمة النقض
انا مش هتكلم انا هقول بس ان قانون زى ده بيقضى على اى ادميه فضلت مع الست من مشوار المحاكم يعنى يضيع عمرها هباء عشان بس فكرت تاخد حقها اليى ربنا شرعه ..
اعتقد قضايا القتل والجنائى محكمة النقض تدخل فيها اه انما الاسره مستقبل انسانه بشر واحده بتعيش وبتحس ايه دخل النقض بيها ليه القانون يسرق من عمرها سنيين كمان وتضيع طاقاتها فى قاعات المحاكم تانى
اى حد بيقرا يقولى بالله ايه الهدف من القانون ده
................................
الثغرات دى مش ضد الرجاله بالعكس انا لما فكرت فيها فكرت فيها مش عشانى لانى يله حسن الختام رجل فى الدنيا وطراطيف رجلى التانيه حاسه انها فى الاخره انما بتمنى ان تتعدل القوانيين دى لسبب
اولا: ان ازاى بنطالب بمجتمع متزن ومثالى وقانونه بيعامل اهم اعمدته بالشكل ده
ثانيا: انى مش عايزه اى بنت يحصلها كده مستقبلا يعنى متمناش لبنت اخويا كده ولا لبنات صحباتى كده ولا لمرات ابنى كده ولا لبنتك وبنت غيرك كده ..ومتأكده ان فيه رجاله كتير لسه جواها انسان عقله موضوعى وحكم على الامور من منطلق ارضاء المولى عز وجل وعارفه ان الكلام ده مش هيأخدوه بحساسيه ولاا اعتباطا لان مصر لسه مليانه رجاله عارفين ان الست امهم واختهم وبنتهم وعمرهم ما هيتمنالهم الا حفظ ادميتهم حاليا او مستقبلا
.......
حاجه تانيه ومهمه قوى انا مش خبيرة قانون وخبرتى اى كانت فهيا اكيد سطحيه فاتمنى من اى حد عنده خبره قانونيه انه يقولى الثغرات دى فيها تغرات ايه
وطبعا محامى التدوين الباحث احمد والريس محمود والاخ الشاعر مجنون وحبيبتى بنت القاضى نيجار دى الحاجات اليى قلتلك هقولك عليها فى التليفون
ومش عايزه تحديف طوب


(حاجه مهمه ومش نفاق ...انا كل ما بلاقى حاجات وتعطيلات فى المحاكم بقول ده بيحصل فى بلد فيها سوزان مبارك يعنى انسانه اهتمت بعمل مجلس قومى للمرأه وعمل مجلس قومى للطفوله ومهتمه بالمرأه والطفل وقضاياهم معقول يحصل للستات كده وهيا موجوده انا عارفه انها مش الحاكم ولا مسنة القوانيين بس اعرف انها السيده الاولى وانها موليه اهتمام للمرأه وحقوقها وعليه انا املى فيها كان ومازال اكبر من كده بكتير .... ومحدش يفكر ان ده نفاق لانى من وانا صغير بحبها وبكنلها احترام يمكن لانى كنت بحب القرايه وهيا خفضت سعر الكتاب اليى ضاعت عليه اغلب فلوسى وعملتله مهرجان كمان يمكن لانى بحبها كده وخلاص ومجرد بس ما بشوفها بالتليفزيون بتترسم ابتسامه على وشى وبقول انا بحب الست دى سواء الاسعار غاليه او مش غاليه سواء الدنيا حلوه او مش حلوه هيا ملهاش ذنب

انا اعتقد اننا كستات لازم نستغل وجود ست عندها ملكة الاحساس بينا وبقضايانا ونعرض عليها مشاكل وروتين المحاكم ده لان لو محصلناش حاجه ايجابيه بوجودها معتقدش ان ممكن الامور تتغير ..
الاخوه المدونيين السياسيين ده احساسى بيها ووجهة نظرى فيها هيا السيده الاولى وانا بحبها وبقدرها الاولى والاخيره فمعلش مش عايزه افكاركوا تاخدكوا لبعيد او تاخدوكوا انتوا اخوات برضه وصلة الرحم بئه..

......تحفيز وتحديث.....
يا اهلا وسهلا بكل حبايبنا وحبيبتنا انا شاكره ليكم يا جماعه تقديركم الكريم ده واعجابكم بالحلقه ..انا كان نفسى انوه عنها بس معرفش ليه كنت محرجه وقلت بعدين بئه بس كان فيه زملا عارفين وده لاننا بنتقابل ساعات كتير على الماسينجر او بنكلم بعض بالتليفون المهم استاذه حنان كانت مكلمانى من فتره بعد ما موضوع روزاليوسف نزل وانا كنت بأجل لحد ما واحده صحبتى بس مش مدونه د/نها قالتلى محاسن انتى بتستهبلى فقلت لنفسى بلاش من الاستهبال اليى مدايق نها ده وكلمتهم وقلتلهم ماشى بصراحه القناه واليى فيها من اجمل ما يمكن ريهام السهلى من ارق واجمل واظرف المذيعات اليى شفتهم فى حياتى ود/ رشاد عبد اللطيف اليى شاركنى الفقره من اروع ما يكون واتشرفت جدا جدا بمعرفته ..واكتر ما شرفنى كمان فرحتكم بالفقره وبالمدونه وباليى بنادى بيه انا فؤجئت بناس معرفهاش باعتالى تسجيل للحلقه وفرحتى بجد بحبكم واهتمامكم ده انا حاسه انى ليا اخوات كتير كتير كتير قوى وانى ابدا مش لوحدى ربنا يبارك فيكم ويجعل قلوبكم مليانه بالحب دايما كده
بس انا اتاخرت عليكم لانى فضلت فى القاهره بعد البرنامج يوم وليله كده عند اختى لانها ربنا رزقها ب جومانه وانا طبعا اليى سهرة بجومانه الفتره اليى فضلتها هناك فعشان كده جيت الشرقيه هلكانه ومكنتش قادره اركز فى اى شئ فاسفه على التاخير عليكم واسفه جدا كمان ..محمد جمال الدين بئه عايزه ااقوله انا متأكده ان اليى المدونه فيه بفضل الله اولا واخيرا وبفضلك لو الانسان ليه فضل انا متأكده ان ربنا جعلك سبب فى ان رسالة المدونه وقضيتها تظهر للنور الف الف شكر ليك يا محمد وعارفه هتقولى مفيش بين الاخوات شكرا بس برضه شكرا وقوى كمان.. انا هبطل هوايتى فى تصديع الناس بالرغى المتواصل واسيبكم مع لينك الحلقه واليى بعتهولى طفاطيفو مشكورا بتوصيه من ابى الجدعه واليى بعته برضه مهندس مصرى محمد اخويا والى بعته ناس حبايبنا كتير اسيبكم بئه مع الحلقه ..على فكره انا احلى من ما شفتم بكتير بكتير وعنيه ملونه وبيضا كاليمامه بس الاضاءه بئه ههههههههه

لو عايز الفيديو كلكك هنا اه من هنا دى انا طلع عينى وطلعت عين وروح محمد جمال الدين ..نضال يعنى ..معايا عشان نحط الفيديو وفى الاخر لقيناه اتشال للاسف معلش بئه يا جماعه عذرا ومحمد انا اسفه جوعتك يا محمد وطلعت عينك ونعيش يا محمد وناخد غيرها واعيش واطلع عينك..